Faenemaot Trutok Long Saed Blong Heven

!OL MAN oli harem gud tumas long tingting ya blong go laef long heven! Plante skul olsem Muslim, Hindu, Budis, ol memba blong ol jos blong Krisendom, mo plante man tu we oli no intres long ol skul, oli bilif se bambae oli gat wan narafala laef afta we oli ded. Oli tingbaot heven olsem wan ples we i naes tumas, mo we oli save harem gud blong stap long hem from we oli no moa safa. Mo tu, oli ting se oli save joen bakegen wetem “olgeta we oli lavem olgeta tumas we oli livim olgeta finis.” Nating se i olsem, tingting blong bighaf blong ol man hemia se: Evriwan oli wantem go long heven, be i no gat wan we i wantem ded blong go long heven. ?From wanem i olsem?

Sipos God i wokem yumi blong yumi ded mo yumi go long heven, ating plante man bambae oli wantem ded. Ating bambae oli olsem ol pikinini we oli stap wantem tumas blong kam bigman mo mared. Be klosap olgeta man oli no wantem ded.

Nating se i olsem, ol lida blong skul oli talem se yumi laef sot taem nomo long wol, mo afta, yumi go long heven, we i stret ples blong yumi. Man ya we bifo hem i ajbisop blong Washington, D.C., Theodore Edgar Cardinal McCarrick, i talem se: “God i no wokem yumi blong yumi laef long wol. Hem i wokem yumi blong laef long heven.” Man we bifo i presiden blong U.S. National Association of Evangelicals, i talem wan tok we i klosap sem mak, i se: “Yumi laef blong presem God mo blong go long heven . . . from we heven nao i hom blong yumi.”

Olgeta we oli ting se bambae oli gat wan laef long heven afta we oli ded, bilif blong olgeta i stanap long smol save nomo. George Barna i presiden blong wan kampani we i stap lukaot moa save long saed blong ol skul. George i talem se plante man oli gat “ol tingting long saed blong laef mo laef afta ded. Oli kasem ol tingting ya long plante defren samting, olsem ol muvi, miusik, mo ol stori buk.” Wan pasta blong skul ya Episkopelian long Florida, i talem se: “Yumi no save plante samting long saed blong heven, yumi save nomo se heven i ples we God i stap long hem.”

Wan impoten save we Baebol i tokbaot, hemia heven. ?Baebol i talem se heven i olsem wanem? ?God i wokem man blong i laef long heven? ?Sipos ol man oli go long heven, bambae oli mekem wanem longwe?

[Tok blong makem poen long pej 3]

?From wanem plante man oli wantem go long heven, be smol nomo oli wantem ded blong go long heven?