?Pikinini i Mas Lanem Wanem?
“Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.”—2 TIMOTI 3:16.
PIKININI i mas save trutok long saed blong God. ?Hem i save lanem trutok ya long weples? Hem i save lanem long Baebol, buk ya we plante man long wol oli tinghae long hem.
Baebol i olsem wan leta we i kam long God. Long leta ya, God i talemaot ol fasin blong hem mo hem i givim advaes long saed blong ol fasin we olgeta pikinini blong hem oli mas folem, nomata se oli yangfala no oli olfala. Bambae yumi tokbaot sam tijing blong Baebol, mo bambae yumi luk wanem samting we pikinini i save lanem long ol tijing ya.
?God i wantem se yumi save wanem long saed blong hem?
▪ Baebol i tijim se: “Ol man oli mas save se yu nomo, we nem blong yu Jehova, yu yu hae olgeta, antap long olgeta samting long wol.”—Ol Sam 83:18, King James Version.
Yumi lanem se: God i no wan paoa nomo, be hem i laef i stap mo hem i gat prapa nem blong hem.
▪ Baebol i tijim se: “Hem i save olgeta tingting blong yumi, mo olgeta samting we yumi wantem. Sipos yu girap, yu lukaot hem, bambae hem i glad blong tekem yu, be sipos yu tanem baksaed long hem, bambae hem i lego yu yu stap olsem, gogo yu lus olgeta.”—1 Kronikel 28:9.
Yumi lanem se: Jehova God i tingbaot yumi evriwan, wetem ol smol pikinini tu. (Ol Sam 10:14; 146:9) Hem i wantem se yumi save hem.
▪ Baebol i tijim se: “Bambae yufala i no mas spolem . . . ol pikinini we papa blong olgeta i ded. Mi mi Hae God, mo sipos yufala i mekem i strong long olgeta, nao oli krae i kam long mi blong mi givhan long olgeta, bambae mi mi save harem olgeta.”—Eksodas 22:22-24.
Yumi lanem se: Jehova i lesin long prea blong ol smol pikinini tu. Yumi save toktok long God oltaem, mo yumi save talemaot olgeta tingting mo filing blong yumi long Hem.
▪ Baebol i tijim se: “God ya blong yumi ol laen blong Isrel hem i tabu, be oltaem, olgeta ya oli stap traem hem, oli stap mekem hem i harem nogud.”—Ol Sam 78:41.
Yumi lanem se: Toktok blong yumi mo samting we yumi mekem i save mekem Jehova i harem gud no i harem nogud, taswe yumi mas tingting gud bifo we yumi toktok mo bifo we yumi mekem samting.
?Yumi mas soemaot wanem fasin long ol man we oli no sem mak long yumi?
▪ Baebol i tijim se: “God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Ol Wok 10:34, 35.
Yumi lanem se: Sipos Jehova i glad long enikaen man nomata laef blong olgeta i defdefren, yumi no mas tingting nogud long olgeta from we kala blong skin no fes blong olgeta i defren long yumi.
▪ Baebol i tijim se: “Sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta. Be yufala i mas toktok gud long olgeta we yufala i ona long olgeta.”—1 Pita 3:15, 16.
Yumi lanem se: Taem yumi stap tokbaot ol tijing blong jos long ol man, yumi mas strong blong talemaot ol tingting blong yumi, be yumi no mas rao long olgeta. Mo tu, yumi mas soemaot respek long ol man we bilif blong olgeta i defren long yumi.
?Yumi mas soemaot wanem fasin long ol famle blong yumi?
▪ Baebol i tijim se: “Ol pikinini. Oltaem yufala i mas obei long ol papa mo mama blong yufala, . . . mo fasin ya i save mekem Masta blong yumi i glad long yufala.”—Kolosi 3:20.
Yumi lanem se: Pikinini we i obei, hem i soemaot se hem i lavem papa mo mama blong hem. Be i no hemia nomo, hem i soemaot tu se hem i wantem mekem God i glad.
▪ Baebol i tijim se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi.”—Kolosi 3:13.
Yumi lanem se: Samtaem, ol narafala man mo famle blong yumi oli mekem yumi harem nogud. Be sipos yumi wantem we God i fogivim yumi, yumi mas lanem blong fogivim ol narafala man tu. —Matiu 6:14, 15.
?From wanem yumi mas tok tru mo yumi kaen long ol man?
▪ Baebol i tijim se: “Yufala i mas finis long ol giaman toktok, . . . [mo] yufala i mas tok tru nomo long yufala.”—Efesas 4:25.
Yumi lanem se: Taem yumi tok tru, yumi stap folem fasin blong God mo yumi mekem Hem i harem gud. Sipos yumi gat fasin ya blong talem ol giaman toktok, yumi save kam olsem enemi blong God, Setan, we hem i “stamba blong ol giaman toktok.”—Jon 8:44; Taetas 1:2.
▪ Baebol i tijim se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.”—Matiu 7:12.
Yumi lanem se: Yumi mas tingbaot ol filing, ol tingting, mo ol samting we famle blong yumi mo ol narafala long komuniti blong yumi i nidim. Taem yumi “gat sore” long narafala, bambae narafala tu i mekem sem fasin long yumi.—1 Pita 3:8; Luk 6:38.
Ol eksampol we yumi tokbaot finis, oli soemaot se ol tijing blong Baebol i save halpem pikinini blong i tingbaot narafala, i gat respek, mo i gat sore long narafala. ?Be hu i mas tijim ol samting ya long pikinini?