Wan Kwestin
Matyu 17:20 i talem se ol aposol oli no save winim sik blong wan boe ‘from we bilif blong olgeta i no naf.’ Be Mak 9:29 i talem se blong winim sik ya, oli mas prea. ?From wanem tufala Gospel ya oli givim defren risen long bisnes ya?
Yes, tufala store ya oli joen tugeta, wan i no agensem narawan. Fastaem, lukluk Matyu 17:14-20. Ol vas ya oli tokbaot wan man we pikinini blong hem i gat wan sik we i mekem se hem i stap hafhafded, mo ol disaepol blong Jisas oli no save winim sik ya. Ale Jisas i tok strong long devel we i stap long pikinini ya, nao devel ya i kamaot long hem mo pikinini i kam gud bakegen. Ol disaepol oli askem from wanem oli no save ronemaot devel ya. Gospel blong Matyu i talem se Jisas i ansa, i se: “From we bilif blong yufala i no naf. Tru mi talem long yufala, sipos bilif blong yufala i olsem sid ya blong nambangga we i smol tumas, bambae yufala i save talem long bigfala hil ya se ‘Yu gowe,’ nao bambae hem i mas gowe. Bambae i no gat wan samting we yufala i no save mekem.”
Naoia, lukluk Mak 9:14-29, we i talem sam moa samting. Eksampel, Mak 9:17 i talemaot klia sik blong boe ya se, wan rabis speret i stap long boe ya, i mekem se hem i gat sik blong faol. Makemgud se long narafala ples, Baebol i talem se Jisas i winim sik blong faol mo i ronemaot devel long sam narafala man. (Matyu 4:24) Long saed blong sik blong faol we boe ya i kasem, dokta Luk i talem se hem i kamaot from wan devel no rabis speret we ‘sora blong hem i fas mo i no save toktok.’ (Luk 9:39; Kolosi 4:14) Makemgud ol tok ya long Mak 9:18: “Taem devel ya i kam strong long hem.” Hemia i soem se devel i no stap spolem boe ya oltaem, be sam samtaem nomo. Be yet, ol disaepol oli no naf blong ronemaot devel ya mo mekem boe ya i kamgud bakegen. Taem oli askem long Jisas from wanem oli no save mekem samting ya, hem i ansa se: “Ol devel olsem hemia, prea nomo i save ronemaot olgeta.”
Be taem yumi ridimgud Gospel blong Mak, yumi luk se hem i no agensem samting we Matyu i raetem. Long Mak 9:19, yumi ridim se Jisas i sore from we ol man long taem blong hem oli no bilif nating. Mo long vas 23, hem i talem long papa blong boe ya se: “Man we i bilif, hem i save kasem evri samting.” Taswe Mak tu i makem se bilif i impoten tumas. Wan samting nomo se, long vas 29, hem i givim moa save long saed blong bisnes ya. Hem i ademap samting we Jisas i talem long saed blong prea, we Matyu mo Luk oli no raetemdaon.
?Taswe, yumi save talem wanem? Long sam narafala taem, ol 12 aposol, mo ol 70 disaepol tu oli ronemaot ol rabis speret. (Mak 3:15; 6:13; Luk 10:17) Be naoia, ol disaepol oli no save ronemaot devel ya. ?From wanem? Sipos yumi joenem olgeta samting we ol defren Gospel oli talem, yumi kasem se long taem ya, ol disaepol oli no rere blong mekem samting ya. Maet oli no save ronemaot rabis speret ya from we hem i narakaen. I luk olsem se ol rabis speret oli gat ol defren fasin, intres, mo save tu. Blong ronemaot rabis speret ya, ol disaepol oli rili nidim strong bilif, mo mekem dip prea blong askem help blong God. Tru ya, Jisas i gat wan strong bilif olsem. Mo Papa blong hem, Hemia we i stap harem ol prea, i stap sapotem hem tu. (Ol Sam 65:2) Yes, Jisas i gat paoa blong ronemaot devel, blong winim sik blong boe ya, mo hem i mekem samting ya.