Man i Wantem Faenem Trufala Tok Long Saed Blong Fiuja

KING blong Masedonia, we plante man oli save hem long nem ya Bigfala Aleksanda, i karem wok ya blong king long yia 336 B.K.T.a Smoltaem biaen, hem i go long Delfi, hemia long medel blong Gris, blong luk ol pris we oli stap talem fiuja. Wan long ol bigfala plan we King ya i gat long saed blong fiuja, hemia blong winim olgeta kantri blong wol. Be, hem i wantem se ol god oli halpem hem blong mekem bigfala plan ya i kamtru. Sam kastom stori oli talem se, long dei we King Aleksanda i kasem Delfi, pris we i stap talem fiuja i no save toktok wetem hem. Be, Aleksanda i no wantem aot bifo we hem i gat ansa blong hem. Ale, hem i strong long pris ya blong talemaot fiuja blong hem. Pris ya i kros nao i singaot se: “!Man, yu yu gat bigfala paoa, i no gat wan man i save winim yu!” Yangfala king i harem se tok ya i wan gudfala saen blong God. Tok ya i olsem wan promes se bambae Aleksanda i winim faet blong hem.

Be, sipos Aleksanda i bin ridim ol profet tok long buk blong Daniel we i stap long Baebol, bambae hem i bin luk se faet ya i hapen olsem wanem. Baebol i talem i stret nomo se, kwiktaem Aleksanda i winim olgeta faet blong hem agensem ol narafala kantri. Ol kastom stori oli talem se, Aleksanda i gat jans biaen, blong ridim ol tok we profet Daniel i bin raetem long saed blong hem. Josephus, wan man Jiu we i raetem histri, i talem se taem king blong Masedonia i kam insaed long Jerusalem, hem i ridim profet tok blong Daniel​—ating japta 8 blong buk blong Daniel. (Daniel 8:​5-8, 20, 21) Ale, i luk olsem se, from we Aleksanda i luk profet tok ya blong Daniel, ol ami blong hem oli no spolem taon blong Jerusalem.

Ol Man Oli Nidim Samting Ya Tumas

Olgeta man, nating se oli king no man olbaot, nating se oli laef longtaem bifo no tede, be oli wantem save fiuja blong olgeta. Oli nidim blong harem sam tok we oli save trastem, long saed blong fiuja blong olgeta. From we man i gat save, hem i naf blong stadi long ol samting we oli bin hapen longtaem bifo, oli savegud samting we i stap hapen naoia, mo oli intres tumas long wanem we bambae i hapen long fiuja. Wan toktok blong ol man Jaena, i talem stret se: “Man we i save talemaot ol samting tri dei bifo we oli kamtru, hem i save kam rij blong plante taosen yia.”

Long olgeta handred yia we oli pas, plante milyan man oli traem lukluk i go long fiuja. Ale, oli lesin long plante toktok we long tingting blong olgeta, oli kamaot long God. Tingbaot ol man Gris blong bifo. Olgeta ya oli gat plante pris blong talem fiuja, we oli stap long ol ples olsem Delfi, Delos, mo Dodona. Ol man Gris oli go long ol ples ya blong askem ol god blong olgeta blong talemaot samting we bambae i hapen long politik no long faet. Antap long samting ya, oli askem ol samting long saed blong prapa laef blong olgeta, olsem ol trep, mared mo pikinini. I no ol king mo ol lida blong faet nomo we oli go long ol ples ya. Be, samtaem olgeta man blong wan vilej mo ol man blong bigfala taon oli kam long ol pris ya blong kasem toktok blong ol spirit man.

Folem tok blong wan tija, tede “namba blong ol grup blong man we oli stadi long saed blong fiuja i kam antap bigwan.” Be, plante long olgeta oli no wantem lukluk i go long stamba blong ol profet tok​—hemia Baebol. Oli no wantem bilif se olgeta save ya we oli stap lukaotem, bambae oli faenem nomo long ol profet tok blong Baebol. Sam man blong hae save oli talem se ol profet tok blong Baebol oli sem mak wetem ol tok we ol pris blong bifo oli talemaot. Mo tede, ol man we oli no gat bilif oli no trastem ol profet tok blong Baebol.

Mifala i askem yu blong jekemap wanem we Baebol i talem. Sipos yu skelemgud ol profet tok blong Baebol wetem ol tok blong man long saed blong fiuja, ?yu luksave wanem? ?Yu yu save trastem moa ol profet tok blong Baebol no ol tok blong ol pris blong bifo we oli stap talem fiuja? ?Yu sua se bambae yu gat wan gudfala laef sipos yu dipen long wanem we ol profet tok blong Baebol oli talem?

[Futnot]

[Tok Blong Pija Long Pej 3]

Baebol i talem i stret nomo se, Aleksanda bambae i winim olgeta faet blong hem agensem ol narafala kantri

[Credit Line]

Cortesía del Museo del Prado, Madrid, Spain

[Tok Blong Pija Long Pej 4]

Bigfala Aleksanda

[Credit Line]

Musei Capitolini, Roma

[Foto Credit Line Pija Long Pej 2]

COVER: General Titus and Alexander the Great: Musei Capitolini, Roma