Visitim Bakegen Ol Man We Oli Intres
1 Taem yumi stap prij long ol haos wanwan, plante taem yumi no gat tumas taem blong spenem wetem man we i intres. Plante taem, yumi rili mekem wok ya blong tijim man taem yumi mekem ol visit bakegen mo ol Baebol stadi. (Mat. 28:19, 20) Blong tijimgud ol man taem yumi mekem ol visit bakegen, yumi mas lukluk bakegen long ol poen we yumi bin tokbaot long faswan taem we yumi toktok wetem man blong haos. Nao yumi save reregud blong gohed long storeyan.
2 Sipos yu bin tokbaot ol trabol long famle, maet yu save yusum ol poen long japta 29 blong “Laef Foreva” buk. Yu save talem se:
◼ “Lastaem, yumi tokbaot se i waes blong folem advaes blong Baebol sipos yumi wantem haremgud long famle. ?Long tingting blong yu, wanem samting i save mekem famle i joengud tede?” Letem man i ansa. Lukluk long paragraf 27 long pej 247, mo ridim Kolosi 3:12-14. Gohed blong storeyan mo soem olsem wanem trufala lav i save mekem ol famle oli joengud tugeta. Eksplenem olsem wanem fasin ya blong stadi long Laef Foreva buk i save givhan blong winim ol problem.
3 Sipos fastaem yu bin tokbaot ol fasin blong wol we oli stap kam moa nogud, maet yu save gohed blong storeyan olsem:
◼ “Mi mi save se bambae yu agri we i mas gat ol bigfala jenis sipos yumi wantem laef long pis. Baebol i soem se Setan i stampa blong ol problem blong yumi. Plante man oli wantem save from wanem God i letem hem blong i stap longtaem tumas olsem. ?Wanem tingting blong yu?” Letem hem i ansa. Openem Laef Foreva buk long pej 20, paragraf 14 mo 15, mo eksplenem from wanem God i no finisim Setan yet. Nao ridim Rom 16:20, we i soem ol samting we bambae oli kamtru i no longtaem long fyuja.
4 Sipos yu bin tokbaot ol blesing we bambae oli kamaot aninit long rul blong Kingdom, taem yu mekem visit bakegen, yu save talem se:
◼ “Bambae Kingdom blong God i givim ol nambawan blesing long wol ya mo long ol man. Ol pija long pej 12 mo 13 oli eksplenemgud ol blesing ya. ?Wanem samting we yu luk long ples ya, we yu yu intres long hem? [Letem hem i ansa.] Traem tingbaot se bambae i olsem wanem blong laef long wan wol we i olsem.” Ridim paragraf 12. Sipos hem i intres, askem kwestin we i stap long paragraf 13, mo storeyan long ansa blong kwestin ya. Talem long hem se japta ya i ansarem plante moa kwestin long saed blong ol blesing blong Kingdom mo se bambae yu glad tumas blong tokbaot ol samting ya, taem yu visitim hem bakegen.
5 Maet yu save statem wan Baebol stadi sipos yu talem olsem:
◼ “Plante man oli faenem ansa long ol kwestin blong olgeta long saed blong Baebol, taem oli yusum buk ya.” Openem Laef Foreva buk long pej we i talem nem blong ol japta, mo askem se: “?Weswan japta nao we yu intres moa long hem?” Letem hem i ansa. Nao openem buk long japta we hem i intres long hem, mo ridim faswan paragraf. Eksplenem olsem wanem ol kwestin we oli stap daon long evri pej, oli tokbaot bigfala poen we i stap long ol wanwan paragraf. Tokbaot wan no tu moa paragraf, blong soem fasin blong stadi, mo mekem plan blong visitim hem bakegen.
6 Taem yumi visitim bakegen ol man we oli intres long Laef Foreva buk, yumi soemaot se yumi wantem mekem Kristin minista wok blong yumi fulwan. (2 Tim. 4:5) Maet yumi save halpem ol man we oli lesin long yumi blong kasem laef we i no save finis.—Jon 17:3.