Ansa Long Wan Kwestin

◼ ?Wanem ol samting we yumi mas karem i go long ol miting?

Evri wik yumi kasem gudfala tijing mo tok blong leftemap tingting blong yumi long ol miting blong kongregesen. (Aes. 48:17; Hib. 10:​24, 25) Be, fasin blong ol samting ya blong givhan long yumi, i dipen bigwan long fasin blong yumi blong mekemrere gud.

I gud se olgeta memba blong famle oli gat prapa buk blong stadi mo ol narafala samting we oli nidim long ol miting. Hemia i min se wan Baebol, singsing buk, ol buk we yumi stadi long olgeta long miting, buk blong raetem ol not, mo wan pen.

Long saed blong Tiokratik Skul, yumi nidim Program Blong Tiokratik Skul wetem Theocratic Ministry School Guidebook. Tufala samting ya i halpem yumi blong tingbaot stampa tok blong ol studen mo blong folem tok blong elda we i lukaot long skul ya, taem hem i givim advaes. Yumi save yusum ol advaes we hem i givim tu blong kamgud moa long ol tok blong yumi long miting, mo long ol storeyan blong yumi long wok blong prij. Maet evri memba blong famle i save gat prapa buk blong hem we Tok Namba 1 i kamaot long hem, antap moa buk ya Joen Tugeta Long Wosip, mo ol narafala buk we yumi nidim.

Long saed blong Miting Blong Kingdom Wok, yumi nidim laswan Kingdom Wok Blong Yumi mo Reasoning buk. Yu save karem ol buk we bambae oli yusum insaed long miting, olsem ol buk we oli yusum long ol pleplei. Ol elda oli mas karem buk ya Ol Rul Blong Mekem Minista Wok Blong Yumi tu.

Ol papa mama oli mas traehad blong mekem se ol pikinini blong olgeta oli sidaon kwaet mo lesingud long ol miting blong kongregesen. Sipos oli givim long ol pikinini ol Wajtaoa mo ol narafala buk taem oli smol, nating se oli no save rid yet, samting ya i save pulum olgeta blong intres long ol miting. Taem ol pikinini oli lanem blong gat respek long ol tiokratik buk mo blong yusum olgeta, oli lanem ol gudfala fasin long saed blong speret, we oli save stap wetem olgeta long ful laef blong olgeta.

Glad mo fasin blong haremgud we yumi kasem long ol miting blong kongregesen, i save kam dip moa taem yumi karem ol samting we yumi nidim long miting. (2 Tim. 3:17) Hemia nao beswan rod blong meksua se yumi kam ‘fulap long stret save long wil blong [God], wetem waes mo fasin luksave long saed blong speret.’​—⁠Kol. 1:⁠9.