Baebol i Ansa

?From wanem Baebol i singaot Jisas se Pikinini blong God?

God i no nidim wan woman blong hem i save gat pikinini, from we Hem nao i mekem olgeta samting we i laef. Hem i mekem ol man blong oli naf blong folem fasin blong hem. From samting ya, taem God i mekem Adam, Baebol i singaot hem se “pikinini blong God.” Jisas tu, Baebol i singaot hem se “Pikinini blong God.” Hemia from we Jisas i gat ol fasin olsem Papa blong hem.—Ridim Luk 3:38; Jon 1:14, 49.

?Wetaem God i mekem Jisas?

God i mekem Jisas fastaem long Adam. Taswe, hem i yusum Jisas blong i mekem olgeta narafala samting mo ol enjel tu. From samting ya nao, Baebol i talem se Jisas hem i ‘fasbon blong God.’—Ridim Hibrus 1:6.

Bifo we Jisas i bon long Betlehem, hem i stap long heven olsem wan enjel. Long stret taem, God i karem laef blong Jisas mo i putum i go long bel blong Meri, nao hem i bon olsem wan man long wol ya.—Ridim Luk 1:30-32; Jon 6:38; 8:23.

?God i mekem we Jisas i bon i kam long wol ya blong wanem? ?Wanem spesel wok we Jisas i mekem? Yu save faenem ansa blong ol kwestin ya long Baebol. Ol ansa ya bambae oli givim moa save long yu long ol samting we God mo Jisas i mekem blong yumi, nao bambae yu wantem tumas blong talem tangkiu long tufala.