Jeova i Soem Lav Mo Kaengud Fasin Long Mi
JOHN ANDRONIKOS I TALEM STORI YA
Yia hem i 1956. Naen dei nomo afta mared blong mi, mi stap long fored blong wan apil kot long Komotini, long not blong Gris. Hop blong mi hemia se kot i tekemaot 12 manis we hem i givim long mi olsem panis from we mi bin prij Kingdom blong God. Disisen blong kot—sikis manis kalabus—hem i spolem hop blong mi mo i statem plante narafala traem. Be, long taem ya, Jeova i soem long mi se hem i wan God we i gat lav mo kaengud fasin.
TAEM mi bon long Oktoba 1, 1931, famle blong mi i stap laef long taon blong Kavala, bifo hemia taon ya Neapolis long Masedonia, ples ya we aposol Pol i bin visitim long seken misinari trep blong hem. Taem mi mi gat faef yia, Mama i kam wan Witnes blong Jeova, mo nating se hem i no save rid mo raet plante, hem i traem bes blong hem blong tijim mi blong lavem God mo fraetgud long hem. Papa blong mi i wan man we i holemtaet ol olfala tingting, mekem se hem i strong blong folem ol kastom blong Otodoks Skul long Gris. Hem i no intres long trutok blong Baebol mo i agensem mama blong mi, mekem se plante taem hem i raf tumas long hem.
Long rod ya nao, mi gruap long wan haos we ol man blong hem oli gat defren bilif, we Papa i kilim Mama mo i lego mifala. Taem mi pikinini yet, Mama i karem mi mo smol sista blong mi long ol Kristin miting. Be, taem mi kasem 15 yia, tingting blong ol yangfala mo spirit blong stap independen i pulum mi blong lego ol Witnes blong Jeova. Nating se i olsem, mama blong mi we i stap tru long God i traehad, mo i krae plante long ol traehad we hem i mekem blong halpem mi.
From fasin pua mo nogud fasin blong laef blong mi, mi kam sik tumas mo mi stap long bed bitim tri manis. Ale, long taem ya wan brata we i bin tijim trutok long mama blong mi, mo we i gat fasin daon, i luksave se mi rili gat trufala lav long God. Hem i harem se hem i save halpem mi blong strong bakegen long saed blong spirit. Sam narafala oli talem long hem se: “Yu westem taem blong yu nomo blong traem halpem Jon; hem i neva save stretem laef blong hem, blong hem i intres bakegen long ol samting long saed blong spirit.” Be, longfala tingting blong brata ya mo fasin blong gohed nomo blong givhan long mi i karem frut. Long Ogis 15, 1952, taem mi gat 21 yia, mi baptaes long wora blong soemaot se mi givim laef blong mi i go long Jeova.
Jes Mared Mo Kalabus
Tri yia biaen, mi mitim Marta, wan sista we i gat strong tingting long saed blong spirit mo ol nambawan fasin. Mitufala i promes blong mared. Wan dei mi rili sapraes taem Marta i talem long mi: “Tede mi go prij long ol haos wanwan. ?Yu wantem kam wetem mi?” Go kasem dei ya mi neva joen long spesel wok ya be mi tekem jans nomo blong givim witnes long ol man. Long taem ya, long Gris, oli putum tabu long wok blong prij, mo mifala i mekem wok ya nomo long fasin haed. Mo from samting ya, polis i holem plante long mifala, sam oli pas long kot mo oli kalabus. Nating se i olsem, !mi no save talem ‘no’ long woman we bambae mi mared long hem!
Marta i mared wetem mi long 1956. Hem i long taem ya nao, naen dei nomo afta mared blong mitufala we apil kot long Komotini i givim sikis manis kalabus long mi. Samting we i hapen, i mekem mi mi tingbaot wan kwestin we mi bin askem sam taem bifo long wan Kristin sista, wan fren blong mama blong mi: “?Olsem wanem mi save soemaot se mi wan trufala Witnes blong Jeova? Mi neva kasem jans blong pruvum se bilif blong mi i strong.” Taem sista ya i kam luk mi long kalabus, hem i mekem mi mi tingbaot kwestin ya mo hem i talem se: “Naoia yu gat jans blong soemaot lav we yu gat blong Jeova. Hemia wok blong yu nao.”
Taem mi harem se loea blong mi i traem kasem mane blong mekem se mi mi kamaot long kalabus, mi talem long hem se mi jusum blong stap go kasem taem blong mi i finis. !Mi glad tumas! From we long en blong ol sikis manis ya, tu man we oli stap wetem mi long kalabus, oli akseptem trutok. Long ol yia we oli kam biaen, plante taem mi pas long kot from gud nius.
Ol Jus We Mifala i Neva Sore From
Long 1959, tu yia afta we mi aot long kalabus, mi wok olsem presiden elda long kongregesen, mo oli invaetem mi blong go long Kingdom Ministri Skul, wan kos we i trenem ol elda blong kongregesen. Be, long sem taem, pablik hospital i wantem givim wan wok long mi we i blong oltaem, wan gudfala wok we i save mekem se mi mo famle blong mi mifala bambae i haremgud long saed blong mane blong long taem. ?Mi jusum wanem? Mi bin wok finis long hospital, be blong tri manis nomo, mo bos blong hospital ya i glad tumas long wok blong mi. Be taem mi kasem pepa blong go long skul, hem i no wantem mi tekem taem blong spel, nating se oli no pem mi. Afta we mi tingtinggud mo mi prea long saed ya, mi tekem disisen blong putum ol intres blong Kingdom long fas ples mo mi no tekem wok ya.—Matiu 6:33.
Raonabaot long sem taem, distrik mo seket elda oli kam wok long kongregesen blong mifala. Mifala i holem miting blong mifala long fasin haed insaed long haos blong ol brata from we gavman mo ol lida blong Otodoks Jyos long Gris oli stap agensem mifala. Afta wan long ol miting, distrik elda i kam luk mi mo hem i askem long mi sipos mi gat tingting blong mekem wok blong prij fultaem. Kwestin ya i tajem hat blong mi from we stat long taem ya we mi tekem baptaes, mi bin drim longtaem finis long wok ya. Mi ansa se: “Yes, mi wantem tumas mekem wok ya.” Be, mi gat responsabiliti finis blong lukaot long wan pikinini gel. Brata i talem long mi: “Yu mas trastem Jeova, mo bambae hem i halpem yu blong mekem ol plan blong yu oli kamtru.” Taswe, long sem taem we mi lukaot long famle blong mi, mi mo waef blong mi mitufala i jenisim sam samting long laef blong mifala, mekem se long Desemba 1960, mi statem wok olsem spesel paenia long Is blong Masedonia—long taem ya i gat faef paenia nomo long kantri.
Afta we mi bin wok olsem spesel paenia wan yia, branj ofis blong Aten i invaetem mi blong wok olsem elda we i stap visitim ol kongregesen. Taem mi gobak long haos afta trening blong wan manis long spesel wok ya, mi storebaot ol ekspiryens blong mi wetem Marta. Daerekta blong wan ples we oli digim mangganis i kam visitim mi mo invaetem mi blong kam bos long wan haf blong kampani, mo hem i wantem mekem wan gudfala kontrak blong faef yia, wan naesfala haos, mo wan trak. Hem i givim tu dei long mi blong givim wan ansa. Bakegen, mi no wet nating, mi prea long Jeova: “!Mi ya, mi save go! !Yu sanem mi!” (Aesea 6:8) Waef blong mi i agri fulwan wetem disisen blong mi. Mifala i trastem God, ale mifala i statem wok blong goraon mo givhan long ol kongregesen, mo wetem lav mo kaengud fasin Jeova i neva lego mifala.
Stanap Strong Tru Long Ol Trabol
Nating se i gat sam problem long saed blong mane, mifala i strong blong gohed long wok blong prij mo oltaem Jeova i givim wanem we mifala i nidim. Long stat, mi stap yusum wan smol motobaek blong visitim ol kongregesen, sam ples oli longwe bitim 500 kilometa. Plante taem mi kasem sam trabol, mo mi mekem sam aksiden tu. Wan dei long koltaem, afta we mi kambak from wan miting, mi krosem wan reva we i stap ron bigwan. Wan taem nomo motobaek i stop, wota i kam kasem ni blong mi. Biaen wil i flat. Wan man we hem i gat wan pam i kam halpem mi, mo afta mi go riperem wil long wan vilej klosap. Taem mi kasem haos blong mi long tri klok long moning, mi kolkol mo mi taet tumas.
Long wan narafala dei, taem mi lego wan kongregesen blong go long wan narafala, motobaek i glis mo i foldaon long ni blong mi. From samting ya, traoses blong mi i brok mo i wetwet long blad. From we mi no moa gat traoses, ale wan brata i givim wan traoses blong hem long mi we i big tumas blong mi, mo long naet ya mi givim tok blong mi olsem. Nating se i olsem, mi no letem enikaen problem oli mekem mi kam slak long wok blong Jeova mo ol brata we mi laekem olgeta tumas.
Long wan narafala aksiden, mi kasem bigfala kil, wan han i brok mo ol tut blong mi long fored oli brok. Long taem ya nao sista blong mi we i no Witnes mo we i stap laef long Yunaeted Stet, i kam visitim mi. !Mi haremgud tumas taem hem i halpem mi blong pem wan trak! Taem ol brata blong branj long Aten oli harem nius long saed blong aksiden blong mi, oli sanem wan leta we i leftemap tingting blong mi, mo long ol tok blong olgeta oli raetem ol tok blong Rom 8:28, we i talem se: “God i stap wok long olgeta samting we oli stap kamtru long laef blong yumi, blong mekem i gud long yumi ya we yumi lavem hem.” !Bakegen mo bakegen, promes ya i kamtru long laef blong mi!
Wan Gudfala Sapraes
Long 1963, mi stap wok wetem wan spesel paenia long wan vilej we ol man blong hem oli no intres long mesej. Mitufala i tekem disisen blong wok wanwan, mi long wan saed blong rod mo hem long narasaed. Long wan haos, i no long taem afta we mi kilim doa, wan woman i pulum mi kwik insaed long haos blong hem, hem i satem mo lokem doa biaen long mi. Mi sapraes tumas from we mi no kasem save wanem i stap hapen. Smol taem biaen, hem i singaot tu blong spesel paenia i kam insaed long haos. Ale, woman i talem long mitufala: “!No meknoes! !No muf!” Smoltaem afta, mifala i harem ol strong voes afsaed. Ol man oli stap lukaotem mitufala. Taem ol noes oli godaon, woman i talem long mitufala: “Mi mekem samting ya blong protektem yufala. Mi respektem yufala from we mi bilif se yufala i trufala Kristin.” Mitufala i tangkiu long hem mo bifo we mitufala i aot, mitufala i livim plante buk wetem hem.
Fotin yia biaen, taem mi go long wan distrik asembli long Gris, wan woman i kam klosap long mi mo hem i talem se: “Brata, ?yu rimemba mi? Mi ya, woman we i protektem yu from ol man blong agens taem yu kam givim witnes long vilej blong mifala.” Hem i muf i go stap long Jemani, hem i stadi Baebol, mo hem i joen wetem ol man blong Jeova. Naoia, olgeta famle blong hem i stap long trutok.
Yes, long ol yia ya we oli pas, mifala i kasem plante blesing from ol disaepol we oli “olsem wan leta we man i raetem finis.” (2 Korin 3:1) Sam long olgeta we mifala i bin gat privilej blong halpem blong kasem save long trutok blong Baebol oli wok olsem elda, man blong givhan, mo paenia. !Mi glad tumas blong luk long ol yia biaen long 1960, smol namba blong pablisa long teritori we mi bin wok long hem, i kam antap mo i bitim 10,000 man we oli stap wosipim Jeova! Olgeta ona i mas go long God blong mifala we i God blong soem lav mo kaengud fasin, mo we i stap yusum mifala long stret rod blong hem.
“Taem Oli Sik”
Long ol yia we mitufala i mekem wok ya blong goraon blong givhan long ol kongregesen, Marta we hem i gat fasin glad oltaem i stap olsem wan gudfala fren we i givhangud long mi. Be, long Oktoba 1976, hem i kam sik tumas mo oli mas katem hem. Biaen Marta i no moa save wokbaot mo hem i stap long wan wiljea. ?Olsem wanem nao mitufala we i harem nogud long filing i save fesem problem long saed blong mane from sik ya? Bakegen mitufala i trastem Jeova mo mitufala i luk lav mo fasin blong givim presen blong hem. Taem mi go wok long Masedonia, Marta i stap long haos blong wan Witnes long Aten blong kasem wan spesel help we ol dokta oli givim long hem tru long sam eksasaes. Hem i ring long mi blong talem ol tok ya we oli leftemap tingting blong mi: “Mi oraet nomo. Yu nao yu mas gohed, mo taem mi save muf bakegen, bambae mi go wetem yu long wiljea blong mi.” Mo, hem i mekem olsem hem i talem. Ol brata blong Betel we mitufala i laekem olgeta tumas oli sanem plante leta we oli leftemap tingting blong mitufala. Oltaem oli mekem Marta i tingbaot ol tok blong Ol Sam 41:3: “Taem oli sik, [Jeova] bambae i givhan long olgeta i mekem olgeta oli oraet bakegen.”
Long 1986, from ol bigfala problem ya long saed blong helt, oli tekem disisen se i moa gud blong mi blong wok olsem spesel paenia long Kavala. Long ples ya mifala i laef klosap long famle blong gel blong mifala. Oltaem ol brata oli kam long haos blong mifala, mo taem oli askem long Marta: “?Olsem wanem?” plante taem hem i ansa se: “!From we mi stap klosap long Jeova, mi haremgud!” Taem mitufala i stap rere ol miting no oli invaetem mifala blong wok long ol ples we i gat plante nid, Marta i talem se: “Ale Jon, yumi go wok long ples we i gat bigfala nid.”
Sam yia bifo, mi tu mi fesem wan bigfala problem long saed blong helt. Long Maj 1994, oli faenem wan bigfala problem long hat we mi save ded from, mo oli mas katem mi. Bakegen, tru long hadtaem ya, mi harem han blong Jeova we i sapotem mi wetem lav. Bambae mi neva fogetem prea we wan seket elda i mekem long taem we mi slip long hospital, mo taem ya tu we mifala i mekem Memoriol long rum blong mi long hospital wetem fo sikman we oli soem intres long trutok.
Jeova i Man Blong Lukaot Long Mifala
Taem i pas kwiktaem, mo bodi blong mifala i godaon be spirit blong mifala i kam niu bakegen tru long stadi mo long wok blong prij. (2 Korin 4:16) Naoia 37 yia oli pas afta we mi talem, “!Mi ya, mi save go! !Yu sanem mi!” Mi bin kasem plante gudfala taem mo plante blesing long hapi laef blong mi. Yes, samtaem mi harem se “mi pua, mi no gat paoa,” be mi save talem wetem strong tingting long Jeova: “Yu yu no fogetem mi nating, oltaem yu stap tingbaot mi. Oltaem yu yu stap sevem mi.” (Ol Sam 40:17) Hem i rili wan God we i soem lav mo kaengud fasin long mi.
[Tok Blong Pija Long Pej 25]
Wetem Marta long 1956
[Tok Blong Pija Long Pej 26]
Haba long Kavala
[Tok Blong Pija Long Pej 26]
Wetem Marta long 1997