Wan Niufala Memba Blong Hed Kampani

LONG Wenesde moning, 24 Jenuware 2018, olgeta we oli stap long Betel long Yunaeted Stet mo Kanada oli harem wan spesel mesej: I gat wan niufala memba blong Hed Kampani blong ol Witnes blong Jehova, hemia Brata Kenneth Cook.

Brata Cook i bon mo i gruap long Pennsylvania, long Amerika. I no longtaem bifo we hem i finis long haeskul, wan fren blong hem long skul i tijim hem long trutok, mo hem i baptaes long 7 Jun 1980. Hem i kam wan fultaem paenia long 1 Septemba 1982. Afta we hem i paenia blong tu yia, oli singaot hem blong i go wok long Betel. Long 12 Oktoba 1984, hem i stat blong wok long Betel long Wallkill, New York.

Brata Cook i gohed 25 yia blong mekem ol defdefren wok long ofis long Betel mo ples blong printim ol buk. Hem i maredem Jamie long 1996, mo Jamie i joenem hem long Betel long Wallkill. Long Disemba 2009, Brata mo Sista Cook i go wok long Wajtaoa Edukesen Senta long Patterson, New York. Long ples ya, Brata Cook i wok long Dipatmen blong Raetem Ol Leta. Long Eprel 2016, tufala i kambak long Wallkill blong smoltaem, mo afta, tufala i go wok long Brooklyn Betel. Faef manis biaen, tufala i muv i go long wol hedkwota long Warwick, New York. Long Jenuware 2017, Brata Cook i kam wan man blong givhan long Raeting Komiti blong Hed Kampani.