Lukaotgud Long Ol Tok We Yu Stap Tijim Long Man

“Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.”​—1 TIMOTI 4:​16.

1, 2. ?From wanem tede, yumi nidim tumas ol tija we oli gat strong tingting blong wok?

“YUFALA i mas go long ol man long olgeta ples long wol, blong pulum olgeta oli kam man blong mi. . . . Yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:​19, 20) From oda ya blong Jisas Kraes, i klia se olgeta trufala Kristin oli mas mekem wok blong tija. Yumi mas givhan long ol man we oli gat gudfala hat, blong oli save God, bifo we i let tumas. Blong mekem olsem, i nidim ol tija we oli gat strong tingting blong wok. (Rom 13:11) Aposol Pol i askem strong long yumi se: “Yu yu mas talemaot tok blong hem. Nating we ol man oli wantem harem tok ya no oli no wantem harem, be oltaem yu yu mas strong blong talemaot.” (2 Timoti 4:2) Samting ya i minim fasin blong tij insaed mo afsaed long kongregesen.a Tru tumas, wok blong prij i no jes minim se yumi talemaot mesej blong God. Yumi mas gat gudhan blong tij sipos yumi wantem se ol man we oli intres oli kam disaepol.

² Yumi laef long taem we ‘laef long wol ya i kam strong tumas.’ (2 Timoti 3:1) Tingting blong ol man i fulap wetem ol waes blong wol mo ol giaman tijing. Plante man oli stap long “tudak nomo” mo oli stap “longwe tumas long laef ya we God i stap givim, from we tingting blong olgeta i kam strong olsem ston nomo, nao oli no gat save.” (Efesas 4:​18, 19) Samfala oli harem nogud tumas long filing blong olgeta. Yes, ol man oli rili “trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:​36) Nating se i olsem, yumi save tijimgud ol man we hat blong olgeta i gud, blong givhan long olgeta blong jenisim fasin blong olgeta.

Ol Tija Insaed Long Kongregesen

3. (a) ?Taem Jisas i givim oda blong yumi tijim narafala, samting ya i minim wanem tu? (b) ?I wok blong hu fastaem blong tijim narafala insaed long kongregesen?

³ Tru long program blong stadi Baebol wetem ol man long haos blong olgeta, plante milyan man oli stap kasem tijing. Be, afta we ol niuwan oli tekem baptaes, oli nidim help bakegen blong kam “olsem rus blong tri [we] i holemtaet graon, olsem we haos i fas strong long graon we i stanap long hem.” (Efesas 3:​17) Taem yumi folem oda ya blong Jisas we i stap long Matiu 28:19, 20, mo yumi pulum tingting blong ol niuwan i go long ogenaesesen blong Jeova, yumi givhan long olgeta blong kasem blesing from ol tijing we oli kamaot stret long kongregesen. Efesas 4:​11-​13 (NW) i soemaot se God i makemaot sam blong oli wok “olsem man blong lukaot long sipsip mo sam olsem tija, blong bambae olgeta man blong Hem oli rere blong mekem ol wok blong hem, nao olgeta ya we oli olsem bodi blong Kraes, oli save kam strong moa.” Samtaem, gudhan blong tijim narafala i minim se oli mas ‘tok strong long man we i rong, mekem tingting blong man i stanap strong, mo gat longfala tingting blong tijimgud olgeta.’ (2 Timoti 4:2) Wok blong ol tija i impoten tumas mekem se, taem Pol i raetem leta i go long ol man Korin blong tokbaot wok blong ol aposol mo ol profet, hem i tokbaot wok blong ol tija tu.​—1 Korin 12:28.

4. ?Olsem wanem gudhan blong tijim man i save halpem yumi blong obei long advaes blong Pol we i stap long Hibrus 10:24, 25?

⁴ I tru se, i no olgeta Kristin evriwan we oli save wok olsem elda long kongregesen. Nomata long samting ya, i wok blong yumi evriwan blong pulum yumi blong “lavem ol man, mo blong mekem ol gudfala fasin.” (Hibrus 10:​24, 25) Yumi save mekem samting ya long ol miting. Hemia i min se taem yumi givim ansa, yumi reregud mo yumi talemaot samting we i stap long hat blong yumi from we yumi wantem tijim narafala mo leftemap tingting blong olgeta. Ol pablisa blong Kingdom we oli gat ekspiryens oli save ‘givhan long narafala blong mekem ol gudfala wok.’ Oli save mekem olsem taem oli serem save mo ekspiryens blong olgeta wetem ol niuwan long wok blong prij. Long ol taem olsemia, no enitaem we yumi joen wetem olgeta, yumi save givim sam gudfala tok blong tijim olgeta. Eksampel, ol woman we oli gat save long laef oli mas “soemaot [tijim, NW] ol stret fasin.”​—Taetas 2:3.

Oli Pulum Yumi Blong Bilif

5, 6. (a) ?Olsem wanem trufala Kristin skul i defren olgeta long giaman wosip? (b) ?Olsem wanem ol elda oli halpem ol niuwan blong mekem disisen we i waes?

⁵ Trufala Kristin skul i defren olgeta long ol giaman skul. Ol giaman skul oli traem bos long tingting blong ol man. Taem Jisas i stap long wol, ol lida blong skul oli traem lidim evri samting we ol man oli mekem long laef blong olgeta. Oli mekem olsem taem oli stanemap sam kastom we i kamaot long tingting blong olgeta nomo. (Luk 11:46) Ol lida blong Krisendomb oli mekem samting ya tu, plante taem.

⁶ Be, trufala wosip hem i “wan tabu wok” we yumi givim wetem “paoa blong tingting blong yumi.” (Rom 12:​1, NW) Ol man blong Jeova oli kasem save we i ‘pulum olgeta blong bilif.’ (2 Timoti 3:​14, NW) Samtaem, ol elda we oli gat wok blong lidim kongregesen, maet oli mas givim sam advaes mo soem sam rod blong mekem wok blong bambae kongregesen i rongud. Ol elda ya oli no traem mekem disisen long ples blong ol narafala Kristin, be oli traem tijim ol Kristin ya blong “oli naf blong jusumaot wanem fasin i gud mo wanem fasin i nogud.” (Hibrus 5:​14) Blong mekem olsem, ol elda oli fidim kongregesen “long ol tok blong fasin blong bilif long God, mo long ol gudfala tijing.”​—1 Timoti 4:6.

Lukaotgud Long Fasin Blong Yu Blong Tijim Man

7, 8. (a) ?Olsem wanem ol man we oli no gat hae save, oli naf blong kam tija? (b) ?Wanem i soemaot se blong karem gudfala frut taem yumi tijim man yumi wanwan i mas traehad?

⁷ Be, i gud yumi gobak long toktok blong yumi fastaem, long saed blong wok ya we yumi mas mekem blong tijim man. ?I nidim wan spesel save, edukesen, no gudhed blong joen long wok ya? No, i no rili nidim samting ya. Bighaf blong ol man we oli mekem wok ya blong tijim man long olgeta ples blong wol, oli man olsem yumi nomo we oli no go long wan hae skul. (1 Korin 1:​26-​29) Pol i eksplenem se: “Be mifala ya, we mifala i stap holem ol gudgudfala samting ya we God i givim [minista wok blong yumi], mifala i olsem ol graonpot nomo [bodi blong yumi we i gat sin]. Nao fasin ya i stap soemaot, we paoa ya we i bigfala tumas i blong God, i no blong mifala.” (2 Korin 4:7) Ol gudfala frut we oli kamaot long wok blong talemaot Kingdom long olgeta ples blong wol, i pruvum se paoa blong tabu spirit blong Jeova i stap biaenem wok ya.

⁸ Nating se i olsem, wanwan long yumi i nidim blong traehad hem wan blong kam ‘prapa man blong wok we God i stap harem gud long hem, we yumi no gat sem long wok blong yumi. Yumi mas kam man we i stap tijim ol man long trutok blong God long fasin we i stret gud.’ (2 Timoti 2:​15) Pol i askem strong long Timoti se: “Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.” (1 Timoti 4:​16) ?Olsem wanem yumi save lukaot gud long ol tok we yumi stap tijim long ol man insaed no afsaed long kongregesen? Blong mekem olsem, ?yumi nidim sam spesel save no fasin blong tij?

9. ?Wanem i moa impoten i winim gudhan we yumi gat blong tij?

⁹ Taem Jisas i mekem Bigfala Toktok blong hem antap long Hil, hem i soemaot klia se hem i save gud olsem wanem blong tijim man. Taem hem i finisim tok blong hem, “ol man oli sapraes tumas long fasin blong hem blong tijim man.” (Matiu 7:28, NW) I tru se i no gat wan long yumi we i save tij gud olsem Jisas. Be, blong kam wan tija we i karem gudfala frut, yumi no nid blong gat gudhan blong toktok. !Vas blong Job 12:7 i talem se, “ol anamol” mo “ol pijin” we oli no save toktok, be oli save tijim yumi! Samting we i impoten blong joenem wetem gudhan we yumi gat blong tij, hemia blong tingbaot se ‘yumi kam wanem kaen man’​—wanem sam long ol gudfala fasin we yumi gat finis long laef blong yumi mo wanem kaen gudfala fasin we yumi stap wokem long saed blong spirit mo we ol studen oli save folem.​—2 Pita 3:​11; Luk 6:​40.

Man Blong Stadi Long Tok Blong God

10. ?Olsem wanem Jisas i soemaot nambawan eksampel long fasin blong stadi long Tok blong God?

¹⁰ Wan tija we i karem gudfala frut taem hem i tijim Baebol, hem i wan gudfala studen blong Tok blong God. (Rom 2:​21) Jisas Kraes i soemaot nambawan eksampel long saed ya. Taem Jisas i mekem minista wok blong hem, hem i yusum sam tingting no sam tok we oli kamaot long klosap haf blong olgeta buk we oli stap long Hibru haf blong Baebol.c Taem hem i gat 12 yia nomo, yumi luk se hem i savegud Tok blong God, from we hem i stap ‘sidaon long medel blong ol tija, i stap lesin long tok blong olgeta, mo i stap askem kwestin long olgeta.’ (Luk 2:​46) Taem Jisas i kam bigman, hem i stap go oltaem long haos prea, long ples ya we ol man oli stap ridimaot Tok blong God.​—Luk 4:16.

11. ?Wanem gudfala fasin blong stadi we ol tija oli mas gat?

¹¹ ?Yu yu wan man we i wantem tumas blong ridim Tok blong God? Taem yu digim Baebol bambae yu “kasem save long fasin fraet gud long Jeova, mo bambae yu faenem save blong God.” (Ol Proveb 2:​4, 5, NW) Taswe, i gud blong gat gudfala fasin ya blong stadi oltaem. Traem ridim wan haf blong Tok blong God evri dei. (Ol Sam 1:2) Mekem i olsem kastom blong yu blong ridim evri Wajtaoa mo Wekap! taem oli kamaot. Lesingud long olgeta miting blong kongregesen. Lanem fasin blong mekem dip stadi. Sipos yumi lanem blong ‘luklukgud olgeta samting ya,’ bambae yumi no save bitim mak long tijing blong yumi mo bambae yumi no givim enikaen rong tingting taem yumi tijim man.​—Luk 1:3.

Soem Lav Mo Respek Long Olgeta We Yumi Tijim

12. ?Wanem fasin we Jisas i mekem long ol disaepol blong hem?

¹² Wan narafala impoten samting, hemia blong gat wan stret tingting long saed blong man ya we yumi stap tijim. Ol Farisi oli no gat respek long ol man we oli stap lesin long Jisas. Oli talem se: “Ol man olbaot ya oli no save Loa blong Moses nating, taswe God i kros long olgeta.” (Jon 7:​49) Be Jisas i gat bigfala lav mo respek long ol disaepol blong hem. Hem i talem se: “Mi mi no moa save singaot yufala, se ol man blong wok blong mi, from we man blong wok, hem i no save ol samting we masta blong hem i stap mekem. Naoia mi mi stap singaot yufala, se ol fren blong mi, from we olgeta samting ya we mi mi harem long Papa blong mi, mi talemaot finis long yufala.” (Jon 15:15) Hemia i soemaot olsem wanem ol disaepol blong Jisas bambae oli gohed long wok ya blong tijim man.

13. ?Pol i harem olsem wanem long saed blong olgeta we hem i bin tijim?

¹³ Eksampel, Pol i no toktok long ol studen blong hem olsem se oli strenja. Hem i talem long ol Kristin blong Korin se: “Maet yufala i gat hamas taosen man blong tijim yufala long laef ya we yufala i joen long Kraes, be yufala i gat wan man nomo we i olsem papa blong yufala. Mi mi talemaot gud nius long yufala fastaem, nao from samting ya, long laef ya we yufala i stap joen long Jisas Kraes, mi mi olsem papa blong yufala.” (1 Korin 4:​15) !Wanwan taem, Pol i krae tu, taem hem i givim advaes long olgeta we hem i tijim! (Ol Wok 20:31) Mo tu, hem i soemaot nambawan fasin ya blong gat longfala tingting mo kaen fasin. Taswe hem i save talem long ol man Tesalonaeka se: “Mifala i stap mekem i isi long yufala, olsem wan mama we i stap lukaot long ol pikinini blong hem.”​—1 Tesalonaeka 2:7.

14. ?From wanem i impoten tumas blong soem intres long ol Baebol studen blong yumi? Talem wan eksampel.

¹⁴ ?Yu yu folem fasin blong Jisas mo Pol? Sipos yumi rili gat lav long ol studen blong yumi bambae yumi naf blong givhangud long olgeta nomata se yumi no gat sam spesel save blong tij. ?Ol Baebol studen blong yumi oli harem save se yumi rili intres long olgeta? ?Yumi tektaem blong savegud olgeta? Wan Kristin sista i faenem i had blong givhan long wan studen blong hem blong gohedgud long saed blong spirit. Ale, sista ya i askem long woman ya se: “?I gat wan samting we i mekem yu yu wari?” Woman ya i stat talemaot olgeta samting we i stap long hat blong hem, olgeta wari mo problem blong hem. From gudfala storian we tufala i gat long taem ya, laef blong woman ya i jenis. Long ol taem olsem, i stret blong givim ol tingting no tok blong Baebol we oli save leftemap tingting mo mekem narafala i harem gud. (Rom 15:4) Be, i gat wan woning blong tingbaot: Nating se wan Baebol studen i gohedgud, maet hem i gat sam fasin yet we hem i nidim blong jenisim. Taswe, i no waes blong frengud no kampani oltaem wetem man ya. I gud blong putum sam rul long yumi we oli stret blong wan Kristin mo we oli no bitim mak.​—1 Korin 15:33.

15. ?Olsem wanem yumi save soem respek long ol Baebol studen blong yumi?

¹⁵ Sipos yumi respektem studen blong yumi, samting ya i minim se bambae yumi no traem bos antap long laef blong hem. (1 Tesalonaeka 4:​11) Eksampel, maet yumi stap stadi wetem wan woman we i laef wetem wan man be tufala i no mared. Maet tufala i gat pikinini finis. Nao, taem woman ya i kasem moa save long saed blong God, hem i wantem mekem laef blong hem i stret folem ol rul blong Jeova. (Hibrus 13:4) ?Hem i mas maredem man ya no seraot long hem? Maet yumi tingting se i nogud hem i mared wetem man ya from we hem i no gat intres long ol samting long saed blong spirit, mo samting ya bambae i blokem hem blong gohedgud. No maet yumi fraet se ol pikinini bambae oli trabol, ale yumi tingting se i moagud woman ya i maredem man ya. Be, nomata wanem tingting we yumi gat, yumi no soem respek mo lav sipos yumi traem lukluk long laef blong studen ya mo fosem hem blong folem prapa tingting blong yumi. Tingbaot se woman ya nao bambae i mas laef wetem frut blong disisen we hem i tekem, i no yu. Taswe, ating i moagud blong trenem studen ya blong yusum “tingting we i naf blong jusumaot samting we i gud mo samting we i nogud,” blong mekem prapa disisen blong hem long wanem we hem i mas mekem.​—Hibrus 5:​14, NW.

16. ?Olsem wanem ol elda oli save soem lav mo respek long ol sipsip blong God?

¹⁶ I impoten moa long ol elda blong kongregesen blong soem lav mo respek taem oli stap lukaot long ol sipsip blong God. Taem Pol i raet i go long Filimon, hem i talem se: “From we yumitufala i joen long Jisas Kraes, mi mi gat raet blong talem long yu wanem samting we i stret blong yu yu mekem. Be from we yumitufala i fren gud, mi no save mekem olsem.” (Filimon 8, 9) Samtaem, sam problem oli save kamaot long kongregesen. Maet i nidim blong ol elda oli strong long taem olsem. Pol i askem long Taetas blong “tok strong long [olgeta we oli mekem mastik], blong mekem fasin blong bilif blong olgeta i kam strong moa.” (Taetas 1:​13) Nating se i olsem, ol elda oli mas traehad blong gat kaengud fasin oltaem taem oli toktok long kongregesen. Pol i raetem se: “Man blong wok blong Masta blong yumi, hem i no mas man blong faet, hem i mas mekem i gud long olgeta man. Mo hem i mas wan gudfala man blong tij, we tingting blong hem i longfala.”​—2 Timoti 2:​24; Ol Sam 141:3.

17. ?Wanem mastik we Moses i bin mekem, mo ol elda oli save lanem wanem from samting ya?

¹⁷ Ol elda oli no mas fogetem se oli stap lukaot long ‘ol sipsip blong God.’ (1 Pita 5:2) Tingbaot Moses we i lusum stret tingting blong hem, nating se hem i wan man we tingting blong hem i stap daon oltaem. Ol man Isrel “oli mekem tingting blong Moses i kam nogud, nao hem i gohed i sakem toktok long olgeta we i no tingbaot.” (Ol Sam 106:33) I tru we ol sipsip ya oli gat fol, be God i harem nogud tumas from fasin ya we Moses i mekem long ol sipsip blong Hem. (Namba 20:​2-12) Taem ol elda tede oli fesem sam traem olsem, oli mas traem tijim mo givim advaes long narafala wetem fasin luksave mo kaen fasin. Ol brata blong yumi bambae oli obei kwiktaem, sipos oli harem save se narafala i tinghae long olgeta mo i wantem halpem olgeta. Oli harem nogud taem narafala i stretem olgeta olsem we oli man we bambae oli neva save kamgud bakegen. Ol elda oli nidim blong holem gudfala tingting we Pol i gat, taem hem i talem se: ‘Masta ya blong yumi, hem i stap mekem mifala i trastem yufala, se naoia yufala i stap mekem olsem we mifala i talem long yufala, mo we bambae yufala i gohed blong mekem olsem.’​—2 Tesalonaeka 3:4.

Luksave Mo Tekem Aksin Folem Nid Blong Olgeta

18, 19. (a) ?Yumi mas mekem wanem taem yumi luk se wan Baebol studen hem i no kwik blong kasem save? (b) ?Wanem sam rod we maet oli givhan long studen we i faenem i hadwok long wan kaen tijing?

¹⁸ Wan tija i save karem gudfala frut sipos hem i luksave ol slak fasin mo ol gud fasin blong studen blong hem, mo biaen i rere blong jenisim fasin blong hem blong tij, blong givhan moa long studen ya. (Skelem wetem Jon 16:12.) Long parabol blong Jisas long saed blong talen mane, wan masta i givim wok long ‘wanwan man blong wok blong hem, olsem we oli naf blong mekem.’ (Matiu 25:15) Yumi save folem fasin ya tu, taem yumi mekem Baebol stadi. I stret nomo blong wantem makem wan stret taem blong finisim olgeta haf blong buk we yumi yusum blong stadi Baebol. Be, yumi no mas fogetem se, i no olgeta man we oli save ridgud no we oli naf blong lanem mo kasem save kwiktaem ol niufala poen. Taswe, yumi mas luksave wetaem i stret blong muf long wan poen i go long narawan tru long stadi, sipos studen hem i gat hadtaem blong kasem save kwiktaem. Yumi mas halpem ol studen blong kasem mining blong samting we oli stap lanem. Hemia nao, wanem we i impoten moa, i bitim we yumi finisim buk long taem we i stret long yumi.​—Matiu 13:51.

¹⁹ Yumi save talem sem mak long saed blong ol Baebol studen we oli gat hadtaem wetem sam tijing, olsem Triniti no ol lafet blong giaman skul. I nogud sipos yumi givim plante narafala buk long saed blong Baebol long studen blong i mekem dip stadi long hem, antap long buk ya we yumi stap stadi finis wetem hem. Be, sam samtaem maet i gud blong mekem samting ya taem yumi luksave se i nidim. Yumi mas yusum fasin luksave, blong no mekem sam samting we bambae oli mekem studen ya i tektaem blong gru.

!Soem Glad!

20. ?Wanem eksampel blong Pol i soemaot se hem i glad mo hem i sua long fasin blong hem blong tijim narafala?

²⁰ Pol i talem se: ‘Tingting blong yufala i mas glad oltaem.’ (Rom 12:11) Yes, nomata sipos yumi stap mekem wan Baebol stadi no yumi gat wan tok blong givim long miting blong kongregesen, yumi mas mekem wetem strong tingting mo glad. Pol i talem long ol Kristin long Tesalonaeka se: “Taem [mifala] i tekem gud nius i kam long yufala, mifala i no toktok nating nomo. Mifala i toktok, mo mifala i stap mekem ol merikel long paoa blong [tabu spirit], mo mifala i bilif strong se gud nius ya i tru.” (1 Tesalonaeka 1:5) From samting ya, Pol mo ol fren blong hem oli no ‘talemaot gud nius ya nomo, be oli rere tu blong lego laef blong olgeta,’ from ol man.​—1 Tesalonaeka 2:8.

21. ?Olsem wanem yumi save holem glad taem yumi gohed long wok ya blong tijim man?

²¹ Trufala fasin glad i kamaot taem yumi rili bilif se ol Baebol studen blong yumi oli nidim blong harem samting we yumi mas talem long olgeta. Yumi no mas luk wok ya blong tijim man olsem wan kastom we yumi mekem nomo evri dei. Esra, we i wan pris, i rili tinghevi long fasin blong hem blong tijim narafala. Hem i “laekem tumas ol tok blong Buk blong Loa blong Hae God, nao oltaem hem i stap stadi long hem, mo i stap mekem ol samting we buk ya i talem. Mo hem i stap tijim ol laen blong Isrel long ol loa mo ol rul we i stap long buk ya.” (Esra 7:​10) Yumi mas mekem sem mak taem yumi rere gud mo yumi traem tingting gud long ol impoten poen we i stap long haf we yumi stadi long hem. Yumi mas prea long Jeova blong hem i mekem yumi bilif strong mo mekem tingting blong yumi i no hafhaf. (Luk 17:5) Glad blong yumi i save halpem ol Baebol studen blong rili laekem trutok. Be, i tru se, taem yumi lukaotgud long ol tok we yumi tijim long man, samting ya i minim tu se yumi nidim blong folem sam spesel rod blong tij. Nekis stadi bambae i tokbaot sam long ol rod ya.

[Ol futnot]

?Yu Yu Tingbaot?

◻ ?From wanem tede i nidim ol Kristin tija we oli gat gudhan blong tij?

◻ ?Wanem gudfala fasin blong stadi we yumi mas traem folem?

◻ ?From wanem i impoten tumas blong gat lav mo respek long ol man we yumi tijim?

◻ ?Olsem wanem yumi save soemaot se yumi kea long nid blong ol Baebol studen?

◻ ?From wanem fasin glad mo fasin blong suagud long ol tok blong yumi, oli impoten tumas taem yumi tijim narafala?

[Tok Blong Pija Long Pej 10]

Ol gudfala tija oli man blong stadi long Tok blong God

[Tok Blong Pija Long Pej 13]

Soem intres long ol wanwan Baebol studen