!Yufala i Mas Gohed Blong Wokem Rod Blong God i Sevem Yufala!
“Ol fren, . . . yufala i mas gohed blong wokem rod blong God i sevem yufala, mo yufala i fraet tu long hem.”—FILIPAE 2:12, NW.
1, 2. ?Wanem bilif i lidim plante man blong ting se oli no save bos long ol samting we bambae i hapen long laef blong olgeta?
“?YU YU bon olsemia?” I no longtaem i pas, kwestin ya i kamaot long fas pej blong wan niuspepa we plante man oli ridim. Aninit long stamba tok ya, oli raetem se: “Fasin, tingting, mo disisen we man i mekem long laef. Ol niufala stadi oli soemaot se, yumi bon wetem ol samting ya.” Ol tok ya oli save mekem sam man oli ting se, oli no bos long ol samting we oli hapen long laef blong olgeta.
2 Sam narafala oli fraet from we oli ting se sipos papa mama blong olgeta i no lukaotgud long olgeta, no sipos ol tija oli no tijimgud olgeta, bambae oli kalabus long wan laef we oli no glad. Maet oli ting se oli bon long wol ya blong mekem ol semfala mastik blong papa mama blong olgeta, folem wanem we filing blong olgeta i pulum olgeta blong mekem, mo blong no stap tru long Jeova. Tru ya, ol man olsem oli ting se oli bon blong mekem ol nogud disisen nomo. ?Hemia wanem we Baebol i tijim? Sam man blong skul oli bilif strong se Baebol i tijim samting ya. Oli bilif se God i makemaot fiuja blong olgeta man finis.
3. ?Wanem mesej blong Baebol we i leftemap tingting blong yumi blong luksave se yumi naf blong bos long fiuja blong yumi?
3 Ol defdefren bilif ya oli sapotem wan tingting nomo se: Yu no save jusum wanem we yu yu wantem, mo yu no save blokem ol samting we bambae i hapen long laef blong yu. I tru, hemia wan tingting we i save mekem yumi harem nogud. Proveb 24:10 i talem se: “Sipos tingting blong yu i no strong long taem blong trabol, hemia i soemaot we yu yu no strong nating.” Be, yumi kasem advaes blong lanem moa samting, from we Baebol i talem se ‘yufala i mas gohed blong wokem rod blong God i sevem yufala.’ (Filipae 2:12) ?Olsem wanem yumi save mekem bilif blong yumi i strong long impoten tijing ya blong Baebol?
Wok We Yumi Mekem Blong “Bildimap” Yumi Wan
4. Ol vas blong 1 Korin 3:10-15 oli tokbaot fasin blong bildim haos wetem ol samting we faea i no save kakae, be ?pijatok ya i no stap minim wanem?
4 Tingbaot pijatok blong aposol Pol long 1 Korin 3:10-15. Long pijatok ya, hem i tokbaot Kristin wok blong bildimap man. Impoten poen long pijatok ya, hemia se yumi bildimap yumi wan wetem ol man raonabaot long yumi. ?Samting ya i minim wanem? ?I minim se taem wan disaepol i tekem disisen mo i gohed blong mekem wok blong Jeova, hem i mas dipen oltaem long man we i tijim mo trenem hem? No gat. Pol i stap soemaot se i impoten tumas we tija i traem bes blong hem blong mekemgud wok ya blong bildimap narafala. Be, olsem yumi lanem long faswan stadi, Pol i no minim se Baebol stadi no disaepol ya i no save mekem prapa disisen blong hem. I tru se, pijatok blong Pol i laenap moa long wok we yumi mekem blong bildimap narafala, i no blong bildimap yumi wan. Samting ya i klia from we Pol i talem se man we i mekem haos blong hem olbaot nomo, bambae haos ya i lus long faea, be man ya bambae i sef. Samtaem Baebol i yusum semkaen pijatok ya blong tokbaot wok we yumi mekem long yumi wan.
5. ?Wanem vas blong Baebol i soemaot se ol Kristin oli mas mekem wok blong ‘bildimap’ olgeta wanwan?
5 Tingbaot wan eksampel. Jud 20, 21 i talem se: “Ol fren. Yufala i mas wok strong blong [bildimap bilif blong yufala]. Bilif ya i kamaot long God mo i klin gud. Mo oltaem yufala i mas prea long paoa blong tabu spirit. Yufala i mas stap long laef ya we oltaem yufala i save se God i stap lavem yufala.” Long vas ya, Jud i yusum wan Grik tok we i minim ‘bildimap.’ Hemia semfala tok we Pol i yusum long 1 Korin japta 3. Be, i luk olsem se Jud i stap tokbaot wok blong bildimap yumi wan antap long fandesen blong bilif blong yumi. Taem Luk i raetemdaon pijatok blong Jisas long saed blong man we i bildim haos blong hem antap long ston, Grik tok we hem i yusum blong talem “fandesen,” i sem mak long hemia we Pol i yusum long pijatok blong hem long saed blong Kristin wok blong bildimap narafala. (Luk 6:48, 49) Mo tu, Pol i stap tingbaot fasin blong stanap long wan “fandesen,” taem hem i givim advaes long ol Kristin brata sista blong hem blong gru long saed blong spirit. Tru ya, Tok blong God i tijim se yumi save “bildimap” yumi wan.—Efesas 3:15-19; Kolosi 1:23; 2:7.
6. (a) Eksplenem olsem wanem wok blong bildimap wan Kristin disaepol, i no wok blong wan man nomo, be plante man oli joen long wok ya. (b) ?Ol wanwan disaepol oli mas mekem wanem wok?
6 ?Wok ya blong bildimap wan Kristin, hem i wok blong wan man nomo? No gat. Traem tingbaot sipos yu wantem bildim wan haos. Yu go luk wan man blong i mekem plan blong haos blong yu. Nating se, yu gat tingting blong mekem bighaf blong wok ya, be bambae yu pem wan man blong wokem haos blong i givhan long yu mo blong i talem long yu weswan rod i beswan blong folem. Sipos man ya i putum wan strongfala fandesen, i halpem yu blong kasem save ol plan blong haos ya, i talem long yu wanem ol beswan samting we yu mas pem blong wokem haos, mo i tijim yu blong bildim haos ya, ating bambae yu agri se man ya i mekem wan gudfala wok. Be, sipos yu no lesin long advaes blong man ya, nao yu girap, yu pem olting blong bildim haos we oli jip mo oli no strong, mo yu no folemgud plan blong haos ya, i sua se bambae haos ya i brokdaon kwiktaem nomo. !Be yu no save talem se i fol blong man ya blong wokem haos, no man ya we i mekem plan blong haos blong yu! Long sem fasin, plante man oli joen blong bildimap ol wanwan Kristin disaepol. Jeova i bigfala man blong mekem plan. Hem i sapotem trufala Kristin ya, we i ‘joen wetem hem long wok’ ya blong tijim mo bildimap wan Baebol stadi. (1 Korin 3:9) Be, Baebol stadi ya tu i mas mekem wan samting. Afta we ol narafala oli givhangud long hem, hem i mas mekem prapa disisen blong hem. (Rom 14:12) Sipos hem i wantem kasem ol gudfala Kristin fasin, hem i mas wokhad blong kasem olgeta, blong bildimap ol fasin ya insaed long hem.—2 Pita 1:5-8.
7. ?Wanem ol hadtaem we samfala Kristin oli fesem, mo wanem i save leftemap tingting blong olgeta?
7 Taswe, ?hemia i minim se ol fasin we yumi bon wetem, ol samting raonabaot long yumi, mo gudfala fasin blong ol tija blong yumi, oli blong nating nomo? No gat. Tok blong God i talem se wanwan long ol samting ya oli save gat paoa long yumi mo pulum yumi. Yumi bon wetem plante slak fasin, mo samtaem i rili hadwok blong faet agensem ol fasin ya. (Ol Sam 51:5; Rom 5:12; 7:21-23) Trening blong papa mama mo ol samting we oli hapen long haos, oli save gat bigfala paoa long wan yangfala. Oli save pulum hem blong mekem i gud no blong mekem i nogud. (Proveb 22:6; Kolosi 3:21) Jisas i jajem ol lida blong skul blong ol man Jyu from we tijing blong olgeta i no karem gudfala frut long laef blong ol man. (Matiu 23:13, 15) Tede, ol samting ya oli stap wok long laef blong yumi. Eksampel, sam man blong God oli fesem bigfala traem from hadtaem we oli kasem taem oli smol. Ol man olsem, oli nidim se yumi kaengud mo yumi sore long olgeta. Oli save harem gud from mesej blong Baebol we i soemaot se oli no bon blong mekem sem mastik we papa mama blong olgeta i mekem, mo blong no stap tru long God. Eksampel blong sam king blong Juda bifo i soemaot poen ya.
Ol King Blong Juda—Oli Mekem Prapa Disisen Blong Olgeta
8. ?Wanem nogud eksampel we Jotam i luk long papa blong hem, mo nating se i olsem, hem i mekem wanem disisen?
8 Usia i kam king blong Juda taem hem i gat 16 yia nomo, mo hem i rul 52 yia. Long bighaf blong ol yia ya, Usia i “stap folem fasin blong papa blong hem [Amajia]. Hem i stap mekem ol samting we Hae God i glad long hem.” (2 King 15:3) Jeova i blesem hem taem i mekem ami blong hem i winim plante faet. Be, sore tumas, samting ya i mekem se Usia i kam praod tumas. Hem i mekem flas mo i rebel agensem Jeova taem hem i bonem insens long olta insaed long tempel, wan wok we ol pris nomo oli gat raet blong mekem. God i stretem Usia, be Usia i no lesin, hem i kam kros. Ale, wan trabol i kasem hem we i mekem bigfala sem long hem. Usia i kasem leprosi mo hem i mas aot long ol man, i go laef hem wan nomo, gogo kasem we hem i ded. (2 Kronikel 26:16-23) ?Olsem wanem long boe blong hem Jotam? I isi nomo blong yangfala man ya i folem eksampel blong papa blong hem, mo i isi tu blong kros long Jeova from fasin stretem we papa blong hem i kasem. Maet ol man raonabaot long hem oli bin traem pulum hem blong gat rong tingting, from we oli stap gohed blong mekem giaman wosip. (2 King 15:4) Be Jotam i mekem prapa disisen blong hem wan. “Oltaem king ya i stap mekem ol samting we Hae God i glad long hem.”—2 Kronikel 27:2.
9. ?Wanem sam long ol gudfala fasin we oli save pulum Ahas blong mekem i gud, be laef blong hem i folem wanem rod?
9 Jotam i rul 16 yia, mo i stap tru long Jeova long olgeta yia ya. Taswe, boe blong hem Ahas, i gat wan nambawan eksampel blong folem. Mo i gat wan narafala samting we i save pulum Ahas blong mekem i gud. Hem i gat jans blong stap long wan taem we ol trufala profet ya Aesea, Hosea, mo Maeka, oli stap wok strong blong talemaot profet tok long Isrel. Nating se Ahas i gat gudfala jans ya, hem i mekem wan nogud disisen. “Hem i no folem ol gudfala fasin blong olfala bubu ya blong hem bifo, King Deved, hem i stap mekem ol samting we Hae God i no glad long hem nating.” Ahas i wokem ol pija blong Bal mo i wosipim olgeta. Hem i bonem ol prapa pikinini boe blong hem long faea blong mekem sakrefaes long ol god blong ol hiten man. Nating se Ahas i gat ol gudfala eksampel blong folem, hem i mestem bigfala jans ya blong stap olsem wan king mo olsem man blong Jeova.—2 Kronikel 28:1-4.
10. ?Ahas i wanem kaen papa, be pikinini blong hem, Hesekia i mekem wanem disisen?
10 Taem yumi tingbaot klin wosip, i no gat wan papa we fasin blong hem i nogud moa i bitim Ahas. Boe blong hem, Hesekia, i no aot long haos blong papa blong hem. Ol yangfala boe we Ahas i kilim oli ded blong mekem sakrefaes long Bal, ating oli ol stret brata blong Hesekia. ?Ol nogud samting ya we Ahas i mekem, oli pulum Hesekia blong lego Jeova? No gat. Hesekia i kam wan bigfala king blong Juda. Hem i wan king we i stap tru long God, i waes, mo ol man oli laekem hem tumas. I no gat plante king we oli mekem sem mak olsem hem. “Oltaem [Jeova] i stap wetem hem.” (2 King 18:3-7) Tru ya, yumi gat risen blong bilif se, maet Hesekia nao, tabu spirit i bin pusum hem blong raetem Ol Sam namba 119, taem hem i yang yet. Sipos i olsem, i no hadwok blong kasem save from wanem hem i raetem se: “Mi mi harem i nogud we i nogud.” (Ol Sam 119:28) Nating se Hesekia i kasem ol bigfala trabol, hem i letem Tok blong Jeova i lidim hem long laef blong hem. Ol Sam 119:105 i talem se: “Hae God. Tok blong yu i olsem laet. Oltaem hem i stap soemaot rod blong mi, mo i stap lidim mi.” Hesekia i mekem prapa disisen blong hem—wan disisen we i stret.
11. (a) Nating se papa blong Manase i wan gudfala eksampel, ?Manase i rebel agensem Jeova go kasem wanem mak? (b) ?Wanem disisen we Manase i mekem taem hem i kam olfala, mo yumi save lanem wanem from stori ya?
11 Be, i gat wan samting bakegen we i narakaen. Tingbaot, wan pikinini blong beswan king blong Juda i kam wan king we i moa nogud i bitim ol narafala king blong Juda. Boe blong Hesekia, Manase i leftemap fasin blong wosipim aedol, wok wetem rabis spirit, mo raf fasin we oli bitim mak. Baebol i talem se: “Hae God i stap givim tok blong hem long King Manase mo long ol man blong hem blong wonem olgeta.” Maet hem i yusum ol profet blong mekem wok ya. (2 Kronikel 33:10) Wan olfala stori blong ol man Jyu i talem se, Manase i no wantem lesin, nao i mekem ol man oli tekem so, oli katem bodi blong Aesea long tu haf. (Skelem wetem Hibrus 11:37.) Nating sipos samting ya i tru no nogat, be i klia se Manase i no lesin long ol woning we God i givim long hem. Tru tumas, hem i bonem sam long ol prapa pikinini boe blong hem long faea, blong mekem sakrefaes, taem oli laef yet. Hem i mekem olsem we bubu blong hem Ahas i bin mekem. Be, taem hem i kam olfala, hem i kasem sam bigfala trabol, nao ol trabol ya oli mekem se hem i tanem tingting mo i jenisim fasin blong hem. (2 Kronikel 33:1-6, 11-20) Eksampel blong hem i tijim yumi se wan man we i bin mekem sam krangke disisen long laef blong hem, hem i save jenisim disisen ya.
12. ?Wanem tu defren disisen we Amon mo pikinini blong hem Josaea, tufala i mekem long saed blong wok blong Jeova?
12 Amon, boe blong Manase, i save lanem plante samting from fasin ya we papa blong hem i tanem tingting from ol sin blong hem. Be, hem i mekem rong disisen. Amon i “mekem ol samting we i nogud we i nogud olgeta” gogo ol man oli kilim hem i ded. Fasin blong boe blong hem Josaea, i defren olgeta. Josaea i jusum blong lanem samting from trabol we i bin hapen long bubu blong hem. Hem i stat rul taem hem i gat eit yia nomo. Taem hem i gat 16 yia, hem i stat lukaot Jeova mo biaen, hem i soemaot wan nambawan eksampel, olsem wan king we i stap tru long God. (2 Kronikel 33:20–34:5) Hem i mekem wan disisen—wan disisen we i stret.
13. (a) ?Yumi lanem wanem from ol king blong Juda we yumi jes tokbaot? (b) ?Fasin blong papa mama blong trenem ol pikinini blong olgeta i impoten olsem wanem?
13 Sotfala stadi we yumi mekem long saed blong ol seven king ya blong Juda, oli tijim yumi long wan impoten samting. Yumi lanem se, sam king oli gat rabis fasin, be boe blong olgeta i mekem gudfala fasin. Mo sam narafala king oli mekem gudfala fasin, be boe blong olgeta i gat rabis fasin. (Skelem wetem Eklesiastis 2:18-21.) Samting ya i no daonem impoten wok blong ol papa mama blong trenem pikinini blong olgeta. Ol papa mama we oli trenem pikinini blong olgeta long rod blong Jeova, oli givim beswan jans long ol pikinini ya blong kam ol gudfala man blong Jeova. (Dutronome 6:6, 7) Be sam pikinini, nating se ol papa mama oli rili traehad blong givhan long olgeta, oli jusum blong folem rong rod. Sam narafala pikinini, nating se fasin blong papa mama blong olgeta i nogud, oli jusum blong laekem Jeova mo mekem wok blong hem. From blesing blong Jeova, ol pikinini ya oli gat gudfala laef. Samtaem yu stap askem long yu wan se ?bambae yu yu mekem wanem disisen? !Ale, tingbaot sam fasin blong Jeova we oli soemaot se hem i sua we yu yu naf blong mekem stret disisen!
!Jeova i Trastem Yu!
14. ?Olsem wanem yumi save se Jeova i kasem save long ol samting we yumi no naf blong mekem?
14 Jeova i luk evri samting. Proveb 15:3 i talem se: “Hae God i stap luk olgeta samting we i stap hapen long evri ples. Nating we yumi stap mekem i gud no i nogud, be oltaem hem i stap luk yumi.” King Deved i tokbaot Jeova i se: “Taem mi mi no bon yet, be yu yu luk mi finis, mo olgeta dei we yu yu makemaot se oli blong mi, nating we oli no kamtru yet, be yu yu raetemdaon olgeta finis long buk blong yu.” (Ol Sam 139:16) Taswe, Jeova i save ol slak fasin ya we yu yu stap traehad blong winim—nating se hemia ol fasin we yu bon wetem, no we oli kamaot from samting we i bin hapen long laef blong yu we yu no naf blong blokem. Jeova i savegud wanem samting i bin hapen long laef blong yu. Hem i save yu moa, i bitim we yu yu save yu wan. Hem i save wanem we yu no naf blong mekem. Mo hem i gat sore. Hem i neva askem yumi blong mekem wanem we yumi no naf blong mekem.—Ol Sam 103:13, 14.
15. (a) ?Wanem nambawan samting we i save leftemap tingting blong olgeta we narafala i mekem oli harem nogud? (b) ?Jeova i givim wanem wok long yumi blong soem ona long yumi?
15 Long defren fasin, Jeova i no luk yumi olsem ol man we oli no save bos long samting we i hapen long laef blong olgeta. Sipos yumi stap harem nogud from sam nogud fasin we narafala i bin mekem long yumi bifo, yumi save haremgud taem yumi save se Jeova i no laekem nating ol man we oli wantem mekem ol nogud fasin olsem. (Ol Sam 11:5; Rom 12:19) Be, ?olsem wanem sipos yumi tanem baksaed long hem, mo mekem wan disisen we yumi save se i rong? ?Bambae Jeova i blokem yumi blong no kasem nogud frut we i save kamaot from rong disisen blong yumi? No gat. Tok blong hem i talem se: “Evri man i gat wok blong hem.” (Galesia 6:5) Jeova i soem ona long ol man, taem hem i letem olgeta wanwan oli jusum blong folem stret fasin mo mekem wok blong hem. Hemia nao wanem we Moses i bin talem long nesen blong Isrel. Hem i se: “Naoia mi mi talem stret long yufala se yufala nomo i mas jusumaot. ?Yufala i wantem laef, no yufala i wantem ded? ?Yufala i wantem blong Hae God i blesem yufala, no blong hem i givim panis long yufala? Mi mi singaot heven mo wol, blong tufala ya nao bambae i witnes blong mi, we mi talem long yufala se yufala i mas jus. !Mi mi wantem tumas blong yufala i jusumaot laef!” (Dutronome 30:19) Jeova i trastem fulwan se yumi naf blong mekem disisen we i stret. ?Olsem wanem yumi save samting ya?
16. ?Olsem wanem yumi save “wokem rod blong God i sevem yumi”?
16 Makemgud wanem we aposol Pol i raetem: “Ol fren blong mi. . . . Yufala i mas gohed blong wokem rod blong God i sevem yufala, mo yufala i mas fraet tu long hem. Mi talem olsem, from we oltaem God i stap wok long laef blong yufala blong mekem yufala i glad blong obei long hem, mo blong givim paoa long yufala blong yufala i save mekem ol samting we hem i wantem.” (Filipae 2:12, 13) Grik tok we oli tanem i kam “wokem rod” long vas ya, i minim se man i traehad go kasem we hem i finisim gud wan wok. Tru ya, i no gat wan long yumi we i kalabus long fasin ya blong stop long wan wok mo no moa traehad long wok ya. Jeova God i trastem fulwan se yumi naf blong finisim wok we hem i givim long yumi blong mekem—wok ya nao bambae i lidim yumi i go blong kasem sef. Sipos samting ya i no tru, bambae tabu spirit i no save pusum Pol blong raetemdaon tok ya. Be, ?olsem wanem yumi save mekem wok ya? Yumi no mekem wok ya long prapa paoa blong yumi. Sipos yumi strong inaf blong mekem wok ya, bambae yumi no nid blong “fraet.” Be, Jeova i stap ‘wok long laef blong yumi,’ i min se tabu spirit blong hem i stap wok long tingting mo hat blong yumi, i stap halpem yumi blong ‘obei mo mekem samting we God i wantem.’ Wetem help ya we i soem lav blong God, ?i stret blong ting se yumi no save mekem wan stret disisen mo gohed blong folem disisen ya long laef blong yumi? !No gat!—Luk 11:13.
17. ?Wanem sam jenis we yumi save mekem long laef blong yumi wan, mo olsem wanem Jeova i halpem yumi blong mekem olsem?
17 I gat sam samting blong blokem yumi we bambae yumi mas traehad blong winim. Maet hemia ol nogud fasin we yumi bin folem long ful laef blong yumi, no maet hemia sam samting we oli pulum yumi mo we oli save spolem tingting blong yumi. !Nating se i olsem, tabu spirit blong Jeova i save givhan long yumi blong winim ol fasin ya! Hemia i stret wetem tok we Pol i raetem i go long ol Kristin blong Korin se, Tok blong God i naf blong brekemdaon ‘ol samting we oli strong.’ (2 Korin 10:4) Tru tumas, Jeova i save halpem yumi blong jenisim laef blong yumi. Tok blong hem i talem strong long yumi blong “finis long olfala laef ya” mo blong ‘putum niufala laef we God i wokem olsem we hem i wantem. Niufala laef ya i kamaot long trufala stret fasin mo fasin blong obei long hem oltaem.’ (Efesas 4:22-24) ?Tabu spirit blong Jeova i rili save halpem yumi blong jenisim laef blong yumi olsem? !Yes hem i save mekem! Tabu spirit blong God i save wokem ol gudfala frut long laef blong yumi. Hemia ol nambawan fasin we yumi evriwan i wantem tumas blong kasem. Faswan long ol fasin ya, hemia lav.—Galesia 5:22, 23.
18. ?Evriwan we i gat save, oli naf blong mekem wanem disisen, mo samting ya i mas halpem yumi blong gat strong tingting blong mekem wanem?
18 Antap long hemia, i gat trutok we i save mekem man i fri. Ol rod blong Jeova God blong soem lav, oli no gat en blong hem, mo hem i wokem yumi long pija blong hem. (Jenesis 1:26; 1 Jon 4:8) Taswe, yumi save jusum blong lavem Jeova. Fiuja blong yumi i dipen long lav ya. Olfala laef blong yumi bifo, ol fasin we yumi lanem from narafala, mo ol fasin we yumi bon wetem, oli no save givim gudfala fiuja ya. Adam mo Iv, tufala i mas laekem Jeova God tumas, sipos tufala i wantem stap oltaem long garen blong Iden. Hemia nao lav we yumi wanwan i nidim sipos yumi wantem laef tru long Amageden mo winim laswan traem long en blong Wan Taosen Yia Rul blong Kraes. (Revelesen 7:14; 20:5, 7-10) Yumi wanwan, nomata wanem kaen laef yumi gat, yumi save wokem wan lav olsem. (Matiu 22:37; 1 Korin 13:13) I gud we yumi gat strong tingting blong lavem Jeova mo bildimap lav ya gogo i no save finis.
?Wanem Tingting Blong Yu?
◻ ?Wanem bilif blong plante man we i go agensem stret tijing blong Baebol long saed blong wok we wanwan man i mas mekem?
◻ ?Ol Kristin oli mas mekem wanem wok blong bildimap olgeta wanwan?
◻ ?Olsem wanem eksampel blong ol king blong Juda i soemaot se olgeta man wanwan oli save mekem prapa disisen blong olgeta?
◻ ?Olsem wanem Jeova i mekem yumi sua se yumi naf blong mekem ol stret disisen long laef, nating se ol samting raonabaot long yumi oli save pulum yumi blong mekem rong disisen?
[Tok Blong Pija Long Pej 15]
?Ol fasin we yumi bon wetem oli lidim evri samting we bambae oli hapen long fiuja blong yumi?
[Tok Blong Pija Long Pej 17]
Nating se papa blong King Josaea i soem nogud eksampel, Josaea i jusum blong mekem wok blong God