Yunis Mo Loes Tufala Tija We Oli Soem Gudfala Eksampel

Yumi ol man blong Jeova, yumi save se wok blong tijim trutok blong Baebol long pikinini blong yumi, hem i wan impoten samting we yumi mas mekem. Nating sipos samtaem evri samting i gud, be wok ya i karem fulap defren kaen traem mo trabol oli kam. I hadwok moa taem wan Kristin papa no mama i mas mekem wok ya hem wan, we hasban no waef blong hem i gat narafala bilif. Samting olsem i bin hapen bifo finis. Baebol i tokbaot wan mama we i fesem semkaen hadwok ya long faswan handred yia K.T.

Woman ya, we nem blong hem Yunis, wetem famle blong hem, oli stap long Listra, wan taon long eria blong Liconia long saot blong Esia Maena. Listra i wan smol taon we i no gat fulap man oli save long hem. Hem i wan taon we ol man Rom oli stap long hem, we oli putum narafala nem blong hem se Julia Feliks Jemina Lustra. Ogastas Sisa nao i man we i stanemap ples ya blong blokem ol stronghed grup blong stilman we oli mekem wok blong olgeta long ol ples raonabaot. Yunis i wan woman Jyu we i joen long Kristin skul, mo hem i stap wetem hasban blong hem we i wan man Gris mo i no folem Kristin bilif, mo wetem pikinini boe blong hem, Timote, mo mama blong hem Loes.​—Ol Wok 16:​1-3.

Ating, i no gat fulap man Jyu long Listra, from we Baebol i no tokbaot wan haos prea long ples ya. Be, long Ikoniam, we i stap samwe long 30 kilomita longwe long Listra, i gat plante man Jyu lelebet oli stap. (Ol Wok 14:19) Taswe, maet i no isi long Yunis blong mekem ol wok we oli joen wetem bilif blong hem. Sam man blong stadi oli talem se from we pikinini boe blong hem, Timote, i no sakomsaes afta we hem i bon, samting ya i soemaot se ating hasban blong Yunis i no bin agri long samting ya.

Be, i no Yunis nomo we i gat bilif. I luk olsem se Timote i kasem tijing “blong Baebol” tru long bubu woman blong hem tu, we nem blong hem Loes, hemia mama blong Yunis.a Aposol Pol i pulum Timote wetem ol tok ya se: “Yu yu mas holemstrong ol samting ya we mifala i tijim yu long hem bifo, mo we yu bilifgud long hem finis, from we yu save gud wanem man oli tijim yu. Mo yu save tu we taem yu pikinini yet, kam kasem naoia, be yu yu savegud ol tok blong Baebol. Tok ya i save mekem yu yu waes, i save lidim yu long rod ya we God i stap yusum blong sevem olgeta we oli bilif long Jisas Kraes.”​—2 Timote 3:14, 15.

Edukesen ‘Taem Hem i Smol Pikinini Yet’

Taem Pol i talem se Timote i kasem edukesen long saed blong “Baebol” taem ‘hem i smol pikinini yet,’ samting ya i minim se hem i bebi yet. Hemia i stret folem Grik tok (breʹphos) we oli yusum long ples ya, mo we oltaem i minim wan bebi we i jes bon. (Skelem wetem Luk 2:​12, 16.) Olsem nao, Yunis i soemaot se hem i tinghevi long wok we God i givim long hem. Hem i no westem taem, be hem i kwik blong givim trening long Timote taem hem i smol yet. Hem i givim tijing we i halpem Timote blong gruap olsem wan strongfala man long wok blong God.​—Dutronome 6:​6-9; Proveb 1:8.

Timote i “bilifgud” long ol trutok blong Baebol. Wan Grik diksonari i talem se tok we Pol i yusum long ples ya i minim se, “tingting i strong long wan samting, mo i suagud long” samting ya. I sua se, i nidim taem mo fasin traehad blong mekem strong bilif ya i gru long hat blong Timote. I nidim taem mo fasin traehad tu, blong halpem hem blong skelemgud Tok blong God mo mekem wok we i soemaot bilif long samting ya. Taswe, ating Yunis wetem Loes tugeta i wokhad blong tijim Baebol long Timote. !Be, i gat gudfala frut i kamaot from hadwok blong tufala woman ya we oli laekem God tumas! Pol i raetem tok ya i go long Timote se: “Mi stap tingbaot fasin blong bilif blong yu, we i no blong gyaman, we i sem fasin nomo blong bilif we bubu blong yu Loes, mo mama blong yu Yunis, tufala i stap holem. Mo mi savegud we yu tu yu stap holem fasin ya yet.”​—2 Timote 1:​5.

!Yunis mo Loes tufala i mekem wan impoten wok long laef blong Timote! Long saed ya, man ya David Read, we i stap raetem ol buk, i talem se: “Sipos aposol ya i ting se impoten samting, hemia se Timote i jenisim laef blong hem blong kam wan Kristin, bambae aposol ya i tokbaot samting ya fastaem. Be, faswan samting we hem i talem long saed blong bilif blong Timote, hemia se bilif ya i ‘laef finis i stap long Loes . . . mo Yunis.’ ” Tok blong Pol long saed blong bilif blong Loes, Yunis, mo Timote, i soemaot se plante taem, edukesen we papa mama mo ol olfala bubu tu oli givim long pikinini, i stampa samting we i makemaot se long fyuja, pikinini ya bambae i olsem wanem long saed blong speret. Samting ya i mas mekem ol memba blong famle tede, oli tinghevi se, olsem wanem oli stap mekem wok ya we God i givim long olgeta blong tijim ol pikinini blong olgeta.

Ating Pol i stap tingbaot wan narafala samting tu. Hemia fasin blong laef we Loes mo Yunis i mekem i kamaot long famle blong olgeta. Maet aposol Pol i bin visitim tufala long faswan taem we hem i kam long Listra, raonabaot long yia 47 mo 48 K.T.b Ating long taem ya nao, tufala woman ya i joenem Kristin skul. (Ol Wok 14:​8-​20) Maet Pol i luk se famle ya i hapi mo i joengud, taswe hem i yusum wan spesel tok taem hem i tokbaot Loes, “bubu” blong Timote. Wan man blong stadi, we nem blong hem Ceslas Spicq, i talem se Grik tok we Pol i yusum, (hem i no yusum teʹthe we plante man oli yusum blong soem respek long ol olfala, be hem i yusum tok ya mamʹme), hem i sem mak long “tok we wan pikinini i talem blong soem se hem i laekem tumas” bubu woman blong hem. Long vas ya, tok ya i olsem wan “naesfala rod blong soem se tufala i savegud tufala mo tufala i gat filing long tufala.”

Timote i Aot Long Famle Blong Hem

Yumi no suagud sipos man blong Yunis i laef i stap long namba tu taem we Pol i visitim Listra (raonabaot long 50 K.T.). Plante man blong stadi oli talem se long taem ya Yunis i wan widowoman finis. Nating se i olsem wanem, be Timote i gruap wetem tijing blong mama mo bubu woman blong hem, mo i kam wan gudfala yangfala man we i gat samwe 20 yia long taem ya. ‘Ol brata long Listra mo Ikoniam oli stap talem se hem i wan gudfala man.’ (Ol Wok 16:2) I klia se, tingting ya blong wantem tumas blong talemaot gud nyus blong Kingdom, i stap long hat blong Timote, from we hem i agri taem Pol i singaot hem blong wokbaot wetem hem mo Saelas long misinari trep blong tufala.

!Tingbaot filing blong Yunis mo Loes taem Timote i rere blong go! Tufala i save finis se long fastaem we Pol i visitim taon blong olgeta, ol man oli bin stonem aposol ya mo livim hem i stap long rod, we oli ting se hem i ded finis. (Ol Wok 14:19) Taswe, ating i no isi long tufala blong letem yangfala Timote i go. Ating tufala i stap tingbaot se bambae hem i gowe blong hamas manis, mo se bambae hem i kambak sef no olsem wanem. Nating se i gat ol wari ya, i sua se mama mo bubu woman blong Timote oli pulum hem blong tekem spesel jans ya blong mekem moa long wok blong Jeova.

Ol Gudfala Lesen

Yumi save lanem fulap samting taem yumi tingbaot Yunis mo Loes. Bilif i pusum tufala blong tijimgud Timote long Baebol. Sipos ol olfala bubu man mo woman tede oli bigman long saed blong tingting, mo oli soemaot gudfala eksampel blong fasgud long God long ol smol bubu blong olgeta, samting ya i save givhan long fulwan Kristin kongregesen.c (Taetas 2:​3-5) Mo tu, eksampel blong Yunis i save mekem ol mama we man blong olgeta i no stap long trutok oli tingbaot se, i wok blong olgeta blong givim tijing long saed blong Baebol long pikinini blong olgeta, mo oli save kasem blesing from. Samting ya i minim se oli nidim blong gat strong tingting, antap moa, sipos hasban i no agri long bilif blong olgeta. I nidim tu we waef i soem waes fasin, from we wan Kristin waef i mas gat respek long hasban blong hem we i hed blong famle.

Loes mo Yunis i gat strongfala bilif, tufala i traehad, mo tufala i lego plante samting we tufala nomo i wantem, be tufala i kasem gudfala blesing taem tufala i luk se Timote i gohedgud long saed blong speret, gogo i kam wan nambawan misinari mo elda. (Filipae 2:​19-​22) Long sem fasin, yumi mas tektaem, gat longfala tingting, mo holem strong tingting, taem yumi tijim ol trutok blong Baebol long ol pikinini blong yumi. Be, taem yumi luk we gudfala frut i kamaot, bambae yumi glad nomo. Plante gudfala yangfala Kristin we oli kasem tijing blong ‘Baebol taem oli smol pikinini yet’ long ol famle we papa mo mama i gat defren bilif, oli givim bigfala glad long papa no mama blong olgeta we i fasgud long God. !Yes, tok blong Proveb i tru tumas se: ‘Woman we i bonem pikinini we i waes bambae i glad’!​—Proveb 23:23-​25.

Aposol Jon i tokbaot ol Kristin we oli olsem pikinini blong hem, i se: “Taem mi harem we ol pikinini blong mi oli stap folem trutok oltaem long laef blong olgeta, hemia i mekem mi mi harem i gud moa, i winim ol narafala samting.” (3 Jon 4) I sua se, filing we Jon i talemaot long ol tok ya i sem mak long filing blong plante papa no mama we oli gat sem fasin olsem Yunis mo Loes, tufala tija ya we oli soem gudfala eksampel.

[Ol futnot]