Gilead Skul i Sanem Ol Misinari Long “Olgeta Ples Long Wol”
BITIM fifti yia finis we Wajtaoa Baebol Skul blong Gilead i stap sanem ol misinari i go long ol narafala kantri. Long Septemba 11, 1999, ol misinari blong namba 107 klas i kasem stefeket blong olgeta. Long klas ya, i gat 48 studen evriwan. Ol studen ya oli kamaot long 11 kantri, mo oli go blong mekem misinari wok long 24 kantri. Bambae oli joenem plante taosen narafala misinari, we oli stap wok strong blong mekem lastok we Jisas i talem bifo hem i go long heven, i kamtru. Hem i bin talem se bambae ol disaepol blong hem oli ‘talemaot hem . . . gogo oli finisim olgeta ples long wol.’—Ol Wok 1:8.
Miting ya blong givimaot stefeket, we oli holem long Wajtaoa Edukesen Senta long Patterson, New York, i rili wan nambawan taem long wan naesfala ples. Ol studen we oli kasem stefeket oli glad tumas blong luk ol famle, ol gudfala fren mo ol narafala brata sista long miting ya. Olgeta we oli stap long ol ofis long Brooklyn mo Walkill, olgeta tu oli lesin mo lukluk miting ya long radyo mo video. Sipos yumi kaontem evriwan we oli joen long program ya, ful namba hemia 4,992.
Stap Tru Long Wok Blong Jeova Mo Ol Narafala
“?Hu i Stap Long Saed Blong Jeova?” Hemia stamba blong faswan tok we Carey Barber i givim. Carey Barber i wan memba blong Hed Kampani, mo i jeaman blong miting ya. Hem i eksplenem se hemia wan kwestin we i stap fored long ol man Isrel long taem blong Moses. Tok ya i mekem se ol niufala misinari mo ol narafala tu, oli tingbaot se plante man Isrel oli lusum laef blong olgeta long draeples from we oli no stap strong long saed blong Jeova. Afta we ol man Isrel oli wosipim aedol, oli “kakae mo dring gogo oli drong, nao oli stap slip wetem woman olbaot long klia ples nomo.” (Eksodas 32:1-29) Jisas i givim woning long ol Kristin from sem denja ya, i se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap”—Luk 21:34-36.
Nekis brata, Gene Smalley, blong Raeting Dipatmen, i askem ol studen se: “?Bambae Yu Yu Olsem Wan Meresin We i Mekem Narafala i Haremgud?” Hem i eksplenem se long Engglis, oli stap yusum Grik tok ya pa·re·go·riʹa blong kolem wan meresin we i save mekem man i haremgud. Be long Kolosi 4:11, aposol Pol i yusum sem Grik tok ya blong tokbaot olgeta we oli wok wetem hem. Long New World Translation, oli tanem tok ya i kam “wan meresin we i givim paoa long man.”
Taem ol niufala misinari ya oli go long ol ples we oli mas wok long hem, bambae oli olsem meresin sipos oli holem tingtingdaon mo mekem ol brata sista long ol ples ya oli strong, mo sipos oli soem fasin joengud mo lav long ol narafala misinari.
Daniel Sydlik, wan memba blong Hed Kampani, i givim nekis tok we nem blong hem “Nambawan Rul Blong Folem.” Hem i eksplenem nambawan rul we Jisas i talem long Matiu 7:12 se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” Hem i eksplenem se, rul ya i minim se yumi no mas spolem narafala man, be tu i min se yumi mas mekem i gud long olgeta.
I nidim tri samting blong mekem olsemia: ae we i wekapgud, hat we i gat sore, mo han we i givhan long narafala. Blong talem bakegen bigfala poen long tok ya, Brata Sydlik i talem: “Sipos yumi filim se yumi wantem halpem narafala, yumi mas halpem olgeta kwiktaem. Yumi mas traehad blong mekem i gud long ol narafala man, olsem we yumi wantem olgeta blong mekem long yumi.” Hemia i tru moa long saed blong ol misinari we oli go long ol narafala ples blong halpem ol man blong oli folem trufala Kristin Skul.
Ol Tija Oli Givim Ol Gudfala Advaes
Karl Adams, wan tija blong Gilead Skul, i leftemap tingting blong ol niufala misinari blong oli “Gohed Blong Gru Oltaem.” ?Gru long saed blong wanem? Fastaem, oli mas gru long saed blong save mo fasin blong yusumgud ol save ya. Long Gilead Skul, ol studen oli lanem olsem wanem blong mekem dip stadi blong save bigfala poen long ol stori blong Baebol mo ples we ol stori ya oli halpem long hem. Tija ya i leftemap tingting blong ol niufala misinari blong tingbaot olsem wanem ol stori ya oli save gat paoa long laef blong olgeta. Hem i leftemap tingting blong olgeta blong gohed blong mekem samting ya oltaem.
Brata Adams i talem se: “Seken samting: gohed blong gru long lav. Lav i wan samting we, sipos yu fidim, hem i save gru. Be sipos yu no fidim, hem i save ded. (Filipae 1:9) Naoia, olsem ol misinari, oli nid blong gru long lav, long olgeta samting we i hapen long laef blong olgeta. Mo namba tri samting: “Kam strong moa long Kristin laef blong yufala, we Jisas Kraes, we i Masta mo Sevya blong yumi, i stap givhan moa long yufala long gladhat blong hem, mo we yufala i save hem moa.” (2 Pita 3:18) Brata ya i talem se: “Hemia nambawan kaen fasin we Jeova i soemaot tru long Jisas. Taem yumi gat fasin tangkiu long nambawan kaen fasin blong Jeova, bambae yumi glad blong mekem samting we Jeova i wantem mo ol wok we hem i givim long yumi, mo glad ya i save gru i kam bigwan.”
Mark Noumair, wan narafala tija blong Gilead Skul, i givim nekiswan tok we nem blong hem “Akseptem Ol Hadtaem Wetem Lav, Mo Yu Save Winim.” Tija ya i talem se: “Long laef blong yu olsem misinari, yu mas lan blong akseptem ol hadtaem wetem lav, mo bambae yu winim ol hadtaem ya. Jeova i stap stretem nomo olgeta we hem i lavem. Nomata sipos yu ting se sam advaes oli no gat mining, oli strong tumas, mo oli no stret, lav mo fasin fren we yu gat wetem Jeova bambae i halpem yu blong akseptem fasin stretem ya.”
Brata Noumair i mekem i klia se wan misinari i gat plante defren wok blong mekem. “Sipos yu mekem ol wok ya, be yu no gat lav, bambae yu no save haremgud. Bambae yu les blong mekem ol wok long haos—olsem kuk, pem ol samting, klinim ol frut, mo boelem wota. Yu mas askem long yu wan se, ‘?From wanem mi stap mekem ol wok ya?’ Nao, sipos yu ansa se, ‘Ol wok blong mi i blong mekem ol narafala misinari oli gat gud helt mo oli hapi,’ ale bambae yu harem se i no strong tumas blong karem ol wok ya.” Hem i finisim tok blong hem olsem se: “Nomata sipos yu mas akseptem sam advaes, holem promes blong yu olsem misinari, no stretem sam rong tingting, yu mas mekem olgeta samting ya wetem lav. Lav bambae i mekem se yu naf blong stanap strong long wok blong yu. ‘Lav i no save lus samtaem.’”—1 Korin 13:8.
Wan narafala tija blong Gilead Skul, Wallace Liverance, i singaotem sam misinari blong mekem sam pleplei we i soem sam nambawan ekspiryens we oli kasem taem oli stap wok wetem ol kongregesen we oli kamaot long hem. Ol misinari ya oli prij long ol haos wanwan, be tu oli yusum ol trening we oli bin kasem blong kam misinari, nao oli storeyan wetem ol man long ples we ol trak oli stop long hem, ples blong wasem klos, ol ples blong tekem tren, mo ol narafala ples.
Ol Olfala Misinari Oli Leftemap Tingting Blong Ol Niufala Misinari
Taem ol niufala misinari oli go long defren kantri, ?oli nidim blong wari? ?Oli save winim ol traem we bambae oli kasem long ol ples ya? ?Ol branj ofis oli mekem wanem blong halpem ol niufala misinari ya blong gohedgud long wok blong olgeta? Blong ansarem ol kwestin ya, Steven Lett, we hem i wok long Sevis Dipatmen, mo David Splane, blong Raeting Dipatmen, tufala oli askem kwestin long ol brata we long taem ya, oli stap long wan skul long Wajtaoa Edukesen Senta. Ol brata ya oli wok long branj komiti long Spen, Hong Kong, Laeberia, Benin, Madagaska, Brasil, mo Japan.
Olgeta brata ya we oli stap mekem wok blong Jeova longtaem lelebet, sam long olgeta oli bin wok olsem misinari blong plante yia. Olgeta ya oli talem ol gudfala tok we i leftemap tingting blong ol niufala misinari mo ol famle blong olgeta blong oli no fraet. Oli talemaot ol prapa ekspiryens blong olgeta mo ol ekspiryens blong ol narafala misinari. Oli soem se ol niufala misinari oli save winim ol problem mo wari blong olgeta. Raimo Kuokkanen, wan misinari long Madagaska, i talem se: “Maet problem we yumi fesem i bigwan, be i gat rod blong winim problem ya, mo Sosaeti i halpem yumi.” Östen Gustavsson, wan misinari we naoia i stap wok long Brasil, i talem se: “I no yumi we i jusum ples we yumi mas go wok long hem, be narafala i jusum long yumi. Taswe mifala i tekem disisen se bambae mifala i no stop, be mifala i traem bes blong mifala blong gohed long wok ya.” James Linton, wan misinari long Japan, i talemaot wanem we i givhan long hem, i se: “Hemia ol brata sista we oli mekem wok blong misinari.” Wok blong misinari i wan rod blong mekem wok blong Jeova mo lukaot long ol sipsip blong hem. Mo wok ya i mekem yu yu hapi mo yu haremgud.
Blokem Sik We i Save Kilim Man i Ded Long Saed Blong Spirit
Theodore Jaracz, wan memba blong Hed Kampani, we i bin go long Namba 7 klas blong Gilead Skul long 1946, i givim laswan tok, we nem blong hem, “Traehad Blong Stap Laef Long Saed Blong Spirit Oltaem.” Fastaem hem i tokbaot ol nogud samting we oli stap hapen raonabaot long wol. Biaen hem i soemaot se i gat sam bigfala trabol oli stap kasem ol man naoia.
Brata Jaracz i yusum Ol Sam 91, mo hem i makemaot “rabis sik” mo “rabis fasin” ya we i bin spolem mo kilim i ded plante milyan man long saed blong spirit. Devel Setan mo rabis wol blong hem, i bin yusum ol giaman tingting we oli stanap long save blong man, mo ol samting long saed blong bodi, blong spolem tingting blong man long saed blong spirit. Be Jeova i promes se sik ya i no save spolem ‘man we i stap long tabu haos blong hem.’—Ol Sam 91:1-7.
Brata Jaracz i talem se: “I hadwok blong stanap strong long bilif, blong stap oltaem long sefples ya. Yumi no save mekem olsem ol man we oli stap talem ol tok jik. Ol man ya ‘oli no gat wan samting nating long saed blong spirit.’ Tede, i gat plante man olsem. Hemia i wan problem we yumi evriwan insaed long ogenaesesen blong Jeova i stap fesem. Mo tu, problem ya i save gat paoa long yu long misinari wok blong yu.” (Jud 18, 19) Be ol niufala misinari oli kasem advaes se oli save stanap strong long saed blong spirit long misinari wok blong olgeta. Brata Jaracz i pulum olgeta blong tingbaot eksampel blong ol brata we oli stap stanap strong long Rasia, Esia mo Afrika—nating se gavman i putum tabu long wok blong prij long ples blong olgeta, ol man i agensem olgeta, oli jikim olgeta, oli talem ol giaman tok agensem olgeta, mo jajem olgeta blong nating. Antap long ol samting ya, plante taem ol brata ya oli fesem ol traem long saed blong bodi, from we i gat ol faet bitwin ol man blong ol defren laen, mo oli sot long ol samting we oli nidim blong laef.
Taem yu harem se yu kam slak long saed blong spirit, “i impoten tumas blong luksave stamba blong problem ya, mo biaen yusum advaes long Tok blong God blong winim problem ya.” Brata Jaracz i yusum sam eksampel insaed long Baebol. God i bin talem long Josua se hem i mas ridim Loa evri dei mo evri naet. (Josua 1:8) Long taem blong Josaea, taem oli faenem buk blong Loa, Jeova i blesem olgeta we oli folemgud ol loa ya. (2 King 23:2, 3) Timoti i bin save ol tabu Tok blong God, stat long taem we hem i bebi yet. (2 Timoti 3:14, 15) Ol man Berea oli no jes lesingud nomo, be oli “glad moa” from we oli stap ridimgud ol tok blong Baebol evri dei. (Ol Wok 17:10, 11) Mo Jisas Kraes i nambawan eksampel long fasin ya blong save mo yusum Tok blong God.—Matiu 4:1-11.
Blong finisim tok blong hem, Brata Jaracz i talem long ol niufala misinari se: “Naoia yufala i rere blong mekem misinari wok blong yufala. Mo bambae yufala i go long olgeta ples long wol. Sipos yufala i traehad oltaem blong stanap strong long saed blong spirit, bambae yufala i no letem wan samting nating i blokem yufala blong mekem ol wok we yufala i promes blong mekem. Bambae yufala i go prij wetem strong tingting, mo bambae yufala i leftemap tingting blong narafala blong gat strong bilif olsem yufala. Mo mifala i prea se Jeova bambae i mekem olgeta we yufala i tijim olgeta oli laef, olsem we hem i mekem yumi laef long saed blong spirit. Long rod ya nao, bambae i gat plante moa man we oli save kam fri long ol trabol long saed blong spirit we i stap kam antap long fulwol. Plante moa man bambae oli joenem yumi blong mekem samting we Jeova i wantem. Mo bambae Jeova i blesem yufala long wok ya.”
Afta we jeaman i ridimaot ol tok blong talem halo we ol brata long ol defren kantri long wol oli sanem i kam, ol studen oli kasem stefeket blong olgeta. Biaen, wan studen i ridimaot wan leta we klas i bin raetem blong talem tangkiu. !Oli gat bigfala tangkiu long Jeova mo ogenaesesen blong hem from spesel trening we oli kasem, mo from wok we ol misinari ya oli mas go blong mekem “long olgeta ples long wol”!—Ol Wok 1:8.
[Bokis blong pija long pej 29]
Kaontem Klas Ya
Oli kamaot long hamas kantri: 11
Oli go wok long hamas kantri: 24
Hamas studen: 48
Hamas hasban mo waef tugeta: 24
Oli gat hamas yia: 34
Hamas yia long trutok: 17
Hamas yia finis oli prij fultaem: 12
[Tok Blong Pija Long Pej 26]
Klas Namba 107 Blong Wajtaoa Baebol Skul Blong Gilead
Long ol nem aninit, yumi kaontem ol laen i stat long fored i gobak biaen, mo stat long lefsaed i go long raetsaed.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, R.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, B.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.