Seremaot Ol Buklet Blong Faenem Olgeta We Oli Intres
1 Olgeta buklet oli olsem wan strongfala tul. Insaed long 32 pej nomo, wan buklet i save pruvumgud plante trutok blong Baebol mo pulumdaon ol tingting mo tijing we oli no stret wetem save blong God.—2 Korin 10:5.
2 Afta we hem i ridim buklet ya, Ol Wetnes Blong Jeova—Oli Joengud Blong Mekem Wok Blong God Long Olgeta Ples Blong Wol, wan man i raetem se: “Mi mi neva luk wan ogenaesesen olsem. . . . Hem i nambawan tumas blong faenem ol man we oli stap tingting strong blong mekem wil blong God, from we naoia wol i fulap long ol skul we oli gat tu fes.” Wan kleva long Afrika hem i stadi long buklet ya !Yu Yu Save Harem Gud Blong Olwe Long Wol! Ale, ?olsem wanem save ya i gat paoa long laef blong man ya? Hem i lego wok blong kleva, mo tu, i sakemaot ol woman ya we oli bin stap laef wetem hem, mo i stap nomo wetem faswan waef we i olfala moa. Biaen, hem i maredem hem.
3 Buklet ya Should You Believe in the Trinity? hem i givim plante pruf mo poen blong man i tingtinggud long olgeta mo i olsem wan tul we i gat paoa long saed blong trutok. Wan man blong skul we i raetem wan store long The Sunday Gleaner long Jamaika, Wes Indis, hem i tokbaot buklet ya se: “Buklet ya . . . hem i wan nambawan wok blong ol Wetnes, mo naoia i no gat man we i bilif long Triniti—no man we i bilif we Jisas mo God tufala i wan nomo—we i stap sef. Buklet ya i gat plante long ol tok blong ol man blong histri mo toktok blong ol man blong stadi long saed blong God we i soemaot se tijing blong Triniti i no kamaot long Baebol. . . . Hem i strong blong ol man blong raetem ol buk blong ol skul oli luk olsem wanem wan memba blong skul—no wan we i strong long skul blong hem—i save ansa long ol strong toktok we i gat paoa we ol Wetnes oli yusum blong agensem tingting ya se Jisas i sem mak long God.”
4 Yusum Gud Olgeta: Blong mekem wok blong olgeta, ol buklet ya oli mas go long han blong ol man we oli save ridim olgeta. From we yumi gat plante buklet olsem mo wanwan long olgeta i gat ol defren kaen stampa tok, yumi mas traehad blong givimaot wan we yumi ting se i stret wetem nid blong wanwan man we yumi stap prij long hem. Sipos yumi save ol buklet blong yumi, mo mekemrere ol defren kaen poen we oli stap long hem, bambae i moa isi long yumi blong yusum gud olgeta, maet long wok blong prij, long haos blong yumi, no long ol narafala ples bakegen.
5 Wan eksampel, sipos yumi stap toktok long wan man we hem i konfyus long saed blong tijing blong Triniti we Krisendom i tijim, no wan we i ting se Jisas hem i God, ?wanem buklet yu save yusum? Sipos wan man i askem kwestin long yu se, ?from wanem God we i gat lav i letem olgeta trabol oli stap, wanem buklet i stret wetem nid blong hem? Sipos wan man i stap tingbaot we i gat nid blong wan gavman we i save givhan long ol man, ?wanem buklet nao maet i stret long hem?
6 Yumi mas save weswan buklet blong yusum, mo antap long samting ya, yumi mas traehad blong pulum tingting blong ol man long ol save insaed long ol buklet ya. Sipos i gat jans, soemaot klia ol tok no ol pija we oli save pulum hem blong ridim ol save ya. No maet yu save ridim wan no tu paragraf wetem hem, lukluk olgeta vas we i stap, tokbaot ol poen wetem hem. I bin gat plante Baebol stadi long rod ya.
7 Olgeta buklet blong yumi oli givim ol Baebol ansa mo oli givim wan strong hop long tingting blong ol man we oli stap harem nogud, mo oli stap krae from ol rabis fasin long wol ya. (Lukluk Esikel 9:4.) Ol man we oli olsem ol sipsip, bambae oli akseptem mesej we ol buklet ya oli stap tokbaot. Hem i wan gudfala jans blong yumi blong yusumgud olgeta buklet ya long olgeta haf blong minista wok blong yumi taem yumi stap traem blong faenem ol man we oli intres.