Baebol i Ansa

?Wanem ya Jajmen Dei?

Long taem bifo, God i yusum ol man we oli mekem wok olsem ol jaj, blong oli givhan long ol man blong hem, we ol narafala man oli stap spolem olgeta. (Jajes 2:18) Baebol i tokbaot Jajmen Dei we bambae i kamtru long fiuja, olsem wan taem blong glad. Mo Jehova we i bigfala jaj, bambae i sevem ol man blong hem, mo i finisim ol rabis fasin.—Ridim Ol Sam 96:12, 13; Aesea 26:9.

God i putumap Jisas blong hem i jajem olgeta man, ol man we oli laef mo ol man we oli ded finis. (Ol Wok 10:42; 17:31) Plante man oli ded we oli no save God. Nating se i olsem, long taem blong Jajmen Dei, Jisas bambae i mekem olgeta oli laef bakegen. Olsem nao, bambae oli gat janis blong save God, mo mekem wosip long hem.—Ridim Ol Wok 24:15.

?From wanem Jajmen Dei bambae i stap blong wan taosen yia?

Ol man we oli ded, bambae oli laef bakegen long ol wan taosen yia ya. (Revelesen 20:4, 12) Bambae oli tekem taem blong lanem ol rul blong God, mo obei long hem. Defren olgeta long samting we plante man oli stap talem tede, Baebol i talem se God bambae i jajem ol man from samting we oli mekem afta we oli laef bakegen.—Ridim Rom 6:7.

Baebol i tokbaot wan narafala dei blong jajmen, we bambae i hapen jes bifo long stat blong wan taosen yia. Dei ya hemia en, we yumi tokbaot long ol haf we oli stap long fas pej blong magasin ya. Long dei ya, God bambae i spolem ol man we oli no obei long hem. (2 Pita 3:7) Taswe, yumi mas lukaotgud blong soemaot se yumi lavem God.—Ridim 2 Pita 3:9, 13.