Ol Enjel—?Oli Gat Paoa Long Yumi Olsem Wanem?

PROFET Daniel i tokbaot vison we hem i luk long saed blong ol enjel blong God i se: “I gat plante taosen [enjel] we oli man blong wok blong [God], oli stap long ples ya, mo i gat plante narafala [enjel] we oli plante we plante tumas, man i no save kaontem olgeta, oli stap stanap long fes blong [God].” (Daniel 7:10) Vas ya i soemaot klia from wanem God i wokem ol enjel. Ol enjel oli olsem ol man blong wok blong God mo oli rere blong mekem wanem we God i talem long olgeta.

God i yusum ol enjel blong mekem sam samting we i joen wetem laef blong ol man. Bambae yumi tokbaot olsem wanem God i yusum olgeta blong mekem ol man blong Hem oli strong mo blong protektem olgeta, blong givim mesej long ol man mo blong jajem ol rabis man.

Ol Enjel Oli Mekem Man i Strong Mo Oli Protektem Man

Ol enjel oli soem bigfala intres long ol man from we, bifo olgeta, taem God i wokem wol mo faswan man mo woman, ol enjel oli stap finis mo oli luk ol samting we Hem i stap wokem. Jisas Kraes i olsem stret pija blong waes blong God. Bifo we hem i kam long wol, hem i talem se: “Mi hapi tumas blong luk ol man.” (Ol Proveb 8:31) Mo Baebol i soemaot se “ol enjel tu oli wantem save” long saed blong Jisas mo fiuja ya we ol profet blong God oli bin talemaot.​—1 Pita 1:​11, 12.

Plante yia i pas, nao ol enjel oli luk we bighaf blong ol man oli no mekem wok blong Man ya we i wokem olgeta. !I sua se ol enjel ya we oli stap tru long God oli mas harem nogud! Be i defren taem wan sinman i tanem tingting blong hem from sin blong hem mo i lukluk i go long Jeova. Long taem ya, “ol enjel blong God oli glad tumas.” (Luk 15:10) Ol enjel oli intres bigwan long laef blong olgeta we oli mekem wok blong God, mo Jeova i yusum olgeta plante taem blong mekem ol man blong hem long wol ya oli strong mo blong protektem olgeta. (Hibrus 1:14) Tingbaot sam eksampol.

Tu enjel i halpem gudfala man ya Lot mo tufala gel blong hem blong oli aot long taon blong Sodom mo Gomora, mo blong oli sef taem God i spolem rabis taon ya.a (Jenesis 19:​1, 15-26) Plante handred yia afta, sam man oli sakem profet Daniel i go long hol we i fulap long ol laeon. Be ol laeon oli no kakae hem. ?From wanem? Daniel i talem se: “!God i sanem enjel blong hem i kam satem maot blong ol laeon ya, nao oli no kakae mi!” (Daniel 6:22) Ol enjel oli givhan long Jisas taem hem i statem wok blong hem long wol ya. (Mak 1:13) Mo smoltaem bifo we Jisas i ded, wan enjel i kamtru long hem mo i “mekem hem i strong bakegen.” (Luk 22:43) !Hemia i rili wan blesing blong Jisas taem ol enjel oli givhan long hem long ol hadtaem long laef blong hem! Mo tu wan enjel i tekemaot Pita long kalabus.​—Ol Wok 12:​6-11.

?Olsem wanem long taem blong yumi? ?Ol enjel oli protektem yumi? Sipos yumi wosipim Jeova folem Tok blong hem, hem i promes se ol enjel blong hem we oli gat paoa mo we yumi no save luk olgeta oli save protektem yumi. Baebol i promes se: “Oltaem enjel blong [Jeova] i stap lukaot gud long olgeta we oli ona long hem, mo i stap tekemaot olgeta long trabol.”​—Ol Sam 34:7.

Yumi mas luksave se ol enjel oli mekem wanem we God i wantem be i no wanem we man i wantem. (Ol Sam 103:​20, 21) Oli letem God i lidim olgeta, oli no obei long ol oda we man i givim long olgeta. Taswe, yumi mas prea long Jeova God nomo blong i halpem yumi, i no long ol enjel. (Matiu 26:53) I tru se tede yumi no save luk ol enjel, taswe yumi no save talem se God i yusum olgeta go kasem wanem mak blong halpem ol man. Be yumi save se Jeova i “givim paoa long ol man we oli ona long hem long olgeta tingting blong olgeta.” (2 Kronikel 16:9; Ol Sam 91:11) Mo yumi save se “sipos yumi askem samting long hem we i stret long tingting blong hem, hem [God] bambae i harem prea blong yumi.”​—1 Jon 5:14.

Baebol i talem tu se ol prea blong yumi mo wosip blong yumi i mas go long God nomo. (Eksodas 20:​3-5; Ol Sam 5:​1, 2; Matiu 6:9) Ol enjel ya we oli stap tru long God oli leftemap tingting blong yumi blong mekem olsem. Eksampol, taem aposol Jon i traem blong mekem wosip long wan enjel, enjel ya i blokem hem mo i talem se: “No, yu no mekem olsem. . . . Yu mas bodaon long God nomo blong mekem wosip long hem.”​—Revelesen 19:10.

Ol Enjel Oli Talemaot Ol Mesej Blong God

Long lanwis Hibru mo Grik, tok ya we yumi tanem i kam “enjel” i minim “man blong karem mesej,” mo hemia wan narafala wok we olgeta enjel ya oli mekem. Oli talemaot ol mesej blong God long ol man. Olsem nao, “God i sanem enjel ya blong hem, Gabriel, blong i go long wan taon long Galili, nem blong hem Nasaret.” ?From wanem? Blong talem long wan yangfala woman we nem blong hem Meri se nating we hem i no slip wetem wan man yet, be bambae hem i bonem wan pikinini boe we oli mas putum nem blong hem se Jisas. (Luk 1:​26-31) Mo tu, wan enjel i kamtru long ol man blong lukaot long sipsip we oli stap afsaed long vilej, mo i talem long olgeta se “Mesaea [Kraes] ya we i Masta” i bon. (Luk 2:​8-11) Long sem fasin, ol enjel oli karem mesej blong God i kam long Ebraham, Moses, Jisas, mo sam narafala man we Baebol i tokbaot.​—Jenesis 18:​1-5, 10; Eksodas 3:​1, 2; Luk 22:​39-43.

?Tede, olsem wanem ol enjel oli talemaot mesej blong God long ol man? Tingbaot wok we Jisas i talem long ol man blong hem blong oli mekem bifo we rabis fasin blong wol ya i finis. Hem i talem se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae [“en,” NW ] i save kam.” (Matiu 24:​3, 14) Ol Witnes blong Jeova oli spenem bitim plante milian aoa evri yia blong talemaot gud nius blong Kingdom blong God. ?Be, yu yu save se ol enjel tu oli joen long wok ya? Aposol Jon i tokbaot wan vison we hem i bin luk se: “Nao mi luk we wan narafala enjel . . . i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis.” (Revelesen 14:​6, 7) Vas ya i soemaot impoten wok we ol enjel oli mekem blong givhan long ol man tede.

Ol Witnes blong Jeova tede oli luksave se ol enjel oli stap givhan long olgeta taem oli mekem wok ya blong prij long ol haos wanwan. Plante taem oli mitim wan man we i jes prea long God blong i sanem wan man blong halpem hem blong kasem save long ol stamba tingting blong God. Frut we i kamaot from wok blong ol enjel mo ol Witnes hemia se, evri yia plante taosen man oli kasem save long saed blong Jeova. Maet wok ya we ol enjel oli stap lidim mo we i save sevem laef blong man, i givhan long yu tu.

Ol Enjel Oli Mekem Jajmen Blong God i Kamtru

I tru se God i no givim raet long ol enjel blong jajem man, be hemia i no min se oli stap stanap nomo mo wajem ol man. (Jon 5:22; Hibrus 12:​22, 23) Long ol taem bifo, oli mekem wok blong givim panis long ol man, oli mekem jajmen blong God i kamtru. Olsem nao, God i yusum ol enjel blong agensem ol man Ijip taem oli holem ol man Isrel blong oli wok slef blong olgeta. (Ol Sam 78:49) Mo long wan naet nomo, “wan enjel blong Hae God” i kilim i ded 185,000 soldia long wan ples we ol enemi blong ol man blong God oli stap long hem.​—2 King 19:35.

Long fiuja tu, bambae ol enjel oli mekem bigfala jajmen blong God i kamtru long wol ya. Bambae Jisas i kam “wetem ol strong enjel blong hem, mo faea we i laet. Hem bambae i kam blong givim panis long olgeta we oli no save ona long God, mo long olgeta we oli no save obei long gud nius.” (2 Tesalonaeka 1:​7, 8) Bambae panis ya i go nomo long olgeta man we oli no wantem harem gud nius we ol Witnes oli stap talemaot long olgeta ples long wol wetem help blong ol enjel. Olgeta we oli lukaotem God mo obei long ol tijing blong Baebol, bambae oli no kasem panis ya.​—Sefanaea 2:3.

!Yumi glad tumas we oltaem ol enjel ya we oli stap tru long God oli stap mekem ol samting we God i wantem oli kamtru! Jeova i yusum olgeta blong halpem mo protektem ol man long wol ya we oli stap tru long Hem. Samting ya i leftemap tingting blong yumi, from we i gat ol rabis enjel tu we Baebol i kolem olgeta se ol dimon. Olgeta ya oli wantem blong spolem yumi.

?Hu Ya Ol Dimon?

Long ol 1,500 yia afta we Setan i trikim Iv long garen blong Iden, ol enjel blong God long heven oli luksave we Devel Setan i pulum olgeta man blong oli lego God. Smol man nomo oli stap tru long God, olsem Ebel, Inok mo Noa. (Jenesis 3:​1-7; Hibrus 11:​4, 5, 7) Sam enjel tu oli biaen long Setan. Baebol i tokbaot ol enjel ya olsem ol spirit man we oli no obei “long taem blong Noa.” (1 Pita 3:​19, 20) ?Wanem samting i soemaot se oli no obei?

Long taem blong Noa, i gat sam enjel we oli rebel agensem God nao oli livim prapa ples blong olgeta long heven blong kamdaon long wol mo tekem bodi olsem man. ?From wanem oli mekem olsem? Hemia from we oli wantem tumas blong mekem nogud long saed blong seks wetem ol woman blong wol ya. From samting ya, oli gat ol pikinini, ol bigbigfala man blong faet we oli kolem olgeta ol Nefilim. Mo tu “olgeta man long wol oli stap mekem i nogud tumas, mo oltaem, tingting blong olgeta i fulap nomo long ol rabis fasin.” Nating se i olsem, Jeova God i no letem se rabis fasin i stap longtaem long wol. Jeova i mekem Bigfala Wota i ron we i kavremap ful wol nao i tekemaot olgeta rabis man wetem ol Nefilim ya tu. Olgeta nomo we oli stap tru long God oli stap laef.​—Jenesis 6:​1-7, 17; 7:23.

Ol rabis enjel ya we oli rebel agensem God, oli no ded taem Bigfala Wota i ron. Oli lego bodi blong olgeta long wol ya mo oli gobak long heven blong laef olsem ol spirit man. Biaen oli kam ol dimon. Oli jusum blong stap long saed blong Devel Setan we Baebol i kolem hem “jif blong ol devel.” (Matiu 12:​24-27) Ol dimon oli wantem we ol man oli wosip long olgeta. Hemia sem samting we bos blong olgeta tu, Setan, i wantem.

Ol dimon oli save mekem bigfala trabol, be yumi no nid blong fraet long olgeta. Oli no gat olgeta paoa. Taem ol enjel we oli no obei long God long taem blong Noa oli gobak long heven, oli no moa gat raet blong joen wetem ol narafala enjel blong God we oli stap tru long hem. Defren olgeta, God i blokem laet long saed blong spirit blong i no moa saenaot long olgeta mekem se oli gat wan fiuja we i nogud nomo. Yes, oli stap long tudak long saed blong spirit we Baebol i kolem se Tataros. (2 Pita 2:​4, NW ) Jeova i fasem olgeta long “jen we i no save brok samtaem,” blong mekem se oli stap long tudak long saed blong spirit. Mo tu naoia, oli no moa save tekem bodi olsem man bakegen.​—Jud 6.

?Bambae Yu Yu Mas Mekem Wanem?

?Ol dimon, oli gohed yet blong gat paoa long laef blong ol man? Yes. Oli yusum “ol giaman trik” olsem we bos blong olgeta Devel Setan tu i stap yusum. (Efesas 6:​11, 12) Be, taem yumi mekem ol advaes blong God long Baebol i wok long laef blong yumi, yumi save stanap strong agensem ol dimon ya. Mo tu, ol enjel we oli gat bigfala paoa oli save lukaotgud long olgeta we oli lavem God.

!I impoten we yu stadi Baebol blong lanem ol samting we God i wantem, mo yu mekem ol samting ya oli wok long laef blong yu! Yu save askem wan Witnes blong Jeova we i stap klosap long yu no yu raet long olgeta we oli wokem magasin ya, blong oli halpem yu blong lanem moa long saed blong ol tijing blong Baebol. Ol Witnes blong Jeova bambae oli glad blong stadi Baebol wetem yu we yu no pem mo long wan taem we i stret long yu.

[Futnot]

[Bokis blong pija long pej 6]

?OLSEM WANEM OL ENJEL OLI MEKEM WOK BLONG OLGETA?

Jeova i gat wan bigfala hip blong ol enjel we oli mekem wok blong olgeta olsem:

Enjel ya we i gat bigfala paoa mo haenem bitim ol narawan hemia Mikael, jif blong ol enjel, no Jisas Kraes. (1 Tesalonaeka 4:16; Jud 9) Ol seraf, ol jerubim, mo ol narafala enjel oli stap aninit long hem.

Ol seraf oli stap long wan hae posisen long plan blong God. Oli stap stanap raonabaot long bigfala jea blong God. Wok blong olgeta i blong leftemap God se Hem i tabu tumas, mo oli lukaotgud long ol man blong God blong oli stap klin oltaem long saed blong spirit.​—Aesea 6:​1-3, 6, 7.

Ol jerubim oli stanap klosap long bigfala jea blong God mo oli leftemap haenem blong Jeova.​—Ol Sam 80:1; 99:1; Esikel 10:​1, 2.

Ol narafala enjel oli wok long nem blong Jeova mo oli mekem wil blong Jeova i kamtru.

[Tok blong pija long pej 6]

Ol enjel oli mekem jajmen blong God i kamtru