Ol Visit Bakegen We Oli Mekem Yumi Glad
1 Sipos yu tingbaot olgeta risen we yu gat blong glad, ?bambae yu talem wanem? Save long saed blong Jeova, kampani blong ol narafala Kristin, famle blong yu . . . Yes, ating lis blong yu i longfala.
2 ?Bambae yu putum long lis ya save we yu gat mo fasin blong yusum buk blong Revelesen? Maet yu askem se, ?Yu minim wanem? Tabu speret i lidim aposol Jon blong raetem ol faswan tok ya blong Revelesen se: “Man we i ridim tok ya we God i givim, hem i save harem gud. Mo olgeta we oli harem, nao oli holem tok ya long tingting blong olgeta, olgeta ya tu oli save harem gud. From we taem blong ol samting ya i kam kolosap.” (Rev. 1:1, 3) ?Yu ting se Jon i haremgud tumas taem hem i kasem ol vison blong Revelesen? !Yes! ?Be olsem wanem long yumi? Jon i no kasem save long ol samting we hem i raetem, be tede yumi gat ol tok blong Baebol mo long histri blong pruvum se “taem blong ol samting ya i kam kolosap.” Taswe, ol save blong Revelesen i save mekem yumi glad. Samting ya i impoten moa long manis Desemba, taem yumi visitim bakegen ol man we oli bin karem Revelesen buk, from we oli save haremgud sipos oli kasem save long buk blong Revelesen long Baebol.
3 Sipos yumi bin tokbaot hu ya Bigfala Babilon, maet yumi save talem olsem:
“Buk we mi livim wetem yu i tokbaot hu ya “Bigfala Babilon.” Stat long faswan handred yia, ol man oli intres tumas long ol vison mo saen long buk blong Revelesen long Baebol. Wan saen we i olsem tok haed, hemia woman blong rod ya, Bigfala Babilon, we Revelesen japta 17 mo 18 i tokbaot. ?Babilon ya i minim wanem? Japta 33 bambae i halpem yu blong faenem ansa long kwestin ya.” Nao soem pija long pej 236, mo eksplenem olsem wanem ol gyaman skul oli bin go long olgeta ples blong wol, stat long taem blong Babilon bifo. Nao soem olsem wanem yumi mekem Baebol stadi wetem ol man long haos blong olgeta. Yusum pej 205, haf 1 mo 2. Talem long olgeta se wan rod nomo blong kamaot long Babilon, i blong stadi Baebol mo kasem stret save blong trutok. Long nekis visit blong yu, maet yu save yusum wan narafala buk, buklet, no traket, we yumi stap yusum blong stadi wetem ol man.
4 Maet yu yusum save long pej 322 (Fr. pej 310) blong “Reasoning” buk mo talem se:
“?Yu yu save hamas defren kaen fasin blong wosip i gat? [Wet long ansa.] I klia se, wan stampa nid blong man i blong wosip long wan samting we i hae moa. Be, from we plante taem ol man oli wosip long ol gyaman god, Revelesen 14:7 i givim wan woning we i stret long taem blong yumi. Samting ya i soem se yumi nidim blong mekem wosip long Man we i Wokem yumi, hemia trufala God. Buk blong Revelesen i kolem olgeta gyaman skul se Bigfala Babilon, mo i givim wan impoten woning long Revelesen 18:2a, 4. [Ridim.] Maet wan man i mekem stret fasin mo i traehad blong mekem i gud long ol narafala, ?be olsem wanem sipos hem i stap joen long ol gyaman skul? [Wet long ansa.] God i no save glad long hem. Hemia samting we yumi mas tinghevi long hem, ?i tru? Yumi mas luksave weswan skul nao i trufala skul.” Soem pej 328 kasem 330 (Fr. pej 316-318) blong Reasoning buk, no wan narafala buk we i tokbaot samting ya.
5 Sipos yu bin tokbaot wok we Jisas i stap mekem naoia folem stampa tingting blong God, yu save talem se:
“Lastaem yumitu storeyan, yumi tokbaot we Jisas i no moa stap olsem wan pikinini naoia. Hem i wan king mo jaj we i gat bigfala paoa long heven. ?Yu yu bilif fulwan se bambae hem i jajem wol ya? [Wet long ansa.] ?Mo olsem wanem long olgeta milyan man we oli ded? ?Bambae hem i jajem olgeta tu? [Wet long ansa.] Buk blong Revelesen i soemaot se bambae oli gat jans blong laef bakegen long wol ya.” Soem Revelesen 20:12, 13, nao soem pija long pej 299 blong Revelesen buk. Afta we yu storeyan long saed ya, maet yu askem long hem se wol ya bambae i olsem wanem long fyuja taem ya. Talem long hem se ansa blong kwestin ya i stap long japta 42 blong buk. Bifo we yu aot long haos, putum wan taem blong kambak bakegen.
6 Taem yumi joen long wok blong prij long Desemba, yumi save tingbaot ol poen ya long Revelesen buk mo ol man long ples blong yumi. Nao taem yumi givimaot ol save long nyufala buk ya we i eksplenem Revelesen, bambae i olsem we Revelesen i givim glad long yumi mo long olgeta tu.