Soem Se Yu Kea Taem Yu Mekem Ol Visit Bakegen
1 Fasin blong lukaotem ol man we oli soem intres long ol haos wanwan, i soem se yumi wantem givim jans long ol narafala blong harem mesej blong Kingdom. Taswe yumi mas gobak long ol man we yumi givimaot buk long olgeta long manis Janewari. Hemia wan nambawan rod blong soem se yumi kea long ol narafala.
2 Yu save traem blong tokbaot Kingdom blong God olsemia:
◼ “Lastaem, yumi tokbaot Kingdom blong God mo ol samting we bambae i mekem blong yumi. I no longtaem, bambae Kingdom ya i mekem wol ya i kam wan paradaes. From we yumi neva luk wan paradaes, ating i had blong lukluk samting ya long tingting blong yumi. Bambae paradaes ya i luk olsem. [Soem pija long pej 4.] Long Baebol i gat promes blong wan paradaes olsem, mo Jisas hem wan bambae hem i putum long wol.” Ridim Aesea 11:2-5. Openem buk long pej 104, haf 5 mo 6, mo soem wanem yumi mas mekem sipos yumi wantem laef long paradaes ya, we kolosap i kam.
3 Hemia wan rod blong gobak bakegen blong tokbaot fasin glad:
◼ “Yumi evriwan i wantem stap glad. Plante man oli ting se i no save gat trufala fasin glad long wol ya. ?Wanem tingting blong yu long samting ya? [Letem hem i ansa.] Sam man oli talem se fasin glad i wan fasin blong tingting. Sipos tingting blong yumi i fulap long fasin ya blong laekem ol narafala, soem respek long God, mo long wan gudfala hop blong fyuja, yumi save rili hapi nating se yumi gat problem.” Ridim Ol Sam 119:1, 2. Eksplenem se wan stadi blong Baebol i tijim yumi olsem wanem blong laekem ol narafala, blong ona long God, mo faenem wan gudfala hop blong fyuja. Openem buk long pej 7, haf 6.
4 Ating yu save gobak bakegen blong storeyan long saed blong pis, wetem wan sotfala tok olsem:
◼ “Ol lida blong wol ya oli no naf blong putum pis mo seftaem. Jeova nomo i save mekem samting ya. Baebol i soem long yumi wanem we yumi mas mekem. [Tokbaot sam poen long haf 4 long pej 103, mo afta ridim Ol Sam 46:8, 9.] Mi laekem blong soem long yu olsem wanem buk ya i save givhan long yu.”
5 Maet yu wantem gobak blong toktok wetem man we i pem buklet ya “?God i Rili Kea Long Yumi?” folem rod ya:
◼ “Fastaem mi bin livim wan buklet olsem long yu. Hem i tokbaot wan impoten kwestin: ‘?God i rili kea long yumi?’ ?Yu yu kasem wanem tingting afta we yu lukluk insaed long buklet ya? [Letem hem i ansa.] Taem yu ridim ol vas we oli mekem promes long paradaes long wan nyufala wol, wan ples we yumi save laef long pis, ating samting ya i leftemap tingting blong yu [Soem pija long pej 2 mo 3, mo soemaot sam long ol nambawan samting ya blong nyufala wol.] Mi haremsave se yu mo olgeta we yu laekem, yufala i save glad tumas blong laef long wan wol olsem. Luk wanem we haf 16 long pej 31 i talem long saed ya.” Ridim haf ya, mo soem se fasin blong lukaot long Jeova i min se yumi mas lanem moa long saed blong Hem mo ol plan blong Hem, taem yumi stadi long Tok blong Hem, Baebol.
6 Jeova i soem nambawan eksampel blong wan Man blong Lukaot long ol Sipsip, we i keagud long ol sipsip blong hem. (Esik. 34:11-14) Fasin traehad blong yumi blong folem eksampel blong Hem i mekem Hem i glad. Samting ya i soem tu, se yumi gat lav mo i mekem se ol narafala oli kasem blesing from.