Timoti “Yu Yu Pikinini Blong Mi Stret”

TAEM Kristin aposol Pol i jusum Timoti blong wokbaot wetem hem, Timoti i wan yangfala boe yet. Tufala i gohed blong wok tugeta go kasem 15 yia. Fasin joengud bitwin tufala ya i pusum Pol blong tokbaot Timoti olsem: “Long Kristin laef, hem i olsem pikinini blong mi we mi mi lavem hem.” Mo tu, hem i talem long Timoti se: “Yu yu pikinini blong mi stret.”​—1 Korin 4:​17; 1 Timoti 1:⁠2.

?Wanem fasin blong Timoti i mekem se Pol i laekem hem tumas? ?Olsem wanem Timoti i kam wan gudfala fren blong wok wetem Pol? ?Mo yumi save lanem wanem from stori we Baebol i talem long saed blong ol wok blong Timoti?

Pol i Jusum Hem

Pol i mitim yangfala disaepol ya Timoti, samwe long yia 50 K.T.a Hemia taem hem i visitim Listra (we tede i long Teki) long namba tu misinari trep blong hem. Ol brata blong Listra mo Ikoniam oli tokbaot Timoti, we maet i jes kasem 20 yia blong hem, se hem i wan gudfala man. (Ol Wok 16:​1-3) Timoti i gat wan laef we i stret long mining blong nem blong hem se, “Man We i Ona Long God.” Stat long taem we Timoti i smol nomo, mama blong hem, Yunis, mo bubu blong hem, Loes, tufala i tijim Tabu Baebol long hem. (2 Timoti 1:5; 3:​14, 15) Maet tufala ya i joenem Kristin skul, tu yia bifo we Pol i mekem faswan visit blong hem long taon blong olgeta. Naoia, tru long tabu spirit, wan tok i talemaot klia wanem fiuja blong Timoti. (1 Timoti 1:​18) Folem tok ya, Pol mo ol elda blong kongregesen oli putum han blong olgeta long yangfala man ya. Fasin ya i makemaot hem blong i mekem wan spesel wok, mo Pol i jusum hem blong folem hem long misinari trep blong hem.​—1 Timoti 4:​14; 2 Timoti 1:⁠6.

From we papa blong Timoti hem i wan man Gris we i no bilif long Jisas, Timoti i no bin sakomsaes. I tru se, ol Kristin oli no nid blong mekem samting ya. Be, blong no mekem trabol long tingting blong ol man Jyu we bambae tufala i visitim olgeta, oli mekem sakomsaes long Timoti.​—Ol Wok 16:3.

?Ol man oli luk Timoti olsem wan man Jiu? Sam man blong hae save oli talem se, long tingting blong ol tija blong loa, “ol pikinini we oli bon long wan mared bitwin wan man mo woman we tufala i no gat sem bilif, oli stap aninit long raet blong mama blong olgeta.” Hemia i minim se, “wan woman Jiu i bonem ol pikinini we oli Jiu.” Be, wan man blong raetem buk, nem blong hem Shaye Cohen, i no sua sipos “loa ya i stap finis long faswan handred yia K.T. no nogat.” Hem i no sua tu, sipos ol man Jiu blong Esia Maena oli stap folem loa ya tu no nogat. Afta we hem i tingtinggud long ol samting we oli bin hapen long histri, hem i luksave se, taem ol hiten man oli mared wetem ol woman blong Isrel, “ol pikinini blong mared ya bambae oli olsem pikinini blong Isrel nomo, sipos famle ya i laef wetem ol man Isrel. Ol pikinini oli stap aninit long laen blong mama, taem famle ya i stap long kantri blong mama. Be, taem wan woman Isrel i muf i go long wan narafala kantri blong stap wetem man blong hem we i wan hiten man, ol pikinini blong tufala tu, bambae oli stap olsem ol hiten man.” Nating se i olsem wanem, from we papa mo mama blong Timoti tufala i blong defren kantri, samting ya i halpem hem bigwan long wok blong prij. Hem i no gat problem blong joengud wetem ol man Jiu no ol hiten man. Maet samting ya i halpem hem blong blokem ol tingting we i seraotem olgeta.

Visit blong Pol long Listra i jenisim laef blong Timoti. Yangfala man ya i wantem tumas blong folem rod blong tabu spirit mo, wetem tingting daon, hem i rere blong wok wetem ol Kristin elda. From samting ya, hem i kasem plante blesing mo i gat jans blong mekem plante moa wok. Nating se Timoti i save finis no nogat, be, taem hem i letem Pol i lidim hem, samting ya i rerem hem blong mekem plante impoten tiokratik wok long fiuja. Ol wok ya oli karem hem i go longwe long ples blong hem, i go kasem bigfala taon blong Rom.

Timoti i Sapotem Wok Blong Kingdom

Yumi no save olgeta wok we Timoti i mekem. Be hem i wokbaot plante blong mekem wok blong Kingdom i go moa. Long 50 K.T., Timoti i mekem faswan trep blong hem wetem Pol mo Saelas, i go tru long Esia Maena kasem Yurop. Long ol ples ya, hem i prij long ol taon olsem Filipae, Tesalonaeka, mo Berea. Be, from we ol man oli stat mekem trabol long olgeta, Pol i muf i go long Atens. Timoti wetem Saelas tufala i stap long Berea blong lukaot long niufala grup blong ol disaepol we i stat long ples ya. (Ol Wok 16:6–17:14) Biaen, Pol i sanem Timoti i go long Tesalonaeka, blong leftemap tingting blong niufala kongregesen we i stap long ples ya. Timoti i karem sam gudfala nius long saed blong kongregesen ya, taem hem i mitim Pol long Korin.​—Ol Wok 18:5; 1 Tesalonaeka 3:​1-7.

Baebol i no talem hamas yia Timoti i stap wetem ol man Korin. (2 Korin 1:​19) Maet raonabaot 55 K.T., Pol i ting se i moa gud blong sanem Timoti i gobak long Korin from we hem i kasem sam nogud nius long saed blong olgeta. (1 Korin 4:​17; 16:10) Biaen, Erastus mo Timoti oli aot long Efesas i go long Masedonia. Mo taem Pol i stap long Korin mo i raetem leta i go long ol man Rom, Timoti i stap wetem hem bakegen.​—Ol Wok 19:22; Rom 16:21.

Taem Pol i aot blong go long Jerusalem, Timoti mo sam narafala disaepol oli aot wetem hem. Mo maet oli folem aposol ya i go kasem Troas. Yumi no save sipos Timoti i gohed wetem olgeta ya i go kasem Jerusalem. Be raonabaot long yia 60-​61 K.T., taem Pol i stap long kalabus long Rom, hem i tokbaot Timoti long fastok blong trifala leta we hem i raetem.b (Ol Wok 20:4; Filipae 1:1; Kolosi 1:1; Filimon 1) Pol i mekem plan blong sanem Timoti i aot long Rom i go long Filipae. (Filipae 2:​19) Mo afta we Pol i kamaot long kalabus, Timoti i stap long Efesas folem advaes blong aposol ya.​—1 Timoti 1:3.

Long faswan handred yia i no isi nating blong mekem trep i go long narafala ples. Taswe, Timoti i rili soemaot gudfala tingting taem hem i rere blong mekem ol trep ya blong halpem ol kongregesen. (Lukluk Wajtaoa blong Ogis 15, 1996, pej 29, bokis.) Bambae yumi luk wan long ol trep we hem i mekem mo samting ya bambae i halpem yumi blong save moa long saed blong Timoti.

Moa Save Long Fasin Blong Timoti

Pol i stap wetem Timoti, taem aposol ya i stap kalabus long Rom. Pol i raetem leta i go long ol Kristin blong Filipae we oli stap fesem hadtaem, i se: “Sipos Jisas, Masta blong yumi i glad, mi mi tingting se bambae i no longtaem, mi save sanem Timoti i kam luk yufala. Nao bambae mi save kasem sam nius blong yufala, blong mekem mi mi harem gud. I no gat narafala man long ples ya we i gat sem tingting we Timoti i gat, we hem i stap tingbaot yufala tumas. Olgeta narafala man oli stap tingbaot ol wok blong olgeta nomo, be oli no save tingbaot wok blong Jisas Kraes. Be hem, yufala i save we hem i soemaot fasin blong hem finis, from we hem i wok wetem mi long ol wok blong gud nius blong Kraes, olsem we pikinini i stap wok wetem papa blong hem.”​—Filipae 1:​1, 13, 28-​30; 2:​19-​22.

Ol tok ya oli soemaot se Timoti i wari long saed blong ol Kristin brata blong hem. Sipos Timoti i no pas long sip, i wokbaot nomo aot long Rom blong go kasem Filipae, trep ya i tekem 40 dei, krosem Solwota blong Adriatik, mo 40 dei bakegen blong kambak long Rom. Timoti i rere blong mekem trep ya blong halpem ol brata sista blong hem.

I tru se Timoti i mekem plante trep, be i gat samtaem we helt blong hem i nogud. I luk olsem se bel blong hem i stap soa mo from samting ya hem i “stap sik oltaem.” (1 Timoti 5:​23) Be hem i traehad blong talemaot gud nius. !Yumi kasem save nao from wanem Pol i rili frengud wetem hem!

From we Pol nao i stap lukaot long Timoti mo tufala i mekem plante samting tugeta, ale Timoti i karem ol fasin blong Pol. Taswe, Pol i save talem long hem se: “Be yu, Timoti, taem we yu stap biaen long mi, yu save finis ol toktok blong mi, mo ol fasin blong mi, mo ol samting we mi mi wantem mekem long laef blong mi. Yu luk finis fasin blong mi blong bilif, mo blong mekem tingting blong mi i longfala. Mo yu luk finis fasin blong mi blong lavem ol man, mo blong holem wok gogo i finis. Yu luk finis we ol man oli stap ronem mi tumas, mo we mi harem nogud tumas long bodi blong mi. Yu save finis ol samting ya we mi mi kasem long Antiok mo long Ikoniam mo long Listra, we ol man oli stap mekem i nogud tumas long mi.” Timoti i krae wetem Pol, hem i stap long ol prea blong hem, mo hem i wok olsem wan slef wetem hem blong sapotem wok blong Kingdom.​—2 Timoti 1:​3, 4; 3:​10, 11.

Pol i leftemap tingting blong Timoti se, “yu yu wan yang man nomo, be i nogud yu letem ol man oli luklukdaon long yu from samting ya.” Maet ol tok ya oli soemaot se Timoti i wan man blong sem, mo maet hem i fraet lelebet blong soem paoa blong hem. (1 Timoti 4:​12; 1 Korin 16:​10, 11) Be, hem i naf blong wok hem wan nomo, taswe Pol i trastem hem mo i sanem hem blong mekem sam impoten wok. (1 Tesalonaeka 3:​1, 2) Pol i luksave bigfala nid we i stap long kongregesen blong Efesas. Ale, hem i askem long Timoti blong stap long ples ya blong ‘blokem olgeta blong oli no moa tijim ol man long ol tingting we i no stret.’ (1 Timoti 1:3) Be, nating se hem i kasem plante responsabiliti, Timoti i gat tingting daon. Mo nating se hem i wan man blong sem, hem i gat strong tingting blong wok. Eksampel, hem i go long Rom blong halpem Pol, we long taem ya i mas pas long kot from bilif blong hem. Yes, Timoti i bin kalabus blong smoltaem tu, from sem samting olsem Pol.​—Hibrus 13:23.

I klia se, Timoti i lanem plante samting wetem Pol. Yumi luksave se Pol i tinghae long Timoti from we, tru long tabu spirit blong God, Pol i raetem tu leta i go long Timoti, we yumi save faenem long Kristin Grik haf blong Baebol. Samwe long 65 K.T., taem Pol i haremsave se klosap bambae hem i ded, hem i singaot Timoti bakegen blong kam luk hem. (2 Timoti 4:​6, 9) Baebol i no talem sipos Timoti i bin gat jans blong luk Pol bifo we hem i ded, no nogat.

!Yu Mas Rere Blong Wok!

Yumi save lanem plante samting long saed blong gudfala eksampel blong Timoti. Hem i kasem plante blesing from we hem i wok wetem Pol. Yangfala man ya we i gat fasin blong sem, biaen hem i kam wan elda. Tede, ol yangfala Kristin man mo woman oli save kasem plante blesing sipos oli kampani oltaem wetem ol bigman long saed blong spirit. Mo sipos ol yangfala ya oli jus blong mekem wok blong Jeova long ful laef blong olgeta, bambae oli mekem plante gudfala wok we i gat mining. (1 Korin 15:58) Oli save mekem wok blong haftaem paenia no fultaem paenia long kongregesen blong olgeta, no oli save wok long ol ples we i nidim moa man blong talemaot Kingdom. Wan long ol wok we oli save mekem, hemia wok blong misinari long wan narafala kantri no wok long hedkwota blong Watch Tower Sosaeti no long ol branj ofis blong hem. Mo, i tru, olgeta Kristin oli save soemaot sem gudfala tingting olsem Timoti, taem oli mekem wok blong Jeova wetem ful hat blong olgeta.

?Yu yu wantem gohed blong gru long saed blong spirit? ?Yu yu wantem se Jeova i yusum yu blong mekem wan wok long ogenaesesen blong hem we yu yu naf blong mekem? Ale, folem eksampel blong Timoti. Sipos yu naf blong mekem wan wok, yu mas stap rere oltaem blong wok. ?Maet bambae yu kasem sam spesel wok blong mekem long wok blong Jeova?

[Ol futnot]

[Tok Blong Pija Long Pej 31]

“I no gat narafala man long ples ya we i gat sem tingting we Timoti i gat”