STORI BLONG FRAN PEJ | ? HU I STAP LESIN LONG PREA BLONG YUMI?
?From Wanem God i Wantem Se Yumi Prea Long Hem?
God i wantem kam fren blong yumi.
Ol fren oli toktok gud tugeta blong oli save fren gud moa. Long sem fasin, God i wantem se yumi toktok long hem mo fasin ya i openem rod blong yumi fren gud wetem hem. Hem i talem se: “Yufala i kam long mi, yufala i prea long mi, mo mi bambae mi harem yufala.” (Jeremaea 29:12) Taem yu stap toktok long God bambae yu kam ‘klosap long [hem], nao hem bambae i kam stap klosap long yu.’ (Jemes 4:8) Baebol i talem long yumi se: “Oltaem hem i stap klosap long olgeta we oli stap krae i go long hem.” (Ol Sam 145:18) Taem yumi prea long hem oltaem bambae yumi fren gud wetem hem.
“Oltaem hem i stap klosap long olgeta we oli stap krae i go long hem.”—Ol Sam 145:18
God i wantem halpem yu.
Jisas i talem se: “I no gat wan long yufala we taem pikinini blong hem i askem bred long hem, be hem i save givim ston long hem. Mo i no gat man we taem pikinini blong hem i askem fis long hem, be hem i save givim snek long hem . . . be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim ol gudgudfala samting long ol man we oli askem samting long hem.” (Matiu 7:9-11) God i wantem se yu prea long hem from we ‘oltaem hem i stap tingbaot yu’ mo hem i wantem halpem yu. (1 Pita 5:7) Mo tu, hem i wantem se yu talemaot ol trabol blong yu long hem. Baebol i talem long yumi se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem.”—Filipae 4:6.
Ol man oli nidim God.
Ol man blong stadi long fasin blong man, oli luk se plante milian man oli harem se oli wantem prea long God. Sam long olgeta ya hemia olgeta we oli no bilif long God.a Hemia i soemaot se God i wokem yumi wetem tingting ya we yumi nidim hem long laef blong yumi. Jisas i talem se: “Olgeta we oli lukaot God from we oli luksave se oli nidim hem long laef blong olgeta, oli save harem gud.” (Matiu 5:3, NW) Wan rod blong yumi save mekem samting ya, hemia taem yumi toktok wetem God oltaem.
?Yumi save kasem wanem blesing sipos yumi prea long God?
a Wan ripot we i kamaot long 2012 long Pew Research Center i soemaot se, 11 pesen blong ol man we oli no bilif long God long Amerika, oli stap prea klosap wan taem long wan manis.