Stap Sef Insaed Long Ogenaesesen Blong God

“Nem blong Jeova i olsem wan strong haos. Ol stret man oli resis blong go haed long hem, nao hem i lukaotgud long olgeta.”​—PROVEB 18:10.

1. Folem prea blong Jisas, ?ol Kristin oli gat wanem hadtaem?

SMOLTAEM bifo we Jisas i ded, hem i prea long Papa blong hem long heven, from ol man blong hem. Hem i wari tumas long olgeta, nao i talem se: “Mi mi talemaot ol tok blong yu long olgeta. Mo ol man blong wol ya oli no laekem olgeta, oli stap agens long olgeta, from we olgeta oli no man blong wol, olsem we mi mi no man blong wol. Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef.” (Jon 17:14, 15) Jisas i save se wol ya i wan ples we i denja tumas long ol Kristin. Blong soem fasin agens, ol man blong wol bambae oli talem gyaman tok agensem ol Kristin mo ronem olgeta. (Matyu 5:​11, 12; 10:16, 17) Wol ya bambae i olsem wan stampa ples blong mekem kruked fasin.​—2 Timote 4:​10; 1 Jon 2:​15, 16.

2. ?Weples ol Kristin oli save go blong stap sef long saed blong speret?

² Wol ya, we i fulap long ol man we oli stap longwe long God mo we oli stap agensem ol Kristin, hem i stap long paoa blong Setan. (1 Jon 5:​19) I tru, ol man blong wol oli plante moa, i bitim ol man insaed long Kristin kongregesen. Mo Setan hem wan i gat moa paoa, i bitim paoa blong eniman long wol ya. Taswe, fasin agens blong wol ya, i rili wan bigfala denja long ol Kristin. ?Ol man blong Jisas oli save go wea blong stap sef? Wan haf insaed long Wajtaoa blong Desemba 1, 1922, i givim ansa, se: “Naoia, yumi stap long rabis taem. Faet i stap gohed bitwin long ogenaesesen blong Setan mo ogenaesesen blong God. Faet ya i strong we i strong.” Long faet ya, ogenaesesen blong God i wan sefples long saed blong speret. Tok ya, “ogenaesesen” i no stap long Baebol, mo “ogenaesesen blong God” i wan nyufala tok we i kamaot long ol yia biaen long 1920. Ale, ?wanem ya ogenaesesen ya? ?Mo olsem wanem yumi save faenem sefples insaed long hem?

Ogenaesesen Blong Jeova

3, 4. (a) Folem wan diksonari mo Wajtaoa, ?wanem ya wan ogenaesesen? (b) ?Olsem wanem yumi save singaot olgeta Wetnes blong Jeova raon long wol se oli wan ogenaesesen?

³ Folem Concise Oxford Dictionary, tok ya ogenaesesen i minim “wan grup blong man we oli wok folem plan.” Long faswan handred yia, ol aposol oli hivimap ol Kristin long ol wanwan kongregesen, mo hed kampani long Jerusalem i lukaot long olgeta. Taswe, i stret blong tokbaot ‘grup blong ol brata’ ya olsem wan ogenaesesen. (1 Pita 2:​17) Plan blong ogenaesesen blong ol Wetnes blong Jeova tede, i sem mak olsem long faswan handred yia. Long faswan handred yia, ‘ol man we i olsem presen,’ hemia ‘ol elda mo ol tija,’ oli mekem se fasin joen insaed long grup blong ol brata i kam strong moa. Sam long ol elda ya, oli goraon blong visitim ol defren kongregesen, be sam narafala elda oli wok nomo insaed long kongregesen blong olgeta. (Efesas 4:​8, 11, 12; Ol Wok 20:28) Tede tu, ol semfala “presen” ya, oli mekem se fasin joen blong ol Wetnes blong Jeova i stap kam strong moa.

⁴ Wajtaoa blong Novemba 1, 1922, i tokbaot wod ya “ogenaesesen,” i se: “Wan ogenaesesen i wan grup blong man we oli wok wanples folem plan blong mekem wan stampa tingting i kamtru.” Wajtaoa ya i gohed blong eksplenem se, ol Wetnes blong Jeova oli wan ogenaesesen. Mo samting ya i no minim se oli “wan narakaen grup, we i biaenem wan man, olsem sam man oli talem. Be olgeta oli ol Baebol Studen [ol Wetnes blong Jeova] we oli stap traehad blong mekem stampa tingting blong God i kamtru. Oli mekem evri samting stret olsem we Masta i bin mekem, i folem gudfala oda.” (1 Korin 14:33) Aposol Pol i soem se ol Kristin long taem blong hem tu, oli wok folem oda. Hem i talem se ol tabu Kristin oli olsem wan bodi, we i gat ol defren haf blong hem, we ol defren haf ya oli stap mekem prapa wok blong olgeta. (1 Korin 12:12-​26) !Hemia i wan nambawan pija tok blong makem wan ogenaesesen! ?From wanem ol Kristin oli folem gudfala oda? From we oli mas mekem samting we i joen wetem “ol stampa tingting blong God,” oli mas mekem samting we hem i wantem.

5. ?Wanem ya ogenaesesen blong God long wol?

⁵ Baebol i bin talem se ol trufala Kristin tede bambae oli joen tugeta long wan “kantri,” oli kam wan “nesen.” Long kantri ya, bambae oli ‘saenaot olsem ol sta we oli stap saen i kam long wol.’ (Aesea 66:8; Filipae 2:​15) Ol man blong “nesen” ya we i folem wan plan, namba blong olgeta naoia, i bitim faef milyan faef handred taosen. (Aesea 60:​8-​10, 22) Be, hemia i no fulwan ogenaesesen blong God yet. Ol enjel tu oli stap insaed long ogenaesesen blong God.

6. ?Hu ya i stap insaed long bigfala ogenaesesen blong God?

⁶ I gat plante eksampel we i pruvum se ol enjel oli stap wok wetem ol man blong God long wol ya. (Jenesis 28:12; Daniel 10:12-​14; 12:1; Hibrus 1:​13, 14; Revelesen 14:​14-​16) Taswe, i stret nomo we Wajtaoa blong Mei 15, 1925, i talem se: “Olgeta tabu enjel oli joen wetem ogenaesesen blong God.” Semfala Wajtaoa ya i gohed, i talem se: “Masta Jisas Kraes, we hem i gat bigfala paoa mo haenem, hem nao i hed blong ogenaesesen blong God.” (Matyu 28:18) Taswe, bigfala ogenaesesen blong God, hemia ol enjel long heven wetem ol man long wol ya, we olgeta evriwan oli stap wok tugeta blong mekem samting we God i wantem. (Lukluk bokis) !I rili wan bigfala blesing blong stap insaed long ogenaesesen ya! !Mo yumi glad tumas blong wet long taem ya we olgeta man, long heven mo long wol, bambae oli joen tugeta blong presem Jeova God! (Revelesen 5:​13, 14) ?Be long wanem rod ogenaesesen blong God i stap lukaotgud long yumi tede?

Stap Sef Insaed Long Ogenaesesen Blong God​—?Olsem Wanem?

7. ?Long wanem rod, ogenaesesen blong God i stap lukaotgud long yumi?

⁷ Ogenaesesen blong God i save halpem yumi blong blokem Setan mo ol trik blong hem. (Efesas 6:​11) Setan i stap mekem hadtaem long ol man blong wosip long Jeova, hem i pulum narafala blong mekem i nogud long olgeta, mo hem i traem mekem oli foldaon long sin. Plan blong hem i blong pulum ol man blong Jeova blong lego ‘rod ya we oli mas wokbaot long hem.’ (Aesea 48:17; lukluk Matyu 4:​1-​11.) I tru, long wol ya yumi no save ronwe fulwan long ol hadtaem we Setan i stap mekem agensem yumi. Be, fasin fren we yumi gat wetem God mo ogenaesesen blong hem i mekem yumi strong mo i lukaotgud long yumi. Olsem nao, ogenaesesen ya i halpem yumi blong stap oltaem long “rod” ya. Frut we i kamaot se, yumi no lusum hop blong yumi.

8. ?Olsem wanem ogenaesesen blong Jeova long heven i givhan long ol man blong hem long wol ya?

⁸ ?Olsem wanem ogenaesesen blong God i save lukaotgud long yumi? Faswan samting, ol enjel blong Jeova oli givhan long yumi oltaem. Taem Jisas i kasem bigfala hadtaem, wan enjel i kam givhan long hem. (Luk 22:43) Taem laef blong Pita i stap long bigfala denja, wan enjel i sevem hem tru long wan merikel. (Ol Wok 12:​6-​11) I tru se tede, i no moa gat ol merikel olsem. Nating se i olsem, ol man blong Jeova oli gat promes ya se ol enjel bambae oli givhan long olgeta long wok blong prij. (Revelesen 14:​6, 7) Plante taem, ol man blong Jeova oli kasem bigfala paoa taem oli fesem ol hadtaem. (2 Korin 4:7) Mo tu, oli savegud se ‘enjel blong Jeova i stap lukaotgud long olgeta we oli obei long Hem, mo i stap tekemaot olgeta long trabol.’​—Ol Sam 34:7.

9, 10. ?Olsem wanem yumi save talem se “nem blong Jeova i wan strong haos,” mo olsem wanem rul ya i stret long fulwan ogenaesesen blong God?

⁹ Ogenaesesen blong Jeova long wol ya tu i stap lukaotgud long yumi. ?Olsem wanem? Long Proveb 18:10, yumi ridim se: “Nem blong Jeova i olsem wan strong haos. Ol stret man oli resis blong go haed long hem, nao hem i lukaotgud long olgeta.” Hemia i no minim se man we i talem nem blong God bakegen mo bakegen, bambae hem i sef, no gat. Fasin blong go haed long nem blong Jeova, i minim se yumi trastem hem. (Ol Sam 20:1; 122:4) Mo tu, yumi mas sapotem hae rul blong hem, folem ol loa mo ol rul blong hem, mo bilif long ol promes blong hem. (Ol Sam 8:​1-9; Aesea 50:10; Hibrus 11:6) I minim tu se, yumi mas wosip long Jeova nomo. Olgeta we oli wosipim Jeova long rod ya, olgeta nomo oli save talem wetem man blong raetem Ol Sam, se: “Oltaem [Jeova] i stap mekem yumi glad, from we yumi trastem tabu nem blong hem.”​—Ol Sam 33:21; 124:8.

¹⁰ Naoia, olgeta evriwan we oli stap insaed long ogenaesesen blong God long wol ya, oli talem wetem Maeka, se: “Long saed blong yumi, bambae yumi wokbaot long nem blong Jeova, God blong yumi, oltaem gogo i no save finis.” (Maeka 4:5) Tede, “Isrel blong God” we Baebol i kolem olgeta se ‘wan kampani blong holem nem blong hem,’ olgeta nao oli stap lidim ogenaesesen ya. (Galesia 6:​16; Ol Wok 15:14; Aesea 43:​6, 7; 1 Pita 2:​17) Taswe, blong stap insaed long ogenaesesen blong Jeova, yumi mas kampani wetem ol man we oli stap lukaot nem blong Jeova mo we oli agri se nem ya i wan ples blong haed.

11. ?Wanem ol spesel rod we ogenaesesen blong Jeova i givim blong lukaotgud long ol man we oli stap insaed long hem?

¹¹ Mo tu, ogenaesesen blong God long wol ya i wan grup blong man we oli gat sem bilif, we oli stap leftemap tingting mo mekem bilif blong narafala i strong. (Proveb 13:20; Rom 1:​12) Long ogenaesesen ya, ol Kristin man blong lukaot sipsip, oli stap kea long ol sipsip. Oli leftemap tingting blong hemia we i sik mo we i harem nogud, mo oli traehad blong givhan long olgeta we oli foldaon long sin blong oli kam strong bakegen. (Aesea 32:​1, 2; 1 Pita 5:​2-4) ‘Slef we i stret mo waes’ i stap yusum ogenaesesen ya blong givim ‘kakae long yumi, long stret taem blong hem.’ (Matyu 24:45) “Slef” ya, we hem i minim ol tabu Kristin, i stap givimaot ol beswan samting long saed blong speret​—hemia ol stret save blong Baebol we i save lidim man long laef we i no save finis. (Jon 17:3) Ol Kristin oli gat bigfala tangkyu from we “slef” ya i stap halpem olgeta blong holemtaet ol gudfala fasin, mo blong kam ‘waes olsem snek mo stap kwaet olsem sotleg’ long wol ya we i denja tumas long olgeta. (Matyu 10:16) Mo oltaem, oli kasem help blong “wok strong long wok ya blong Masta blong yumi.” Wok ya i rili wan strongfala ples blong haed.​—1 Korin 15:58.

?Hu i Stap Insaed long Ogenaesesen Blong God?

12. ?Hu ya i stap insaed long ogenaesesen blong God long heven?

¹² Ogenaesesen blong God i sefples blong olgeta ya nomo we oli stap insaed long hem. Be ?hu olgeta ya? Long saed blong ogenaesesen blong God long heven, ansa i klia nomo. Setan wetem ol enjel blong hem, oli no moa gat ples long heven. Be ol gudfala enjel blong God, oli stap yet long heven, oli stap “long wan bigfala miting.” Aposol Jon i luk se long ol lasdei, “Smol Sipsip,” “ol fo jerubim,” mo “plante taosen enjel” oli stap kolosap long bigfala jea blong God. Mo i gat 24 elda oli stap wetem olgeta. Ol 24 elda ya i minim olgeta tabu Kristin evriwan we oli kasem nambawan laef blong olgeta long heven finis. (Hibrus 12:22, 23; Revelesen 5:​6, 11; 12:​7-​12) I klia se olgeta ya evriwan, oli insaed long ogenaesesen blong God. Be samting ya i no sem mak long ogenaesesen blong God long wol.

13. ?Olsem wanem Jisas i makem olgeta we oli stap insaed long ogenaesesen blong God mo olgeta we oli no stap insaed?

¹³ Jisas i tokbaot sam man we oli talem se oli man blong hem, se: “Bambae plante man oli save singaot long mi se, ‘Masta, Masta. Long nem blong yu, mifala i talemaot ol tok we God i givim long mifala. Mo long nem blong yu, mifala i ronemaot plante devel. Mo long nem blong yu, mifala i mekem plante merikel. ?Olsem wanem long mifala?’ Be bambae mi mi talem stret long fes blong olgeta se, ‘Neva mi mi save yufala. Yufala i man blong mekem rabis fasin, yufala i gowe long mi.’” (Matyu 7:​22, 23) Sipos wan man i stap mekem ol rabis fasin, i klia se hem i no stap insaed long ogenaesesen blong God, nomata wanem samting hem i talem mo wanem wosip hem i mekem. Jisas i soem tu olsem wanem blong makemaot man we i stap insaed long ogenaesesen blong God. Hem i talem se: “I no olgeta man evriwan we oli stap singaot mi se ‘Masta, Masta,’ we bambae oli save go insaed long nyufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.”​—Matyu 7:​21.

14. ?Yumi mas mekem wanem blong soem se yumi stap insaed long ogenaesesen blong God?

¹⁴ Taswe, blong stap insaed long ogenaesesen blong God​—we ‘kingdom blong heven’ i stampa blong hem’​—man i mas mekem samting we God i wantem. ?Wanem samting God i wantem yumi blong mekem? Pol i makem wan impoten haf blong samting ya, taem hem i talem se: ‘God ya, hem i wantem sevem olgeta kaen man, mo i wantem we olgeta man bambae oli gat stret save long trutok blong hem.’ (1 Timote 2:4) Man we i rili wantem kasem ol stret save blong Baebol, folem ol save ya long laef blong hem, mo serem wetem “olgeta kaen man,” ale man ya i stap mekem samting we God i wantem. (Matyu 28:19, 20; Rom 10:13-​15) Jeova God i wantem tu se ol sipsip blong hem oli kasem kakae mo narafala i lukaot long olgeta. (Jon 21:15-​17) Ol Kristin miting oli mekem wan impoten wok long saed ya. Sipos wan man i fri blong go long ol miting, be hem i no stap go, man ya i soemaot se hem i no gat tangkyu long jans ya blong stap insaed long ogenaesesen blong God.​—Hibrus 10:23-​25.

Fren Wetem Wol

15. ?Jemes i givim wanem woning long ol kongregesen long taem blong hem?

¹⁵ Samwe long 30 yia afta we Jisas i ded, kasin brata blong hem, Jemes, i makem sam fasin we oli save mekem wan man i lusum ples blong hem insaed long ogenaesesen blong God. Hem i raetem se: ‘Yufala i olsem woman we i stap livim man blong hem, i stap go wetem narafala man. ?Weswe? ?Yufala i no save se man we i stap fren wetem wol, hem i kam enemi blong God? Taem yufala i fren wetem wol, be semtaem nomo yufala i kam enemi blong God.’ (Jemes 4:4) I klia se wan enemi blong God, hem i no stap insaed long ogenaesesen blong God. ?Be i minim wanem blong fren wetem wol? Samfala oli bin eksplenem se man i save soem fasin ya long ol defren rod. Maet hem i fasin blong lukaot no joen oltaem long kampani blong man we oli rabis. Yes, i stret blong eksplenem olsem. Be jes bifo long vas ya, Jemes i wantem makem wan poen​—hemia rong tingting we i lidim man blong mekem fasin we i no stret.

16. Jemes i givim woning se man we i fren wetem wol, hem i kam enemi blong God. ?Be ol vas raonabaot long woning ya oli soem wanem?

¹⁶ Long Jemes 4:​1-3, yumi ridim se: “?Wanem nao i stampa blong ol faet mo ol rao blong yufala? Ol samting ya i stap kamtru from we long tingting blong yufala, yufala i wantem harem gud long evri samting, nao fasin ya i stap mekem yufala i wantem faet oltaem nomo. Yufala i wantem ol samting, be yufala i no save kasem, nao yufala i girap, yufala i kilim man i ded from. Yufala i wantem ol samting blong narafala man, be yufala i no save kasem, nao yufala i rao, yufala i faet from. Be yufala i no kasem ol samting we yufala i wantem, from we yufala i no askem long God, yufala i no kasem from we tingting blong yufala i no stret. Yufala i stap askem ol samting ya long God, blong mekem yufala nomo i harem gud.” Afta we Jemes i raetem ol tok ya, hem i givim woning agensem fasin blong fren wetem wol.

17. ?Long wanem rod, “ol faet” oli kamaot long Kristin kongregesen long faswan handred yia?

¹⁷ Sam handred yia afta we Jemes i ded, ol gyaman Kristin oli faet mo oli kilkilim olgeta oli ded. Be, Jemes i raetem leta blong hem i go long ol memba blong “Isrel blong God” long faswan handred yia. Hemia olgeta we bambae oli kam ‘pris mo king’ long heven. (Revelesen 20:6) Olgeta ya oli no kilkilim olgeta oli ded long ol faet. Sipos i olsem, ?from wanem Jemes i talem se ol fasin ya oli stap long medel blong ol Kristin? Aposol Jon i talem se man we i stap agensem brata blong hem, hem i man blong kilim man i ded. Mo Pol i talem se, fasin blong rao mo agyu insaed long kongregesen, i sem mak long fasin blong “faet.” (Taetas 3:9; 2 Timote 2:​14; 1 Jon 3:​15-​17) Long saed ya, ating Jemes i stap tingbaot man we i no laekem ol Kristin brata sista blong hem. Ol Kristin ya oli mekem fasin bitwin long olgeta, we i sem mak long fasin blong ol man long wol blong Setan.

18. ?Wanem i save lidim wan Kristin blong mekem ol fasin mo gat ol filing we oli no soem lav long ol brata sista?

¹⁸ ?From wanem ol fasin olsem oli kamaot insaed long ol Kristin kongregesen? Hemia from ol rong tingting, olsem tingting ya blong wantem ol samting blong narafala mo blong “wantem harem gud long evri samting.” Fasin flas, jelas, mo wantem kasem haenem, oli save spolem Kristin fasin joen insaed long wan kongregesen. (Jemes 3:​6, 14) Man we i gat ol tingting olsem, hem i stap fren wetem wol. Ale, hem i kam enemi blong God. Olgeta we oli gat ol rong tingting olsem, oli no mas ting se oli save stap insaed long ogenaesesen blong God, no gat.

19. (a) ?Wan Kristin i save talem se i fol blong hu fastaem, sipos hem i faenem se rong tingting i stap gru insaed long hat blong hem? (b) ?Olsem wanem wan Kristin i save winim rong tingting?

¹⁹ ?Yumi save talem se i fol blong hu sipos yumi faenem se ol rong tingting oli stap gru insaed long hat blong yumi? ?I fol blong Setan? I tru, yumi save talem yes. From we Setan i ‘jif blong ol rabis speret’ long wol ya, we oli mekem se rong tingting olsem i kasem olgeta ples. (Efesas 2:​1, 2; Taetas 2:​12) Be plante taem, ol rong tingting ya oli kamaot from we yumi no stretgud olgeta. Afta we Jemes i givim woning se yumi no mas fren wetem wol, hem i raetem se: “Baebol i talem se, ‘God i wantem tumas we tingting blong yumi we hem i putum insaed long yumi, bambae i stap strong long hem nomo.’ Mo tok ya i no blong nating nomo.” (Jemes 4:5) Yumi evriwan i bon wetem fasin ya blong wantem mekem i no stret. (Jenesis 8:​21; Rom 7:​18-​20) Nating se i olsem, yumi naf blong faet agensem tingting ya, sipos yumi luksave ol slak fasin blong yumi mo dipen long Jeova blong winim olgeta. Jemes i talem se: ‘Fasin ya we God i stap givhan long yumi long gladhat blong hem i bigwan moa i bitim tingting blong jelas we yumi bon wetem.’ (Jemes 4:6) From help blong tabu speret blong God mo ol Kristin brata sista, mo tru long sakrifaes blong Jisas, ol Kristin we oli gat strong bilif oli save winim ol slak fasin. (Rom 7:​24, 25) Oli sef insaed long ogenaesesen blong God. Oli fren wetem God, i no wetem wol ya.

20. ?Olgeta we oli stap insaed long ogenaesesen blong God, oli harem gud long wanem nambawan blesing?

²⁰ Baebol i promes se: ‘Jeova i stap givim paoa long ol man blong hem, mo i stap blesem olgeta, i stap mekem olgeta oli gat gudfala laef, oli gat pis.’ (Ol Sam 29:11) Sipos yumi rili stap insaed long “nesen” blong Jeova tede, hemia ogenaesesen blong hem long wol, bambae yumi kasem paoa we hem i stap givim mo bambae yumi harem gud long pis we i olsem blesing long ol man blong hem. I tru, wol blong Setan i bigwan moa, i bitim ogenaesesen blong Jeova long wol ya. Mo Setan i gat moa paoa, i bitim yumi man. Be Jeova i gat Olgeta Paoa. I no gat wan man we i gat paoa olsem hem. Ol strongfala enjel tu, oli joen wetem yumi blong wosip long God. Taswe, yumi naf blong stanap strong sipos man i agensem yumi. Olsem Jisas, yumi save winim wol ya.​—Jon 16:33; 1 Jon 4:4.

?Yu Save Eksplenem?

◻ ?Wanem ya ogenaesesen blong God long wol ya?

◻ ?Long wanem rod, ogenaesesen blong God i lukaotgud long yumi?

◻ ?Hu ya i stap insaed long ogenaesesen blong God?

◻ ?Olsem wanem yumi save blokem fasin blong fren wetem wol?

[Bokis blong pija long pej 9]

?Wanem Ya Ogenaesesen Blong God?

Long ol buk blong ol Wetnes blong Jeova, oli yusum tok ya “ogenaesesen blong God” blong minim tri defren samting.

1 Ogenaesesen blong Jeova long heven, we yumi no save luk. Insaed long ogenaesesen ya, i gat ol enjel we oli stap tru long God. Baebol i kolem ogenaesesen ya se “Jerusalem ya long heven.”​—Galesia 4:​26.

2 Ol man blong Jeova long wol ya, ogenaesesen we yumi save luk. Tede, ol tabu Kristin wetem bigfala kampani, oli mekemap ogenaesesen ya.

3 Bigfala ogenaesesen blong Jeova long heven mo long wol. Tede, ol enjel blong Jeova long heven, wetem olgeta we hem i makemaot long wol ya, olsem ol pikinini blong hem, we oli gat hop blong laef olsem speret man, olgeta nao oli mekemap ogenaesesen ya. Biaen, taem ol man long wol ya oli kam stretgud olgeta, bambae olgeta tu oli joen long bigfala ogenaesesen ya.

[Tok Blong Pija Long Pej 10]

Yumi kasem ol beswan kakae long saed blong speret, tru long ogenaesesen blong Jeova