!Oli Eksplenem Buk Blong Daniel!
OL MAN we oli kam long Distrik Asembli, oli wantem tumas blong kasem wan kopi blong niufala buk ya we i gat 320 pej, nem blong hem, Pay Attention to Daniel’s Prophecy! ?Wanem filing blong olgeta long saed blong buk ya? Makem wanem we sam long olgeta i talem.
“Mi mi sem mak long plante yangfala we oli no kasem 20 yia yet. Mi no gat intres nating blong stadi long ol stori blong bifo. Taswe, taem mi kasem wan kopi blong niufala buk ya, Pay Attention to Daniel’s Prophecy!, mi no rili intres blong ridim. Be wan dei mi traem blong ridim smol. !Man, faswan tingting blong mi i rong olgeta! Hemia wan long ol beswan buk we mi bin ridim. !Hem i wan buk we i rili kasem intres blong mi! Mi no moa harem se mi stap ridim wan stori we i hapen wan taosen yia bifo. Hemia faswan taem we mi harem se mi save putum mi wan long ples blong Daniel. Mi save pijarem se laef bambae i olsem wanem sipos oli tekemaot mi long famle blong mi, sanem mi long narafala kantri, mo traem bilif blong mi bakegen mo bakegen. Tangkiu tumas from buk ya.”—Anya.
“Wanem we i halpem mi bigwan, hemia klia mesej ya se, Jeova i bos fulwan long ol bisnes we oli gat paoa long ol man blong hem. Ol vison mo ol drim blong Daniel wetem ol drim blong ol narafala we hem i givim mining blong olgeta, oli soemaot klia se oltaem, bambae God blong yumi i mekem ol samting oli kamaot folem stamba tingting blong hem. Samting ya i mekem hop blong yumi i kam strong moa se ol profet tok blong Baebol long saed blong niufala wol, bambae oli mas kamtru.”—Chester.
“Mi laekem fasin we yufala i folem blong mekem stori blong Daniel i gat laef. Yufala i makem gud ol samting we oli stap oltaem long tingting blong Daniel mo ol samting we oli impoten long hem. Samting ya i mekem se mi kasem moa save from wanem Jeova i lavem Daniel tumas. Taem hem i kasem traem mo ol man oli mekem nogud long hem, hem i no wari long hem wan. Faswan samting we hem i wari long hem, hemia Jeova mo naesfala nem blong Hem. Tangkiu tumas we yufala i mekem ol poen ya oli klia.”—Joy.
“!Hemia nao buk we yumi bin wet long hem longtaem finis i kam! I neva gat wan buk we i soem plante samting long saed blong buk blong Daniel mo olsem wanem hem i stret long yumi wanwan. Long naet afta we mi kasem niufala buk ya, mi ridim bighaf blong hem. Biaen, mi stop mo mi prea long Jeova blong talem bigfala tangkiu long hem.”—Mark.
“Wanem we mitufala i no tingbaot, hemia paoa we buk ya i save gat long ol pikinini blong mitufala. Wan i gat faef yia, mo narawan i gat tri yia. . . . Stori blong Daniel, Hananea, Misael, mo Asarea, we i stap long My Book of Bible Stories, i wan long ol beswan stori we ol pikinini blong mitufala oli laekem. Be fasin we buk ya Daniel’s Prophecy i folem blong talem stori ya, i gat bigfala paoa long tufala pikinini blong mitufala. Mitufala i neva ting se samting olsem i save hapen. Nating se tufala i smol yet, i luk olsem se tufala i naf blong folem fasin blong ol yangfala ya we oli gat stret fasin. !Oli nambawan eksampel long ol pikinini blong mitufala! !Yufala i rili givim wan nambawan tul long mifala! !Tangkiu, tangkiu tumas!”—Bethel.
“I olsem se mi stap wetem ol yangfala Hibru taem oli kasem traem from bilif blong olgeta. Mo samting ya i leftemap tingting blong mi blong jekemap bilif blong mi. Bokis ya blong tingtingbak, “?Yufala i Makem Wanem?” i mekem ol wanwan japta ya oli kasem hat blong mi. Tangkiu bakegen from wan narafala nambawan buk we yufala i wokem.”—Lydia.