Laswan Dei Blong Jisas Long Wol Ya

Hemia long Fraede aftenun, Naesan 14, long yia 33 Kristin Taem. Wan grup blong man mo woman, oli stap rere blong berem bodi blong wan gudfala fren blong olgeta. Wan long olgeta, hemia Nikodimas, hem i karem sam senta i kam blong putum long dedbodi ya bifo we oli berem. Wan narafala man we nem blong hem Josef i karem kaliko ya linen, we i klin gud, blong kavremap dedbodi ya we i kasem plante kil.

?HU YA ol man ya? ?Mo hu ya man ya we oli stap berem dedbodi blong hem? ?Olgeta samting ya oli gat paoa long yu? Blong ansa long ol kwestin ya, i gud yumi gobak long stat blong impoten dei we samting ya i hapen long hem.

Tasde Naet, Naesan 14

Long taem ya, hem i fulmun. Sloslou, mun i stap go antap, mo i saengud i kam long Jerusalem. Plante man we oli stap long taon ya, naoia oli stap spel gud afta long wan bisi dei. Long naet ya, olbaot long evri ples yumi save harem gudfala smel blong sipsip we ol man oli stap rusum. Yes, plante taosen man oli stap rere from wan spesel dei​—hemia lafet blong Pasova we oli stap mekem evri yia.

Insaed long wan bigfala rum, yumi luk Jisas Kraes wetem ol 12 aposol blong hem. Oli stap sidaon raon long wan tebel we ol samting oli rere finis. !Yu lesin! Jisas i stap toktok. Hem i se: “Long tingting blong mi, mi mi wantem tumas blong yumi kakae kakae ya blong Pasova fastaem, nao biaen bambae oli mekem mi mi harem nogud long bodi blong mi.” (Luk 22:15) Jisas i save se ol enemi blong hem, we oli man blong skul, oli wantem kilim hem i ded. Be bifo long samting ya, wan impoten samting i mas hapen long naet ya.

Afta we oli mekem Pasova, Jisas i talemaot se: “Wan long yufala bambae i letem mi mi go long han blong ol enemi blong mi.” (Matiu 26:21) Samting ya i mekem se ol man blong hem oli sore tumas. ?Hu man bambae i mekem samting ya? Afta we Jisas i storian smol wetem ol aposol blong hem, hem i talem long Judas Iskariot se: “Samting ya we bambae yu mekem, yu hareap long hem.” (Jon 13:27) Nating se ol narafala aposol oli no save mining blong tok ya, be Judas nao i man ya we bambae i letem Jisas i go long han blong ol enemi blong hem. Nao, Judas i aot, i go blong mekem nogud plan blong hem agensem Jisas i kamtru.

Wan Spesel Lafet

Naoia Jisas i stanemap wan niufala lafet​—wan lafet blong tingbaot ded blong hem. Hem i tekem wan bred, i prea blong talem tangkiu long God from mo i serem long ol man blong hem. Hem i talem se: ‘Yufala i tekem, yufala i kakae. Hemia bodi blong mi, we bambae mi givim from yufala.’ Taem olgeta oli kakae finis, Jisas i tekem wan kap blong red waen mo i talem tangkiu long God from. Nao hem i talem long ol man blong hem se: “Yufala evriwan, yufala i dring long hem.” Jisas i gohed, i eksplenem se: “Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap.” Hem i givim oda long ol 11 aposol we oli stap tru long hem, i se: “Oltaem yufala i mas mekem samting ya blong tingbaot mi bakegen.”​—Matiu 26:26-28; Luk 22:19, 20; 1 Korin 11:24, 25.

Long naet ya, wetem kaen fasin, Jisas i mekem ol aposol blong hem oli rere from samting we i stap long fored blong olgeta mo i pruvum long olgeta se hem i lavem olgeta tumas. Hem i eksplenem se: “I no gat man we i lavem ol fren blong hem moa, i winim man we i lusum laef blong hem blong sevem ol fren blong hem. Mo sipos yufala i stap mekem ol samting we mi mi talem long yufala, yufala i fren blong mi.” (Jon 15:13-​15) Yes, ol 11 aposol oli no lego Jisas taem hem i kasem ol traem. Long rod ya, oli pruvum se oli ol trufala fren blong hem.

Long sem naet ya​—maet i medel naet finis​—Jisas i mekem wan prea we ol man blong hem oli no save fogetem. Biaen, oli singsing blong presem Jeova. Ale, oli aot long taon ya, oli wokbaot long laet blong mun, oli gokros long narasaed blong wan krik, nem blong hem Kedron.​—Jon 17:1 kasem 18:1.

Long Garen Blong Getsemane

Smoltaem biaen, Jisas mo ol aposol blong hem oli kasem garen blong Getsemane. Jisas i livim eit aposol blong hem oli stap klosap long garen ya, mo i tekem Pita, Jemes, mo Jon, nao oli go longwe lelebet, long wan ples we i gat ol oliftri. Hem i talem long trifala se: “Tingting blong mi i hevi tumas, we klosap mi mi ded from. Yufala i stap wet long ples ya, i nogud yufala i slip, yufala i mas waj.”​—Mak 14:33, 34.

Jisas i livim trifala aposol ya, nao i go longwe lelebet insaed long garen ya blong prea. Hem i prea strong we i stap krae bigfala, we wota i stap kamaot long ae blong hem. Hem i se: “Papa, sipos i stret long tingting blong yu, plis yu tekemaot ol samting ya we i stap mekem mi mi harem nogud.” Wan bigfala wok i stap long solda blong Jisas. !Hem i harem nogud tumas taem hem i tingbaot wanem we bambae ol enemi blong Jeova oli talem taem oli kilim i ded Pikinini blong Hem, wan nomo we Hem i gat, olsem wan man blong brekem loa! Jisas i harem nogud moa taem hem i tingbaot ol rabis tok we ol man oli save sakem long gudfala Papa blong hem long heven sipos hem i no winim strongfala traem ya. Tingting blong Jisas i trabol tumas, nao hem i stap prea strong moa, we swet blong hem we i foldaon long graon, i olsem blad nomo.​—Luk 22:42, 44.

Hemia i namba tri taem we Jisas i prea. Taem we hem i finis, wan grup blong ol man oli kamtru long ples ya, we oli stap karem ol laet mo ol stik faea. Ol man ya, Judas Iskariot nao i stap lidim olgeta, nao oli kam stret long Jisas. Ale Judas i talem long Jisas i se: “Halo, Tija,” mo i kis long hem. Jisas i talem long hem se: “Judas. ?Mi mi Pikinini blong Man, be yu yu kam blong kis long mi, blong letem mi mi go long han blong ol enemi blong mi?”​—Matiu 26:49; Luk 22:47, 48; Jon 18:3.

!Wantaem nomo, ol aposol oli luksave se ol man ya oli kam blong holem Masta mo gudfala fren blong olgeta! Nao, Pita i pulumaot wan naef blong faet, i katemaot sora blong slef blong hae pris. Be kwiktaem nomo, Jisas i singaot, i se: “!Ei! !I naf ya!” Nao, Jisas i putum han blong hem long sora blong man ya, i mekem hem i gud bakegen, mo i talem long Pita se: “Yu putumbak naef blong yu long paos blong hem. Man we i tekem naef blong faet, hem bambae i ded long naef blong faet.” (Luk 22:50, 51; Matiu 26:52) Nao, ol soldia wetem ol kapten blong olgeta, oli holem Jisas mo oli fasem hem. Taem ol aposol oli luk samting ya, oli fraet tumas mo tingting blong olgeta i fasfas. Ale oli girap, oli livim Jisas, oli ronwe long hem.​—Matiu 26:56; Jon 18:12.

Fraede Moning, Naesan 14

Medel naet i pas finis, mo naoia, hem i ol faswan aoa blong Fraede. Fastaem, oli lidim Jisas i go long haos blong Anas, wan haeman we i gat bigfala paoa. Bifo, man ya i hae pris. Nao Anas i askem sam kwestin long Jisas mo biaen, oli lidim Jisas i go long haos blong Hae Pris ya Kaeafas. Hemia ples we ol memba blong Sanhedrin oli hivap long hem.

Naoia, ol lida blong skul, oli traem blong faenem sam man blong mekem giaman witnes agensem Jisas. Be, ol tok we oli stap talem oli no sem mak. Long taem ya, Jisas i stap kwaet, i no toktok. Kaeafas i jenisim ol teknik blong hem, nao i talem se: “Hae God i laef, i stap we i stap, mo long nem blong hem, yu yu mas talem trutok. !Yu talem long mifala! ?Yu yu Mesaea, yu Pikinini blong God, no nogat?” Hemia wan samting we Jisas i no save haedem. Taswe, hem i no fraet, hem i ansa se: “Mi ya nao. Bambae yufala i save luk mi, mi Pikinini blong Man, mi sidaon long raetsaed blong God ya we i gat olgeta paoa. Mo bambae yufala i luk we mi mi kamaot long klaod blong skae, mi kamdaon.”​—Matiu 26:63; Mak 14:60-​62.

Nao Kaeafas i singaot bigwan, i se: “?Weswe yumi stap lukaot witnes bakegen? Yufala i harem finis we hem i tok nogud long God.” Ale, sam long olgeta oli girap, oli slavem fes blong Jisas mo oli spet long hem. Sam narafala, oli faetem hem mo oli sakem plante rabis tok long hem. (Matiu 26:65-​68; Mak 14:63-​65) Long Fraede moning, smoltaem afta we san i girap, kaonsel ya Sanhedrin i mekem miting bakegen. Ating oli mekem miting ya blong traem soemaot se kot we oli bin mekem long naet i stret nomo folem loa. Bakegen, Jisas i no fraet blong talem se hem i Kraes, hem i Pikinini blong God.​—Luk 22:66-​71.

Biaen, ol jif pris mo ol elda oli tekem Jisas i go long Ponjes Paelet, hedgavman blong ol man Rom long Judia, blong i askem kwestin long hem. Ol lida ya, oli jajem Jisas se hem i stap pulum ol man blong agensem gavman, i stap blokem ol man blong no pem takis long Sisa, mo “i stap talem se hem i Mesaea, we hemia king ya.” (Luk 23:2; skelem wetem Mak 12:17.) Afta we Paelet i askem kwestin long Jisas, hem i talemaot se: “Mi mi no faenem se man ya i brekem loa.” (Luk 23:4) Taem Paelet i harem se Jisas i wan man Galili, hem i sanem Jisas i go long Herod Antipas, we i rula long Galili. Long taem ya, Herod i stap long Jerusalem. Hem i kam blong mekem lafet blong Pasova. Herod i no gat tingting blong jajem bisnes ya. Hem i wantem nomo blong luk we Jisas i mekem wan merikel. Be Jisas i no talem wan tok nating mo i no wantem mekem wan merikel. From samting ya, Herod wetem ol soldia blong hem oli mekem plei long hem mo biaen, oli sanem hem i gobak long Paelet.

Paelet i askem bakegen se: “?Wanem samting nogud we hem i mekem? Mi mi no faenem wan samting we hem i mekem, we i stret blong hem i ded from. Be bambae ol man blong mi oli wipim hem, mo biaen bambae oli letem hem i gofri.” (Luk 23:22) Ale, hem i letem ol man blong hem oli wipim Jisas wetem wan kaen wip we i terem ol mit long baksaed blong Jisas. Nao ol soldia oli mekem wan hat wetem ropnil, oli putum long hed blong Jisas mo oli stap jikim hem. Oli tekem wan stik, oli kilim hem long hed blong hem, ale, ol ropnil we oli wokem olsem hat blong king, oli stikim hed blong hem moa. Nating se oli mekem i nogud tumas long Jisas, be hem i gohed blong onagud blong God mo i no letem tingting blong hem i foldaon.

Maet Paelet i gat tingting se bambae ol man oli sore long Jisas from ol kil long bodi blong hem. Taswe, hem i tekem Jisas i kam stanap bakegen long fes blong olgeta man. Paelet i talem se: “!Ei, olgeta! Mi tekem man ya i kam afsaed bakegen, blong yufala i luk we mi no save faenem wan rabis poen long hem nating.” Be ol jif pris, oli singaot bigwan se: ‘!Nilim hem long pos! !Nilim hem long pos!’ (Jon 19:​4-6) Oli gohed, oli stap singaot strong moa. Paelet i no moa save se bambae hem i mekem wanem. From samting ya, hem i letem Jisas i go long han blong olgeta blong oli kilim hem i ded.

Hem i Harem Nogud Tumas Gogo i Ded

Ating naoia i klosap long medel dei. Oli tekem Jisas i go afsaed long Jerusalem, long wan ples we oli kolem Golgota. Long ples ya, ol soldia oli putum Jisas long wan wud, oli tekem ol bigfala nil, oli nilim tufala han mo tufala leg blong hem. Yumi no save eksplenem soa we Jisas i harem long bodi blong hem. Soa ya i bitim mak, from we bodi blong hem i hevi, mo ol nil oli stap terem mit long han mo leg blong hem. Wan hif blong man oli kam wanples blong wajem taem we bambae oli nilim Jisas mo tufala man blong brekem loa, long pos. Plante man oli tok nogud long Jisas. Ol jif pris oli stap laf long hem, oli se: “Hem i sevem plante narafala man finis, be i no naf blong sevem hem.” Ol soldia wetem tufala man blong brekem loa we i stap hang klosap long hem, olgeta tu oli tok nogud long Jisas.​—Matiu 27:41-​44.

Naoia i medel dei, mo oli jes nilim Jisas long pos. Nao, wantaem nomo, God i mekem se tudak i kam kavremap olgeta ples, nao i stap tri aoa olsem.a Maet samting ya nao i mekem se man nogud we i stap hang long raetsaed blong Jisas i tok blong blokem man ya we i stap long lefsaed. Nao, man ya we i stap hang long raetsaed, hem i lukluk i go long Jisas mo i askem se: “Jisas. Taem we yu yu kam King, nao yu kam long paoa blong yu, plis yu tingbaot mi bakegen.” !Man ya i soemaot bigfala bilif jes bifo we hem i ded! Jisas i ansa long hem, i se: “Tru, mi mi talem long yu tede. Bambae yu yu stap wetem mi long Paradaes.”​—Luk 23:39-​43, NW.

Samwe long tri klok long aftenun, Jisas i harem se klosap nao bambae hem i ded. Hem i talem se: “Mi mi tosta.” Nao, hem i singaot bigwan, i se: “God blong mi, God blong mi. ?From wanem yu lego mi mi stap olsem ya?” I olsem we Papa blong hem i lego trabol ya i traem bilif blong hem fulwan. Ale, Jisas i talem bakegen tok we Deved i bin raetem bifo. Nao, wan long ol man we oli stap klosap long hem i kafsaedem sam waen long koten, i putum koten ya long wan stik mo i pusum i go long maot blong Jisas. Jisas i dring smol waen ya, nao hem i pulum win bigwan mo i talem se: “Olgeta samting i finis nao.” Biaen, hem i singaot bigfala i se: “!Papa! !Mi mi putum laef blong mi long han blong yu!” Afta we hem i talem tok ya, hem i bodaon mo i ded.​—Jon 19:​28-30; Matiu 27:46; Luk 23:46; Ol Sam 22:1.

Klosap nao bambae san i godaon. Taswe, oli mas hareap blong berem bodi blong Jisas bifo we san i godaon mo Sabat Dei (Sarede, Naesan 15) i stat. Nao, Josef blong Aramatia i askem long Paelet blong i letem hem blong tekemaot bodi blong Jisas. Josef ya, hem i wan memba blong kaonsel ya Sanhedrin, mo ol man oli save gud hem. Hem i wan disaepol blong Jisas, be bifo, hem i stap haedem samting ya. Nikodimas, wan narafala memba blong Sanhedrin, we hem tu i bin haedem bilif blong hem long Jisas, hem i givim wan bag we i fulap long tufala lif ya mir mo alos, we oli gat gudfala smel. Bag ya i gat samting olsem 33 kilo long skel blong ol man Rom. Nao, oli kavremap gud bodi blong Jisas mo oli putum hem long wan hol we oli katem long ston klosap long ples ya. Hol ya i niuwan, oli no putum wan man yet long hem.

!Jisas i Laef Bakegen!

Eli long Sande moning, taem ples i tudak yet, Meri, woman Magdala mo sam narafala woman bakegen, oli go long gref blong Jisas. !Oli sapraes bigwan! Ston ya we i blokem hol i kamaot finis. !Yu luk! !Hol ya i emti nomo i stap! Ale, Meri, woman Magdala, i resis i gobak, i talemaot samting ya long Pita mo Jon. (Jon 20:​1, 2) Smoltaem biaen, wan enjel i kamaot long tu narafala woman we i stap. Enjel ya i talem se: “Yutufala i no fraet.” Hem i talem tu se: “Yutufala i go kwik, yutufala i talemaot long ol man blong hem we hem i laef bakegen finis.”​—Matiu 28:2-7.

!Taem tufala i stap resis i go, tufala i mitim Jisas long rod! Nao, hem i talem long tufala i se: “Yutufala i go talem long ol brata blong mi.” (Matiu 28:​8-​10) Biaen, taem Meri, woman Magdala, i stap afsaed long gref blong Jisas, i stap krae, Jisas i kamtru long hem. Meri i harem gud tumas nao i resis i go blong talemaot nambawan nius ya long ol narafala disaepol. (Jon 20:11-​18) Yes, hemia wan Sande we yumi no save fogetem. Long dei ya, Jisas we i laef bakegen, i kamtru long ol defren disaepol blong hem faef taem. !Long rod ya, hem i pruvum long olgeta se hem i laef bakegen!

?Olsem Wanem Samting Ya i Gat Paoa Long Yu?

?Olsem wanem ol samting we oli bin hapen 1,966 yia bifo, oli save gat paoa long yu naoia, we yu stap klosap long yia 2,000? Wan man we i bin lukluk ol samting ya i talem se: “God i gat wan pikinini nomo blong hem, be hem i sanem hem i kam long wol ya, blong i mekem rod blong yumi, blong yumi kasem laef. Long samting ya nao, God i soemaot fasin blong hem blong lavem yumi. Stamba blong fasin ya i no we yumi lavem God, be we God i lavem yumi, nao i sanem Pikinini blong hem, blong i ded blong mekem rod blong God i tekemaot ol sin blong yumi.”​—1 Jon 4:9, 10.

?Olsem wanem nao ded blong Kraes i “mekem rod” blong God i tekemaot ol sin blong yumi? Ded blong Kraes i “mekem rod” blong yumi frengud wetem God. Faswan man Adam, i rebel agensem God mo from samting ya, hem i pasem sin mo ded i go long olgeta pikinini blong hem. Be Jisas i givim laef blong hem olsem wan ransom blong pemaot ol man long sin mo ded. Olsem nao, God i save soem sore mo i glad long yumi. (1 Timoti 2:​5, 6) Taem yumi soem bilif long sakrefaes blong Jisas we i kavremap sin, yumi save kam fri long panis we yumi kasem from sinman ya, Adam. (Rom 5:​12; 6:​23) Samting ya i givim wan nambawan jans long yumi blong frengud wetem Jeova God, Papa blong yumi long heven we i laekem yumi tumas. Blong talem long sotfala tok, nambawan sakrefaes blong Jisas i save mekem se yumi kasem laef we i no gat en blong hem.​—Jon 3:​16; 17:3.

Long Tasde naet, long Epril 1, plante milyan man bambae oli joen long plante handred ples raon long wol blong mekem lafet blong tingbaot ded blong Jisas Kraes. Long taem ya, bambae yumi luk plante moa samting long saed blong ded blong Jisas. Mifala i singaot yu blong kam long lafet ya. Ol Witnes blong Jeova long ples blong yu bambae oli glad blong talem long yu weples mo wetaem bambae lafet ya i stap long hem. I sua se lafet ya bambae i mekem se yu gat bigfala tangkiu from samting we God, we i lavem yumi tumas, mo gudfala Pikinini blong hem, tufala i mekem long laswan naet blong Jisas long wol ya.

[Futnot]

[Bokis/Foto blong pija long pej 7]

JISAS I DED MO I LAEF BAKEGEN

15 Fraede naet Sabat Dei i stat

[Ol Futnot]