Tingting Oltaem Blong Seremaot Ol Magasin Long Oktoba
1 Wajtaoa mo Wekap! oli karem mesej blong gud nyus blong olwe we i mekem man i haremgud mo i leftemap tingting blong man. Fasin blong gat tingting oltaem blong seremaot ol magasin i minim tekem taem blong ridimgud olgeta mo luksave olsem wanem ol atikol oli stret long ol man long teritori blong yumi.
2 Faswan samting, savegud ol atikol we stampa tok blong olgeta i stap long fored blong magasin. Ol pija we oli stap long fored blong magasin, plante taem olgeta nomo oli save pulum tingting blong man blong haos mo pusum hem blong karem sam magasin. Jusum sam atikol we yu ting se ol man long teritori blong yu oli save intres long olgeta. ?Bighaf blong ol man long teritori blong yu oli stap long sem skul? ?Wanem nao ol bigfala samting we oli wari long hem? Wetem ol tingting ya long maen blong yu, yu save rere long wan gudfala storeyan. Makem ol fasin blong storeyan we oli stap daon.
3 Wekap! blong Epril-Jun long Bislama i tokbaot fasin blong ronem mane. Yu save talem se:
◼ “Yumi evriwan i agri se yumi nidim mane long laef blong yumi. Plante man oli rere blong mekem eni samting blong fidim famle blong olgeta mo namba blong olgeta i stap kam antap oltaem. Samfala oli drim se bambae oli winim plante mane long ol plei laki. Plante man oli kam stilman mo ol woman oli kam woman blong rod. Yumi save luk ol samting ya raon long yumi. ?Wanem tingting blong yu? ?Yu ting se i oraet blong mekem ol fasin ya sipos yumi nidim mane?” [Wet long ansa] Yu save yusum ol kwestin daon long pej 5 mo ol vas blong Baebol long pej 6. Askem man blong karem ol magasin mo traem statem wan rod blong magasin.
4 Sipos yu stap seremaot Oktoba 1 “Wajtaoa,” yu save soem atikol ya “?Baebol—I Impoten Olsem Wanem?” Yu save talem se:
◼ “Ating i gat wan Baebol long evri haos long eria ya. Plante man we oli gat wan Baebol oli ting se i impoten tumas.” Afta, yu save askem wan kwestin we i go stret long hem, olsem se: “?Yu ting se Baebol i tru?” Afta we man blong haos i ansa, maet yu save gohed wetem sam tok we i stret long poen ya olsem: “I gat plante pruf blong soem se Baebol i kamaot long God mo i save lidimgud yumi tede. Baebol i gat ol save we i save lidim yumi i go long laef we i no save finis. [Ridim Jon 17:3.] Plante man oli respektem Baebol be oli no save olsem wanem blong yusum. Atikol ya long Wajtaoa i eksplenem olsem wanem yu wan yu save yusum Baebol blong kasem ansa long ol kwestin blong yu long saed blong fyuja. Yu save kasem Wajtaoa we oli sanem long haos blong yu oltaem mo praes blong hem i 600 VT nomo long wan yia.”
5 Taem yu yusum Oktoba 15 “Wajtaoa,” maet yu laekem moa wan isi fastok olsem:
◼ “Samtaem, kolosap evriwan oli bin lusum wan we oli laekem tumas long ded. Atikol ya i askem kwestin ya, ‘?Ol Dedman Oli Stap Olsem Wanem?’ ?Yu ting se wanem nao i hapen long man taem hem i ded? [Wet long ansa.] Sipos yu wantem blong save olsem wanem Baebol i ansa long kwestin ya, mi mi glad blong livim magasin ya wetem yu.” Afta, yumi save askem sabskripsen. Yu save holem traket ya ?Olsem Wanem Long Ol Fren Blong Yumi We Oli Ded? i stap rere blong givim long man blong haos we i laekem moa blong ridim wan samting we i smol nomo.
6 Traehad blong askem sabskripsen long evri doa. Sipos i no wan gudfala taem blong storeyan wetem man blong haos long Baebol, yu save soemaot magasin kwiktaem nomo. Taswe, yu mas gat tingting oltaem blong seremaot ol magasin long Oktoba.