‘Yu Mas Lavem Ol Man Raonabaot Long Yu’

1, 2. (1) ?Wanem nambatu loa we i hae moa long ol narafala loa? (2) ?Bambae yumi ansa long wanem kwestin?

TAEM wan Farisi i askem long Jisas se wanem loa i hae moa long ol narafala loa, Jisas i talem se: ‘Yu mas lavem [Jehova] we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Long las stadi, yumi lanem mining blong ol tok ya. Mo Jisas i talem nambatu loa we i hae moa long ol narafala loa, se: “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.”—Mat. 22:34-39.

² Jisas i talem se yumi mas lavem ol man we oli stap raonabaot long yumi. ?Be hu ya ol man we oli stap raonabaot long yumi? ?Olsem wanem yumi soemaot se yumi lavem olgeta? Bambae yumi ansa long ol kwestin ya, mo bambae yumi luk se taem yumi lavem ol man, evriwan i kasem blesing from, mo Jehova tu i glad.

?HU YA OL MAN WE OLI STAP RAONABAOT LONG YUMI?

3, 4. (1) ?Jisas i talem wanem parabol? (2) ?Man Sameria i givhan olsem wanem long man we i hafded long rod? (Yu luk pija long stat blong stadi.)

³ Maet yumi ting se ol man we oli stap raonabaot long yumi, hemia ol man we oli stap klosap long haos blong yumi. (Prov. 27:10) Be taem wan man i askem long Jisas se: “?Hu ol man ya we oli stap raonabaot long mi?”, Jisas i talem parabol blong gudfala man Sameria long hem, mo hem i eksplenem se fasin blong lavem ol narafala i minim wanem. (Ridim Luk 10:29-37.) Long parabol ya, ol stilman oli kilim wan man nao hem i hafded i stap long rod. Wan pris mo wan Livaet, tufala i luk hem. Tufala nao i mas sore long man ya, be nogat, tufala i no givhan long hem. Wan man Sameria nao i givhan long hem. Long taem ya, ol man Isrel oli no laekem nating ol man Sameria.—Jon 4:9.

⁴ Man Sameria ya i wasem ol soa blong man ya wetem waen mo oel blong traem mekem oli kam gud bakegen. Mo hem i tekem man ya i go long wan hotel, mo i givim 2,000 vatu long man blong hotel. Mane ya i pei blong wan wokman we i wok tu ful dei. (Mat. 20:2) Ol samting we man Sameria ya i mekem, oli soemaot se hem i lavem man we i stap raonabaot long hem, hemia man ya we i hafded long rod. Yumi tu yumi save mekem olsem man Sameria ya, sipos yumi sore long ol man mo yumi lavem olgeta.

5. ?Afta long Hariken Sandy, olsem wanem ol Witnes blong Jehova oli soemaot se oli lavem ol man?

⁵ Yumi laef long ‘ol las dei’ mo bighaf blong ol man oli no gat sore. Plante man oli raf, oli laekem faet, mo oli no lavem ol man raonabaot long olgeta. (2 Tim. 3:1-3) Long 29 Oktoba 2012, wan bigfala hariken we nem blong hem Sandy, i spolemgud wan ples long taon blong New York. Plante man oli no moa gat lektrik, gas, mo sam narafala samting bakegen. Sore tumas, ol man ya oli harem nogud finis, be ol stilman oli go stil bakegen long haos blong olgeta. Be long sem ples ya, ol Witnes blong Jehova oli givgivhan long olgeta mo long ol narafala man tu, from we oli lavem ol man. ?Wanem sam samting we yumi save mekem, blong soemaot se yumi lavem ol man raonabaot long yumi?

SAM ROD BLONG YUMI SOEMAOT SE YUMI LAVEM OL MAN

6. ?Yumi save givhan long ol man olsem wanem?

⁶ Yumi yusum Baebol blong givhan long ol man. Taem yumi prij, yumi pulum tingting blong ol man i go long ‘tok blong Baebol we i stap mekem man i harem gud.’ (Rom 15:4) Yumi lavem ol man taem yumi yusum Baebol blong talemaot gud nius blong Kingdom long olgeta. (Mat. 24:14) !Hemia wan bigfala ona blong yumi go talemaot ol promes blong God long ol man!—Rom 15:13.

7. ?Wanem ya Nambawan Rul, mo wanem i hapen taem yumi folem rul ya?

⁷ Yumi folem Nambawan Rul. Jisas i tokbaot rul ya, i se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala. Hemia mining blong Loa we God i givim long Moses, mo mining blong ol tok blong ol profet tu.” (Mat. 7:12) “Loa we God i givim long Moses” i minim buk blong Jenesis kasem Dutronome, mo “ol tok blong ol profet” i minim ol buk blong ol profet tok long Hibru haf blong Baebol. Jehova i givim “Loa” mo “ol tok blong ol profet” long ol man blong hem, from we hem i lavem olgeta mo hem i wantem se olgeta oli lavlavem olgeta. Tede tu, Jehova i wantem se yumi lavem ol man. Hem i talem se: ‘Yufala i mas mekem ol fasin we i stret mo i gud. Bambae mi mekem i gud long olgeta we oli stap mekem ol fasin nomo we i stret.’ (Aes. 56:1, 2) Sipos yumi lavem ol narafala mo yumi mekem i gud long olgeta, bambae yumi glad tumas.

8. ?From wanem yumi mas lavem ol enemi blong yumi, mo wanem i save hapen sipos yumi mekem olsem?

⁸ Yumi lavem ol enemi blong yumi. Jehova i tijim yumi oltaem blong yumi lavem ol enemi blong yumi. Long taem blong Jisas, sam lida blong skul oli tijim ol man se oli mas agensem ol enemi blong olgeta. Be Jisas i givim advaes long ol man se: “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.” (Mat. 5:43-45) Pol i givim wan advaes we i klosap sem mak, i se: “Sipos wan enemi blong yu i hanggri, yu mas givim kakae long hem. Sipos hem i tosta, yu mas givim wota long hem.” (Rom 12:20; Prov. 25:21) Long Isrel bifo, Jehova i givim loa long ol man blong oli givhan long ol enemi blong olgeta, mo long ol anamol blong ol enemi ya. (Eks. 23:5) Sipos oli folem ol loa ya, sam man we fastaem oli no laeklaekem olgeta nating, oli save jenis nao oli kam gudfala fren. Taem yumi lavem ol enemi blong yumi, samting ya i save pulum olgeta blong oli jenisim tingting blong olgeta. Sam long olgeta oli save kam ol man blong Jehova tu.

9. ?Yumi mas mekem wanem blong yumi save joen gud wetem ol brata blong yumi?

⁹ ‘Yumi traehad blong joen gud wetem ol narafala man.’ (Hib. 12:14) Sipos yumi mas joen gud wetem olgeta man, hemia i min se yumi mas joen gud wetem ol brata mo sista blong yumi tu. Jisas i talem se: “Sipos yu kam long Olta blong God blong givim presen i go long hem, nao yu tingbaot we brata blong yu i stap kros long yu from wan samting, yu mas livim presen ya i stap long fes blong Olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God.” (Mat. 5:23, 24) Taem yumi gat wan problem wetem wan brata no sista, yumi soemaot se yumi lavem hem taem yumi traehad blong mekem pis kwiktaem. Samting ya i save mekem Jehova i glad.

10. ?From wanem yumi no mas jajem ol narafala?

¹⁰ Yumi no mas jajem ol narafala. Jisas i talem se: “Bambae yufala i no jajem narafala man, i nogud God i jajem yufala.” Jisas i tijim yumi se yumi no mas jajem ol narafala from mastik blong olgeta. Mo hem i talem se: “?From wanem yu stap tokbaot smol doti ya we i stap long ae blong brata blong yu, be yu no save luk bigfala wud ya we i stap long ae blong yu? ?Sipos bigfala wud ya i stap yet long ae blong yu, olsem wanem yu save talem long brata blong yu se, ‘Ei, yu kam. Mi tekemaot smol doti ya we i stap long ae blong yu.’? !Fasin blong yu i krangke! Fastaem yu mas tekemaot bigfala wud ya we i stap long ae blong yu, nao bambae yu save luklukgud blong tekemaot smol doti ya we i stap long ae blong brata blong yu.” (Mat. 7:1-5) Tok ya i tijim yumi se yumi no mas tok agensem ol narafala taem oli mekem mastik, from we ol mastik blong yumi tu oli plante tumas.

ROD WE I BESWAN BLONG LAVEM OL MAN

11, 12. ?Wanem wan impoten rod blong yumi soemaot se yumi lavem ol man?

¹¹ I gat plante rod blong yumi soemaot se yumi lavem ol man. Be Jisas i tijim yumi se rod we i beswan, hemia blong yumi talemaot gud nius blong Kingdom. (Luk 8:1) Hem i talem long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi.” (Mat. 28:19, 20) Taem yumi obei long Jisas, yumi save givhan long ol man blong oli lego bigfala rod we i isi, we i lidim man blong go lus, mo yumi soemaot smol rod we i strong, we i lidim man i go kasem laef. (Mat. 7:13, 14) Yumi save se Jehova i glad taem yumi wok strong.

¹² Jisas i givhan long plante man blong oli kasem save se oli nidim Jehova. (Mat. 5:3) Yumi folem fasin blong Jisas taem yumi talemaot “gud nius” blong God long ol man. (Rom 1:1) Yumi tijim olgeta se sakrefaes blong Jisas i openem rod blong Jehova i glad long olgeta, mo blong oli fren gud wetem hem. (2 Kor. 5:18, 19) Yes, wok blong talemaot gud nius i wan impoten rod blong yumi soemaot se yumi lavem ol man.

13. ?Yu yu harem olsem wanem taem yu tijim ol man blong oli save Jehova?

¹³ Taem yumi rerem gud ol poen we bambae yumi tokbaot wetem ol visit mo ol Baebol stadi, yumi naf blong tijim olgeta blong oli obei long Jehova. Maet samfala oli mas jenisim plante samting long laef blong olgeta. (1 Kor. 6:9-11) Yumi glad tumas we Jehova i givhan long ol man we oli gat tingting daon, blong oli gohed gud nao oli kam ol fren blong hem. (Wok 13:48) Ol man we fastaem oli harem nogud mo oli wari, oli harem gud mo oli trastem Jehova taem oli stadi. Hemia wan ona blong yumi mekem spesel wok ya blong soemaot se yumi lavem ol man.

POL I TOKBAOT FASIN BLONG MAN WE I LAVEM NARAFALA

14. ?Long 1 Korin 13:4-8, Pol i tokbaot wanem?

¹⁴ Pol i tokbaot fasin blong man we i rili lavem ol narafala. Sipos yumi folem ol fasin ya, bambae Jehova i blesem yumi, yumi no gat tumas trabol, mo yumi glad. (Ridim 1 Korin 13:4-8.) Ol tok blong Pol bambae oli tijim yumi long sam narafala rod blong yumi lavem ol man.

15. (1) ?From wanem yumi mas mekem tingting blong yumi i longfala mo yumi sore long ol man? (2) ?From wanem yumi no mas jalus mo flas?

¹⁵ “Man we i stap lavem man, tingting blong hem i longfala, mo hem i gat sore long man.” Jehova i mekem tingting blong hem i longfala long olgeta man mo hem i sore long olgeta, nating se oli sinman. Taswe, yumi tu yumi mas mekem sem fasin taem ol man oli mekem mastik, mo taem oli no kaen long yumi. Sam brata oli gat wok long kongregesen, no oli gat sam samting we yumi, yumi no gat. Be sipos yumi rili lavem ol brata blong yumi, bambae yumi no jalus long olgeta. Mo tu, yumi no mas flas mo mekem tingting blong yumi i go antap. Baebol i talem se Jehova i no laekem nating ol man we oli ‘flas mo oli ting se olgeta nomo oli nambawan.’—Prov. 21:4.

16, 17. ?Wanem sam rod blong yumi lavem narafala, we 1 Korin 13:5, 6 i tokbaot?

¹⁶ Sipos yumi lavem narafala, bambae yumi mekem i gud long hem. Bambae yumi no giaman long hem, yumi no stilim olting blong hem, mo yumi no mekem ol narafala samting we i mekem Jehova i no glad. Mo tu, bambae yumi ‘no tingbaot yumi nomo,’ be yumi tingbaot ol narafala fastaem. Taswe, oltaem bambae yumi gohed blong mekem i gud long ol narafala.—Fil. 2:4.

¹⁷ Sipos yumi lavem ol man, bambae yumi “no save kros kwik” mo yumi “no save stap kros longtaem.” Sipos wan man i mekem yumi harem nogud, yumi no kam kros kwiktaem long hem. Yumi no mas kaontem rong blong ol narafala. (1 Tes. 5:15) Sipos yumi gat nogud tingting long narafala, hemia i olsem we yumi stap mekem wan smol faea i kam bigwan, nao i bonem yumi mo ol narafala. (Lev. 19:18) Be i gud yumi fogivim narafala mo yumi fogetem rong blong hem. Sipos yumi lavem narafala, bambae yumi “no save harem gud long ol fasin we i no stret.” Sipos ol man oli mekem i no stret long wan man we i no laekem yumi nating, bambae yumi no glad blong luk se hem i stap harem nogud.—Ridim Ol Proveb 24:17, 18.

18. ?Fas Korin 13:7, 8 i talem wanem long fasin blong lavem man?

¹⁸ Pol i gohed blong talem se man we i lavem narafala, “hem i no save letem wan samting i daonem tingting blong hem.” Sipos wan man i mekem yumi harem nogud, nao biaen hem i talem sore, bambae yumi fogivim hem from we yumi lavem hem. Lav i mekem yumi “bilif strong long” evri tok we i stap long Baebol, mo yumi harem gud long olgeta samting we ogenaesesen blong Jehova i tijim yumi long hem. Mo yumi ‘putum tingting blong yumi i strong long’ tok blong God from we yumi trastem olgeta promes blong hem, nao samting ya i save pusum yumi blong go talemaot ol promes ya long ol narafala. (1 Pita 3:15) Mo taem yumi kasem trabol, yumi prea mo yumi putum tingting blong yumi i stap strong long ol promes blong God. Lav i mekem se yumi ‘no foldaon taem bigfala trabol i kasem yumi.’ Maet trabol ya, hem i sin we ol narafala oli mekem agensem yumi, no oli ronem mo kilim yumi, no sam narafala trabol bakegen. Mo tu, “fasin ya we oltaem man i lavem man, bambae i no save finis samtaem.” Ol man we oli obei long God, bambae oli gohed blong lavem ol narafala gogo i no save finis.

YUMI MAS GOHED BLONG LAVEM OL MAN

19, 20. ?Wanem vas i tijim yumi se yumi mas gohed blong lavem ol man?

¹⁹ Sipos yumi folem ol advaes blong Baebol, bambae yumi lavem ol man oltaem. (Mat. 22:39) Jehova mo Jisas tufala i wantem se yumi mekem olsem. Yumi mas lavem olgeta man, i no ol manples blong yumi nomo. Sipos samtaem yumi harem se i had blong lavem ol narafala, yumi save prea long Jehova blong hem i lidim yumi wetem tabu spirit. Hem bambae i givhan long yumi mo i blesem yumi.—Rom 8:26, 27.

²⁰ Loa ya blong man i lavem ol narafala i impoten tumas, taswe Baebol i talem se hem i “stamba blong ol narafala loa.” (Jem. 2:8) Jehova i givim plante loa long ol man blong hem bifo, blong tijim olgeta blong oli lavem ol man raonabaot long olgeta. Biaen, Jehova i pulum Pol blong hem i raetem se: “Ol loa ya, mo plante narafala loa bakegen, be i gat wan loa nomo we hem i kavremap olgeta evriwan we i talem se, ‘Yufala i mas lavem ol man we oli stap raonabaot long yufala, mo yufala i mas mekem i gud long olgeta, olsem we yufala i stap mekem i gud long yufala nomo.’”—Rom 13:8-10.

21, 22. ?From wanem yumi mas lavem Jehova mo ol man?

²¹ Jisas i givhan long yumi blong yumi kasem save hu ya ol man raonabaot long yumi, taem hem i talem se Papa blong hem i “stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Mat. 5:43-45) Jisas i stap tijim yumi se yumi mas lavem olgeta man, nomata se oli mekem i stret no nogat. Olsem yumi tokbaot finis, wan impoten wok we yumi save mekem blong soemaot long ol man se yumi lavem olgeta, hemia blong talemaot gud nius blong Kingdom long olgeta. !Sipos oli folem samting we oli lanem long Baebol, bambae oli kasem blesing ya blong kam ol fren blong God!

²² Yumi bin lanem se yumi mas lavem Jehova wetem olgeta hat, laef, mo tingting blong yumi. Mo yumi lanem tu se yumi mas lavem ol man raonabaot long yumi. Sipos yumi mekem olsem, yumi stap obei long tufala loa we tufala i hae moa long ol narafala loa. Mo tu yumi mekem Papa blong yumi, Jehova, i glad.