?Jeova i Wantem Yumi Blong Mekem Wanem?
“?Jeova i askem wanem long yu . . . ? Yu mas wokem stret fasin, yu mas laekem kaen fasin, mo yu mas wokbaot wetem God we tingting blong yu i stap daon. Hemia nomo hem i wantem.”—MAEKA 6:8, NW.
1, 2. ?Wanem samting we maet i mekem tingting blong sam man blong Jeova i foldaon, be wanem i save halpem olgeta ya?
VERA i wan Kristin sista we i holemstrong long bilif longtaem finis. Naoia hem i gat raonabaot 75 yia, mo hem i stap siksik plante. Hem i se: “Sam samtaem, mi lukluk i goaot long windo mo mi luk ol Kristin brata sista blong mi oli stap prij long ol haos wanwan. Samting ya i mekem mi mi krae from we mi wantem tumas blong stap wetem olgeta, be sik i blokem mi.”
2 ?Samtaem yu bin harem olsemia? Ating olgeta man we oli lavem Jeova, oli wantem wokbaot long nem blong hem mo mekem ol samting we hem i askem olgeta blong mekem. ?Be olsem wanem sipos yumi sik, yumi olfala, no yumi gat wok insaed long famle? Maet tingting blong yumi i foldaon from we maet ol samting ya oli blokem yumi blong mekem evri samting we hat blong yumi i wantem tumas blong mekem long wok blong God. Sipos hemia nao tingting blong yu, ating bambae yu harem se ol tok blong Maeka japta 6 mo japta 7 oli leftemap tingting blong yu. Ol japta ya oli soem se samting we Jeova i askem long yumi, oli no bitim mak mo yumi evriwan i naf blong mekem.
?God i Mekem Wanem Long Ol Man Blong Hem?
3. ?Wanem fasin we Jeova i mekem long ol stronghed man Isrel?
3 Fastaem bambae yumi lukluk long Maeka 6:3-5 mo makem wanem fasin we Jeova i mekem long ol man blong hem. Rimemba se, long taem blong Maeka, ol man Isrel oli stap mekem samting we i agens long Jeova. Nating se i olsem, yumi luk se Jeova i sore long olgeta from we hem i gohed yet blong singaot olgeta se, “Ol man blong mi.” Hem i talem long olgeta se: “Ol man blong mi. Yufala i mas tingbaot ol samting ya.” Hem i no tok strong mo stretem olgeta, be hem i traem pulum hat blong olgeta taem hem i askem se: “?Mi mi putum wanem long yufala we i hevi tumas, we yufala i harem se yufala i no save karem?” Hem i talem tu se oli mas talemaot stret long hem, samting ya we i mekem tingting blong olgeta i nogud.
4. ?Eksampol we God i soem long saed blong fasin sore i mas pulum yumi blong mekem wanem?
4 !Tru, Jeova i soem wan nambawan eksampol long yumi evriwan! Hem i soem sore taem hem i singaot ol stronghed man Isrel mo Juda long taem blong Maeka se “ol man blong mi,” mo i askem long olgeta blong oli mas talem wanem samting we oli harem se i no stret. Yes, i gud sipos yumi tu yumi soem sore mo kaen fasin taem yumi joen no wok wanples wetem ol brata sista long kongregesen. I tru, sam long olgeta maet oli gat fasin we yumi no laekem, no sam maet oli slak long saed blong spirit. Be sipos oli lavem Jeova, yumi mas wantem halpem olgeta mo soem sore long olgeta.
5. ?Wanem stamba poen we Maeka 6:6, 7 i soemaot?
5 Nekis samting we yumi save tokbaot i stap long Maeka 6:6, 7. Maeka i askem plante kwestin, i se: “?Hae God i God blong heven, mo sipos mi mi go blong mekem wosip long hem, bambae mi karem wanem samting blong mekem sakrefaes long hem? ?Bambae mi tekem ol yang buluk we i nambawan, blong bonem blong givim long hem? ?No sipos mi givim plante taosen sipsip long hem, bambae hem i save glad? ?No sipos mi stap karem fulap olifoel i kam long hem, bambae hem i save harem gud? ?No sipos mi kilim fasbon pikinini boe blong mi, mi givim long hem, sakrefaes ya i save pemaot sin blong mi?” Tru tumas, i no ‘plante taosen sipsip no fulap olifoel’ we bambae oli mekem Jeova i glad. Be i gat wan samting we i save mekem hem i glad. ?Wanem samting ya?
Yumi Mas Wokem Stret Fasin
6. ?Wanem trifala fasin we i kamaot long God we Maeka 6:8 i tokbaot?
6 Long Maeka 6:8 (NW ) yumi lanem samting we Jeova i wantem yumi blong mekem. Long ples ya Maeka i askem se: “?Mo Jeova i askem wanem long yu from? Yu mas wokem stret fasin, yu mas laekem kaen fasin, mo yu mas wokbaot wetem God we tingting blong yu i stap daon. Hemia nomo hem i wantem.” Trifala samting ya i joen wetem filing, tingting, mo ol aksin blong yumi. Yes, yumi mas filim se yumi wantem wokem ol fasin ya, yumi mas tingbaot olsem wanem yumi save soemaot olgeta, mo yumi mas tekem aksin blong mekem ol fasin ya. Naoia bambae yumi lukluk long wanwan long trifala fasin ya.
7, 8. (a) ?Wanem mining blong “wokem stret fasin”? (b) ?Wanem fasin nogud we i plante long taem blong Maeka?
7 “Wokem stret fasin” i min se yumi mekem samting we i stret. Stret fasin blong God blong mekem ol samting, hemia nao fasin we yumi mas traehad blong folem. Ol man long taem blong Maeka oli no wokem stret fasin. Oli no mekem i stret long man. ?Oli mekem olsem wanem? Tingbaot Maeka 6:10. Lashaf blong vas ya i talem se ol bisnes man oli stap yusum “ol kap blong makem ol samting,” we “oli blong giaman nomo,” hemia i min se ol kap ya oli smol tumas. Vas 11 i gohed se oli stap yusum “skel we i blong giaman nomo.” Mo folem vas 12, ol man ya oli “man blong giaman.” Yes, ol bisnes man long taem blong Maeka oli trikim man taem oli yusum ol giaman skel mo kap, mo taem oli stap giaman.
8 Be i no ol bisnesman nomo we oli gat ol fasin ya. Ol man we oli jajem man long kot, olgeta tu oli gat ol fasin ya. Maeka 7:3 i soemaot se “ol haeman wetem ol jaj oli stap askem long man blong i pem olgeta, blong oli save haedem rong blong hem.” Ol man oli stap pem ol jaj, i olsem we oli pasem mane aninit long tebol, blong kasem jajem we olgeta oli wantem agensem ol man we oli mekem i stret nomo. “Man we i gat paoa” i stap joen long ol kruked fasin ya. Tru, Maeka i talem se ol haeman, ol jaj, mo ol man we oli gat paoa, evriwan oli stap “joen wanples,” oli stap givgivhan long olgeta, blong mekem ol wok we oli nogud.
9. ?Taem ol rabis man oli no folem stret fasin, olsem wanem long ol man Juda mo ol man Isrel?
9 Ol rabis lida oli no gat stret fasin ale oli spolem ol man Juda mo ol man Isrel. Maeka 7:5 i talem se from we oli no stap mekem stret fasin, ale i no moa gat tras bitwin ol man, nating se oli gud fren no oli hasban mo waef. Vas 6 i soemaot se trabol ya i mekem we ol famle we fastaem oli joengud, be oli no moa laeklaekem olgeta nating. Ol pikinini oli agensem papa blong olgeta, mo ol gel oli agensem mama blong olgeta.
10. ?Wanem fasin we ol Kristin oli gat nating se wol i no gat stret fasin?
10 ?Olsem wanem tede? ?Yumi luk fasin olsem tu? Yes, olsem Maeka, yumi luk we ol man raonabaot long yumi oli no folem stret fasin, oli no trastem olgeta, mo oli no moa gat tru fren mo famle we i joengud. Be yumi ol man blong God we yumi laef long wol ya we i no gat stret fasin, yumi no letem spirit blong wol i kam insaed long Kristin kongregesen. Defren olgeta, yumi wokhad blong mekem ol gudfala fasin evri dei, olsem fasin blong tok tru oltaem mo yumi no gat tu fes. Yes, ‘oltaem yumi stap mekem i stret nomo.’ (Hibrus 13:18) ?Yu yu luksave se taem yumi gat stret fasin yumi stap kasem plante blesing from we i gat tras bitwin long ol brata?
?Olsem Wanem Yumi Harem Jeova We i “Stap Singaot Long Yumi”?
11. ?Olsem wanem Maeka 7:12 i stap kamtru?
11 Maeka i talemaot se, nating sipos i no gat stret fasin yet, be i gat taem we olgeta man bambae oli harem gud from we i no moa gat man we bambae i mekem i no stret long olgeta. Profet ya i talemaot se olgeta man “long ol narafala ples daon long solwota, mo long ol ples antap long hil” bambae oli hivap wanples blong wosipim Jeova. (Maeka 7:12) Tede profet tok ya i kamtru bakegen long fasin we i bigwan moa. Be hem i no kamtru long wan kantri nomo. Hem i kamtru long ol man wanwan we oli blong enikaen kantri. Ol man ya oli stap harem gud from we God nao i stap mekem i stret long olgeta. (Aesea 42:1) ?Wanem i soemaot samting ya?
12. ?Olsem wanem ol man tede oli stap harem Jeova “i stap singaot” long olgeta?
12 Blong ansa long kwestin ya, bambae yumi tingbaot ol tok we Maeka i bin raetem bifo long vas ya. Long Maeka 6:9 yumi ridim se: “Man we i waes i mas fraet long Hae God, i mas ona gud long hem. Naoia, hem i stap singaot long yumi long taon ya.” ?Olsem wanem ol man long olgeta kantri oli save harem “hem i stap singaot”? ?Mo olsem wanem samting ya i joen wetem stret fasin we yumi mas wokem? I tru, ol man tede oli no save harem prapa voes blong God. Be taem yumi stap prij raon long wol, i olsem we ol man blong defdefren kala mo fasin blong laef oli stap harem voes blong Jeova. From samting ya, ol man we oli lesin oli ‘fraet long God,’ min se oli gat bigfala ona long nem blong hem. Taswe yumi stap mekem i stret long narafala mo yumi stap soemaot lav taem yumi wok strong blong talemaot Kingdom. Taem yumi talemaot nem blong God long evri man, we yumi no mekem i gud moa long wan i bitim narawan, ale yumi stap “wokem stret fasin.”
Yumi Mas Laekem Kaen Fasin
13. ?Olsem wanem lav we i kaengud i defren long lav?
13 Naoia bambae yumi tokbaot namba tu samting we Maeka 6:8 i talem se yumi mas gat. Jeova i wantem we yumi “laekem kaen fasin.” Tok ya long lanwis Hibru we yumi tanem i kam “kaen fasin” i save karem sem mining olsem “lav we i kaengud,” no “lav we i stap tru.” Lav we i kaengud i min se yumi soem intres long narafala, yumi kea mo yumi tingbaot olgeta. Lav we i kaengud hem i defren long lav. ?Hem i defren olsem wanem? Lav i wan tok we yumi save yusum long plante samting, yumi no yusum nomo long man be yumi save yusum tu, taem yumi tokbaot olting no maet sam tingting. Eksampol, Baebol i talem se man i “lavem waen mo oel” mo man i “lavem waes.” (Ol Proveb 21:17, NW; 29:3, NW ) Be lav we i kaengud hem i wan fasin we oltaem yumi yusum long ol man nomo, antap moa long olgeta we oli mekem wok blong God. Taswe Maeka 7:20 (NW ) i talem se Jeova God i ‘soem lav we i kaengud long Ebraham,’ man ya we i wok blong Hem.
14, 15. ?Olsem wanem yumi soem lav we i kaengud, mo wanem wan pruf blong samting ya?
14 Folem tok blong Maeka 7:18 profet i talem se God i ‘glad blong soemaot lav [no “lav we i kaengud,” long NW ].’ Maeka 6:8 i no talem nomo se yumi mas soemaot lav we i kaengud be hem i talem se yumi mas laekem, no lavem, fasin ya. ?Ol vas ya oli tijim yumi long wanem? Oli tijim yumi se lav we i kaengud hem i wan fasin we man i no fosem hem blong soem. Man i soem fasin ya from we hem i wantem tumas blong mekem olsem. Yes, yumi folem fasin blong Jeova, yumi glad blong soem lav we i kaengud long olgeta we oli sot long sam samting.
15 Tede, lav we i kaengud hem i wan fasin we i makemaot ol man blong God. I gat plante eksampol blong soemaot samting ya be bambae yumi tokbaot wan nomo. Long Jun 2001, wan hariken i mekem bigbigfala ren i foldaon long Texas, Yunaeted Stet, mekem se wota i kam antap bigwan long ples ya. Wota ya i spolem plante taosen haos, wetem plante handred haos blong ol Witnes blong Jeova tu. Ale, samwe long 10,000 Witnes oli givim taem mo paoa blong olgeta fri nomo blong halpem ol Kristin brata blong olgeta we oli stap long trabol ya. I tekem bitim sikis manis blong oli bildim bakegen 8 Haos Kingdom mo bitim 700 haos blong ol Kristin brata blong olgeta. Ol volontia ya oli wokhad, oli yusum taem blong olgeta long dei, long naet mo long wiken, blong kam givhan. Olgeta we oli no naf blong kam wok, oli givim presen olsem kakae, mane mo ol narafala samting bakegen. ?From wanem olgeta taosen Witnes ya oli kam givhan long ol brata blong olgeta? From we oli “laekem kaen fasin.” !Mo i gud tumas blong save se ol Kristin brata sista raon long wol oli stap mekem olkaen wok olsem from lav we i kaengud! Yes, i no wan baden blong soem “lav we i kaengud,” be hem i wan glad!
Wokbaot Wetem God We Tingting Blong Yumi i Stap Daon
16. ?Wanem pijatok i halpem yumi blong luksave se yumi mas gat tingting daon taem yumi wokbaot wetem God?
16 Namba tri samting we Maeka 6:8, (NW ) i tokbaot hemia se yumi mas “wokbaot wetem God we tingting blong [yumi] i stap daon.” Hemia i min se yumi luksave wanem samting we yumi no naf blong mekem mo yumi dipen fulwan long God. Tingbaot pijatok ya: Wan smol gel i stap holemtaet han blong papa blong hem taem tufala i wokbaot long strong win. Smol gel ya i save se paoa blong hem i no naf, be hem i trastem papa blong hem. Yumi tu yumi mas luksave se i gat sam samting we yumi no naf blong mekem, be yumi mas trastem Papa blong yumi long heven. ?Olsem wanem yumi save gat fasin ya blong trastem God oltaem? Wan samting we yumi save mekem hemia blong no fogetem from wanem i waes blong stap klosap long God. Maeka i mekem yumi tingbaot tri risen se: Jeova i Man blong Sevem yumi, hem i Man blong Lidim yumi, mo i Man blong Protektem yumi.
17. ?Olsem wanem Jeova i sevem, i lidim mo i protektem ol man blong hem bifo?
17 Long Maeka 6:4, 5, God i talem se: “Taem ol olfala bubu blong yufala oli stap long Ijip bifo, mi nao mi tekemaot olgeta i kam long ples ya.” Yes, Jeova i Sevem Isrel. Nao hem i gohed i se: “Moses mo Eron mo Meriam, mi nao mi sanem trifala, blong trifala i lidim olgeta i kam.” Yes Jeova i yusum Moses mo Eron blong lidim nesen blong Isrel, mo Meriam i lidim ol woman blong Isrel blong mekem danis from we Isrel i win. (Eksodas 7:1, 2; 15:1, 19-21; Dutronome 34:10) Jeova i yusum sam man blong hem blong oli lidim pipol blong hem. Long vas 5, Jeova i talem long nesen blong Isrel se oli mas tingbaot se hem i protektem olgeta long rabis plan blong Balak mo Balam. Mo hem nao i lukaotgud long ol man Isrel long lashaf blong trip blong olgeta, taem oli aot long Sitim long Moab go kasem we oli kamtru long Gilgal long Promes Lan.
18. ?Olsem wanem God i stap olsem Man blong Sevem yumi, Man blong Lidim yumi, mo Man blong Protektem yumi tede?
18 Taem yumi wokbaot wetem God, hem i sevem yumi, yumi aot long wol blong Setan. Hem i yusum Tok blong hem mo ogenaesesen blong hem blong lidim yumi. Mo hem i protektem ogenaesesen blong hem, we yumi pat blong hem, taem sam man oli traem spolem hem. Taswe i gat plante risen blong soemaot se yumi mas holemtaet han blong Papa blong yumi long heven taem yumi wokbaot wetem hem tru long ol strong win blong rabis wol ya, mo finisim lashaf blong trip blong yumi blong go kasem ples ya we i gud moa i bitim Promes Lan—hemia niufala wol blong God we stret fasin nomo i stap long hem.
19. ?From wanem i nidim tingting daon taem i gat sam samting we yumi no naf blong mekem?
19 Sipos yumi wokbaot wetem God we tingting blong yumi i stap daon, bambae yumi luk ol samting olsem we oli rili stap. Yumi save mekem olsem from we, taem yumi gat tingting daon, yumi luksave se i gat sam samting we yumi naf blong mekem mo i gat sam samting we yumi no naf blong mekem. Maet yumi olfala, no yumi sik oltaem, ale yumi no save mekem plante long wok blong Jeova. Be i nogud blong letem samting ya i mekem tingting blong yumi i foldaon. I gud blong tingbaot se God i glad long ol traehad blong yumi mo presen we yumi givim i go long hem, folem ‘ol samting nomo we yumi gat, i no folem ol samting we yumi no gat.’ (2 Korin 8:12) Yes, Jeova i wantem we yumi mekem wok blong hem wetem gladhat, no long olgeta laef blong yumi, stret olsem we yumi naf blong mekem. (Kolosi 3:23) Taem yumi traehad mo gat strong tingting blong mekem wanem we yumi naf blong mekem long wok blong God, God bambae i blesem yumi bigwan.—Ol Proveb 10:22.
Blesing From Fasin Blong Stap Wet Long God
20. ?Wanem save i mas mekem se yumi wantem gohed blong wet long God olsem Maeka?
20 Taem yumi luk blesing blong Jeova long laef blong yumi, yumi wantem gat sem tingting ya olsem Maeka. Hem i talemaot se: “Bambae mi soemaot fasin blong stap wet long God ya we i save sevem mi.” (Maeka 7:7, NW ) ?Olsem wanem ol tok ya oli joen long fasin blong wokbaot wetem God we tingting blong yumi i stap daon? Fasin blong stap wet long God, no longfala tingting, i halpem yumi blong no harem nogud from we dei blong Jeova i no kamtru yet. (Ol Proveb 13:12) Tru ya, yumi evriwan i wantem tumas se rabis wol ya i lus. Be evri wik i gat plante taosen man we oli jes stat blong wokbaot wetem God. Save ya i mekem se yumi wantem stap wet long God. Wan man we i Witnes blong longtaem finis, i talem se: “Taem mi lukluk i gobak long olgeta 55 yia we mi spenem long wok blong prij, mi sua fulwan se mi no westem taem blong mi blong wet long Jeova. Defren olgeta, mi blokem mi wan long plante trabol we oli save mekem hat blong mi i soa.” ?Yu tu yu harem olsem?
21, 22. ?Olsem wanem ol tok blong Maeka 7:14 oli stap kamtru tede?
21 Taem yumi wokbaot wetem Jeova yumi stap mekem i gud long yumi wan bakegen. Long Maeka 7:14 (NW ) Maeka i talem se ol man blong God oli olsem ol sipsip we oli stap klosap long man we i lukaot long olgeta. Tede, profet tok ya i kamtru fulwan long smol grup blong Isrel long saed blong spirit mo ol “narafala sipsip.” Oli putum tras blong olgeta long Jeova mo oli go haed long hem olsem Man blong Lukaot long Sipsip. Olgeta ya oli “stap olgeta nomo long bus, long ples we i gat plante gras i stap.” Hemia i min se, long saed blong spirit, oli no joen long wol ya we i fulap long trabol mo denja.—Jon 10:16; Dutronome 33:28; Jeremaea 49:31; Galesia 6:16.
22 Yes, olsem Maeka 7:14 (NW ) i soemaot, ol man blong Jeova oli harem gud from we oli no sot long wan samting. Maeka i tokbaot ol sipsip blong God, hemia ol man blong hem, i se: “Yu letem olgeta oli stap kakae ol gudfala gras long Basan mo Gilead.” Ol sipsip long Basan mo Gilead oli harem gud long gras long ples ya we i grin gud, nao oli stap fatfatgud. Long sem fasin, ol man blong God tede oli harem gud long fulap samting we oli kasem long saed blong spirit. Hemia wan blesing bakegen we ol man oli save kasem taem oli wokbaot wetem God we tingting blong olgeta i stap daon.—Namba 32:1; Dutronome 32:14.
23. ?Yumi save lanem wanem long Maeka 7:18, 19?
23 Long Maeka 7:18, 19 profet Maeka i tokbaot filing blong Jeova se hem i wantem fogivim sin blong ol man we oli tanem tingting blong olgeta. Vas 18 i talem se Jeova i stap ‘fogivim mo tekemaot ol sin.’ Long vas 19 yumi ridim se bambae hem i ‘tekemaot sin blong olgeta, i sakem i godaon olgeta long medel solwota.’ ?Yumi lanem wanem from fasin ya blong God? Maet yumi save askem long yumi wan se, ?Mi mi stap folem fasin blong Jeova long saed ya? ?Mi mi fogivim mastik no rong we narafala i mekem long mi? Taem narafala i tanem tingting mo i lukaot rod blong soem se hem i sore from samting we hem i mekem, ating bambae yumi wantem soemaot fasin blong Jeova we i rere blong fogif fulwan mo blong olwe.
24. ?Olsem wanem profet tok blong Maeka i givhan long yu?
24 ?Wanem gudfala samting we yumi kasem long stadi ya blong profet tok blong Maeka? Profet tok ya i mekem yumi tingbaot bakegen se Jeova i givim wan hop we i tru long olgeta man we oli kam klosap long hem. (Maeka 2:1-13) Profet tok ya i leftemap tingting blong yumi blong mekem wanem we yumi naf blong mekem blong leftemap trufala wosip mo gohed blong wokbaot long nem blong God gogo i no save finis. (Maeka 4:1-4) Mo yumi sua fulwan se nomata wanem samting we i hapen long laef blong yumi, yumi naf oltaem blong mekem wanem we Jeova i wantem. Yes, profet tok blong Maeka i rili givim paoa long yumi blong wokbaot long nem blong Jeova.
?Bambae Yu Yu Ansa Olsem Wanem?
• ?Folem tok blong Maeka 6:8, Jeova i askem wanem long yumi?
• ?Sipos yumi “wokem stret fasin” i min se yumi mas mekem wanem?
• ?Olsem wanem yumi save soem se yumi “laekem kaen fasin”?
• ?Yumi mas mekem wanem blong ‘wokbaot wetem God we tingting blong yumi i stap daon’?
[Tok blong pija long pej 21]
Nating se ol man long taem blong Maeka oli nogud olgeta, Maeka i mekem samting we Jeova i wantem. Yu tu yu save mekem i sem mak
[Tok blong pija long pej 23]
Wokem stret fasin taem yu prij long enikaen man
[Tok blong pija long pej 23]
Soem se yu laekem kaen fasin taem yu givhan long olgeta we oli sot long sam samting
[Tok blong pija long pej 23]
Yu gat tingting daon taem yu givim bes blong yu mo long semtaem yu luksave samting we yu no naf blong mekem