?Jeova i Askem Wanem Long Yumi Tede?
“Wan tok i kamaot long klaod ya, i talem se, ‘Hemia Pikinini blong mi, we mi lavem hem. Mi mi glad tumas long hem. Yufala i mas lesin gud long hem.’ ”—MATIU 17:5.
1. ?Wetaem Loa i kasem stamba mak blong hem?
JEOVA i givim Loa long nesen blong Isrel. Loa ya i gat plante haf long hem. Aposol Pol i tokbaot olgeta, taem hem i raetem se: “Ol rul ya oli save stap, gogo kasem taem ya we God bambae i jenisim olgeta samting oli kam niuwan bakegen.” (Hibrus 9:10) Taem Loa i halpem wan smol grup blong ol man Isrel blong akseptem Jisas olsem Mesaea, no Kraes, hem i kasem stamba mak blong hem. Taswe, Pol i talem se: “Kraes i finisimgud olgeta wok blong Loa.”—Rom 10:4; Galesia 3:19-25; 4:4, 5.
2. ?Hu i stap aninit long Loa blong Moses, mo wetaem oli fri long Loa ya?
2 ?Hemia i min se Loa i no moa gat mining long yumi tede? Taem yumi tingtinggud, yumi luksave se i no olgeta man long wol we oli stap aninit long Loa. Man blong raetem Sam i eksplenem samting ya, i se: “[Jeova] i stap tijim yumi [ol man Isrel] long ol rod blong hem, mo long ol tingting blong hem. Hem i no mekem samting ya long ol man blong ol narafala kantri. Olgeta ya oli no save nating ol tingting blong hem.” (Ol Sam 147:19, 20) Taem God i stanemap niufala kontrak, tru long sakrefaes blong Jisas, nesen blong Isrel i no moa nidim blong stap aninit long Loa. (Galesia 3:13; Efesas 2:15; Kolosi 2:13, 14, 16) Taswe, sipos Loa i no moa gat mining long laef blong ol man, ?Jeova i askem wanem long olgeta we oli wantem mekem wok blong hem tede?
Samting We Jeova i Askem
3, 4. (a) ?Wanem samting stret, we Jeova i askem long yumi tede? (b) ?From wanem yumi mas biaen long Jisas?
3 Long laswan yia blong minista wok blong Jisas, aposol Pita, Jemes, mo Jon, trifala i folem hem i go antap long wan bigfala hil, we maet hemia wan ples antap long bigfala hil ya Hemon. Long ples ya oli luk wan vison we i soemaot paoa we Jisas i kasem long Kingdom blong hem. Mo oli harem prapa voes blong God we i talem se: “Hemia Pikinini blong mi, we mi lavem hem. Mi mi glad tumas long hem. Yufala i mas lesin gud long hem.” (Matiu 17:1-5) Hemia nao bigfala samting we Jeova i stap askem long yumi. Hem i askem yumi blong lesin long Pikinini blong hem mo blong folem eksampel mo tijing blong hem. (Matiu 16:24) Taswe, aposol Pita i raetem se: “Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.”—1 Pita 2:21.
4 ?From wanem yumi mas biaen long Jisas? From we taem yumi folem ol fasin blong hem, i olsem we yumi stap folem Jeova God. Jisas i savegud Papa blong hem, from we tufala i spenem plante taosen milyan yia tugeta long heven, bifo we Jisas i kam long wol ya. (Ol Proveb 8:22-31; Jon 8:23; 17:5; Kolosi 1:15-17) Taem Jisas i stap long wol, hem i soemaot olgeta fasin blong Papa blong hem. Hem i eksplenem se: “Mi mi stap talemaot ol samting ya nomo we Papa blong mi i tijim mi finis long hem.” Yes, Jisas i folem stret olgeta samting we Jeova i mekem. Taswe hem i save talem se: “Man we i luk mi, hem i luk Papa blong mi.”—Jon 8:28; 14:9.
5. ?Ol Kristin oli stap aninit long wanem loa, mo wetaem loa ya i stat wok?
5 ?I minim wanem se yumi lesin long Jisas mo folem fasin blong hem? ?Hem i min se yumi stap aninit long loa? Pol i raetem se: “Mi mi no stap aninit long Loa blong Moses.” Long ples ya, hem i stap tokbaot “olfala kontrak,” hemia kontrak blong Loa we God i bin mekem wetem nesen blong Isrel. Be, Pol hem i luksave se hem i stap “aninit long Loa blong Kraes.” (1 Korin 9:20, 21, NW; 2 Korin 3:14) From we olfala kontrak blong Loa i finis, wan “niufala kontrak” i stat, we i stanap long “loa blong Kraes.” Olgeta man blong Jeova tede oli mas obei long loa ya.—Luk 22:20; Galesia 6:2; Hibrus 8:7-13.
6. ?Yumi save talem se “loa blong Kraes” i olsem wanem? ?Long wanem rod yumi soemaot se yumi obei long hem?
6 “Loa blong Kraes” we Jeova i givim, hem i no ol loa we oli raetemdaon long pepa wetem ol defren haf blong hem, olsem olfala kontrak blong Loa. Niufala loa we ol man blong Kraes bambae oli folem i no wan lis blong plante rul we i talem wanem blong mekem mo wanem blong no mekem. No gat. Jeova i givim fo buk, we oli stap long Baebol, we oli tokbaot plante samting long saed blong laef mo ol tijing blong Pikinini blong hem. Mo tu, God i pulum sam long ol faswan man blong Jisas blong raetemdaon sam advaes long saed blong fasin we yumi wanwan i mas gat, ol wok blong kongregesen, fasin insaed long famle, mo sam narafala samting bakegen. (1 Korin 6:18; 14:26-35; Efesas 5:21-33; Hibrus 10:24, 25) Taem yumi mekem laef blong yumi i laenap wetem eksampel mo tijing blong Jisas Kraes, mo yumi folem ol advaes blong ol man we oli raetem Baebol long faswan handred yia, yumi stap obei long “loa blong Kraes.” Hemia nao samting we Jeova i askem long ol man blong hem tede.
Lav Hem i Impoten Tumas
7. Long laswan Pasova we Jisas i mekem wetem ol aposol blong hem, ?olsem wanem Jisas i soemaot stamba blong loa blong hem?
7 Aninit long Loa blong Moses, lav hem i impoten. Be lav hem i impoten moa long loa blong Kraes, i stamba blong hem. Poen ya i kam klia taem Jisas i kam tugeta wetem ol aposol blong hem blong mekem lafet blong Pasova long 33 K.T. Stori we Jon i raetem long saed blong samting we i hapen long naet ya, i soemaot se Jisas i tokbaot lav 28 taem long tok blong hem. Hemia i makem long tingting blong ol aposol blong hem se lav hem i impoten tumas, no hem i trufala mining blong loa ya blong hem. Taswe, tok blong Jon i gat mining taem hem i statem stori blong naet ya, i se: “Jisas i save we taem blong hem i kam finis blong hem i aot long wol ya, i gobak long Papa blong hem. Oltaem hem i stap lavem ol man blong hem, we olgeta oli stap long wol ya, mo hem i stap lavem olgeta olwe, gogo hem i givim laef blong hem from olgeta.”—Jon 13:1.
8. (a) ?Wanem i soemaot se wan rao i stap gohed longtaem bitwin long ol aposol? (b) ?Olsem wanem Jisas i tijim ol aposol blong hem blong gat tingting daon?
8 Jisas i laekem tumas ol aposol blong hem, nating se hem i mas traem plante taem blong halpem olgeta blong winim ol nogud tingting ya blong kasem paoa mo hae posisen. Plante manis bifo we ol aposol oli kasem Jerusalem, ‘oli stap rao se hu long olgeta i hae moa.’ Mo jes bifo we oli kasem taon ya blong mekem lafet blong Pasova, rao ya blong save hu i hae moa, i kamaot bakegen. (Mak 9:33-37; 10:35-45) Wan samting we i hapen smoltaem afta we ol aposol oli go antap long rum blong mekem lafet blong Pasova tugeta, i soemaot se hemia problem we i stap gohed yet long medel blong olgeta. Long taem ya i no gat wan long olgeta we i tekem jans blong folem kastom ya blong wasem leg blong narafala. Blong tijim olgeta blong gat tingting daon, Jisas hem wan i wasem leg blong olgeta.—Jon 13:2-15; 1 Timoti 5:9, 10.
9. ?Olsem wanem Jisas i stretem bisnes we i hapen afta long laswan Pasova?
9 Nating se oli kasem lesen ya finis, afta long lafet blong Pasova mo lafet blong Memoriol we Jisas i stanemap blong tingbaot ded blong hem we i klosap, makem wanem i hapen bakegen. Gospel blong Luk i talem se: “Nao ol man blong Jisas oli rao from tingting ya se hu nao i hae moa long olgeta.” Jisas i no kam kros long ol aposol blong hem, mo hem i no tok strong long olgeta. Jisas i kaengud mo i givim advaes long olgeta. Hem i soemaot se i impoten blong stap defren long ol haeman blong wol we oli wantem kasem paoa nomo. (Luk 22:24-27) Ale, hem i talem wan tok we maet yumi save talem se, hemia pos blong loa blong Kraes. Hem i se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala.”—Jon 13:34.
10. ?Wanem rul we Jisas i givim long ol disaepol blong hem, mo rul ya i minim se oli mas mekem wanem?
10 Long semfala naet ya, Jisas i makem se lav ya blong ol man we oli folem hem i mas go kasem wanem mak. Hem i se: “Loa blong mi i olsem, se yufala i mas lavlavem yufala, olsem we mi mi lavem yufala. I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.” (Jon 15:12, 13) ?Jisas i minim se ol man blong hem oli mas rere blong ded blong sevem ol narafala man blong bilif, sipos i nidim blong mekem olsem? Yes. Jon i stap long taem ya, mo long tingting blong hem, hemia nao stret mining blong tok ya blong Jisas. Taswe, biaen, hem i raetem se: “Taem Kraes i letem laef blong hem blong sevem yumi, hem i soemaot fasin ya blong lavem narafala man. Mo i stret nomo blong yumi tu, yumi letem laef blong yumi, blong givhan long ol Kristin brata mo sista blong yumi.”—1 Jon 3:16.
11. (a) ?Olsem wanem yumi mekem loa blong Kraes i wok? (b) ?Wanem eksampel we Jisas i givim?
11 Taswe, sipos yumi stap folem loa blong Kraes i no naf jes blong tijim narafala long saed blong loa ya. Yumi mas gat wan fasin blong laef we i sem mak long hemia blong Jisas. I tru se, taem Jisas i toktok hem i yusum ol naesfala wod mo tok we oli stretgud long ol man. Be, antap long ol tok ya, hem i tijim man tru long eksampel blong hem tu. Nating se Jisas i bin gat bigfala paoa taem hem i wan spirit man long heven, be hem i tekem jans blong mekem ol wok blong Papa blong hem long wol ya mo blong soem long man wanem nao stret rod blong laef. Hem i gat tingting daon, hem i kaen gud, i tingbaot ol narafala, mo i halpem olgeta we oli stap hadwok tumas mo karem ol hevi samting. (Matiu 11:28-30; 20:28; Filipae 2:5-8; 1 Jon 3:8) Mo Jisas i pulum ol man blong hem blong laeklaekem olgeta, olsem we hem wan i laekem olgeta.
12. ?From wanem yumi save talem se loa blong Kraes i no daonem fasin blong laekem Jeova?
12 Lav long Jeova i impoten samting long Loa blong Moses. ?Be long loa blong Kraes, hem i impoten olsem wanem? (Matiu 22:37, 38; Galesia 6:2) ?Maet hem i no impoten tumas long loa ya? !No gat! Lav long Jeova mo long ol narafala Kristin, tufala samting ya i joen tugeta mo i no gat samting we i save seraotem tufala. Man i no save lavem Jeova sipos hem i no lavem brata blong hem. Aposol Jon i talem se: “Man we i stap talem se hem i lavem God, be i no laekem nating Kristin brata no sista blong hem, i stap agens long hem, hem i man blong giaman. ?Be sipos hem i no save lavem brata no sista blong hem we hem i stap luk oltaem, olsem wanem bambae hem i save lavem God we hem i no luk samtaem?”—1 Jon 4:20; skelem wetem 1 Jon 3:17, 18.
13. ?Wanem i kamaot from we ol disaepol oli obei long niufala loa blong Jisas?
13 Taem Jisas i givim niufala loa long ol disaepol blong hem se, oli mas laeklaekem olgeta olsem we hem i laekem olgeta, hem i tokbaot gudfala frut we i save kamaot from fasin ya. Hem i se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Man ya Tertullian, we i bon plante handred yia afta we Jisas i ded, i talem se lav we ol Kristin brata oli gat bitwin long olgeta i karem frut stret olsem tok ya blong Jisas. Tertullian i talem se ol man we oli no Kristin oli stap tokbaot ol man blong Kraes olsem se: ‘Yufala i traem luk olsem wanem we olgeta ya oli lavlavem olgeta mo olsem wanem we oli rere blong givim laef blong olgeta from narafala.’ Maet yumi askem long yumi wan se, ‘?Mi mi soem lav long ol Kristin brata blong mi, we i pruvum se mi mi wan disaepol blong Jisas?’
Olsem Wanem Yumi Pruvum Lav Blong Yumi
14, 15. ?Wanem samting maet i mekem i strong blong obei long loa blong Kraes, be wanem bambae i halpem yumi blong mekem olsem?
14 I impoten tumas we ol man blong Jeova oli soemaot lav ya we Jisas i soem. Be, ?yu yu faenem i had blong lavem ol Kristin brata we maet oli gat fasin blong tingbaot olgeta nomo? Olsem yumi luk finis, ol aposol oli bin rao mo traem kasem samting we olgeta wanwan oli wantem. (Matiu 20:20-24) Ol Kristin long Galesia tu, oli stap raorao long olgeta. Pol i talem long olgeta se, man we i folem Loa hem i lavem narafala man. Nao, hem i givim woning long olgeta se: “Be sipos yufala i stap raorao long yufala, hemia, yufala i olsem anamol nomo we oli stap kakae olgeta. Nao bambae laef blong yufala i kam nogud olgeta.” Afta we Pol i tokbaot ol wok blong bodi, we oli defren olgeta long ol frut blong tabu spirit blong God, hem i gohed blong givim advaes ya: “I nogud yumi stap praod, no yumi stap mekem yumi nomo i stap kros long yumi, no yumi nomo i stap jalus long yumi.” Nao aposol ya i se: “Yufala i mas stap givgivhan long yufala long ol trabol blong yufala. Long fasin ya, bambae yufala i save mekem ol samting we loa blong Kraes i talem.”—Galesia 5:14–6:2.
15 ?Taem Jeova i wantem yumi blong obei long loa blong Kraes, hem i askem samting we i had tumas long yumi blong mekem? I no isi blong kaengud long man we i bin tok strong long yumi, no we oli spolem filing blong yumi. Be, ‘yumi pikinini blong God, mo hem i lavem yumi tumas, nao from samting ya, yumi mas traehad blong folem fasin blong hem.’ (Efesas 5:1, 2) Yumi mas gohed blong luk eksampel blong God, we i ‘soemaot se hem i lavem yumi tumas taem Kraes i ded blong sevem yumi, long taem ya we yumi stap mekem i nogud yet.’ (Rom 5:8) Taem yumi rere blong halpem ol narafala, wetem olgeta we oli mekem i nogud long yumi, bambae yumi save harem gud from we yumi save se yumi stap folem fasin blong God mo yumi stap obei long loa blong Kraes.
16. ?Olsem wanem yumi pruvum lav blong yumi long God mo Kraes?
16 Yumi mas rimemba se, yumi pruvum lav blong yumi tru long ol samting we yumi mekem, i no long ol samting we yumi talem. Jisas hem wan i bin harem se samting we God i wantem i had long hem, from we hem i wan bigfala samting. Jisas i prea se: “Papa, sipos i stret long tingting blong yu, plis yu tekemaot samting ya we i stap mekem mi mi harem nogud.” Be kwiktaem nomo hem i se: “Be yu no mekem olsem we mi mi wantem, yu mekem olsem we yu nomo yu wantem.” (Luk 22:42) Nating se Jisas i safa from olgeta samting we hem i kasem, hem i gohed blong mekem wok blong God. (Hibrus 5:7, 8) Taem yumi obei, yumi pruvum lav blong yumi mo yumi soemaot se long tingting blong yumi, rod blong God nao hem i beswan rod blong folem. Baebol i talem se: “Sipos yumi lavem God, hemia i min se yumi stap folem ol tok blong hem.” (1 Jon 5:3) Mo Jisas i talem long ol aposol blong hem se: “Sipos yufala i lavem mi, bambae yufala i save obei long ol tok blong mi.”—Jon 14:15.
17. ?Wanem spesel oda we Jisas i givim long ol man blong hem, mo olsem wanem yumi save se oda ya i stret long yumi tede tu?
17 Antap long oda ya blong laeklaekem yumi, ?wanem spesel oda we Jisas Kraes i givim long ol man blong hem? Hem i givim oda ya se oli mas mekem wok blong prij we hem i bin trenem olgeta blong mekem. Pita i talem se: “Jisas ya, hem i talem long mifala, se mifala i mas talemaot gud nius blong hem long ol man.” (Ol Wok 10:42) Jisas i bin talem klia oda ya, se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit.” (Matiu 28:19, 20; Ol Wok 1:8) Jisas i soemaot se ol man blong hem we oli laef long taem blong “en blong wol ya,” olgeta tu bambae oli mas folem oda ya. Hem i talem se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.” (Daniel 12:4; Matiu 24:14) I tru se, God i wantem yumi blong prij. Be, maet samfala oli ting se wok ya i wan samting we God i askem we i had tumas blong yumi mekem. ?Be i tru se hem i strong tumas?
From Wanem Maet Wok Ya i Strong
18. ?Yumi mas tingbaot wanem, taem yumi kasem trabol from we yumi mekem samting we Jeova i askem yumi blong mekem?
18 Olsem yumi luk finis, long ol handred yia we oli pas, i bin gat plante defren samting we Jeova i wantem ol man blong mekem. Mo olsem we ol samting ya we God i askem oli defdefren, ol traem we oli kasem tu oli defdefren. Gudfala Pikinini blong God i kasem sam traem we oli strong moa i bitim eni man, mo hem i ded long wan fasin we i nogud olgeta, from we hem i mekem samting we God i askem hem blong mekem. Taem yumi safa from we yumi mekem samting we Jeova i askem yumi blong mekem, yumi mas rimemba se, i no hem we i stamba blong ol traem ya. (Jon 15:18-20; Jemes 1:13-15) Fasin stronghed blong Setan i mekem yumi kasem sin, yumi safa, mo yumi ded. Hem nao i stamba blong ol traem ya we plante taem oli mekem i hadwok long ol man blong Jeova blong mekem samting we God i wantem.—Job 1:6-19; 2:1-8.
19. ?From wanem i wan blesing long yumi blong mekem samting we God i askem tru long Pikinini blong hem?
19 Tru long Pikinini blong hem, Jeova i askem se long taem ya blong en, ol man blong Hem oli mas talemaot wan mesej i go long olgeta ples blong wol, se Kingdom blong God nomo i save karemaot olgeta trabol blong man. Gavman ya blong God bambae i finisim olgeta problem we oli stap long wol—faet, fasin blong kilim man i ded, fasin pua, fasin blong kam olfala, ol sik, mo ded. Mo tu, Kingdom bambae i mekem wol ya i kam wan naesfala paradaes, we olgeta dedman bambae oli laef bakegen long hem. (Matiu 6:9, 10; Luk 23:43; Ol Wok 24:15; Revelesen 21:3, 4) !Hem i rili wan blesing long yumi blong talemaot gud nius blong ol samting ya! Taswe i klia se bambae i no hadwok long yumi blong mekem samting ya we Jeova i askem yumi blong mekem. Bambae i gat ol man we oli agensem yumi, be Devel Setan mo wol blong hem nao, oli stamba blong ol trabol ya.
20. ?Olsem wanem yumi save winim ol traem we Devel Setan i putum long fored blong yumi?
20 ?Olsem wanem yumi save winim eni traem we Setan i putum long fored blong yumi? Yumi save mekem olsem sipos yumi no fogetem ol tok ya: “Pikinini blong mi, yu yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.” (Ol Proveb 27:11) Taem Jisas i lego sefples blong hem long heven blong mekem wok blong Papa blong hem long wol ya, hem i mekem se Jeova i gat ansa blong givim long ol tok blong Setan. (Aesea 53:12; Hibrus 10:7) Taem Jisas i stap olsem wan man, hem i stanap strong tru long plante traem we hem i kasem, nomata se hem i ded no i safa long wan pos. Sipos yumi folem hem olsem Eksampel blong yumi, bambae yumi naf blong winim ol hadtaem we yumi fesem mo bambae yumi mekem wanem we Jeova i askem yumi blong mekem.—Hibrus 12:1-3.
21. ?Wanem filing blong yu long saed blong lav we Jeova mo Pikinini blong hem tufala i soem long yumi?
21 !God mo Pikinini blong hem tufala i rili soem bigfala lav long yumi! From sakrefaes blong Jisas, ol man we oli obei long God oli gat hop blong laef olwe long wan Paradaes. Taswe yumi no mas letem wan samting i mekem hop ya blong yumi i godaon. Be, yumi wanwan i mas tinghae long wanem we Jisas i mekem, olsem Pol we i talem se: “Pikinini blong God . . . i lavem mi, nao i givim laef blong hem, i ded blong sevem mi.” (Galesia 2:20) Mo i gud yumi soem bigfala tangkiu long God blong yumi, Jeova, we i gat bigfala lav, from we hem i neva askem samting long yumi we i had tumas blong yumi mekem.
?Yu Yu Save Ansa?
◻ ?Jeova i askem wanem long yumi tede?
◻ ?Long laswan naet we Jisas Kraes i stap wetem ol aposol blong hem, olsem wanem hem i makemgud se lav i impoten tumas?
◻ ?Olsem wanem yumi pruvum se yumi laekem God?
◻ ?From wanem i wan blesing blong mekem samting we Jeova i askem long yumi?
[Tok Blong Pija Long Pej 23]
?Jisas i tijim wanem lesen taem hem i wasem leg blong ol aposol blong hem?
[Tok Blong Pija Long Pej 25]
Nating se man i agensem yumi, wok blong prij i wan nambawan blesing