?Yu Yu Save Go Moa, Blong Givim Woning Long Narafala?

I gat wan naesfala muvi we i soemaot laef blong ol man long taon blong San Francisco, long Amerika long ol yia 1900. Nem blong muvi ya, A Trip Down Market Street. Plante man oli laekem muvi ya. Muvi ya i no gat saon long hem. Ol man we oli mekem muvi ya, oli putum wan kamera long fored blong wan trak mo oli letem hem i ron olbaot long pablik rod. Long muvi ya, i gat ol kat we ol hos oli pulum mo ol trak blong bifo. Mo i gat ol man we oli go blong pem ol samting long stoa mo ol man blong salem niuspepa.

Be samting we i mekem man i sore taem i wajem muvi ya, hemia se afta we oli mekem muvi ya long Eprel 1906, wan etkwek i mekem faea i kamaot, nao i kilim i ded plante taosen man long taon ya. Mo klosap bighaf blong taon ya i lus. Trabol ya i hapen long 18 Eprel. Maet sam long ol man long muvi ya oli laef smoltaem nomo. Scott Miles, we i wan famle blong wan long ol man we i mekem muvi ya, i talem se: “Mi stap luk ol man long muvi ya, be olgeta oli no save samting we bambae i hapen long olgeta. Mi sore long olgeta.”

Wan samting olsem i stap hapen tede. Evri dei, yumi luk ol man oli gohed blong mekem ol samting long laef blong olgeta. Oli no save se i gat wan bigfala trabol i stap kam, we bambae i spolem rabis wol ya wetem ol samting blong hem. Yumi sore long ol man ya. Taem i gat wan etkwek, man i sek nomo long hem. Be long saed blong bigfala trabol i defren. Yumi gat smol janis yet blong givim woning long ol man, long saed blong dei blong Jehova blong jajem ol man. Taswe, i gud we evri wik, yumi joen long wok blong prij long ol haos wanwan. ?Be olsem wanem? ?Yu yu save go moa, blong givim woning long narafala?

JISAS I RERE OLTAEM BLONG PRIJ

Jisas i soemaot wan nambawan eksampol long yumi. Hem i rere oltaem blong prij. Hem i prij long evri man we hem i mitim, olsem wan man blong tekem mane blong takis, mo wan woman we hem i mitim long wel long medel dei. (Luk 19:1-5; Jon 4:5-10, 21-24) Jisas i glad blong tijim ol man long taem we hem i wantem spel. From we hem i sore long ol man, ale hem i tijim olgeta long plante samting. (Mak 6:30-34) ?Olsem wanem yumi save folem fasin blong Jisas, blong tinghae long wok blong prij?

OLI YUSUM EVRI JANIS BLONG PRIJ

Melika i laef long wan stori haos we i gat plante rum, mo i gat sekiuriti long hem. Long haos ya, i gat wan ofis blong welkamem ol man, mo i gat eleveta.a Plante long olgeta we oli stap long rum klosap long Melika, oli ol studen we oli blong narafala kantri. Namba blong mobaelfon blong olgeta mo nem blong olgeta i no stap long buk blong telefon, we i stap long ofis long haos ya. Melika i glad tumas long janis we hem i gat blong storian long Baebol wetem ol man we oli ren long haos ya. Hem i storian wetem olgeta taem oli stap long ofis blong welkamem ol man, no taem oli stap long eleveta. Hem i talem se: “Mi mi luk ples ya olsem teritori blong mi.” Melika i karem ol magasin long plante defren lanwis mo plante long ol man we hem i storian wetem olgeta, oli glad blong tekem ol traket mo ol magasin. Hem i pulum olgeta tu, blong oli go long Websaet ya, jw.org, mo hem i statem sam Baebol stadi.

Sonia tu i rere oltaem blong prij long eni man we hem i mitim. Hem i wok long wan klinik, mo hem i traehad blong prij long olgeta man we oli wok wetem hem. Fastaem, hem i traem blong save gud ol samting we olgeta oli wantem mo oli laekem. Biaen, long medel dei, taem hem i luk se wan i stap hem wan, ale hem tekem janis blong storian wetem hem long Baebol. Gudfala samting we i kamaot hemia se, hem i statem tu Baebol stadi. Mo Sonia i gat tingting tu, blong yusum smol taem blong hem blong spel, blong prij long ol man we oli stap wet blong pas long dokta.

YU YUSUM GUD OL JANIS BLONG YU

Wan man we i laef long taem blong etkwek ya long 1906, i talem se: “Hemia wan bigfala trabol we i neva hapen long wan taon.” Nating se i olsem, i no longtaem bambae ol man oli luksave se olgeta disasta ya oli smol nomo, taem yumi skelem wetem bigfala dei ya, we i blong givim panis “long olgeta we oli no save ona long God.” (2 Tes. 1:8) Jehova i wantem tumas we ol man oli tanem tingting blong olgeta, mo hat blong olgeta, blong oli save lesin long woning we ol man blong hem oli stap talemaot.—2 Pita 3:9; Rev. 14:6, 7.

Yu gat janis ya blong givhan long ol man blong oli luksave se yumi stap long ol las dei. Mo yumi givhan long olgeta blong oli no tingbaot olgeta nomo, be oli traehad blong lukaot Jehova. (Sef. 2:2, 3) ?Yu yu yusumgud evri janis blong prij long ol man we yu wok wetem olgeta, ol man raonabaot long yu, mo long enikaen man we yu mitim? ?Bambae yu yu go moa, blong givim woning long narafala?