?YU YU SAVE?
?From wanem oli brekem leg blong tufala man nogud long saed blong Jisas?
Baebol i talem se afta we oli nilim Jisas mo tufala man nogud long pos, ‘ol laen blong Isrel, oli askem long Paelat blong i sanem ol man blong hem blong oli go brekem leg blong trifala, blong trifala i ded kwik, nao oli save tekemaot bodi blong trifala.’—Jon 19:31.
Loa blong ol man Jiu i talem se sipos oli hangem wan man nogud long pos, ‘bodi blong hem i no mas hang go kasem nekis dei.’ (Dutronome 21:22, 23) Ol man Jiu oli folem sem rul ya, taem ol man Rom oli hangem ol man long pos. Oli brekem leg blong ol man blong oli ded kwik, nao oli save berem olgeta bifo we Sabat dei i stat.
Taem oli wantem panisim wan man nogud, oli putum hem long wan pos nao oli nilim tufala han blong hem antap mo tufala leg blong hem daon. Taem oli stanemap pos ya, man ya bambae i harem i soa we i soa bitim mak. Hemia from we ful bodi blong hem i hang nomo long tufala nil ya. Ale taem hem i wantem pulum win, hem i yusum leg blong hem blong traem leftemap bodi blong hem i go antap smol. Be sipos oli brekem ol bun blong leg blong hem, bambae i had long hem blong mekem olsem. Bambae hem i ded kwiktaem nomo, from we hem i no save pulum gud win, no maet from we hem i sek.
?Olsem wanem ol man bifo oli yusum sling long faet?
Deved i yusum sling blong kilim Golaeat. Maet hem i lanem blong yusum sling, taem hem i stap lukaot long ol sipsip blong papa blong hem.—1 Samuel 17:40-50.
Hemia sling we ol man Asiria oli yusumblong faet agensem wan strong taon blong ol man Jiu
Long taem bifo, sling i olsem wan saen blong ol man Ijip mo Asiria. Sling ya oli wokem tang blong hem long skin blong anamol, nao oli fasem rop long saedsaed blong hem. Ale taem man i wantem yusum sling ya, hem i tekem wan raon ston we i olsem saes blong wan smol aranis mo i hevi olsem 250 gram, i putum long tang blong sling ya. Biaen hem i slingim mo i lego wan rop, nao ston ya i flae i go stret long samting we hem i wantem kasem.
Long Medel Is, ol man blong digim graon oli faenemaot se i gat plante ston blong sling we ol man bifo oli yusum long faet. Ol soldia we oli tren gud, oli save slingim ston ya i spid olsem 160 kasem 240 kilometa long wan aoa. Sam man blong hae save oli stap agiu se wan sling i no save sakem ston i go longwe sem mak olsem wan ara we man i sutum i go. Nating se i olsem wan sling i save kilim man i ded tu.—Jajes 20:16.