Mi Traehad Longtaem Gogo Mi Faenem Hem
“?JEOVA? ?Hu ya Jeova?” Wan smol gel i tekem Baebol blong famle blong hem we i stap long lanwis Amenia, mo i soem nem ya long Silvia, we i gat eit yia. Ale, Sylvia i askem long ol man raonabaot long Yerevan, Amenia, long ples we hem i laef long hem, be i no gat wan man i save talem long hem hu ya Jeova—papa mama blong hem, tija blong hem, mo ol pris long jos blong hem, olgeta evriwan oli no save.
Silvia i kam bigwan, i kamaot long skul, mo i kasem wan wok, be hem i no save yet hu ya Jeova. Yangfala Silvia, we hem i wan bigfala woman finis, hem i mas aot long Amenia. Smoltaem biaen, hem i kasem Polan, mo i stap long wan smol rum wetem sam narafala refuji. Oltaem sam man i kam visitim fren ya we tufala i stap long sem rum. Silvia i askem long hem se, “?Hu ya ol man ya we oli stap kam luk yu?” Hem i ansa se: “Olgeta ya oli ol Witnes blong Jeova. Oli kam blong tijim mi long saed blong Baebol.”
Silvia i harem gud tumas taem hem i harem nem ya Jeova. Naoia, hem i gat jans blong save Jeova, mo se Jeova i wan God we i lavem ol man tumas. Be smoltaem biaen, hem i mas aot long Polan. Hem i go stap smoltaem long Denmak, narasaed long Baltik Si. Hem i karem smol samting nomo wetem hem. Sam long ol samting we hem i karem, hemia ol buk blong eksplenem Baebol, we ol Witnes blong Jeova oli prentem. Silvia i faenem adres blong ol ofis blong Watch Tower Society long laswan pej blong wan long ol buk ya. !Hemia wan impoten samting we hem i karem wetem hem—wan rod blong kasem Jeova!
Long Denmak, oli tekem Silvia i go long wan kamp blong ol refuji, mo kwiktaem nomo hem i stat blong lukaot ol Witnes blong Jeova. Hem i luk finis long lis blong adres, mo hem i save se branj ofis blong Watch Tower Society long Denmak i stap long taon ya Holbæk. ?Be taon ya i stap wea? !Oli mas tekem Silvia long tren, i go long wan narafala kamp blong ol refuji, mo long rod ya nao, hem i pastru long taon ya Holbæk! Ale, bakegen hem i haremgud we i haremgud tumas.
Smoltaem biaen, long wan dei we san i saen, i no gat klaod nating, Silvia i tekem tren, i gobak long Holbæk mo i aot long ples blong tren, i wokbaot i go kasem branj ofis. Hem i tingtingbak long taem ya, nao i talem se: “Taem mi kam insaed long garen, mi sidaon long wan jea, mo mi talem long mi wan se, ‘!Man! Hemia paradaes stret!’” Long branj ofis, oli welkamemgud hem, mo biaen hem i gat jans blong stadi long Baebol.
Be afta, oli mas muvum hem i go long ol defren ples bakegen. Long ol defren kamp blong refuji, Silvia i mas faenem ol Witnes blong Jeova, mo hem i mas statem stadi long Baebol bakegen mo bakegen. Ale, tu yia biaen, hem i lanem plante samting finis long saed blong Baebol, we i naf blong hem i givim laef blong hem i go long Jeova. Hem i tekem baptaes, mo smoltaem biaen, hem i statem wok blong fultaem paenia. Long 1998, gavman blong Denmak i givim raet long hem blong stap long Denmak.
Naoia, Silvia i gat 26 yia, mo hem i stap wok long ples ya we i bin mekem hem i tingbaot paradaes, hemia branj ofis blong ol Witnes blong Jeova long Denmak. Hem i talem se: “?Bae mi talem wanem? Mi bin lukaot Jeova taem mi wan smol gel yet. Naoia mi faenem hem. Mi bin wantem tumas blong spenem laef blong mi long wok blong hem, mo naoia mi stap long ples ya, long Betel. !Mi prea se bambae mi stap long haos ya long ol yia we oli kam!”