Betel Wan Taon Blong Gud Mo Nogud Samting

I GAT sam taon we ol man oli tinghae long olgeta, mo i gat sam narafala we ol man oli save gud from ol nogud samting we oli hapen insaed long olgeta. Be taon ya, Betel, i defren long ol narafala. Hem i wan taon we ol man oli tingbaot from ol gudfala samting mo ol nogud samting tu, we oli hapen long hem. Man ya Jekob i kolem taon ya se Betel, we i minim “Haos blong God.” Be wan taosen yia biaen, profet Hosea i kolem taon ya “Haos blong Fasin blong Spolem Man.” ?Olsem wanem gudfala taon ya i jenis i kam nogud? ?Mo yumi save lanem wanem from histri blong hem?

Fastaem we ol man blong God oli pas long Betel, hemia long 1943 B.K.T., taem Ebraham i laef yet. Long taem ya, ol man oli singaot taon ya Lus, hemia nem we ol man Kenan oli putum long hem fastaem. Hem i stap long ol hil, samwe 17 kilomita long not blong Jerusalem. Traem tingbaot Ebraham mo nefiu blong hem, Lot. Tufala i klaem long wan haefala ples long ol hil kolosap long Betel, mo tufala i stap lukluk daon long ol gudfala flat ples blong Jodan Vali, we graon blong hem i gud blong wokem garen. Wetem waes fasin, Ebraham i tokbaot ol trabol we hem mo Lot tufala i gat blong faenem inaf kakae blong ol bigfala grup blong anamol blong tufala. Hem i talem se: “Lot. Yumitufala i wan famle nomo, be oltaem, ol man blong mi mo ol man blong yu oli stap raorao long olgeta. Hemia i no stret ya. I moa gud yumitufala i seraot. Olgeta graon ya i stap. I gud yu yu jusumaot haf we yu yu wantem, nao mi bambae mi tekem narafala haf. I stap long yu nomo blong yu jus.”​—Jenesis 13:​3-​11.

Ebraham i no gat tingting ya se bambae hem i jusum fastaem from we hem i gat raet. No gat. Hem i letem man ya we i moa yang long hem blong tekem haf we i moa gud. Yumi save folem nambawan fasin blong Ebraham. Yumi save kwaetem sam rao sipos yumi traehad blong toktok long kwaet fasin mo yumi no tingbaot yumi wan nomo.​—Rom 12:18.

Plante yia biaen, taem Jekob, smol bubu blong Ebraham, i kamp long Lus, hem i gat wan drim we i narakaen. Hem i luk “wan lada i stanap, we stampa blong hem i stap long graon, be en blong hem antap i kasem heven, mo i luk ol enjel oli stap long hem, we oli stap kamdaon, mo oli stap go antap. Nao hem i luk we Jeova i kam stap antap long lada ya.” (Jenesis 28:11-​19, NW; skelem wetem Jon 1:​51.) Drim ya i gat wan impoten mining. Ol enjel we Jekob i luk, oli gat wok blong mekem se promes we God i talem long Jekob long saed blong pikinini blong hem, i kamtru. Ples blong Jeova antap olgeta long lada ya, i soem se hem nao bambae i lidim ol enjel blong mekem wok ya.

Drim ya we i soemaot klia long Jekob se God i stap sapotem hem fulwan, i gat bigfala paoa long Jekob. Taem hem i wekap long drim ya, hem i kolem ples ya Betel, we i minim “Haos blong God.” Nao hem i mekem promes ya long Jeova, i se: “Bambae mi mi seraot olting ya we bambae yu yu givim long mi, long ten hif, nao bambae mi givim wan hif i gobak long yu bakegen.”a (Jenesis 28:20-22) Jekob i luksave se olgeta samting we hem i gat oli kamaot long God, taswe hem i wantem givimbak wan gudfala haf blong ol samting ya olsem wan saen blong fasin tangkyu blong hem.

Tede, ol enjel oli wok blong sapotem ol Kristin. (Ol Sam 91:11; Hibrus 1:​14) Ol Kristin tu oli save soem se oli haremgud long olgeta blesing we oli kasem taem oli kam “fulap long fasin blong talem tangkyu long God.”—2 Korin 9:​11, 12.

Taem i pas, nao ol pikinini blong Jekob oli kam wan nesen. Man we i lidim olgeta, Josua, i winim hiten king blong Betel long stat blong ol faet we Isrel i mekem blong kasem kantri blong Kenan. (Josua 12:16) Long taem blong ol Jaj, woman profet ya Debora i stap laef kolosap long Betel, mo hem i talemaot ol tok blong Jeova long ol man Isrel. Samuel tu i go plante taem long Betel taem hem i jaj long nesen blong Isrel.​—Jajes 4:​4, 5; 1 Samuel 7:​15, 16.

Betel i Kam Stampa Ples Blong Apostasi

Be Betel i no moa joen long klin wosip afta we Kingdom blong Isrel i seraot long 997 B.K.T. King Jeroboam i stanemap Betel olsem stampa ples blong wosip blong buluk, we oli talem se hem i pija blong Jeova. (1 King 12:​25-29) Hemia from wanem, taem Hosea i talemaot se Betel i mas lus, hem i tokbaot taon ya olsem “Betaven,” we i minim “Haos blong Fasin blong Spolem Man.”−Hosea 10:​5, 8.

Nating se Betel i kam wan stampa ples blong fasin blong spolem man long saed blong speret, be yet, yumi save lanem sam impoten samting taem yumi kasem save long wanem we i kamaot long ples ya. (Rom 15:4) Eksampel, yumi save lanem samting from store blong wan profet blong Juda, we Baebol i no talem nem blong hem. Jeova i sanem profet ya i go long Betel blong talemaot bigfala trabol we bambae i kam blong spolem ol olta mo ol pris. Mo tu, Jeova i blokem profet ya se hem i no mas kakae mo dring bifo we hem i gobak long Juda, we i stap long sam kilomita nomo long saot. Taem profet ya i kam long fored blong Jeroboam, King blong Isrel, hem i no fraet blong talemaot wan profet tok we i singaot trabol i kam long olta blong Betel. Be biaen profet ya i no moa obei long Jeova, hem i kakae long haos blong wan narafala olfala profet blong Betel. ?From wanem? From we olfala profet i gyaman se wan enjel blong Jeova i givim oda long hem blong tekem profet ya i kam long haos blong hem, mo blong givim kakae long hem. Smoltaem biaen, profet blong Juda i ded, from we hem i no obei long Jeova.​—1 King 13:​1-​25.

Sipos wan man blong bilif i pulum yumi blong mekem wan samting we tingting blong yumi i no suagud long hem, ?yumi mas mekem wanem? Yumi mas rimemba se, nating sipos man ya i ting se advaes blong hem i gud, be bambae yumi save kasem trabol sipos hem i rong. (Skelem wetem Matyu 16:​21-​23.) Sipos yumi prea mo yumi stadi long Tok blong Jeova blong kasem ol advaes blong Hem, bambae yumi no mekem sem mastik olsem profet ya we Baebol i no talem nem blong hem.​—Proveb 19:21; 1 Jon 4:1.

Samwe long 150 yia biaen, profet Amos tu i wokbaot i go long not blong talemaot sam profet tok agensem Betel. Nating se ol man oli no laekem hem, Amos i strong blong talemaot ol nogud fasin blong olgeta ya wetem pris Amajia, we i flas mo i talem long Amos se ‘i gud we hem i hareap, i gobak long Juda.’ Be, Amos i no fraet blong talemaot long Amajia ol trabol we bambae oli spolem prapa famle blong hem. (Amos 5:​4-6; 7:​10-​17) Eksampel blong Amos i mekem yumi tingbaot se Jeova i save givim fasin no fraet long ol man blong wok blong hem we oli gat tingting daon.​—1 Korin 1:​26, 27.

Biaen, Josaea, wan King blong Juda we i stap tru long God, i ‘brekemdaon olta we i stap long Betel, i brebrekem ol ston blong hem long smosmol pis, mo i kilkilim olgeta gogo i kam ases, mo hem i bonem tabu pos.’ (2 King 23:15, 16) Ol elda tede, oli save folem nambawan eksampel ya taem oli strong blong obei long ol oda blong God, mo taem oli lidim kongregesen long ol fasin blong stap klin.

Ol samting ya we oli hapen long Betel bifo oli soemaot wanem frut we stret fasin mo rabis fasin i karem, taem man i obei mo i no obei long Jeova. Plante yia bifo, Moses i letem nesen blong Isrel i jusumaot wanem bambae hem i mekem. Hem i talem se: “Yufala i mas jusumaot se yufala i wantem folem ol gudfala fasin, no yufala i wantem folem ol fasin we i nogud. Yufala i mas jusumaot se yufala i wantem laef, no yufala i wantem ded.” (Dutronome 30:​15, 16) Fasin blong tingting dip long histri blong Betel bambae i pulum tingting blong yumi blong wantem stap wan man blong “Haos blong God,” ples ya blong trufala wosip, mo blong no stap long “Haos blong Fasin blong Spolem Man.”

[Futnot]

[Tok Blong Pija Long Pej 23]

Ol ston blong olfala taon ya Betel, ples ya we Jeroboam i mekem i kam stampa ples blong wosip long buluk