Talemaot Gud Nyus—Yumi Rere Blong Tekem Evri Jans Blong Prij
1 Jisas i talem long ol disaepol blong hem we oli mas mekem laet blong olgeta i saenaot i kasem ol man. (Mat. 5:14-16) Hem i wantem se olgeta oli holem evri jans blong talemaot gud nyus blong Kingdom. Ale, wan dei, kolosap long wel blong Saeka, hem i tekem jans blong talem trutok long wan woman Sameria. (Jon 4:5-30) ?Be olsem wanem long yumi? ?Yumi tu yumi rere blong tekem wan jans blong prij long ol man?
2 Yumi evriwan i no gat jans blong joen oltaem long wok blong prij long olgeta haos. Be kolosap evri dei, maet yumi gat rod blong wetnes long ol man. ?Olsem wanem? Yes, sipos yumi tekem evri jans blong talemaot gud nyus, yumi mekem olsem. Plante taosen man oli kasem trutok long rod ya. Sipos yumi wajem gud ol jans we yumi gat mo sipos yumi wok had blong holem ol jans ya, bambae plante moa man oli save harem trutok.
?BAMBAE YUMI PRIJ LONG HU?
3 Tede, yumi mekem wok blong prij long olgeta haos wanwan, yumi mekem ol visit mo ol Baebol-stadi, be wan narafala wok we yumi save mekem i olsem: Yumi save tekem evri jans blong talemaot gud nyus long ol man we yumi wok wetem, long ol fren blong yumi long skul, long ol famle blong yumi no long ol narafala man we yumi save olgeta. Taem we yumi tekem bas, no plen, yumi save toktok mo storeyan wetem ol narafala man we oli mekem trep wetem yumi. Taem we yumi go spel long nara ples, yumi save prij long ol man we oli wok long ol hotel, long ol man we oli lukaot long ol pam stesen, long ol man we oli wok long ples blong salem kakae mo long taksiman. Taem we yumi wet long wan dokta, yumi save toktok wetem ol narafala man. Taem yumi stap long haos, maet yumi gat jans blong prij long ol man we oli laef raonabaot long yumi, no maet long ol man we oli pas blong salem samting no long olgeta we oli kam putum sam samting we yumi pem long stoa. Taem yumi stap long haospetal tu, yumi save store wetem ol dokta, ol dresa, mo ol narafala sikman.
?OLSEM WANEM BLONG STATEM WAN TOKTOK?
4 Taem we yumi mekem promes wetem wan man mo yumi save we bambae yumi mas wet, yumi save tekem ol laswan magasin mo i gud we yumi rere long wan haf we maet ol man oli intres long hem. No ating yumi save yusum wan traket no wan buklet blong statem wan toktok. Taem i olsem, samfala oli talem we i gud blong tokbaot wan samting we i jes kamaot we plante man oli sapraes from. Ale biaen yumi save askem tingting blong man ya. Sam narafala oli laekem moa blong askem wan kwestin we i pulum tingting blong man long saed blong wan samting we i jes hapen, mo afta oli talemaot gud nyus long hem. Be wan samting i klia nomo, sipos yumi wantem kasem gud frut long wok blong prij, yumi nao yumi mas go toktok long ol man fastaem.
YUMI PRIJ LONG PLES BLONG WOK
5 Olgeta we oli wok oli save mekem rod blong prij long ol man we oli wok wetem olgeta. Long Amerika, tu Kristin sista tufala i mekem wan lis long ol man we oli wok wetem tufala, mo oli makem gud ol man we maet oli intres long trutok. Taem we tufala i go toktok wetem ol man ya mo sam narafala bakegen, tufala i seremaot moa long 65 buk Revelation—Its Grand Climax At Hand, mo tufala i faenem fulap man we oli intres long trutok.
6 Wan narafala Wetnes i gat plan blong talem trutok long ples we hem i wok long hem. Hem i rere blong mekem olsem long man ya we bambae i kam sidaon kolosap long hem taem we hem i spel long 15 menet. Ale, wan man i kam. Man ya i savegud long trutok mo i talemaot stret long hem we hem i no wantem gohed long toktok ya. Be nating, Wetnes ya i livim sam buk long wan ples we narafala man ya i save tekem. 6 manis oli no pas yet, be man ya mo famle blong hem oli tekem baptaes finis.
7 Jisas, “laet blong wol,” i wantem tekem evri jans blong talemaot gud nyus. (Jon 8:12) Sipos yumi waes gud mo sipos yumi wantem tokbaot ol gudfala samting we yumi save long saed blong Baebol, yumi tu bambae yumi tekem evri jans blong prij. Ale, sem mak long ol disaepol blong Jisas, bambae yumi ‘saenaot olsem ol sta long medel blong ol man.’—Fil. 2:15, 16.