!“Faet Strong Blong Holem Trutok”!

“Yufala i mas faet strong blong holem trutok ya we yumi bilif long hem finis. Hemia trutok ya we God i givim wantaem finis long ol man blong hem we i no moa save givim bakegen.”​—JUD 3.

1. ?Long wanem fasin ol trufala Kristin tede oli stap faet?

OL SOLDIA we oli stap faet, oli gat wan had laef. Traem tingbaot, sipos yu mas putum ol hevi klos blong faet mo maj i go plante kilomita long ren, san, sno, mo ol narafala taem olsem. Yu mas mekem ol strong trening blong yusum ol tul blong faet, mo yu mas naf blong blokem olkaen samting we narafala i mekem agensem yu blong traem kilim yu yu ded no givim kil long bodi blong yu. Be, ol trufala Kristin oli no joen long ol faet blong ol kantri blong wol. (Aesea 2:​2-4; Jon 17:14) Nating se i olsem, yumi no mas fogetem se, long wan fasin, yumi stap faet oltaem. Setan i no laekem nating Jisas Kraes mo ol man blong hem long wol ya. (Revelesen 12:17) Taem man i tekem disisen blong mekem wok blong Jeova God, i olsem we hem i kam wan soldia we i joen long wan faet long saed blong speret.​—2 Korin 10:⁠4.

2. ?Olsem wanem Jud i eksplenem faet blong ol Kristin, mo olsem wanem leta blong hem i save givhan long yumi blong gohed long faet ya?

² Taswe, Jud, haf brata blong Jisas, i raetem tok we i stret nomo, i se: “Ol fren. Fastaem mi wantem tumas blong raetem leta ya i go long yufala blong tokbaot rod we God i stap yusum blong sevem yumi. Be naoia mi harem we mi mas raetem tok ya i go long yufala, blong leftemap tingting blong yufala, se yufala i mas faet strong blong holem trutok ya we yumi bilif long hem finis. Hemia trutok ya we God i givim wantaem finis long ol man blong hem we i no moa save givim bakegen.” (Jud 3) Taem Jud i talem long ol Kristin blong “faet strong blong holem trutok,” hem i yusum tok we i kolosap sem mak long tok ya “harem i soa tumas.” !Yes, faet ya i strong, mo i save mekem yumi soa tu! ?Yu yu faenem se i hadwok samtaem blong gohed blong faet? Smol leta ya blong Jud we i gat bigfala paoa, i save givhan long yumi. Hem i pulum yumi blong blokem rabis fasin long saed blong seks, blong respektem ol man we God i putumap olgeta blong lidim yumi, mo blong stap gohed oltaem long fasin we God i laekem yumi. Bambae yumi luk naoia olsem wanem blong folem ol advaes ya.

Blokem Rabis Fasin Long Saed Blong Seks

3. ?Wanem bigfala trabol i kamaot long Kristin kongregesen long taem blong Jud?

³ Jud i luksave se sam Kristin brata mo sista blong hem oli no stap winim faet ya agensem Setan. Wan bigfala trabol i kasem ol sipsip ya. Jud i raetem se sam rabis man oli “kam joen long kampani” blong olgeta ya. Ol man ya oli stap pulum samfala long fasin haed blong mekem rabis fasin long saed blong seks. Mo oli yusum ol waes tok blong kavremap fasin blong olgeta, yes, ‘oli tanem gladhat blong God i kam olsem eskyus blong mekem ol rabis fasin.’ (Jud 4) Ating oli sem mak long sam Nostik long taem bifo, we oli tingting se sipos oli mekem moa sin, bambae God i sore moa long olgeta. !Ale, oli tingting se i moa gud blong mekem plante sin! Sipos no, ating oli bilif se God i no save panisim olgeta, from we hem i gat kaengud fasin. Nomata wanem tingting oli gat, be oli rong olgeta.​—1 Korin 3:​19.

4. ?Jud i tokbaot wanem trifala jajmen blong Jeova long taem bifo?

⁴ Blong agensem ol rabis tingting blong olgeta, Jud i tokbaot trifala jajmen blong Jeova long taem bifo: jajmen blong God agensem ol man Isrel we “oli no bilif long hem,” jajmen agensem ‘ol enjel we oli livim prapa ples blong olgeta’ blong mekem rabis fasin wetem ol woman long wol ya, mo jajmen agensem ol man Sodom mo Gomora we “oli go krangke . . . nao oli mekem nogud wetem woman mo oli mekem krangke wetem olgeta nomo.” (Jud 5-7; Jenesis 6:​2-4; 19:​4-​25; Namba 14:35) Long trifala taem ya evriwan, Jeova i jajem ol rabis man long strong fasin.

5. ?Jud i talem tok blong wanem profet blong bifo, mo olsem wanem profet tok ya i soemaot se hem i sua blong kamtru?

⁵ Jud i gohed blong tokbaot wan jajmen we i bigwan moa yet. Hem i talemaot profet tok blong Inok​—ol tok we yumi no save faenem long wan narafala ples blong Baebol.a (Jud 14, 15) Inok i talemaot wan taem we Jeova bambae i jajem ol man we oli no obei long hem mo ol samting nogud we oli mekem. Yumi intres long poen ya se, Inok i tok olsem we jajmen ya i kamtru finis. Hem i save tok olsem, from we ol jajmen blong God oli sua blong kamtru, i olsem se oli kamtru finis. Ating ol man oli laf long Inok, mo sam yia biaen, oli laf long Noa tu. Be, ol man ya blong jikim tufala, oli draon olgeta long Bigfala Wora we i ron.

6. (a) ?Jud i nidim blong mekem ol Kristin long taem blong hem oli tingbaot wanem samting? (b) ?From wanem yumi mas tinghevi long ol tok blong Jud?

⁶ ?From wanem Jud i tokbaot ol jajmen ya blong God long leta blong hem? From we hem i save se samfala we oli stap joen long Kristin kongregesen long taem blong hem, oli stap mekem ol sin we oli doti tumas, olsem ol sin we oli pulum God blong jajem ol man long taem bifo. Taswe, Jud i raetem se hem i nidim blong talem sam stampa trutok blong Baebol bakegen long ol kongregesen. (Jud 5) I klia se oli fogetem we Jeova God i save luk ol samting we oli stap mekem. Yes, taem ol man blong God oli minim nomo blong brekem loa blong hem, we i mekem olgeta wetem sam narafala oli doti long fes blong Hem, ale Hem i save luk ol samting ya. (Proveb 15:3) Ol fasin olsem oli mekem hem i harem nogud tumas. (Jenesis 6:6; Ol Sam 78:40) Yumi fraet taem yumi tingbaot se yumi ol man nomo, be yumi save jenisim filing blong Haefala King blong heven mo wol. Hem i stap lukluk yumi evri dei. Taem yumi traehad fulwan blong folem fasin blong Pikinini blong hem, Jisas Kraes, ale yumi mekem hat blong hem i glad tumas. Taswe, yumi neva mas kam kros from ol woning olsem hemia we Jud i givim, be yumi mas folem olgeta.​—Proveb 27:11; 1 Pita 2:21.

7. (a) ?From wanem i impoten tumas we olgeta we oli stap mekem bigfala nogud fasin oli mas askem givhan kwiktaem? (b) ?Olsem wanem yumi evriwan i save ronwe long rabis fasin long saed blong seks?

⁷ Jeova i no jes lukluk nomo, be hem i mekem sam samting tu. Hem i God blong stret fasin, taswe hem i panisim ol man nogud, long stret taem blong hem. (1 Timote 5:​24) Ol man we oli talem se ol jajmen blong God oli blong ol yia bifo nomo, mo se hem i no wari long ol rabis samting we oli stap mekem naoia, oli stap gyaman long olgeta bakegen. !I impoten tumas we eniwan we i stap mekem rabis fasin long saed blong seks tede i askem ol Kristin elda blong givhan long hem kwiktaem! (Jemes 5:​14, 15) Yumi evriwan i mas tinghevi long denja ya blong rabis fasin blong seks we i save kasem yumi long faet blong yumi long saed blong speret. Evri yia, i gat ol man we oli foldaon long sin, we kongregesen i mas sakemaot olgeta. Bighaf blong olgeta oli mekem rabis fasin long saed blong seks mo oli no wantem tanem tingting blong olgeta from sin ya. Yumi mas mekem tingting blong yumi i strong blong faet agensem enikaen traem we i jes stat nomo blong pulum yumi long rod ya.​—Skelem wetem Matyu 26:41.

Respektem Ol Man We God i Putumap Olgeta Blong Lidim Yumi

8. ?Hu ya ‘ol man we oli gat haenem’ we Jud 8 i tokbaot?

⁸ Wan narafala problem we Jud i tokbaot, hemia fasin blong no respektem ol man we God i putumap olgeta blong lidim yumi. Long vas 8, hem i talem se ol semfala rabis man ya oli ‘stap tok nogud long ol man we oli gat haenem.’ ?Hu ya olgeta ya we ‘oli gat haenem’? Olgeta ya oli sinman nomo, be tabu speret blong Jeova i givim bigfala wok long olgeta. Eksampel, ol kongregesen long taem bifo oli gat ol elda, we oli kasem wok blong lukaot long ol man blong God, olsem we man blong lukaot long sipsip i lukaot long ol sipsip blong hem. (1 Pita 5:2) I gat ol elda we oli wokbaot blong visitim ol kongregesen tu, olsem aposol Pol. Mo grup blong ol elda long Jerusalem oli mekem wok blong hed kampani, hemia se oli tekem plante bigfala disisen we oli gat paoa long fulwan Kristin kongregesen. (Ol Wok 15:⁠6) Jud i wari bigwan se samfala long ol kongregesen oli no stap givim ona long ol man ya, mo oli stap tok nogud long olgeta.

9. ?Jud i tokbaot hu we oli no soem respek long ol brata we oli lukaot long olgeta?

⁹ Blong agensem ol tok ya we i no soem respek nating, Jud i tokbaot tri man long vas 11 we trifala i olsem woning: hemia Ken, Balam, mo Kora. Ken i no lesin long advaes we Jeova i givim wetem lav, mo hem i wantem nomo blong gohed long fasin blong hem blong no laekem narafala man nating. Samting ya i lidim hem blong kilim man i ded. (Jenesis 4:​4-8) Balam i kasem plante woning we i klia se oli kamaot long God. !Dongki blong hem i tok long hem tu! Be Balam i tingbaot hem wan nomo, taswe hem i gohed nomo blong mekem rabis plan agensem ol man blong God. (Namba 22:28, 32-​34; Dutronome 23:5) Kora i gat haenem mo bigfala wok finis, be hemia i no naf long tingting blong hem. Hem i stampa blong fasin rebel we i kamaot agensem man ya we i gat tingting daon i bitim ol narafala man long wol, Moses.​—Namba 12:3; 16:1-3, 32.

10. ?Olsem wanem samfala tede oli save foldaon long trap ya blong ‘tok nogud long ol haeman,’ mo from wanem yumi mas blokem ol tok olsem?

¹⁰ !Long fasin we i kliagud, ol eksampel ya oli tijim yumi blong lesin long advaes, mo blong respektem ol man we Jeova i stap yusum olgeta blong mekem ol bigfala wok! (Hibrus 13:⁠17) I isi nomo blong faenem ol poen long ol elda, from we oli sinman olsem yumi. Be, sipos yumi tingting tumas long ol poen blong olgeta mo pulum sam narafala blong no moa respektem olgeta tu, maet yumi ‘stap tok nogud long ol haeman.’ Long vas 10, Jud i tokbaot olgeta we, “sipos oli no save mining blong sam samting, be oli mas tok nogud long hem.” Samfala oli save tok agensem wan disisen blong ol elda no blong komiti blong ol elda we i jajem wan trabol long kongregesen. Be, olgeta ya oli no save ol smosmol samting long saed blong bisnes ya we ol elda oli mas luklukgud long hem bifo we oli tekem disisen. Taswe, ?from wanem ol man ya oli tok nogud long saed blong samting we oli no savegud long hem? (Proveb 18:13) Olgeta we oli gohed blong talem ol nogud tok olsem oli save mekem kongregesen i seraot. Mo taem ol Kristin oli kam wanples blong haremgud tugeta, maet ol man ya oli save kam olsem “bigfala ston daon we sip i save brok long hem.” (Jud 12, 16, 19) Yumi neva mas mekem wan samting we i save spolem narafala long saed blong speret. Long defren fasin, yumi evriwan i mas gat strong tingting blong soemaot tangkyu long ol man ya we oli stap lukaot long yumi, from hadwok blong olgeta mo from fasin blong olgeta blong rili kea long ol sipsip blong God.​—1 Timote 5:​17.

11. ?From wanem Maekel i no tok nogud long Setan blong jajem hem?

¹¹ Jud i tokbaot wan man we i bin respektem narafala we i gat haenem. Hem i raetem se: ‘Taem jif blong ol enjel Maekel, i stap rao wetem Setan from bodi blong Moses, se hu long tufala bambae i tekem, be Maekel i no save leftemap hem blong i sakem toktok we i nogud long Setan. Hem i talem se “Jeova bambae i stretem yu.” ’ (Jud 9) Store ya we i pulum intres blong yumi, mo we Jud nomo i tokbaot long ful Baebol, i tijim yumi long tufala samting. Faswan samting se, yumi mas letem Jeova nomo i jajem man. I klia se Setan i wantem yusum bodi blong gudfala man ya blong bilif, Moses, long wan fasin we i no stret, hemia blong leftemap gyaman wosip. !Wan rabis plan stret! Be, Maekel i gat tingting daon, hem i no jajem Setan, from we Jeova nomo i gat raet blong mekem olsem. Taswe, i moa impoten yet, we yumi no mas jajem ol gudfala man blong bilif we oli stap traehad blong mekem wok blong Jeova.

12. ?Olgeta we oli gat bigfala wok insaed long Kristin kongregesen oli save lanem wanem long eksampel blong Maekel?

¹² Namba tu samting se, olgeta we oli gat wok long kongregesen oli save lanem wan samting long fasin blong Maekel. Maekel i “jif blong ol enjel,” be hem i no traem soemaot se hem i gat moa paoa i bitim ol narafala enjel, nating se ating fasin agens blong Setan i save pulum hem blong mekem olsem. Ol gudfala elda oli folemgud eksampel ya. Oli luksave se, sipos oli yusum paoa blong olgeta blong leftemap olgeta nomo, oli no stap soem respek long hae rul blong Jeova. Leta blong Jud i talem plante samting long saed blong ol man we oli gat bigfala wok long kongregesen, be we oli stap yusum haenem blong olgeta blong leftemap olgeta nomo. Eksampel, long vas 12 kasem 14, Jud i tok strong we i strong long ‘ol man blong lukaot long sipsip, we oli kakae mo dring we oli no gat sem, oli tingbaot olgeta nomo.’ (Skelem wetem Esikel 34:⁠7-10.) Hemia i min se, faswan samting long tingting blong olgeta i blong mekem i gud long olgeta nomo, i no long ol sipsip blong Jeova. Ol elda tede oli save lanem plante samting from ol nogud eksampel olsem. Tru ya, tok blong Jud long ples ya i soemaot wan klia pija blong fasin we yumi no mas folem. Taem yumi stap tingbaot yumi nomo, yumi no save stap olsem ol soldia blong Kraes, from we yumi bisi tumas blong faet from ol samting we yumi nomo i wantem. Long defren fasin, yumi mas folem ol tok ya blong Jisas long laef blong yumi, se: “Man we i stap givim presen i go, hem i save harem gud moa, i winim man we i stap kasem presen blong hem.”​—Ol Wok 20:35.

“Stap Long Laef Ya We God i Stap Laekem Yufala Tumas”

13. ?From wanem yumi evriwan i mas wantem tumas blong stap gohed oltaem long fasin we God i laekem yumi tumas?

¹³ Long en blong leta blong Jud, hem i givim advaes we i mekem yumi haremgud tumas, i se: “Yufala i mas stap long laef ya we God i stap laekem yufala tumas.” (Jud 21) Long Kristin faet we yumi stap mekem, i gat wan samting we bambae i givhan moa long yumi i bitim ol narafala samting, hemia se yumi mas stap gohed oltaem long fasin we Jeova God i laekem yumi tumas. Yes, lav, hem i faswan bigfala fasin blong Jeova. (1 Jon 4:⁠8) Pol i raetem tok i go long ol Kristin long Rom, i se: “Mi mi save finis se i no gat wan samting nating we i save tekemaot yumi long lav blong God we i stap long Jisas Kraes, Masta blong yumi. Ded, laef, ol enjel, ol gavman, ol samting we oli stap finis, ol samting we bambae oli kam, ol bigfala paoa, ol samting we oli hae, ol samting we oli dip, mo olgeta narafala samting we God i wokem, oli no save tekemaot yumi.” (Rom 8:​38, 39, NW) Be, ?olsem wanem yumi save stap gohed oltaem long fasin we God i laekem yumi tumas? Makem trifala samting we Jud i talem se yumi save mekem.

14, 15. (a) ?I minim wanem se yumi kam strong moa long ‘fasin blong bilif we i kamaot long God mo i klingud’? (b) ?Long wanem fasin yumi save jekemgud ol klos blong yumi long saed blong speret?

¹⁴ Faswan samting we Jud i talem, hemia se yumi mas hadwok blong kam strong moa long ‘fasin blong bilif blong yumi we i kamaot long God mo i klingud.’ (Jud 20) Olsem yumi luk finis long laswan stadi, hemia wan wok we yumi mas gohed blong mekem oltaem. Yumi olsem ol haos we man i mas ademap moa samting oltaem long olgeta, blong mekem olgeta oli kam strong moa, nao oli naf blong stanap strong tru long ol hariken we oli stap kam bigfala moa oltaem. (Skelem wetem Matyu 7:​24, 25.) Taswe, yumi neva mas ting se yumi oraet nomo we yumi no save foldaon. Long defren fasin, yumi mas luksave olsem wanem yumi save bildimap yumi moa long faondesen ya blong bilif we yumi gat, olsem wanem yumi save kam strong moa, mo kam ol soldia blong Kraes we oli stap tru moa long hem. Eksampel, yumi save tingbaot ol wanwan klos blong faet long saed blong speret we Efesas 6:​11-​18 i tokbaot.

¹⁵ ?Olsem wanem long ol klos blong faet blong yumi? ?‘Bigfala sil blong bilif’ we yumi holem, hem i strong gud olsem we yumi nidim? Taem yumi tingtingbak long ol yia we oli jes pas, ?yumi luk sam saen we oli soem se yumi stap kam slak long sam samting? Maet yumi no moa go long miting oltaem, no ating yumi no moa strong blong go prij, no maet yumi no moa glad blong mekem prapa stadi blong yumi long Baebol. !Ol saen olsemia oli nogud! Yumi mas mekem wan samting kwiktaem blong bildimap yumi mo blong kam strong moa long trutok.​—1 Timote 4:​15; 2 Timote 4:2; Hibrus 10:​24, 25.

16. ?I minim wanem se yumi prea long paoa blong tabu speret, mo wanem samting we yumi mas askem Jeova blong givim long yumi oltaem?

¹⁶ Namba tu samting we yumi save mekem blong stap gohed oltaem long fasin we God i laekem yumi tumas, hemia, ‘stap prea long paoa blong tabu speret.’ (Jud 20) Hemia i min se tabu speret blong Jeova i gat paoa long yumi taem yumi prea, mo ol prea blong yumi oli laenap wetem Tok blong Hem, Baebol, we tabu speret i givim long ol man. Prea i wan impoten rod blong kam kolosap long Jeova hem wan, mo blong talemaot dip filing we yumi gat blong fasgud long hem. !Yumi neva mas fogetem nambawan blesing ya we yumi gat blong prea! Mo taem yumi prea, yumi save askem Jeova, mo gohed blong askem hem, blong givim tabu speret long yumi. (Luk 11:13) Paoa ya i strong moa i bitim ol narafala paoa we oli save givhan long yumi. Taem tabu speret i givhan long yumi, yumi save stap gohed oltaem long fasin we God i laekem yumi tumas, mo yumi save stanap strong longtaem olsem ol soldia blong Kraes.

17. (a) ?From wanem, eksampel blong Jud long saed blong fasin sore i nambawan tumas? (b) ?Olsem wanem yumi evriwan i save gohed blong soem sore?

¹⁷ Namba tri samting se, Jud i pulum yumi blong gohed blong soemaot sore. (Jud 22) Hem wan i givim nambawan eksampel long saed ya. Tingbaot, i stret nomo we tingting blong hem i trabol from ol nogud fasin, rabis fasin long saed blong seks, mo apostasi,b we oli stap kam insaed long Kristin kongregesen. Be, hem i no go bitim mak, we hem i gat tingting se i denja tumas long taem ya blong soem wan “sofsof” fasin olsem sore. No gat. Hem i pulum ol brata blong gohed blong soem sore taem i stret blong mekem olsem, mo blong toktokgud long olgeta we bilif blong olgeta i hafhaf. Mo long saed blong olgeta tu we kolosap oli rere blong mekem bigfala sin, hem i talem long ol brata se oli mas “pulumaot olgeta long faea.” (Jud 23; Galesia 6:⁠1) !Hemia nambawan advaes blong ol elda long taem blong yumi ya we i fulap long trabol! Olgeta ya tu oli mas traehad blong soem sore taem i stret blong mekem olsem, be, oli mas soem strong tingting tu, taem i nidim. Yumi evriwan i mas wantem blong soem sore long ol narafala. Eksampel, bitim we yumi stap kros from wan smosmol samting we narafala i mekem agensem yumi, yumi save gat fasin we yumi rere blong fogif oltaem.​—Kolosi 3:⁠13.

18. ?From wanem yumi save sua se bambae yumi win fulwan long faet blong yumi long saed blong speret?

¹⁸ Faet we yumi stap long hem, i no isi. Olsem Jud i talem, yumi mas “faet strong.” (Jud 3) Ol enemi blong yumi oli gat paoa. I no Setan nomo, be rabis wol blong hem wetem sin long bodi blong yumi tu, oli stap agensem yumi. !Be yumi save sua fulwan se bambae yumi win! ?From wanem? From we yumi stap long saed blong Jeova. Jud i finisim leta blong hem wetem sam tok blong mekem yumi tingbaot se i stret nomo blong ‘leftemap hae nem blong God, mo blong talemaot we hem i king, i hae moa mo i gat olgeta paoa, i stat bifo olgeta, i kam kasem naoia, gogo i no save finis.’ (Jud 25) Tok ya i pulum yumi blong gat bigbigfala respek long God, ?i tru no? Ale, yumi no save gat tingting we i hafhaf se, maet semfala God ya ‘i no naf blong holem yumi, we bambae yumi no foldaon.’ (Jud 24) !No gat! Yumi evriwan i mas gat strong tingting blong gohed blong blokem rabis fasin long saed blong seks, respektem ol man we God i putumap olgeta blong lidim yumi, mo stap gohed oltaem long fasin we God i laekem yumi tumas. Long rod ya, bambae yumi evriwan tugeta i haremgud tumas taem yumi win fulwan.

[Ol futnot]

Ol Kwestin Blong Tingtingbak

◻ ?Olsem wanem leta blong Jud i tijim yumi se yumi mas faet agensem rabis fasin long saed blong seks?

◻ ?From wanem i impoten tumas blong respektem ol man we God i putumap olgeta blong lukaot long yumi?

◻ ?From wanem i nogud tumas se wan man we i gat bigfala wok long kongregesen i yusum haenem blong hem blong leftemap hem wan nomo?

◻ ?Olsem wanem yumi save hadwok blong stap gohed oltaem long fasin we God i laekem yumi tumas?

[Tok Blong Pija Long Pej 15]

Defren long ol soldia blong Rom, ol Kristin oli stap mekem wan faet long saed blong speret

[Tok Blong Pija Long Pej 18]

Ol Kristin man oli mekem wok blong lukaot long ol sipsip blong God, from lav, i no from we oli tingbaot olgeta nomo