Wokhad Blong Lukaot Ol Baebol Stadi
1 Plante samting i stap kam antap we i pruvum se taem naoia i stap kam kolosap long en blong olfala wol ya. (2 Tim. 3:1-5) ?I minim wanem? I minim we laef blong ol man i stap long denja. Yes, yumi naf blong halpem samfala blong kasem sef. (Prov. 3:27) Blong mekem olsemia, yumi mas traehad blong wok strong blong statem mo mekem ol Baebol stadi.
2 Plante gudfala frut i bin kamaot from fasin blong seremaot ol buk blong yumi we oli stanap long Baebol. Be wanem we ol man oli nidim moa, hemia we yumi halpem olgeta wanwan long wan Baebol stadi we yumi mekem evri wik. ?Olsem wanem yumi save halpem olgeta blong luksave samting ya?
3 Yumi save stanemap sam kwestin we plante man oli stap tingbaot. Ol kwestin olsem, ?From wanem ol gudfala fasin oli stap lus bigwan long wol, from wanem famle laef i no save stap sefgud, from wanem raf fasin mo fasin blong brekem loa oli stap kam antap tumas, from wanem wan God we i gat lav i letem ol nogud fasin oli stap, mo oli gohed olsem? Lukaot ol poen mo ol samting we oli stap hapen we wanwan man long teritori blong yu bambae oli save soem intres long hem. Soem klia ol ansa long ol kwestin ya long Baebol. Soem olsem wanem ol buk we yumi stap givimaot oli save halpem olgeta blong lanem wanem we Baebol i save talem long saed blong samting ya mo narafala impoten poen we i save gat paoa long yumi evriwan.
4 I impoten blong pulum man blong haos blong toktok. Traem luksave ol samting we hem i stap wari from. Traem yusum ol toktok blong yu we i save kasem intres blong hem no wari blong hem. Yusum sam tok insaed long buk, buklet, magasin, no traket we oli eksplenem wanem we Baebol i talem long saed blong problem blong ol man. Bifo yu livim hem, stanemap wan no tu kwestin we yu ting se i save pulum intres blong hem long nekis visit blong yu. Taem yu gobak, mekem sua se yu pulum tingting blong hem bakegen long ol kwestin ya, mo afta yusum buk blong halpem hem blong faenem ol ansa we i kamaot long Baebol.
5 Fasin blong statem ol stadi mo oltaem yumi gohed blong mekem olgeta, i save jenisim laef blong ol man. Yumi nidim blong soem trufala intres mo tingbaot olgeta we yumi mitim long wok blong prij no long olgeta we yu prij long olgeta long defren ples. Yumi mas reregud fastaem blong yumi save mekem intres blong olgeta i gru moa. I nidim blong gat longfala tingting blong gobak kasem we yu save pulum olgeta blong folem wan program blong tekem kakae long saed blong speret oltaem. I nidim blong gat intres long ol man wanwan wetem fasin kaengud. Yumi mas rili wantem blong halpem olgeta blong sef long bigfala trabol we i kolosap tumas. Wok blong yumi blong mekem ol Baebol stadi hem i mas wan samting we yumi tokbaot oltaem long prea.—1 Tes. 5:17.
6 Samting we i save leftemap tingting blong yumi se, yumi luk kolosap wan milyan man oli kam disaepol we oli baptaes long tri yia we oli pas. (Mat. 28:19, 20) Naoia yumi stap mekem fo mo haf milyan Baebol stadi evri manis, mo samting ya i soemaot we yumi stap tingbaot laef blong ol narafala. ?Be olsem wanem long yu? ?Yu stap wok strong blong joen long wok ya blong mekem Baebol stadi? Tingbaot, laef blong yumi mo blong ol narafala i dipen long fasin blong wok strong blong yumi long samting ya.—Esik. 3:17-19.