Bilif Blong Ol Kristin Bambae i Kasem Traem

“I no olgeta man evriwan we oli bilif.”​—2 TESALONAEKA 3:2.

1. ?Olsem wanem ol samting we oli hapen long ol yia bifo oli soemaot se i no olgeta man evriwan we oli gat trufala bilif?

LONG olgeta yia we oli pas finis, i gat plante man, woman, mo pikinini, we oli bin soemaot trufala bilif. I stret blong yusum tok ya “trufala,” from we plante milyan narafala man oli bin soemaot wan kaen bilif we i no tru, oli bilif long samting we i no gat strong pruf no risen blong hem. Plante taem, bilif olsem i joen wetem ol gyaman god mo ol fasin blong wosip we oli no laenap wetem tingting blong God ya we i Antap Olgeta, hemia Jeova, mo wetem Tok blong hem. Taswe, aposol Pol i raetem se: “I no olgeta man evriwan we oli bilif.”​—2 Tesalonaeka 3:2.

2. ?From wanem i impoten we yumi jekemgud prapa bilif blong yumi?

² Nating se i olsem, tok ya blong Pol i soemaot se samfala long taem bifo oli gat trufala bilif, mo i givim tingting long yumi se, sam man tede tu oli gat trufala bilif. Bighaf blong ol man we oli ridim Wajtaoa oli wantem kasem trufala bilif, mo oli wantem se bilif ya i kam strong moa​—hemia bilif we i laenap wetem stret save blong trutok we i kamaot long God. (Jon 18:37; Hibrus 11:6) ?Yu tu yu wantem samting ya? Sipos yes, ale yu mas luksave se bilif blong yu bambae i kasem traem, mo yu mas reregud long samting ya. ?From wanem yumi talem olsemia?

3, 4. ?From wanem yumi mas lukluk i go long Jisas long saed blong ol samting we oli traem bilif blong yumi?

³ Yumi agri se Jisas Kraes i impoten tumas long saed blong bilif blong yumi. Yes, Baebol i talem se hem i Man we i mekem bilif blong yumi i kam stretgud olgeta. Hemia from ol samting we Jisas i bin talem mo mekem, antap moa, from fasin blong hem blong mekem profet tok i kamtru. Hem i mekem se faondesen blong trufala bilif blong ol Kristin, i kam strong moa. (Hibrus 12:2; Revelesen 1:​1, 2) Nating se i olsem, yumi ridim long saed blong Jisas, se “olgeta samting blong traem yumi oli traem hem finis. Hemia nomo i narafala, hem i no mekem sin.” (Hibrus 4:​15) Yes, bilif blong Jisas i kasem traem. Be, samting ya i no mas mekem se tingting blong yumi i foldaon no yumi fraet. Defren olgeta, samting ya i mas mekem se yumi haremgud.

⁴ Taem Jisas i stanap strong tru long ol bigfala traem go kasem we hem i ded long wan pos, hem i ‘lanem fasin blong obei.’ (Hibrus 5:8) Hem i pruvum se trufala bilif i save lidim laef blong man, nomata wanem traem hem i kasem. Poen ya i gat moa mining, taem yumi tingbaot tok we Jisas i talem long saed blong ol man blong hem, i se: “Yufala i mas stap tingbaot tok ya we mi talem finis long yufala, se ‘I no gat man blong wok we i hae moa long masta blong hem.’ ” (Jon 15:20) Mo long saed blong ol man blong hem long taem blong yumi, Jisas i talem se: “Bambae olgeta man oli no laekem yufala, oli agensem yufala, from we yufala i holem nem blong mi.”​—Matyu 24:9.

5. ?Baebol i talem wanem blong soem se bambae yumi mas kasem traem?

⁵ Long ol yia afta 1900, jajmen i stat long haos blong God. Baebol i talemaot se: “Taem i kam finis nao, blong God i jajem olgeta man. Mo faswan blong hem, hem i mas jajem ol famle blong hem. ?Be sipos i statem we i jajem yumi olsem, taem i finisim we bambae i jajem olgeta we oli no bilif long gud nyus blong hem, bambae i olsem wanem long olgeta? Baebol i talem se ‘Sipos i strong blong God i sevem ol gudfala man, be ol man we oli no ona long hem, oli stap mekem i nogud, bambae oli no gat rod nating.’ ”​—1 Pita 4:​17, 18.

Bilif i Kasem Traem​—?From Wanem?

6. ?From wanem bilif we i kasem traem finis i nambawan?

⁶ Long wan fasin, bilif we i no kasem traem yet, i nating nomo, from we yumi no save sipos bilif ya i strong no nogat. Yumi save talem se hem i olsem wan jek we yumi no karem i go long bang yet blong kasem mane blong hem. Maet wan man i bin givim jek ya long yu from wan wok we yu mekem blong hem, no from sam samting we hem i pem long yu, no maet hem i givim jek ya olsem wan presen nomo. Ating i luk olsem we jek ya i gud nomo, ?be hem i rili gud? ?Hem i rili gat bigfala praes we oli raetem long hem? Long sem fasin, yumi no mas gat bilif we i jes luk olsem se i gud, no we yumi jes talem nomo se i gud. Sam samting oli mas traem hem blong pruvum se hem i rili strong mo tru. Taem bilif blong yumi i kasem traem, maet yumi luk se hem i strong gud mo i dip. Be tu, wan traem i save soemaot se yumi nidim blong stretem sam samting long saed blong bilif blong yumi, no maet yumi nidim blong mekem i kam strong moa.

7, 8. ?Wanem stampa blong ol samting we oli traem bilif blong yumi?

⁷ God i stap letem sam trabol mo sam narafala samting oli kasem yumi blong traem bilif blong yumi. Yumi ridim se: “Taem ol samting oli kam blong traem yufala, bambae yufala i no talem se ‘Ol samting ya blong traem mi oli kamaot long God.’ From we i no gat samting nogud we i save kam traem God. Mo i no fasin blong God blong traem man.” (Jemes 1:​13) Ale, ?hu no wanem i stampa blong ol traem ya? Hemia Setan, wol ya, mo sin we i stap long yumi evriwan.

⁸ Ating yumi agri se Setan i gat bigfala paoa long wol ya, mo long tingting mo fasin blong ol man. (1 Jon 5:​19) Mo ating yumi save se hem nao i stap pusum ol man blong mekem trabol long ol Kristin. (Revelesen 12:17) Be, ?yumi bilif se Setan i save yusum sin we i stap long bodi blong yumi, blong pulum yumi i go krangke? ?Yumi bilif se hem i stap putum ol samting blong wol long fored blong yumi blong traem pulum yumi, we hem i hop se bambae yumi foldaon long olgeta, yumi no moa obei long God, mo Jeova bambae i no moa glad long yumi? I tru, yumi no sapraes long ol fasin we Setan i yusum, from we hem i yusum ol semfala trik blong traem mekem Jisas i foldaon.​—Matyu 4:​1-​11.

9. ?Olsem wanem eksampel blong ol man we oli bin soemaot bilif i save givhan long yumi?

⁹ Jeova i yusum Tok blong hem mo Kristin kongregesena blong givim ol gudfala eksampel we yumi save folem long saed blong bilif. Pol i givim advaes ya se: “Ol brata mo sista. I gud yufala evriwan i biaen long mak blong mi. Mifala i soemaot stret fasin finis long fes blong yufala. I gud yufala i stap luklukgud long olgeta we oli folem ol fasin ya.” (Filipae 3:​17) Pol i wan man blong God long faswan handred yia we tabu speret i makemaot hem. Hem i soemaot rod long ol narafala, taem hem i mekem ol nambawan wok we oli joen wetem bilif, nating se hem i kasem sam bigfala traem. Tede tu, kolosap long en blong ol yia 1900, i gat plante man we oli stap soemaot semkaen bilif, mo we yumi save folem eksampel blong olgeta. Tok blong Hibrus 13:7 i stretgud long yumi naoia, olsem we i gat bigfala paoa long taem we Pol i raetem. Vas ya i talem se: “Bambae yufala i no fogetem ol man ya we bifo oli stap lidim yufala, we oli talemaot tok blong God long yufala. Yufala i mas stap tingbaot fasin blong olgeta, we laef blong olgeta i olsem wanem, mo olgeta oli ded olsem wanem. Nao yufala i mas biaen long olgeta, long fasin blong bilif blong olgeta.”

10. ?Hu ya sam man long taem blong yumi we oli bin soemaot gudfala eksampel long saed blong bilif?

¹⁰ Advaes ya i gat moa paoa long yumi taem yumi tingbaot fasin mo laef blong ol man we tabu speret i makemaot olgeta. Yumi save tingting dip long eksampel blong olgeta mo folem bilif blong olgeta. Bilif blong olgeta i tru. Oli bin kasem plante traem blong stretem bilif ya mo mekem i kamgud moa. Long ol yia 1870, namba blong ol Kristin i smol nomo, be naoia i gat wan bigfala kampani blong ol Kristin brata mo sista long olgeta ples blong wol. Yumi luk frut we i kamaot from bilif blong ol tabu man ya, mo from fasin blong olgeta blong stanap strong tru long ol yia stat long 1870 kam kasem naoia. Frut ya, hemia faef mo haf milyan Wetnes blong Jeova we oli stap prij mo tijim ol man long saed blong Kingdom blong God. Bigfala kongregesen blong God long fulwol tede, we ol man blong hem oli stap wosip long trufala fasin mo wok strong olsem we faea i laet long olgeta, i olsem pruf blong bilif we i bin stanap strong tru long plante traem.​—Taetas 2:​14.

Bilif i Kasem Traem Long 1914

11. ?From wanem, yia 1914 i impoten long tingting blong C. T. Russell mo olgeta we oli joen wetem hem?

¹¹ Plante yia bifo we Faswan Bigfala Faet Blong Wol i stat, ol tabu man blong God oli talemaot se bambae 1914 i wan impoten yia long saed blong profet tok blong Baebol. Be, oli bin tingting se ol samting bambae oli hapen kwik moa, mo tu, tingting blong olgeta i no stretgud olgeta long saed blong sam samting we oli mas hapen. Hemia wan eksampel. C. T. Russell, we hem i faswan presiden blong Watch Tower Sosaeti, mo olgeta we oli joen wetem hem, oli luksave se i mas gat wan bigfala wok blong prij i kamaot. Oli ridim tok ya se: “Yufala i mas talemaot gospel blong kingdom long olgeta ples blong wol blong givim wetnes long olgeta nesen. Nao en i save kam.” (Matyu 24:14, King James Version) Be, ?olsem wanem grup blong olgeta ya we i smol nomo i save mekem bigfala wok ya?

12. ?Wan man we biaen i joen wetem Russell i mekem wanem taem hem i harem trutok blong Baebol?

¹² Tingbaot olsem wanem tok ya i gat paoa long A. H. Macmillan, wan man we i joen wetem Russell. Macmillan i bon long Kanada, mo hem i no gat 20 yia yet taem hem i kasem wan buk we Russell i raetem, nem blong buk ya, The Plan of the Ages (1886). (Buk ya, we narafala nem blong hem se The Divine Plan of the Ages, i kam Buk 1 blong wan grup blong buk we nem blong olgeta se Studies in the Scriptures. Oli seremaot plante long ol buk ya long taem bifo. Buk 2, The Time Is at Hand [1889], i makem 1914 olsem yia we “rul blong ol Hiten man” bambae i finis. [Luk 21:24, KJ]) Long semfala naet we Macmillan i stat blong ridim buk ya, hem i tingting se: “!I luk olsem we hemia i trutok!” Long hot taem blong 1900, hem i mitim Russell long wan asembli blong ol Baebol Studen, hemia nem blong ol Wetnes blong Jeova long taem bifo. I no longtaem biaen, Macmillan i tekem baptaes, mo i stat wok wetem Brata Russell long hedkwota blong Sosaeti long Nyu Yok.

13. ?Macmillan mo sam narafala oli luksave se i gat wanem problem long saed blong wok blong mekem Matyu 24:14 i kamtru?

¹³ From samting we ol tabu Kristin ya oli ridim long Baebol, oli makem 1914 olsem yia we wan bigfala jenis bambae i kamaot long saed blong stampa tingting blong God. Be, Macmillan mo sam narafala oli stap tingting se, ?Olsem wanem bigfala wok blong prij long olgeta nesen we Matyu 24:14 i tokbaot, i save kamaot long smoltaem we i stap? Samtaem biaen, Macmillan i talem se: “Mi rimemba se mi bin storeyan plante taem wetem Brata Russell long poen ya, mo hem i stap talem se: ‘Tingbaot brata, long Nyu Yok ya i gat moa Jyu i bitim long Jerusalem. I gat moa man Aerlan long ples ya i bitim long Dublin. Mo i gat moa man Itali long ples ya i bitim long Rom. Ale, sipos yumi prij long olgeta long Nyu Yok, i olsem se yumi stap kasem ol man blong ol defren ples blong wol wetem mesej ya.’ Be tok ya i no mekem tingting blong mifala i stap kwaet. Nao mifala i tingbaot blong mekem sinema ya ‘Foto-Drama.’ ”

14. Bifo 1914, ?Sosaeti i mekem wanem bigfala wok?

¹⁴ !Sinema ya “Foto-Drama Blong Ol Samting We God i Wokem,” i wan bigfala nyufala wok we oli statem! Oli joenem ol pija we oli muvmuf wetem ol slaed foto long kala, mo long semtaem, oli yusum wan gramafon blong talemaot ol tok we i stanap long Baebol mo ol myusek we oli bin rikodem. Long 1913, Wajtaoa i tokbaot wan asembli long Akanso, Yunaeted Stet, i se: “Sosaeti i tekem disisen se naoia i stret taem blong stat yusum ol sinema blong tijim ol man long ol trutok blong Baebol. . . . [Russell] i eksplenem se hem i bin wok long plan ya blong tri yia finis, mo se i gat plante handred naesfala pija we kolosap oli rere blong yusum. I sua se bambae oli pulum fulap man blong lesin, bambae oli talemaot Gospel, mo bambae oli halpem ol man blong kasem bilif long God bakegen.”

15. ?Wanem risal blong sinema ya “Foto-Drama”?

¹⁵ Tru tumas, “Foto-Drama” i mekem samting ya stret, stat long fastaem we oli soemaot hem long Janewari 1914. Hemia sam ripot we oli kamaot long Wajtaoa long 1914:

Epril 1: “Wan pasta i lukluk tu haf blong sinema ya, nao hem i talem se: ‘Mi lukluk stret haf nomo blong FOTO-DRAMA BLONG OL SAMTING WE GOD I WOKEM, be mi lanem moa long hem long saed blong Baebol, i bitim olgeta samting we mi lanem long tri yia we mi mekem kos blong kam wan pasta.’ Wan man Jyu i lukluk sinema ya, nao i talem se: ‘Taem mi goaot long haos sinema ya, mi harem se fasin blong mi olsem wan man Jyu i kamgud moa, i bitim taem we mi go insaed long haos ya.’ Sam pris mo sista blong Katolik oli kam luk DRAMA ya mo oli talemaot bigfala tangkyu from. . . . Mifala i mekem twelef kopi blong DRAMA nomo kam kasem naoia . . . Nating se i olsem, mifala i go long tate-wan bigfala taon blong soemaot sinema ya . . . Bitim tate-faef taosen man evri dei oli stap lukluk, harem, sapraes, tingting, mo kasem blesing, from sinema ya.”

Jun 15: “Ol pija ya oli mekem se mi mi wantem wok strong moa blong talemaot Trutok, mo oli mekem se mi laekem moa Papa blong yumi long Heven wetem gudfala Bigfala Brata blong yumi Jisas. Evri dei, mi prea se bambae God i blesem bigwan wok ya blong soemaot FOTO-DRAMA BLONG OL SAMTING WE GOD I WOKEM, mo blesem ol man we oli joen long wok ya . . . Mi mi man blong wok blong yufala we mi joen long God, F. W. KNOCHE.​—Iowa.”

Julae 15: “Mifala i glad tumas blong luk gudfala wok we ol pija ya oli mekem long taon ya, mo mifala i sua se wetnes we i goaot long ol man blong wol ya bambae i hivimap plante man we oli olsem ol sas samting we Masta blong yumi nomo i jusumaot. Mifala i save plante man we oli strong blong stadi Baebol, mo naoia oli stap joen wetem Klas long ples ya, from we oli bin luk Foto-Drama ya. . . . Sista blong yufala we i joen long Masta blong yumi, EMMA L. BRICKER.”

Novemba 15: “Mifala i sua se bambae yu glad blong harem nyus long saed blong nambawan wetnes we FOTO-DRAMA BLONG OL SAMTING WE GOD I WOKEM i stap givim, long Opera Haos long Kingswei, London. Mifala i luk we han blong Masta i lidim evri smosmol samting long saed blong sinema ya, long fasin we i nambawan tumas, mekem se ol brata oli stap haremgud tumas . . . Ol defren kaen man oli stap kam blong lukluk sinema ya, ol haeman mo ol man nating tu. Mifala i luk we plante lida blong jyos oli kam. Wan pasta . . . i askem sipos hem i save kasem sam moa tikit blong hem mo waef blong hem, from we tufala i wantem kam luk sinema ya bakegen. Wan lida blong Jyos blong Engglan i kam lukluk DRAMA ya plante taem . . . mo hem i karem plante fren blong hem tu oli kam. I gat tu bisop we oli kam lukluk tu, wetem plante haeman.”

Desemba 1: “Mi wetem waef blong mi i talem tangkyu tumas long Papa blong yumi long Heven from bigfala nambawan blesing ya we hem i givim long mitufala tru long yufala. Naesfala FOTO-DRAMA blong yufala i mekem se mitufala i luksave mo bilif long Trutok . . . Mitufala i gat ol sikis buk blong yufala, STUDIES IN THE SCRIPTURES. Oli rili halpem mitufala bigwan.”

Fesem Ol Traem Long Taem Bifo

16. ?Olsem wanem bilif blong ol Kristin i kasem traem long 1914?

¹⁶ Be, ?wanem i hapen taem ol gudfala Kristin ya we oli onagud long God, oli luk se tingting ya blong go joen wetem Masta blong olgeta long 1914, i no kamtru? Ol tabu man ya oli pastru long wan taem blong bigfala traem. Wajtaoa blong Novemba 1, 1914, i talem se: “Yumi mas rimemba se yumi stap long wan taem blong traem.” Long saed ya, buk ya Jehovah’s Witnesses​—Proclaimers of God’s Kingdom (1993) i talem se: “Ol yia blong 1914 kasem 1918 oli rili ‘wan taem blong traem’ ol Baebol Studen.” ?Oli letem ol traem ya oli stretem bilif blong olgeta mo jenisim sam tingting blong olgeta, blong oli save gohed long bigfala wok we i stap fored long olgeta?

17. ?Wanem tingting blong ol trufala tabu man taem oli luk se oli mas stap yet long wol ya afta 1914?

¹⁷ Wajtaoa blong Septemba 1, 1916, i talem se: “Yumi bin tingting se wok blong Hivimap ol memba blong Jyos [ol tabu man] bambae i finis bifo we en blong Rul blong ol Hiten man i kamtru. Be i no gat sam tok long Baebol we i talem olsem. . . . ?Yumi sore we wok ya blong Hivimap ol man i stap gohed yet? . . . Ol gudfala brata, naoia tingting blong yumi i mas fulap long tangkyu long God. Yumi mas laekem moa nambawan Trutok we Hem i givim jans long yumi blong luksave mo bilif long hem. Mo yumi mas gat tingting blong wok moa blong karem Trutok ya i go long ol narafala, mo blong givhan long olgeta blong kasem save long hem.” Yes, bilif blong olgeta i kasem traem, be oli fesem traem ya mo oli winim. Be, yumi ol Kristin i mas save se ol samting we oli traem bilif blong yumi oli plante mo oli defdefren.

18, 19. ?Wanem sam narafala samting we oli traem bilif blong ol man blong God afta we Brata Russell i ded?

¹⁸ Wan eksampel bakegen. Afta we Brata Charles T. Russell i ded, wan defren kaen traem i kasem smol grup blong ol tabu man long wol ya. Samting we i kamaot i traem bilif blong olgeta mo fasin blong olgeta blong stap tru long God. ?Hu ya ‘slef we i stret’ we Matyu 24⁠:45 i tokbaot? Samfala oli bin ting se slef ya, hemia Brata Russell hem wan, mo oli no glad blong folem ol nyufala plan we ogenaesesen i putumap. Sipos Brata Russell hem i slef ya, ?bambae ol brata oli mekem wanem naoia we hem i ded? ?Bambae oli folem wan narafala man olsem slef ya, no bambae oli luksave se naoia i stret taem blong Jeova i yusum wan grup blong ol Kristin olsem tul blong hem, no slef, i bitim we hem i yusum wan man nomo?

¹⁹ Long 1918, wan narafala traem i kasem ol trufala Kristin, taem ol lida blong Krisendomb oli pulum sam haeman blong wol blong ‘yusum loa blong mekem trabol’ agensem ogenaesesen blong Jeova. (Ol Sam 94:20, KJ) Ale, wan taem blong bigfala raf fasin agensem ol Baebol Studen i kamaot long Not Amerika mo Yurop. Fasin agens ya we ol lida blong jyos oli stampa blong hem, i kasem bigfala mak blong hem long Mei 7, 1918, taem gavman blong Yunaeted Stet i saenem sam pepa blong givim raet long polis blong holem J. F. Rutherford, sam man we oli wok wetem hem, mo A. H. Macmillan tu. Oli putum gyaman tok agens long olgeta se oli stap girap agensem gavman. Ol haeman oli no wantem lesin taem ol brata ya oli traem eksplenem se oli no stap mekem samting ya.

20, 21. Olsem Malakae 3:​1-3 i talemaot, ?wanem wok i stap gohed long medel blong ol tabu man ya?

²⁰ Ol Kristin oli no luksave long taem ya, se wan wok blong mekem olgeta oli kam klin long saed blong speret i stap gohed, olsem Malakae 3:​1-3 i tokbaot. Vas ya i talem se: “?Hu i save stanap strong long dei ya we bambae hem i kam, mo hu bambae i stap stanap yet taem hem i kamtru? From we [man ya blong karem mesej blong kontrak] bambae i olsem faea blong man we i kukum aean blong mekem ol doti i ronaot long hem, mo olsem strong sop blong man we i wasem kaliko. Mo hem i mas sidaon olsem wan man we i klinim mo kukum selva. Hem i mas mekem ol pikinini blong Livae oli kam klin, yes, hem i mas tekemaot ol doti long olgeta olsem man we i kukum gol mo selva long faea. Nao tru ya, long tingting blong Jeova, bambae oli kam ol man we oli givim wan presen long hem long stret fasin.”

²¹ Kolosap long en blong Faswan Bigfala Faet Blong Wol, wan narafala samting i kamaot blong traem bilif blong sam Baebol Studen, hemia se, ?bambae oli joen long ol bisnes blong wol long saed blong faet no nogat? (Jon 17:16; 18:36) Samfala oli joen. Taswe, long 1918, Jeova i sanem “man blong karem mesej blong kontrak,” Jisas Kraes, i kam long haos prea blong Hem long saed blong speret, blong karemaot ol doti blong wol we i stap spolem grup blong ol man we oli wosipim hem. Olgeta we oli stap soemaot trufala bilif, oli lanem plante samting long taem ya, mo biaen, oli gohed strong, mo oli soem strong tingting long wok blong prij.

22. Long saed blong ol samting we oli traem bilif blong yumi, ?yumi mas tokbaot wanem samting yet?

²² Yumi no tokbaot ol samting we oli hapen long ol yia bifo jes from we oli pulum intres blong yumi. No gat. Oli joen stret wetem fasin mo wosip blong kongregesen blong Jeova tede long fulwol. Long nekis stadi, bambae yumi tokbaot sam samting we oli stap traem bilif blong ol man blong God tede, mo olsem wanem yumi save winim ol traem ya.

[Ol futnot]

?Yu Yu Tingbaot?

◻ ?From wanem ol man blong Jeova oli save se bilif blong olgeta bambae i kasem traem?

◻ ?Wanem wok blong talemaot mesej blong God i stap gohed bifo long 1914?

◻ ?Wanem ya “Foto-Drama,” mo wanem ol gudfala frut we i kamaot long hem?

◻ ?Olsem wanem ol samting we oli kamaot long 1914 kasem 1918 oli traem ol tabu man?

[Tok Blong Pija Long Pej 12]

Long ol yia kolosap long 1900, plante man long ol defren kantri oli stap stadi Baebol wetem help blong ol buk ya “Millennial Dawn” we biaen oli kam “Studies in the Scriptures”

[Tok Blong Pija Long Pej 13]

Wan leta we C. T. Russell i raetem wetem fastok blong hem we oli rikodem long gramafon: “IBSA [International Bible Students Association] i stap soemaot ‘Foto-Drama Blong Ol Samting We God i Wokem.’ Sinema ya i blong tijim ol man long saed blong skul mo sayens, mo blong sapotem ol tok blong Baebol”

[Tok Blong Pija Long Pej 15]

Demetrius Papageorge i wokbaot i go long plante ples blong soemaot “Foto-Drama Blong Ol Samting We God i Wokem.” Biaen, oli sakem hem i go long kalabus from we hem i folem Kristin fasin blong no joen long faet