Ogenaesesen Blong Jeova i Sapotem Yu Long Wok Blong Prij

“Mi luk i gat wan narafala enjel i stap flae antap long skae, i stap talemaot gud nyus ya we i blong oltaem nomo, i no save finis.”—REVELESEN 14:6.

1. ?Wanem ol traem we oli bin kasem ol Wetnes blong Jeova, mo from wanem oli no lus?

?FROM wanem i impoten tumas blong luksave wok we ogenaesesen blong Jeova long heven i stap mekem blong sapotem Kristin wok blong prij? Sipos kampani blong Jeova we i stap long heven i no givhan long ol Wetnes blong Jeova, ?yu ting se bambae oli naf blong talemaot gud nyus blong Kingdom long olgeta ples blong wol ya we i stap agensem olgeta? Ol Wetnes oli bin gohed blong prij bitim wan handred yia finis, nating se ol man raonabaot long olgeta oli strong blong leftemap kantri blong olgeta se i moagud long ol narawan, nating se ol politik pati oli mekem i strong long ol man long sam kantri, nating se i gat ol bigfala faet long wol, mo nating se oli kasem plante narafala trabol tu. Sipos Jeova i no halpem ol Wetnes blong winim ol defren trabol we ol man long olgeta ples blong wol oli mekem blong traem blokem olgeta, daonem olgeta, mo kilim olgeta, ?yu ting se oli naf blong gohed long wok ya?​—Ol Sam 34:7.

Oli Laef Yet Nating Se Wol i Agensem Olgeta

2. ?Olsem wanem ol trufala Kristin long faswan handred yia oli sem mak long olgeta we oli stap tede?

² Long ol yia 1900, plante enemi blong ol man blong Jeova long ol jyos mo politik, oli yusum ol defren rod, folem loa mo agensem loa, blong traem blokem no daonem wok blong Jeova. Ol Kristin brata mo sista oli kasem bigfala trabol, ol man oli kilim olgeta, oli tok nogud long olgeta, oli raetem ol gyaman tok long saed blong olgeta, mo oli traem spolem gudnem blong olgeta​—oli kilim plante oli ded tu​—mo ol lida blong Bigfala Babilon nao oli biaenem bighaf blong ol trabol ya. Ating yumi save talem sem tok we ol man oli bin talem long saed blong ol faswan Kristin, se ‘yumi save we olbaot long evri ples, ol man oli stap tok nogud long kampani ya blong olgeta.’ Ol lida blong ol man Jyu long taem blong Jisas oli faet strong blong traem blokem wok blong Kraes blong prij. Long sem fasin tede, ol lida blong jyos mo ol man blong apostasi,a we ol politik lida oli sapotem olgeta fulwan, oli traehad blong blokem bigfala wok we ol man blong Jeova oli stap mekem blong tij mo givim wetnes.​—Ol Wok 28:22; Matyu 26:59, 65-​67.

3. ?Yumi save lanem wanem from Henryka Żur we i fasgud long God?

³ Wan eksampel, tingbaot wanem we i hapen long Polan long Maj 1, 1946. Henryka Żur, wan Wetnes gel blong 15 yia we ples blong hem i kolosap long taon ya Kelm, i folem wan narafala Wetnes, wan brata, blong visitim wan velej we sam man long hem oli bin soem intres long trutok. Sam memba blong Katolik jyos we oli joen long wan ami, nem blong hem Narodowe Siły Zbrojne (Ami blong Kantri), i holem tufala. Oli faetem brata ya, be hem i no ded. Be, Henryka i ded. Blong plante haoa, ol man ya oli givim kil olbaot long bodi blong hem we i soa tumas, from we oli wantem fosem hem blong mekem Katolik saen blong kros. Wan long ol man ya we i mekem soa long hem, i talem se: “Yu save tingbaot wanem we yu wantem tingbaot, be yu mas mekem Katolik saen blong kros. !Sipos no, wan bolet bambae i kasem yu!” ?Olsem wanem? ?Gel ya i kam slak mo i lego fasin blong hem blong fasgud long God? No gat. Ale, ol man ya blong jyos, we oli no gat paoa nating blong winim hem, oli pulum hem i go long bus mo oli sutum hem i ded. !Nating se i olsem, Henryka i win! Yes, oli no naf nating blong brekem fasin blong hem blong fasgud long God.b​—Rom 8:​35-​39.

4. ?Olsem wanem politik mo jyos i traem daonem wok blong talemaot Kingdom?

⁴ I bitim wan handred yia nao, we ol man oli raf mo oli no soem respek nating long ol man blong God. Ol Wetnes blong Jeova oli no joen wetem ol jyos blong Setan, mo oli no wantem sapotem olgeta ya. From samting ya, sam man oli agensem olgeta, oli sakem olkaen gyaman tok mo fasin agens long olgeta, oli luk olgeta olsem wan anamol we ol narafala anamol oli stap ronem blong kakae. Sam man blong politik oli agensem olgeta long fasin we i nogud tumas. Plante Wetnes oli ded from bilif blong olgeta. Sam kantri, we oli talem se oli demokratik, oli traem spolem wok blong talemaot gud nyus. Stat long 1917 finis, long Kanada mo Yunaeted Stet, ol lida blong jyos oli pusum sam man blong tok agensem ol Wetnes, we long taem ya oli karem nem ya Baebol Studen. Oli talem se ol Wetnes oli stap traem blong sakemaot gavman. From ol gyaman tok ya, sam brata we oli lukaot long wok blong Wajtaoa Sosaeti oli go kalabus. Samtaem biaen nomo, kot i karemaot gyaman tok ya mo letem olgeta oli gofri bakegen.​—Revelesen 11:​7-9; 12:17.

5. ?Wanem tok i bin leftemap tingting blong ol man blong wok blong Jeova?

⁵ Setan i bin yusum olgeta samting we hem i gat, blong traem stopem wok blong givim wetnes we ol brata blong Kraes wetem ol gudfala fren blong olgeta, oli mekem. Be, olsem plante store oli soemaot, ol strong tok, tok blong mekem olgeta oli fraet, raf fasin, presin, rabis kalabus, mo ded tu, oli no naf blong satem maot blong ol Wetnes blong Jeova. Mo samting ya i tru long olgeta yia we oli pas kam kasem tede. Plante taem, ol tok blong Elaesa oli leftemap tingting blong ol man blong God se: “Yu no fraet, from we i gat moa man i stap wetem yumi i bitim ol man we oli stap wetem olgeta.” !Wan risen, hemia from we ol gudfala enjel blong God oli fulap moa i bitim ol rabis kampani blong Devel Setan!​—2 King 6:​16; Ol Wok 5:​27-​32, 41, 42.

Jeova i Blesem Strong Tingting Blong Prij

6, 7. (a) ?Wanem ol faswan rod we yumi yusum blong talemaot gud nyus? (b) ?Wanem jenis i kamaot long 1943 we i mekem gudfala frut i kamaot?

⁶ Long ol yia biaen long 1900, ol Wetnes blong Jeova oli yusumgud ol nyufala samting we man i wokem, blong givim wetnes long plante moa ples, mo mekem bigfala wok ya i spid moa bifo we en i kam. Long 1914, Pasta Russell, faswan presiden blong Watch Tower Bible and Tract Society, i stat yusum ol foto mo pija wetem wan gramafon we toktok blong hem i laenap long ol wanwan foto ya. Faswan sinema we hem i mekem long saed blong Baebol, hemia “Foto Drama Blong Ol Samting We God i Wokem” we i gohed blong eit haoa. Ol man we oli luk sinema ya long plante kantri, oli sapraes tumas. Biaen, long ol yia 1930 mo 1940, ol man oli stat savegud ol Wetnes from ol smol gramafon we oli yusum long wok blong prij, blong mekem ol man oli lesin long sam tok we namba tu presiden blong Sosaeti J. F. Rutherford, i givim long saed blong Baebol.

⁷ Long 1943, Nathan H. Knorr, namba tri presiden blong Sosaeti, i mekem wok i go moa. Hem i mekem disisen blong stanemap wan skul long olgeta kongregesen wanwan, blong trenem ol man blong prij. Ol Wetnes oli kasem trening blong prij mo tij long ol haos wanwan, we oli no moa yusum gramafon mo ol tok we oli rikodem. Stat long taem ya i kam, oli stanemap sam narafala kos blong trenem ol misinari, ol fultaem paenia, ol elda blong ol kongregesen, mo ol brata we oli lukaot long wok blong ol wanwan hed ofis blong Wajtaoa Sosaeti raon long wol. ?Wanem risal blong samting ya?

8. ?Olsem wanem ol Wetnes oli soemaot bigfala bilif long 1943?

⁸ Long 1943, taem Namba Tu Bigfala Faet blong Wol i stap gohed, i gat 129,000 Wetnes nomo long 54 kantri. Be, oli gat strong tingting mo oli bilif fulwan se Matyu 24:14 i mas kamtru bifo we en i kam. Oli save se Jeova bambae i mas mekem impoten woning ya i goaot long ol man fastaem, bifo we ol samting oli kamtru blong spolem rabis wol ya. (Matyu 24:21; Revelesen 16:16; 19:11-​16, 19-​21; 20:1-3) ?Blesing i kamaot from traehad blong olgeta?

9. ?Wanem ol pruf we oli soemaot se wok blong givim Wetnes i kam antap bigwan?

⁹ Naoia i gat raonabaot 13 kantri we wanwan blong olgeta oli gat bitim 100,000 Wetnes long hem. Sam long ol kantri ya oli ples we Katolik Jyos i strong long hem. Be, traem luk wanem i stap hapen long ol ples ya. Brasil i gat samwe 450,000 pablisa blong gud nyus, mo bitim 1,200,000 man oli kam long Memoriol blong tingbaot ded blong Jisas Kraes long 1997. Meksiko i wan narafala eksampel. I gat kolosap 500,000 Wetnes long ples ya, mo bitim 1,600,000 man oli kam long lafet blong Memoriol. Sam narafala kantri we Katolik jyos i strong, i gat Itali (samwe 225,000 Wetnes), Franis (raonabaot 125,000), Spen (bitim 105,000), mo Ajentina (bitim 115,000). Long Yunaeted Stet, ples we ol skul blong Protestan, Katolik, mo Jyu oli bigwan, i gat samwe 975,000 Wetnes, mo bitim tu milyan man oli kam long Memoriol. I tru se, plante hif blong man oli stap kamaot long Bigfala Babilon, we i minim olgeta gyaman skul blong wol. Yes, plante man oli stap lego ol tijing blong hem we oli no klia, mo oli stap lukluk i go long ol promes blong God we oli klia mo sua blong kamtru. Hemia ol promes blong ‘nyufala heven mo nyufala wol.’​—2 Pita 3:​13; Aesea 2:​3, 4; 65:17; Revelesen 18:​4, 5; 21:​1-4.

Faenem Rod We i Stret Long Wanem We Man i Nidim

10. ?Olsem wanem laef i jenis long samfala ples?

¹⁰ Plante blong ol man we oli wantem lukluk i go long Jeova tru long Jisas Kraes, oli stap long haos blong olgeta taem ol Wetnes oli faenem olgeta. (Jon 3:​16; Ol Wok 20:20) Be, i gat sam narafala rod tu we ol Wetnes oli yusum. Laef blong ol man i stap jenis, mo from hadtaem blong kasem mane, naoia plante woman oli mas faenem wok tu. From samting ya, long ol dei blong wik, i hadwok blong faenem man long haos. Taswe, ol Wetnes blong Jeova oli jenisim ol fasin blong olgeta blong prij, folem nid blong man. Olsem Jisas mo ol faswan disaepol blong hem, ol Wetnes tu oli go long eni ples we oli save faenem ol man, mo enitaem we i stret long ol man.​—Matyu 5:​1, 2; 9:​35; Mak 6:​34; 10:1; Ol Wok 2:​14; 17:16, 17.

11. ?Ol Wetnes blong Jeova oli stap prij wea tede, mo wanem frut i kamaot from?

¹¹ Ol Wetnes oli prij wetem waes fasin long ol bigfala ples blong putum trak, ol stoa, ol faktri, ol ofis, skul, polis stesen, stesen blong bensin, ol hotel, ol restoron, mo long ol rod. Yes, oli prij long evri ples we i gat man long hem. Mo taem ol man oli stap long haos blong olgeta, ol Wetnes oli kam luk olgeta long ples ya tu. Long ol defren rod ya, oli seremaot plante moa buk long saed blong Baebol. Oli faenem plante sipsip blong God. Oli statem plante nyufala Baebol stadi. !Wok ya blong tijim man i bigwan moa i bitim ol narafala wok long histri blong man, mo i gat bitim faef mo haf milyan man blong prij we oli mekem wok ya wetem strong tingting! ?Yu yu gat nambawan blesing ya blong stap joen wetem olgeta ya?​—2 Korin 2:14-​17; 3:​5, 6.

?Wanem i Pusum Ol Wetnes Blong Jeova?

12. (a) ?Olsem wanem Jeova i stap tijim ol man blong hem? (b) ?Tijing ya i gat wanem paoa?

¹² ?Olsem wanem ogenaesesen long heven i joen long olgeta samting ya? Aesea i talem profet tok ya se: “Olgeta pikinini blong yu, bambae Jeova i tijim olgeta, mo pis blong ol pikinini blong yu bambae i fulap.” (Aesea 54:13) Tru long ogenaesesen blong Jeova long wol ya​—long ol Haos Kingdom mo long ol asembli​—Hem i stap tijim kampani ya blong ol Kristin brata long olgeta ples blong wol. From samting ya, oli joengud mo oli gat pis. Yes, ol tijing blong Jeova oli mekem se kampani blong ol man blong Hem oli defren olgeta long ol narafala man. Nomata wanem ples oli stap long hem long wol ya we ol man blong hem oli stap seseraot, oli kasem gudfala tijing blong laeklaekem olgeta mo blong mekem i gud long ol man raonabaot long olgeta olsem we oli stap mekem i gud long olgeta nomo.​—Matyu 22:36-​40.

13. ?Olsem wanem yumi save sua se ol enjel oli lidim wok blong prij?

¹³ Lav, hemia nao samting we i pusum ol Wetnes blong Jeova blong gohed long wok ya blong prij, nating se ol man oli no intres mo oli mekem trabol long olgeta. (1 Korin 13:​1-8) Oli save se ogenaesesen blong heven i stap lidim impoten wok ya blong sevem laef, olsem Revelesen 14:6 i talem. ?Ol enjel oli lidim wok ya blong talemaot wanem mesej? “Yufala i mas onagud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwora mo springwora.” Wok blong talemaot gud nyus blong Kingdom i leftemap nem blong Jeova. Wok ya i singaotem ol man blong presem Man ya we i Wokem Olgeta Samting, hemia God, i bitim we oli leftemap ol samting we God i wokem, mo tijing blong evolusenc we i no joen wetem God nating. Mo ?from wanem wok blong prij hem i impoten tumas? From we taem i kam finis blong God i jajem olgeta man​—hemia jajmen agensem Bigfala Babilon mo olgeta narafala haf blong wol ya blong Setan.​—Revelesen 14:7; 18:8-​10.

14. ?Hu i joen long bigfala wok ya blong tijim man?

¹⁴ Long olgeta Kristin we oli givim laef blong olgeta long Jeova finis, i no gat wan we i save talem se hem i no nidim blong mekem wok ya blong prij. Ol elda we oli strong long saed blong speret, oli lidim wok blong prij long kongregesen. Ol paenia we oli kasem spesel trening, oli bisi fulwan long wok ya. Ol pablisa blong talemaot Kingdom mesej ya, oli wok wetem strong tingting. Yes, nating se oli prij smol no fulap evri manis, be oli gohed blong karem mesej ya i go long evri kona blong wol.​—Matyu 28:19, 20; Hibrus 13:​7, 17.

15. ?Wanem wan pruf we i soemaot se wok blong prij blong ol Wetnes blong Jeova i gat paoa long ol man?

¹⁵ ?Olgeta traehad ya oli gat paoa long ol man blong wol ya? Wan pruf we i soemaot se i gat, hemia bigfala toktok we ol man blong televisen mo nyuspepa oli mekem long saed blong ol Wetnes blong Jeova. Plante taem ol nyus ya oli soemaot klia se yumi no slak blong wok, mo yumi gat strong tingting blong kasem evri man. !Yes, from we yumi gat strong tingting mo yumi stap prij oltaem, samting ya i gat bigfala paoa long ol man, nating se bighaf blong olgeta oli sakemaot mesej ya mo ol man blong karem mesej ya tu!

Yumi Gat Strong Tingting Blong Finisim Wok Blong Givim Wetnes

16. ?Yumi mas soemaot wanem tingting naoia, long sotfala taem we i stap yet?

¹⁶ Yumi no save hamas taem i stap yet bifo we wol ya i finis, mo yumi no nidim blong save taem ya tu. Impoten samting hemia se, tingting we i stap pusum yumi blong mekem wok blong Jeova, hem i mas stret. (Matyu 24:36; 1 Korin 13:​1-3) Be, yumi save wan samting, hemia se gud nyus ya i mas goaot “fastaem.” Samting ya bambae i mekem lav, paoa, mo stret fasin blong Jeova oli kam long klia ples. (Mak 13:10) Ating blong plante yia yumi bin wantem tumas blong luk en blong rabis wol ya, we i fulap long raf mo nogud fasin. Nating se i olsem, yumi mas gohed wetem strong tingting blong folem promes we yumi bin mekem taem yumi givim laef blong yumi i go long Jeova, go kasem mak we yumi naf blong kasem. Maet yumi olfala no yumi sik, be yumi save gohed yet blong mekem wok blong Jeova wetem semfala strong tingting we yumi gat taem yumi yangfala no taem helt blong yumi i gud yet. Maet yumi no moa save spenem fulap taem long wok blong prij olsem yumi mekem bifo. Be i sua se, yumi save gohed blong givim beswan sakrifaes blong yumi blong presem Jeova.​—Hibrus 13:15.

17. Talem wan store we i save leftemap tingting mo givhan long yumi evriwan.

¹⁷ Taswe, nating se yumi yangfala no olfala, yumi mas soemaot strong tingting mo serem gudfala mesej blong nyufala wol wetem olgeta man we yumi mitim. Yumi mas mekem i sem mak olsem wan smol gel long Ostrelya, we i gat seven yia nomo, taem hem i folem mama blong hem i go long stoa. Hem i bin harem long Haos Kingdom se i impoten tumas we evriwan i prij, taswe hem i fulumap tu buklet long saed blong Baebol, oli go long basket blong hem. Taem mama blong hem i bisi blong pem ol kakae long stoa, smol gel ya i lus. !Mama blong hem i lukaotem hem olbaot, mo i faenem hem i stap soem buklet long wan woman! Mama ya i go long woman ya mo i talem sore long hem from we smol gel blong hem i mekem trabol long hem. Be woman ya i karem buklet finis. Taem mama ya i stap hem wan wetem smol gel blong hem, hem i askem se olsem wanem hem i no fraet blong go toktok wetem woman ya we hem i no save nating. Smol gel ya i ansa se: “Mi jes talem nomo long mi wan se, !Redi, Set, Go! Ale, !mi go!”

18. ?Olsem wanem yumi save soem tingting we i nambawan?

¹⁸ Yumi evriwan i mas gat sem tingting olsem smol gel ya long Ostrelya, antap moa, taem yumi talemaot gud nyus long ol strenja mo ol haeman. Maet yumi fraet se bambae oli sakemaot yumi. Yumi no mas fogetem tok blong Jisas se: “Yufala i no tingting tumas se ‘?Bambae yumi ansa olsem wanem, long wanem tok? ?Bambae yumi talem olsem wanem long olgeta?’ From we [tabu speret] bambae i tijim yufala long wanem tok we bambae yufala i mas talem, stret long taem blong tok.”​—Luk 12:11, 12.

19. ?Wanem tingting blong yu long saed blong wok blong prij blong yu?

¹⁹ Taswe, trastem tabu speret blong God se bambae hem i halpem yu, taem yu go wetem kaen fasin blong talemaot gud nyus long ol man. Plante milyan man oli stap trastem ol narafala man mo woman nomo, we laef blong olgeta i sot mo we plante taem oli gat nogud fasin. Yumi trastem Jeova mo ogenaesesen blong hem long heven​—Jisas Kraes, ol tabu enjel, mo ol tabu Kristin we oli laef bakegen finis long ded—​we olgeta ya oli laef gogo i no save finis! Taswe, rimemba: “!I gat moa man i stap wetem yumi i bitim ol man we oli stap wetem olgeta”!​—2 King 6:​16.

[Ol futnot]

?Yu Yu Ansa Olsem Wanem?

◻ ?Olsem wanem ogenaesesen blong God long heven i bin givhan long ol man blong Jeova blong oli no lus olgeta?

◻ ?Wanem sam grup blong politik mo jyos we oli bin mekem trabol long ol Wetnes blong Jeova long ol yia 1900?

◻ ?Olsem wanem ol Wetnes blong Jeova oli jenisim fasin blong olgeta blong prij, folem nid we i kamaot long ol yia we oli pas?

◻ ?Wanem i pusum yu blong prij?

[Tok Blong Pija Long Pej 17]

Henryka Żur

[Tok Blong Pija Long Pej 18]

Japan

Matinik

Yunaeted Stet

Kenya

Yunaeted Stet

Ol Wetnes blong Jeova oli prij long eni taem mo eni ples we i gat man

[Tok Blong Pija Long Pej 20]

Long stat blong ol yia 1900, yumi bin yusum ol gramafon blong talemaot mesej blong Kingdom