!Fasin Blong Trastem Narafala i Save Kam Strong Bakegen!

NATING se trabol ya we man i no moa trastem narafala tede i wan saen blong “Lasdei blong wol,” hem i wan fasin we i stap finis long ol taosen yia we oli pas. (2 Timote 3:1) Hem i kamaot fastaem long wan ples we i nambawan tumas​—wan paradaes. Baebol i tokbaot ples ya, i se: “Nao long saed ya we san i stap kam antap, long wan ples we nem blong hem Iden, Hae God i mekemrere wan gudfala ples blong man. Nao i tekem man ya we i bin mekem, i putum hem i stap long ples ya. Mo i planem ol narnarafala tri oli stap gru olbaot long ples ya. Ol tri ya oli gud tumas blong luk, mo ol frut blong olgeta oli gud tumas blong kakae. Nao long medel blong ples ya, i gat tu tri i stap, wan we frut blong hem i save givim laef, mo narawan we frut blong hem i save mekem man i save ol fasin we i gud mo ol fasin we i nogud.”​—Jenesis 2:​8, 9.

Ol vas we oli kam biaen, oli soem klia olsem wanem store ya i laenap wetem trabol ya tede we man i no moa trastem narafala. Yumi ridim se: ‘Jeova God i talem long hem se “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Tri ya, sipos yu kakae frut blong hem, be long sem dei nomo, bambae yu ded from.” ’ (Jenesis 2:​16, 17) ?I stret we tingting blong Adam i hafhaf long saed blong toktok we Jeova i talem?

Yumi gohed blong ridim: “Nao snek i wan anamol we i waes tumas long fasin blong wokem trik. Long saed ya hem i waes moa long ol narafala anamol ya we Hae God ya we i God blong yumi i mekem, i winim olgeta evriwan. Nao hem i kam askem long woman ya, se ‘?Olsem wanem long frut blong ol tri long ples ya? ?I tru we God i blokem olgeta se oli tabu, yutufala i no save kakae, no i no tru olsem?’ Be woman i ansa long hem se ‘Si, i oraet nomo. Mitufala i save kakae frut blong olgeta tri long ples ya, wan nomo i stap long medel blong ples ya we mitufala i no save kakae frut blong hem. God i blokem hem se i tabu, mitufala i no save kakae frut blong hem. Mitufala i no save tajem nating. Mo hem i talem se sipos mitufala i brekem tabu ya, bambae mitufala i ded from.’ Be snek ya i talem se ‘No, hemia i no tru ya. Yutufala i no save ded from. Hem i talem olsem from we i save se sipos yutufala i kakae frut ya, bambae yutufala i kam waes. Nao bambae yutufala i olsem hem, we i save ol fasin we i gud mo ol fasin we i nogud.’ Nao woman ya i luk we tri ya i gud tumas, mo frut blong hem tu i gud blong kakae, mo hem i wantem tumas blong kasem waes ya we frut ya i save givim long hem. Nao from samting ya, hem i tekem sam frut blong tri ya, i kakae, mo i givim long man blong hem, mo man blong hem tu i kakae.”​—Jenesis 3:​1-6.

Taem Adam mo Iv, tufala i sakemaot klia woning ya blong God, tufala i soem se tufala i no trastem Jeova. Tufala i folem enemi ya blong God, Setan, we i yusum wan snek blong toktok long Iv. Setan i no trastem rod we Jeova i yusum blong rulum ol man. From samting ya, mo from we hat blong hem i flas mo i wantem kasem haeples, hem i rebel agens long God mo i pulum Adam mo Iv blong tufala tu i rebel. Hem i pulum tufala blong ting se God i no man ya we tufala i mas trastem.

?Wanem Risal Blong Samting Ya? Fasin Fren i Brok

Maet yu yu luk finis se taem wan man i no trastem ol narafala, hem i faenem i hadwok blong holemtaet fasin fren blong hem wetem olgeta. Publilius Syrus, wan man blong raetem buk long lanwis Latin long faswan handred yia B.K.T., i raetem se: “Fasin blong trastem narafala, hemia nomo i save mekem fasin fren i stap strong oltaem.” Taem Adam mo Iv, tufala i rebel, tufala i soem se tufala i no trastem God. Taswe, i no gat wan risen blong God i trastem tufala. Nao, from we tufala faswan man i no moa trastem God, tufala i lusum fasin fren we tufala i gat wetem hem. I no gat wan pruf blong soem se Jeova i bin toktok wetem tufala bakegen afta we hem i panisim tufala from fasin rebel blong tufala.

Adam mo Iv tu i no moa frengud wetem tufala. Jeova i givim woning long Iv se: “Bambae mi mi mekem we long taem we yu yu gat bel, bambae yu harem nogud moa long bodi blong yu, mo long taem we yu bonem pikinini, bambae yu harem bak blong yu i soa moa. Be bambae yu stap wetem man blong yu yet, mo hem bambae i bos long yu.” (Jenesis 3:​16) The Jerusalem Bible i talem se: “Bambae hem i mekem i strong long yu.” Adam i no moa hed long waef blong hem wetem lav, olsem God i wantem. Naoia hem i bos long woman blong hem, i mekem i strong long hem.

Afta we tufala i mekem sin, Adam i traem blong blemem woman blong hem. Hem i ting se samting we woman blong hem i mekem, hemia nao risen from wanem God i ronemaot tufala long nambawan garen ya, ale tufala i go long graon we i no gat samting long hem, tufala i kasem panis long wan laef we i no stret mo we i trabol, bifo we tufala i ded mo gobak long graon. (Jenesis 3:​17-​19) Yumi save tingbaot se hemia nao stampa risen from wanem tufala i no joengud. Maet Adam i kros, i talem se bambae hem i neva lesin long Iv bakegen. Maet long tingting blong Adam, i stret nomo blong talem klia long Iv se, ‘!Stat naoia i go, mi mi bos long yu!’ Long saed blong Iv, maet hem i luk se Adam i no mekemgud wok blong hem olsem hed blong famle. Ale from samting ya, hem i no moa trastem man blong hem. Tru ya, taem ol man oli soem se oli no trastem God, oli lusum fasin fren we oli gat wetem hem mo fasin fren we oli gat bitwin olgeta bakegen.

?Yumi Save Trastem Hu?

Eksampel blong Adam mo Iv i soem se, i no stret blong trastem eni man nomo. ?Olsem wanem blong save hu i stret blong yumi trastem mo hu i no stret blong yumi trastem?

Ol Sam 146:3 i givim advaes long yumi se: “Yufala i no mas trastem ol lida blong wol ya. Ol man ya oli no save sevem yufala.” Mo long Jeremaea 17:​5-7, yumi ridim se: “Man we i trastem wan man blong wol ya mo i mekem man i olsem paoa blong hem, nao i tanem hat blong hem i gowe long Jeova, bambae hem i kasem trabol.” Be, “man we i trastem Jeova mo i putum olgeta tingting blong hem long Jeova, bambae hem i kasem blesing.”

I no minim se i rong oltaem blong trastem ol man. Be, ol vas ya oli soem se neva yumi mas ting se i rong blong trastem God. Yes, samtaem fasin blong trastem man i save lidim yumi long bigfala trabol. Eksampel, ol man we oli trastem se man i naf blong mekem samting we God nomo i naf blong mekem​—soem rod blong sef mo karem fulwan pis wetem seftaem​—tingting blong olgeta bambae i foldaon.​—Ol Sam 46:9; 1 Tesalonaeka 5:⁠3.

Yes, yumi save trastem nomo ol man mo ol plan we man i putumap, sipos oli wok folem ol stampa tingting mo ol rul blong God. Taswe, sipos yumi wantem se narafala i trastem yumi, yumi mas talem trutok, gat stret fasin mo soemaot se narafala i save dipen long yumi. (Proveb 12:19; Efesas 4:​25; Hibru 13:18) Sipos laef blong yumi i laenapgud wetem ol rul blong Baebol, long taem ya nomo bambae ol narafala oli gat gudfala risen blong trastem yumi. Samting ya bambae i gat paoa tu, long fasin fren blong yumi wetem ol narafala mo bambae i leftemap tingting blong yumi evriwan.

Fasin Blong Trastem Narafala i Kam Strong Bakegen

Ol Wetnes blong Jeova oli gat nambawan risen blong trastem God mo oli leftemap tingting blong ol narafala blong mekem i sem mak. Jeova i stap tru mo i holem strong oltaem long tok blong hem. Oltaem, yumi save dipen long hem blong mekem samting we hem i talem, from we “God i no save gyaman.” Fasin blong yumi blong trastem God blong lav, bambae i neva lidim yumi blong gat tingting we i foldaon.​—Hibru 6:​18; Ol Sam 94:14; Aesea 46:​9-​11; 1 Jon 4:⁠8.

Ol man we oli joen blong trastem Jeova mo we oli folem ol rul blong hem, oli gat strong tingting blong trastem olgeta. !Long wol ya we i no moa gat fasin blong trastem narafala, yumi rili glad blong faenem ol man ya we yumi save trastem olgeta! Traem tingbaot se bambae wol i olsem wanem sipos yumi trastem fulwan ol samting we evri man i talem mo mekem. Long nyufala wol we i stap kam we God i promes long hem, bambae laef long wol i olsem. !Fasin blong trastem narafala bambae i neva save lus bakegen!

?Yu yu wantem stap long taem ya? Sipos yes, ol Wetnes blong Jeova oli singaot yu naoia blong mekem fasin blong yu blong trastem God mo ol promes blong hem i kam strong moa. Yu save mekem olsem taem yu lanem moa long saed blong ol samting we Hem i wantem yumi blong mekem long laef. Fasin blong stadi long Baebol i givim pruf se God i stap, hem i intres long ol nid blong man, mo se i no longtaem, bambae hem i yusum Kingdom blong hem blong stretem ol problem blong wol. Plante milyan man oli lanem finis blong trastem God mo Tok blong hem, Baebol. Bambae ol Wetnes blong Jeova oli glad blong soem long yu olsem wanem blong stadi Baebol fri nomo. Sipos no, raet long ol man we oli stap seremaot magasin ya blong save moa.

[Tok Makem Poen Long Pej 5]

Fasin blong no trastem God i mekem se ol man oli no moa joengud

[Tok Makem Poen Long Pej 6]

Yumi save trastem ol man nomo sipos oli wok folem ol rul blong God.