Las Enemi We God Bambae i Winim Hemia Ded

1, 2. ?Long stat, laef blong Adam mo Iv i olsem wanem? ?Wanem ol kwestin we oli kamaot?

TAEM God i wokem Adam mo Iv, tufala i no gat enemi. Tufala i stret gud olgeta, mo tufala i laef long wan paradaes. Tufala i fren gud wetem God ya we i mekem tufala, mo hem i tingbaot tufala olsem boe mo gel blong hem. (Jenesis 2:7-9; Luk 3:38) God i givim wan impoten wok long tufala. (Ridim Jenesis 1:28.) ?Tufala i mas laef hamas yia blong tufala i save finisim wok ya? Tufala i nidim sam yia nomo blong mekem wok ya blong ‘gat plante pikinini blong fulumap wol, mo mekem evri samting oli stap aninit long han blong tufala.’ Be tufala i mas laef olwe blong tufala i save lukaot long olgeta ‘samting we oli gat laef long wol ya.’ Tufala i save harem gud long wok ya blong olwe.

² ?From wanem naoia ol samting oli defren? Yumi gat plante enemi, wan long olgeta hemia ded. ?From wanem ol enemi ya oli mekem yumi harem nogud? ?Olsem wanem God bambae i spolem enemi ya? Ol ansa blong ol kwestin ya oli stap long Baebol, mo bambae yumi tokbaot olgeta long stadi ya.

WAN WONING WE I SOEMAOT LAV

3, 4. (1) ?Wanem loa we God i givim long Adam mo Iv? (2) ?From wanem i impoten we tufala i obei long loa ya?

³ God i mekem Adam mo Iv blong tufala i laef olwe. Taswe blong tufala i stap laef, tufala i nidim win, wota, kakae, mo tufala i nidim blong slip. Be samting we i moa impoten, hemia se tufala i mas fren gud wetem Jehova we hem i stamba blong laef. (Dutronome 8:3) Tufala i save gohed blong laef, sipos tufala i letem Jehova i lidim tufala. Bifo we Jehova i mekem Iv, hem i talem long Adam se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.”—Jenesis 2:16, 17.

⁴ Taem God i talem long Adam se, “tri ya we frut blong hem i save mekem yu yu save ol fasin we i gud, mo ol fasin we i nogud,” hem i soemaot se hem i gat raet blong talem wanem samting i gud mo wanem samting i nogud. Adam i save finis samting we i gud mo samting we i nogud. Hemia from we God i mekem hem blong i tekem fasin blong hem, mo i gat wan tingting we i save jajem hem. Tri ya i mekem Adam mo Iv i tingbaot se tufala i nidim Jehova blong i lidim tufala oltaem. Taem tufala i kakae frut blong tri ya, i olsem we tufala i talem long God se, “Mitufala i no nidim yu blong yu rul long mitufala.” From samting ya, tufala mo ol pikinini blong tufala oli ded olsem we Jehova i talem fastaem.

?DED I KASEM OL MAN OLSEM WANEM?

5. ?From wanem Adam mo Iv i no obei long Jehova?

⁵ Adam i talemaot loa ya blong Jehova long Iv. Iv i save gud loa ya, taswe hem i naf blong talem olgeta toktok ya bakegen. (Jenesis 3:1-3) Taem hem i toktok long snek, we hemia Setan, hem i talemaot ol tok ya bakegen. Setan i wantem tumas blong kasem paoa, mo i wantem folem prapa tingting blong hem. Taswe hem i letem ol tingting ya oli kam bigwan long hem. (Yu skelem wetem Jemes 1:14, 15.) Setan i talem long Iv se God i stap giaman, mo hem i talem se sipos Iv i no obei long God bambae hem i no ded, be bambae hem i kam olsem God. (Jenesis 3:4, 5) Iv i bilif long toktok blong Setan nao hem i kakae frut ya, mo i talem long Adam tu blong i kakae. Hemia i soemaot se Iv i wantem folem prapa tingting blong hem nomo. (Jenesis 3:6, 17) Setan i giaman long hem nomo. (Ridim 1 Timoti 2:14.) Adam i save se i no stret blong mekem olsem, be hem i lesin long Iv. I luk olsem se snek ya i wan gudfala fren, be i no tru. Hem i wan rabis enemi, mo i save nogud samting we bambae i kamaot from giaman blong hem.

6, 7. ?Jehova i jajem Adam mo Iv olsem wanem?

⁶ Adam mo Iv tufala i agensem Jehova we hem nao i givim laef, mo olgeta gudgudfala samting long tufala. Jehova i save samting we i hapen. (1 Kronikel 28:9; ridim Ol Proveb 15:3.) Be hem i letem Adam, mo Iv mo Setan blong oli soemaot long hem stret tingting we oli gat. Fasin blong olgeta, i mekem Jehova i harem nogud tumas. (Yu skelem wetem Jenesis 6:6.) Be Jehova i olsem wan gudfala Jaj, hem i mekem i stret long ol sinman.

⁷ God i tokbaot tri ya we frut blong hem i save mekem man i save ol fasin we i gud, mo ol fasin we i nogud. Hem i talem long Adam se: ‘Sipos yu kakae frut blong tri ya, be long sem dei nomo, bambae yu ded.’ Maet Adam i ting se bambae hem i ded, bifo we san i godaon. Be long sapa, Jehova i toktok long Adam mo Iv. (Jenesis 3:8) Jehova i wan gudfala Jaj, taswe hem i lesin long toktok blong tufala fastaem. (Jenesis 3:9-13) Biaen hem i talem long tufala se bambae tufala i ded. (Jenesis 3:14-19) Sipos hem i kilim tufala long sem dei ya, stamba tingting blong hem bambae i no save kamtru. (Aesea 55:11) Ol trabol we oli kamaot from sin, oli stat blong kasem tufala. Jehova i letem tufala i laef smoltaem, blong tufala i save gat ol pikinini we bambae oli gat wan gudfala laef long fiuja. Stret long dei ya we tufala i mekem sin, Jehova i tingbaot tufala olsem we tufala i ded finis. Hemia from we long tingting blong Jehova, 1,000 yia i olsem “wan dei” nomo.—2 Pita 3:8.

8, 9. ?Wanem trabol i kasem ol pikinini blong Adam, from sin we hem i mekem? (Yu luk pija long stat blong stadi.)

⁸ ?Olsem wanem? ?Ol pikinini blong Adam mo Iv bambae oli kasem trabol from samting we tufala i mekem? Yes. Rom 5:12 i talem se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” Aposol Pol i talem tu se: “Wan man nomo i no obei long God, olgeta man oli kam man nogud.” (Rom 5:19) Gudfala man ya Ebel i faswan blong ded. (Jenesis 4:8) Biaen ol narafala pikinini blong Adam mo ol smol bubu blong hem, olgeta tu oli kam olfala mo oli ded. Olgeta man oli kasem sin mo ded, hemia tu enemi we ol man oli no save ronwe long tufala. Yumi no luk stret long ae blong yumi, olsem wanem Adam i pasem sin mo ded i go long ol pikinini blong hem. Be yumi save luk ol nogud samting we oli kamaot from sin blong hem.

⁹ I stret nomo we Baebol i tokbaot sin mo ded se tufala i stap “holem olgeta neson oli stap olsem wan kaliko we oli wivim taet,” mo i stap “kavremap olgeta man.” (Aesea 25:7, NW) I no gat wan man we i save ronwe long sin mo ded. Hemia nao from wanem Baebol i talem se “olgeta man we oli joen long Adam oli save ded.” (1 Korin 15:22) Taswe Pol i askem kwestin ya se: “?Hu man we bambae i save pulumaot mi long laef ya we i stap holemtaet mi, we bambae mi ded from?” (Rom 7:24) ?I gat wan man we i save pulumaot Pol?a

SIN MO DED BAMBAE OLI FINIS BLONG OLWE

10. (1) ?Wanem ol vas blong Baebol we oli soemaot se God bambae i finisim ded? (2) ?Wanem fasin blong Jehova mo Jisas we yumi lanem long ol vas ya?

¹⁰ Jehova i save sevem Pol. Baebol i talem se: ‘Hae God bambae i mekem we ded bambae i go lus olgeta. Bambae hem i ravemaot wota blong ae blong olgeta man.’ (Aesea 25:8) Jehova i olsem wan papa we i tekemaot samting we i mekem ol pikinini blong hem oli harem nogud. Mo bambae hem i ravemaot wota blong ae blong olgeta. !Hem i glad tumas blong finisim ded blong olwe! Jisas i wok wetem Jehova. Fas Korin 15:22 i talem se: “Olgeta man we oli joen long Kraes oli save laef bakegen long ded.” Blong ansa long kwestin ya blong Pol se ‘?Hu bambae i pulumaot mi?’ Pol hem wan i ansa se: ‘Mi mi talem tangkiu tumas long God, from Masta blong yumi Jisas Kraes bambae i mekem samting ya.’ (Rom 7:25) I klia nomo se Jehova i gohed blong lavem ol man, nating se Adam mo Iv i mekem sin. Mo Jisas we Jehova i yusum hem blong mekem Adam mo Iv, hem tu i gohed blong lavem ol man. (Ol Proveb 8:30, 31) ?Be olsem wanem God bambae i sevem olgeta man long sin mo ded?

11. ?Jehova i mekem wanem blong givhan long olgeta man?

¹¹ Taem Adam i mekem sin, Jehova i talem long hem se hem i mas ded. From samting ya, olgeta man oli gat sin mo oli ded. (Rom 5:12, 16) Rom 5:18 i talem se: “Sin ya we wan man nomo i mekem, hem i mekem we God i jajem ol man se oli mekem i no stret, oli mas panis.” ?Olsem wanem Jehova bambae i tekemaot panis we hem i putum finis, be hem i no go agensem stret fasin blong hem? Jisas i ansa long kwestin ya taem hem i talem se, hem i kam ‘blong givim laef blong hem blong pem rod blong plante man oli go fri.’ (Matiu 20:28) Jisas i stret gud olgeta, taswe hem i naf blong givim laef blong hem, olsem wan sakrefaes. ?Olsem wanem sakrefaes ya blong Jisas i soemaot stret fasin blong Jehova?—1 Timoti 2:5, 6.

12. ?Wanem sakrefaes we i soemaot stret fasin blong Jehova?

¹² Jisas i stret gud olgeta, hem i save laef olwe. Jehova i wantem se Adam tu i laef olwe. Jisas i lavem Jehova tumas mo ol man we oli kamaot biaen long Adam. Taswe hem i givim laef blong hem we i stret gud olgeta blong pembak laef ya we Adam i lusum. Biaen, Jehova i mekem Jisas i laef bakegen, blong go long heven. (1 Pita 3:18) Sakrefaes ya i soemaot stret fasin blong Jehova, from we hem i yusum wan laef we i stret gud blong pembak wan laef we i stret gud. Sakrefaes blong Jisas nao i mekem se olgeta we oli kamaot biaen long Adam, oli save kasem laef we i no save finis. Hemia nao from wanem Pol i singaot Jisas se hem i “las Adam,” we hem nao i kam Spirit we i save givim laef.—1 Korin 15:45.

13. ?“Las Adam” bambae i mekem wanem long olgeta we oli ded finis?

¹³ I no longtaem, “las Adam” bambae i givim laef we i no save finis long olgeta man we oli kamaot biaen long Adam. Plante long olgeta ya oli ded longtaem finis. Be bambae oli laef bakegen, blong kasem laef long wol ya.—Jon 5:28, 29.

14. ?Olsem wanem ol man oli save kam fri long sin?

¹⁴ ?Olsem wanem ol man bambae oli kam fri long sin? Jehova i putumap wan gavman long heven blong i mekem samting ya. Jehova i jusum Jisas mo ol 144,000 man blong oli rul. (Ridim Revelesen 5:9, 10.) Ol 144,000 man ya oli kamaot long wol, taswe bambae oli kasem save long ol man we oli rul antap long olgeta. Taem Jisas i rul blong 1,000 yia, bambae hem wetem ol man blong hem, bambae oli givhan long ol man blong oli kam stret gud olgeta.—Revelesen 20:6.

15, 16. (1) ?Baebol i minim wanem taem hem i talem se ded i ‘las enemi’? ?Wetaem bambae ded i finis olgeta? (2) ?Fas Korin 15:28 i tokbaot se Jisas bambae i mekem wanem?

¹⁵ Long en blong 1,000 yia ya, olgeta man we oli obei bambae oli kam fri long sin mo ded. Pol i talem se: “Olgeta man we oli joen long Adam oli save ded, mo long sem fasin, olgeta man we oli joen long Kraes oli save laef bakegen long ded. Be olgeta ya bambae oli kasem laef ya wanwan, long stret fasin blong kasem. Faswan we i laef bakegen, hemia Kraes ya we i olsem fas kakae we i rere long garen. Nao biaen, long taem ya we hem bambae i kamtru, ol man blong hem bambae oli laef bakegen. Nao biaen long samting ya, en blong olgeta samting bambae i kamtru. Kraes bambae i spolem ol jif blong ol devel we oli stap olbaot long wol ya, mo ol gavman blong olgeta, wetem olgeta we oli gat paoa, nao bambae oli lus olgeta, mo bambae hem i finis long king, i givimbak olgeta paoa blong hem long God, Papa blong hem. Be yumi save. Kraes i mas rul fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes. Mo laswan blong ol enemi ya we God bambae i winim olgeta, hemia ded.” (1 Korin 15:22-26) Long taem ya nao, ded we Adam i pasem i kam long yumi, bambae i finis olgeta. Ale, ded we hem i olsem kaliko ya we i “kavremap” olgeta man, bambae i lus blong olwe.—Aesea 25:7, 8.

¹⁶ Pol i gohed i talem se: “Fastaem God bambae i putum olgeta samting oli stap aninit long paoa blong Kraes. Nao biaen, Kraes ya we i Pikinini blong God, hem nomo bambae i putum hem i stap aninit long paoa blong God ya we fastaem i putum olgeta samting oli stap aninit long paoa blong hem. Nao God bambae i holem paoa bakegen, blong i rul long olgeta samting.” (1 Korin 15:28) Stamba wok we Jehova i givim long Jisas blong hem i mekem taem hem i rul, i finis nao. Taswe, hem i glad blong givimbak olgeta paoa, mo ol man ya we oli stret gud olgeta, i gobak long Jehova.

17. ?Wanem bambae i hapen long Setan?

¹⁷ ?Wanem bambae i hapen long Setan we i stamba blong olgeta nogud samting we oli kasem ol man? Yumi save faenem ansa blong kwestin ya long Revelesen 20:7-15. Long en blong 1,000 yia rul blong Kraes, bambae Setan i kam fri blong smoltaem, blong hem i save traem laswan, ol man ya we oli stret gud olgeta. Biaen long taem ya, Setan wetem ol man we oli folem hem, bambae oli lus blong olwe, hemia “seken ded.” (Revelesen 21:8) Olgeta we oli ded bakegen long “seken ded” ya bambae oli lus olgeta, from we bambae oli no moa save laef bakegen. Sipos yumi holemstrong long Jehova, yumi no save fraet long “seken ded.”

18. ?Olsem wanem wok we God i givim long Adam bambae i kamtru fulwan?

¹⁸ Olgeta man bambae oli kam stret gud olgeta, mo Jehova bambae i glad long olgeta, nao i givim laef we i no save finis long olgeta. Olgeta enemi we oli mekem ol man oli harem nogud, bambae oli lus olgeta. Olgeta wok we God i talem long Adam blong i mekem, bambae ol man ya oli mekem evriwan, be hem i no moa stap. Ol man we oli kamaot biaen long hem, bambae oli glad blong lukaot long wol ya mo long ol anamol. !Yumi glad tumas se i no longtaem Jehova bambae i winim ded blong olwe!