?Yu Yu Rimemba?
?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:
• ?Olsem wanem ol man oli jusum Disemba 25 olsem taem we Jisas i bon?
Tok blong God i no talem dei we Jisas i bon long hem. Buk ya Enciclopedia Hispánica i talem se: “Disemba 25, we i Krismas dei, hem i no stret dei we Jisas i bon long hem. Be hem i wan lafet we i makem dei blong yia we i longfala moa long ol narafala dei, we ol man Rom oli stap selebretem, mo oli jenisim lafet ya i kam wan Kristin lafet.” Ol man Rom bifo oli mekem lafet blong welkamem san we i kam antap long koltaem, oli mekem ol wael lafet, mo oli givim presen i go long narafala.—12/15, pej 4-5.
• ?Ol tok blong Steven long Ol Wok 7:59 i soemaot se hem i prea long Jisas?
Nogat. Baebol i soemaot se, ol prea oli mas go long Jeova God nomo. Taem Steven i luk Jisas long wan vison, hem i harem se hem i save toktok stret long Jisas, nao i talem long hem se: “Jisas, Masta. Plis yu tekem mi mi kam stap wetem yu.” Steven i save we Jisas i gat paoa blong mekem ol dedman oli laef bakegen. (Jon 5:27-29) Taswe Steven i askem se Jisas i tekem laef blong hem, go kasem taem ya we bambae Jisas i mekem hem i laef bakegen.—1/1, pej 31.
• ?Olsem wanem yumi save se God i no makemaot fiuja blong wanwan man?
God i letem yumi fri blong jusum rod blong yumi, taswe bilif ya se hem i makemaot finis laef blong ol man, i no tru. !Sipos Jeova i makemaot finis laef blong yumi bifo we yumi bon, mo biaen hem i panisim yumi from ol mastik blong yumi, samting ya i min se God i no gat lav, mo hem i no stret! (Dutronome 32:4; 1 Jon 4:8)—1/15, pej 4-5.
• ?From wanem i no stret blong talem se ol merikel oli no bin hapen?
Sam man blong saens oli agri se oli gat smol save nomo long saed blong ol bigbigfala samting we God i wokem, taswe oli no moa save talem stret se wan bigfala samting i no save hapen nating. Oli jes talem nomo se ‘ating’ wan bigfala samting i save hapen.—2/15, pej 5-6.
• ?From wanem Jaj ya Samson i talem long papa mama blong hem se hem i laekem gel Filistia blong kam woman blong hem? (Jajes 14:2)
Sipos wan man i mared wetem wan woman we i wosip long ol narafala god, man ya i brekem loa blong God. (Eksodas 34:11-16) Be, gel Filistia ya i “stret gud” long ae blong Samson. Samson “i stap mekem rod blong spolem” ol man Filistia, mo woman ya i stret gud blong kasem mak ya. Tabu spirit blong God i givhan long hem. (Jajes 13:25; 14:3, 4, 6)—3/15, pej 26.
• ?Wan Kristin i save givim wan samting olsem presen no mane long wan man blong gavman from wok we hem i mekem blong hem?
I no stret blong pem no givim wan samting we i sas long wan man blong gavman blong i mekem wok we i agensem loa, no blong pulum hem blong twistim loa, no blong i mekem i gud moa long yumi bitim narafala man. Hemia kruked fasin. Be, sipos man i wantem givim wan mane no wan presen long wan man blong gavman from we hem i mekemgud wok blong hem, no blong hem i mekem wan wok we i stret folem loa, no blong blokem wan fasin we i no stret, hemia i no kruked fasin.—4/1, pej 29.