?Yu Yu Gat Bilif Olsem Ebraham?

“?Be taem mi, mi Pikinini blong Man, mi kambak long wol ya bakegen, bambae mi save faenem plante man we oli bilif long mi, no nogat?”​—LUK 18:8.

1. ?From wanem i no isi blong holem strong bilif tede?

I NO isi blong holem strong bilif tede. Wol ya i strong blong ol Kristin oli gowe long ol samting blong spirit. (Luk 21:34; 1 Jon 2:​15, 16) Plante man, oli wokhad tumas blong stap laef from we long laef blong olgeta oli mas fesem ol faet, ol hariken, ol sik, mo kakae we i sot. (Luk 21:10, 11) Long plante bigfala kantri, ol man oli stap skul plante, nao oli daonem ol man we oli folem bilif. Oli talem se olgeta oli no waes, no oli krangke nomo. Mo tu, plante Kristin man, ol man oli mekem i nogud long olgeta from we oli gat bilif. (Matiu 24:9) I gat 2000 yia i pas finis, Jisas i putum wan kwestin we i stret nomo naoia, i se: “?Be taem mi, mi Pikinini blong Man, mi kambak long wol ya bakegen, bambae mi save faenem plante man we oli bilif long mi, no nogat?”​—Luk 18:8.

2. (a) ?From wanem ol Kristin oli nidim tumas strong bilif? (b) ?I gud yumi tingbaot wanem eksampel?

² I klia we yumi nidim wan strong bilif blong mekem laef blong yumi i gud naoia, mo blong kasem laef we i no save finis long fiuja, olsem we God i promes finis. Aposol Pol i talem bakegen ol tok blong Jeova long profet Habakuk, i se: “‘Ol stret man blong mi we oli stap bilif long mi, bambae oli save laef.’ Be ‘sipos wan long olgeta i tanemraon i gobak, bambae mi no save glad long hem.’ . . . Be sipos man i no bilif strong long God, hem i no save mekem God i glad long hem.” (Hibrus 10:38 kasem 11:6; Habakuk 2:4) Pol i talem long Timoti se: “Yu mas traehad blong gohed gud long Kristin laef blong yu, olsem man we i traehad long resis blong hem. Sipos yu traehad olsem, bambae yu save kasem laef ya we i no save finis, we God i singaot yu blong yu kasem.” (1 Timoti 6:​12) ?Olsem wanem nao blong kasem wan bilif we i no save foldaon? Blong ansa long kwestin ya, yumi save tingbaot wan man we i bin laef 4000 yia bifo long yumi. Be bilif blong hem, ol man blong trifala bigfala skul, hemia ol Kristin, ol Muslim mo ol Jyu, oli stap tinghae long hem yet. Man ya Ebraham. ?Wanem i mekem bilif blong hem i nambawan? ?Mo yumi save folem eksampel blong hem tede, no nogat?

Hem i Obei Long God We i Lidim Hem

3, 4. ?From wanem Tera i lidim famle blong hem oli aot long Uru i go long Haran?

³ Baebol i tokbaot Ebraham long ol faswan pej blong hem, we nem blong hem fastaem Ebram. Jenesis 11:26 i talem se: “Tera . . . i bonem Ebram, mo Naho, mo Haran.” Tera wetem famle blong hem, oli stap long taon ya Uru long Koldia, wan rij taon long saot blong Mesopotamia. Be oli no stap long ples ya. “Nao Tera i tekem pikinini blong hem Ebram wetem Sarae we i woman blong Ebram, mo i tekem smol bubu blong hem Lot we papa blong hem Haran, nao oli aot long taon ya Uru long Koldia, blong go long kantri ya Kenan. Be taem olgeta oli go kasem ples ya Haran, oli mekem ples blong olgeta long hem.” (Jenesis 11:31) Naho, we i brata blong Ebraham, hem tu i lidim famle blong hem blong oli kam stap long Haran. (Jenesis 24:10, 15; 28:​1, 2; 29:4) ?Be from wanem nao Tera i aot long rij taon ya Uru, blong go stap farawe long Haran?

⁴ Longtaem biaen, 2,000 yia afta we Ebraham i ded, stret man ya Steven i tok long fes blong kot ya Sanhedrin, we i hae kot blong ol man Jyu. Nao hem i talemaot from wanem famle blong Tera oli muvaot olsem. Hem i talem se: “God ya, nem blong hem i hae we i hae, mo hem nomo i soemaot hem long olfala blong yumi Ebraham, long taem ya we Ebraham i stap yet long kantri blong hem, Koldia long Mesopotamia. Long taem ya, hem i no go mekem ples blong hem long taon ya Haran yet. God i talem long hem se, ‘Yu mas aot long famle blong yu, mo ples blong yu, blong go long wan ples we mi bambae mi soemaot long yu.’ Nao Ebraham i aot long Koldia, i go stap long Haran.” (Ol Wok 7:​2-4) Tera i mekem samting ya from Ebraham, nao i obei long wil blong Jeova, i lidim prapa famle blong hem oli go stap long Haran.

5. ?Taem papa blong hem i ded, Ebraham i go wea? ?From wanem?

⁵ Ol famle blong Tera oli mekem ples blong olgeta long niufala taon ya blong olgeta. Plante yia afta, taem Ebraham i talem se “kantri blong mi,” hem i no minim Uru, hem i minim eria blong Haran. (Jenesis 24:4) Be, nating se i olsem, Ebraham bambae i no stap oltaem long Haran. Steven i talem se: “Taem papa blong [Ebraham] i ded, God i tekem hem i kam stap long kantri ya we yufala i stap long hem naoia.” (Ol Wok 7:4) Ebraham i obei long tok blong Jeova we i lidim hem, nao hem i krosem reva ya Yufretes blong go long kantri ya Kenan, mo Lot i go wetem hem.a

6. ?Jeova i talemaot wanem promes long Ebraham?

⁶ ?From wanem Jeova i askem Ebraham blong go stap long Kenan? From we Jeova i gat wan plan long saed blong stret man ya. Jeova i talem finis long Ebraham: “Yu mas aot long ples ya blong yu, mo long ol famle blong yu, mo long haos blong papa blong yu, nao bambae yu mas go long wan narafala kantri, we mi bambae mi soemaot long yu. Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we plante. Bambae oli kam wan strongfala laen. Mi bambae mi blesem yu, mo bambae mi mi mekem we plante man oli savegud nem blong yu, blong yu bambae yu kam olsem rod blong mi blong mi blesem plante man. Olgeta we oli singaot long mi blong mi blesem yu, mi bambae mi blesem olgeta, be olgeta we oli singaot trabol i kam long yu, mi bambae mi mekem trabol i kam long olgeta. Mi bambae mi yusum yu blong blesem ol man blong olgeta narafala kantri long wol.” (Jenesis 12:​1-3) Ebraham i mas kam papa blong wan bigfala nesen, nao Jeova bambae i protektem nesen ya mo i givim kantri ya Kenan i go long hem. !Wan nambawan promes ya! Be Ebraham i mas mekem bigfala jenis long laef blong hem blong hem i save kasem graon ya.

7. ?Blong hem i save kasem promes blong Jeova, Ebraham i mas rere blong mekem wanem jenis long laef blong hem?

⁷ Taem Ebraham i aot long Uru i go, hem i livim wan taon we i rij mo tu hem i livim olgeta famle blong papa blong hem. Long taem ya, ol famle oli save protektem ol man blong oli stap sef. Taem hem i aot long Haran, hem i seraot long famle blong papa blong hem, wetem famle blong brata blong hem Naho. Nao oli muf i go long wan kantri we oli no save. Taem hem i kasem Kenan, hem i no traem faenem wan sefples insaed long wan taon we i gat ol bigfala stonwol raonabaot, nogat. ?From wanem? Taem Ebraham i jes go insaed long kantri ya, Jeova i talem long hem, se: “Yu yu mas wokbaot blong lukluk olgeta graon ya, from we bambae mi mi givim olgeta evriwan i go long yufala.” (Jenesis 13:17) Long taem ya, Ebraham i gat 75 yia blong hem mo waef blong hem Sera i gat 65 yia blong hem. Be tufala i obei long ol tok ya. “Mo from we hem i stap bilif strong long God, taswe hem i stap long kantri ya we hem i mekem promes blong hem long hem bifo, be hem i wan strenja nomo . . . i stap long ol haos tapolen nomo.”​—Hibrus 11:9; Jenesis 12:4.

Bilif Olsem Ebraham Tede

8. ?Yumi mas wokem wanem insaed long yumi blong folem eksampel blong Ebraham mo sam narafala Witnes blong bifo?

⁸ Long Hibrus 11, Ebraham wetem stamba famle blong hem oli gat nem blong olgeta long medel blong olgeta “witnes blong [God]” long ol taem bifo Kraes we “oli plante we plante.” Nao aposol Pol i tokbaot bilif blong olgeta man blong God blong bifo, mo i enkarajem ol Kristin man blong “lego ol samting we oli stap blokem yumi, mo ol sin [bilif we i slak] we oli stap holemtaet yumi.” (Hibrus 12:1) Yes, bilif we i slak i save ‘holemtaet yumi’ isi nomo. Be long taem blong Pol mo naoia tu, ol trufala Kristin man oli naf blong wokem wan strong bilif we i sem mak long bilif blong Ebraham mo ol narafala blong bifo. Pol i tokbaot hem wan mo ol narafala Kristin fren, i se: “Yumi no save tanemraon blong gobak, nao yumi lus, nogat. Yumi man blong bilif long God, mo hem bambae i sevem yumi.”​—Hibrus 10:39.

9, 10. ?Olsem wanem yumi save se plante man tede oli gat bilif olsem Ebraham?

⁹ Tru, stat long taem blong Ebraham kam kasem naoia, wol ya i jenis bigwan. Nomata, yumi gohed blong mekem wok blong sem God ya we i “God blong Ebraham” mo hem i no save jenis. (Ol Wok 3:​13; Malakae 3:6) I stret blong mekem wosip long Jeova tede, olsem we i stret we Ebraham i wosipim hem long taem blong hem. (Revelesen 4:​11) Plante man oli givim laef blong olgeta i go fulwan long Jeova, mo olsem Ebraham, oli rere blong mekem enikaen jenis long laef blong olgeta, blong mekem wil blong God. Long las yia, 316,092 man oli pruvum we oli givim finis laef blong olgeta long Jeova from we oli baptaes long wota ‘long nem blong Papa, mo long nem blong Pikinini, mo long nem blong tabu spirit.’​—Matiu 28:​19.

¹⁰ Bighaf blong ol niufala Kristin ya oli no nid blong muf i go long narafala kantri farawe blong soemaot we oli givim laef blong olgeta long God. Be long saed blong spirit, i olsem we plante long olgeta oli muf bigwan blong go stap farawe. Eksampel, long aelan ya Morisas, Elsie [Pron: elʹsē] i mekem nakaemas. Evriwan oli fraet long hem. Wan spesel paenia i statem wan Baebol stadi wetem gel blong Elsie, nao samting ya i openem rod blong Elsie ‘i tanem tingting blong hem, i aot long tudak i kam long delaet.’ (Ol Wok 26:18) Blong givhan long gel blong hem, Elsie i agri blong stadi long buk ya My Book of Bible Stories. Oli mekem stadi long hem tri taem long wik from we oli mas enkarajem hem oltaem. Ol fasin nakaemas oli no mekem hem i glad mo hem i gat plante trabol long laef blong hem. Be biaen, hem i finisim longfala trip blong hem, i aot long paoa blong Setan i go long trufala wosip. Ale, taem ol man oli kam blong hem i mekem wan samting long olgeta, hem i talem se Jeova nomo i save protektem olgeta long ol rabis samting. Naoia Elsie i wan Witnes we i baptaes finis, mo 14 man long famle mo ol fren blong hem oli kasem trutok finis.

11. ?Olgeta we oli givim laef blong olgeta long Jeova oli wantem mekem se laef blong olgeta i stret long wanem?

¹¹ Bighaf blong olgeta we oli givim laef blong olgeta long Jeova las yia oli no mas mekem bigfala jenis olsem. Be i olsem se olgeta evriwan oli mas muf, from we long saed blong spirit bifo oli ded mo naoia oli laef. (Efesas 2:1) I tru we oli stap long wol ya long saed blong bodi, be oli no haf blong wol ya. (Jon 17:15, 16) Olsem ol Kristin we God i makemaot, we oli ‘man blong heven, oli gat raet insaed long ples ya,’ olgeta tu oli “stap long wol ya olsem ol strenja nomo, mo olsem ol man we oli no gat hom blong olgeta.” (Filipae 3:​20; 1 Pita 2:​11) Oli mekem laef blong olgeta i kam stret long ol loa blong God, speseli from we oli laekem tumas God mo oli laekem tumas ol narafala man. (Matiu 22:37-​39) Oli no ronem mane mo ol samting we oli blong olgeta nomo, mo oli no wantem kam bigfala man long wol ya. No gat. Oli lukluk i go long “niufala skae mo niufala wol we stret fasin nomo bambae i stap long hem.” ​—2 Pita 3:​13; 2 Korin 4:​18.

12. ?Wanem wok blong las yia i soemaot we taem Jisas i “kambak bakegen long wol ya,” hem i faenem finis “plante man oli bilif”?

¹² Taem Ebraham i muf i go long Kenan, hem i stap wetem stamba famle blong hem nomo, mo Jeova nomo i sapotem mo i protektem olgeta. Long sem fasin, ol 316,092 Kristin we oli jes baptaes oli no stap olgeta nomo, nogat. Jeova i sapotem mo i protektem olgeta tru long spirit blong hem, olsem we hem i bin mekem long Ebraham. (Proveb 18:10) Antap moa, hem i sapotem olgeta tru long wan nambawan “nesen” we i kamaot long olgeta kantri. Nesen ya i gat moa man long hem, i bitim samfala nesen long wol tede. (Aesea 66:8) Las yia, wan niufala namba blong 5,888,650 sitisen blong nesen ya oli soemaot klia we oli gat strong bilif from we oli go talemaot ol promes blong God long ol man raonabaot long olgeta. (Mak 13:10) Oli yusum nambawan namba blong 1,186,666,708 aoa long wok ya, blong faenem ol man we oli intres long trutok. Frut blong wok ya, se oli save mekem 4,302,852 Baebol stadi wetem ol man we i wantem kasem strong bilif. Wan narafala samting i soemaot we oli gat strong tingting se, 698,781 long “nesen” ya oli joen long paenia wok, samfala fultaem, samfala wan manis mo samfala plante manis. (Ripot long wok blong ol Witnes blong Jeova long las yia i stap long ol pej 12 kasem 15.) Ripot ya i givim wan ansa we i gud mo strong long kwestin blong Jisas, se: “?Be taem mi, mi Pikinini blong Man, mi kambak long wol ya bakegen, bambae mi save faenem plante man we oli bilif long mi, no nogat?”

Stap Obei Long Taem Blong Traem

13, 14. Talem sam trabol we Ebraham i kasem wetem famle blong hem long Kenan.

¹³ Plante taem, i no isi long Ebraham mo famle blong hem taem oli stap long Kenan. Wan taem, kakae i sot bigwan, nao hem i mas aot long Kenan blong godaon long Ijip. Mo tu, tufala man, king blong Ijip mo king blong Gerara (klosap long Gasa) oli traem tekem Sera, waef blong Ebraham, i blong olgeta. (Jenesis 12:10-​20; 20:​1-​18) Mo tu, wan taem i gat rao long ol man blong Ebraham mo ol man blong Lot, we oli stap lukaot long ol anamol blong tufala, mekem se tufala famle i mas seraot. Ebraham i no tingbaot hem nomo, i letem Lot i jusumaot lan blong hem fastaem, ale, Lot i jusum blong go stap long eria blong Jodan reva, we long taem ya i olsem garen blong Iden from we hem i gud mo naes.​—Jenesis 13:​5-​13.

¹⁴ Biaen, Lot i stap long medel blong wan faet. King blong Elam farawe mo ol narafala king we i joen long hem, oli kam agensem ol fo king blong ol taon blong levelples daon ya Sidim. Ol king blong farawe oli winim ol king blong ples ya, mo oli stilim plante gudfala samting, wetem Lot mo olgeta samting blong hem. Taem Ebraham i harem samting we i bin hapen, hem i no fraet, i ronem ol king blong ol kantri farawe, nao i kasem bakegen Lot wetem famle blong hem, mo olgeta samting blong ol king we oli manples. (Jenesis 14:​1-​16) Be i gat wan narafala samting we i moa nogud yet, i kamaot long Lot long ples blong Kenan. Maet hem i gat sam risen blong go stap long Sodom, nating we plante man oli save finis ol rabis fasin blong ol man long taon ya.b (2 Pita 2:​6-8) Taem tu enjel i givim woning long hem se bambae God i spolem taon ya, Lot i ronwe wetem waef mo tufala gel blong hem. Be woman blong Lot i no obei long ol rul we tufala enjel i givim, nao sol i kavremap hem, i kam olsem gref blong hem. Nao Lot i mas laef long wan hol blong ston long Joa, hem wetem tufala dota blong hem. (Jenesis 19:​1-​30) Maet ol trabol ya oli mekem Ebraham i harem nogud, speseli from we Lot i kam long Kenan insaed long famle blong Ebraham.

15. Ebraham i fesem sam trabol taem hem i stap long haos tapolen long narafala kantri, ?be wanem nogud tingting hem i no gat?

¹⁵ ?Olsem wanem? ?Ebraham i ting se maet i moa gud sipos hem wetem Lot, tufala i bin stap long sefples blong Uru wetem ol narafala famle blong papa blong hem, no long Haran wetem brata blong hem Naho? ?Hem i harem nogud from we olgeta oli no bin stap long wan taon we i gat bigfala stonwol mo i sefgud, oli stap long ol haos tapolen nomo? ?Maet hem i ting se hem i no bin waes from we hem i lego plante gudfala samting blong go wokbaot long kantri ya olsem wan strenja nomo? Aposol Pol i tokbaot Ebraham mo famle blong hem, i se: “Tingting blong olgeta i no stap gobak long ples blong olgeta, we oli aot long hem finis. Sipos oli stap tingbaot olsem, bambae oli gat jans blong gobak, be i no olsem.” (Hibrus 11:15) Yes, oli no gobak. Nating we oli kasem sam traem, be oli stap long ples we God i wantem blong olgeta i stap long hem.

Stanap Strong Tede

16, 17. (a) ?Ol Kristin oli fesem wanem trabol tede? (b) ?Ol Kristin oli gat wanem gudfala tingting? ?From wanem?

¹⁶ Ol Kristin tede oli stanap strong long sem fasin. Nating se oli haremgud tumas blong mekem wok blong God, be laef i no isi long ol trufala Kristin long ol laswan dei ya. I tru we oli stap long wan kaen paradaes long saed blong spirit, be stil, oli harem nogud olsem ol narafala man from ol trabol blong ekonomi. (Aesea 11:​6-9) Plante oli ded long ol faet blong ol nesen, nating we oli no joen long ol faet ya, mo samfala oli kam pua bitim mak, be i no fol blong olgeta nating. Antap moa, oli gat trabol from oli wan smol kampani nomo we plante man oli no laekem. Long plante kantri oli talemaot gud nius long medel blong ol man we oli no intres nating long mesej. Long sam narafala ples, oli kasem trabol from olgeta we “oli stap mekem ol loa blong stanemap ol fasin nogud,” we “oli stap jajem ol man we oli no mekem wan samting nogud, se oli mas ded.” (Ol Sam 94:20, 21) Mo long ol kantri we oli no agensem ol Witnes tu, nating we plante man oli luksave finis ol gudfala fasin blong olgeta, be oli save se oli mas stap defren long ol fren blong olgeta long skul mo long wok. Oli mekem olsem Ebraham we i stap laef long haos tapolen nomo taem bighaf blong ol narafala man oli laef long ol taon. Yes, i no isi blong laef long medel blong wan wol mo blong “no kam haf” blong hem.​—Jon 17:​14, NW.

¹⁷ ?Olsem wanem nao? ?Yumi no moa glad blong givim laef blong yumi long God? ?Yumi laekem moa blong kam wan haf blong wol ya, blong mekem olsem ol narawan? ?Yumi harem nogud from ol samting we yumi lego finis blong mekem wok blong Jeova? !No gat! Yumi no lukluk long baksaed blong yumi blong harem nogud from ol samting we yumi mestem. Yumi save se ol samting we yumi lego oli nating nomo sipos yumi skelem olgeta wetem ol blesing we yumi gat naoia mo olgeta we bambae yumi kasem long fiuja. (Luk 9:​62; Filipae 3:8) Mo tu, ?olsem wanem long ol man blong wol ya? ?Oli hapi? Tru ya, oli traehad blong faenem sam ansa we yumi kasem finis. Oli safa from we oli no stap folem ol rul blong Baebol we God i lidim yumi long olgeta. (Ol Sam 119:105) Mo plante long olgeta oli wantem tumas blong gat sam gudfala fren olsem ol gudfala Kristin fren blong yumi, mo wan gudfala kampani olsem kampani ya blong ol man we oli bilif, be oli no gat.​—Ol Sam 133:1; Kolosi 3:​14.

18. ?Wanem frut i save kamaot taem ol Kristin oli gat strong tingting olsem Ebraham?

¹⁸ Tru ya, samtaem yumi mas gat strong tingting olsem Ebraham taem hem i ronem olgeta we i karemaot Lot. Be sipos yumi gat strong tingting, God bambae i mekem we gudfala frut i kamaot. Wan eksampel, long kantri ya Aerlan Blong Not, i gat tumas raf fasin, nao ol man oli kam strong tumas blong no laekem ol enemi blong olgeta. Olgeta we i no wantem joen long tufala saed ya oli mas gat strong tingting. Be ol trufala Kristin man oli folem tok ya we Jeova i talem long Josua, se: “Tingting blong yu i mas strong, mo yu mas stanap strong oltaem. Yu yu no mas fraet, mo tingting blong yu i no mas foldaon, from we mi bambae mi stap wetem yu long weples bambae yu yu go long hem.” (Josua 1:9; Ol Sam 27:14) Taem ol yia oli pas, ol man oli luk we oli strong mo oli no fraet, ale oli gat respek long olgeta. Tede oli fri blong prij long olgeta kampani blong man long kantri ya.

19. ?Ol Kristin oli glad blong stap wea? ?Mo from we oli folem ol rul blong Jeova, oli save wet long wanem?

¹⁹ Nomata wanem trabol we yumi stap fesem, yumi save bilif oltaem se, sipos yumi folem ol rul blong Jeova, bambae i gat gudfala frut long samting ya. Yes, bambae hem i kasem glori mo yumi kasem plante blesing. Yumi gat sam hadwok mo yumi mas lego sam samting. Be nating, i no gat wan wok we i moa gud bitim wok blong Jeova. Taem yumi mekem wok ya, yumi glad blong fren wetem ol Kristin brata blong yumi, mo yumi wet strong long gudfala fiuja we God i mekem promes blong givim long yumi.

[Ol futnot]

?Yu Yu Rimemba?

◻ ?From wanem yumi mas gat strong bilif?

◻ ?Olsem wanem Ebraham i soemaot we hem i gat strong bilif?

◻ ?Taem wan man i givim laef blong hem i go long God, hem i mas mekem wanem jenis long laef blong hem tu?

◻ ?From wanem yumi hapi long wok blong God, nomata wanem trabol yumi stap fesem?

[Tok Blong Pija Long Pej 7]

Ebraham i rere blong mekem sam bigfala jenis long laef blong hem, blong hem i save kasem ol samting we God i promes long hem

[Tok Blong Pija Long Pej 9]

I klia nomo we taem Jisas i “kambak bakegen long wol ya,” hem i faenem finis “plante man oli bilif”