Program Blong Nekiswan Spesel Dei Asembli
1 ?From wanem yumi mas talemaot gud nyus we yumi no kam slak? ?Wanem ol mak we man i mas kasem blong kam wan man blong talemaot gud nyus? ?Olsem wanem olgeta we oli sem mo fraet oli save girap mo statem ol storeyan long gud nyus wetem ol narafala? Ol kwestin ya wetem ol narafala kwestin we oli pulum tingting blong yumi, bambae oli kasem ansa long spesel dei asembli, we i stat long sam ples long Septemba. Stampa tok blong asembli ya se: “Yumi Mas Naf Blong Wok Olsem Ol Minista Blong Gud Nyus.”—Skelem wetem 2 Korin 3:5.
2 Yumi ol man blong Jeova, yumi mas lukaotgud long ol fasin blong yumi. Wetem ol tok we i leftemap tingting, sam yangfala bambae oli talemaot olsem wanem oli bin blokem fasin ya blong letem ol fren oli pulum olgeta. Ol tok we i soemaot lav bambae i leftemap tingting blong ol papa mama, long saed blong nid blong trenem ol pikinini blong olgeta olsem ol minista blong God. Bambae program ya i halpem yumi evriwan blong luksave se yumi mas prij. Mo bambae i tokbaot ol blesing we yumi save kasem, mo olgeta we oli lesin long yumi oli save kasem tu.—1 Tim. 4:16.
3 Tru ya, baptaes i wan impoten haf blong dei ya. Bifo long baptaes, wan tok we i stanap long Baebol bambae i go stret long olgeta we oli jes givim laef blong olgeta i go long Jeova. Be, i gud we olgeta evriwan we oli stap, oli lesingud taem oli tokbaot baptaes, mo taem oli mekem mining blong hem i klia. Olgeta we oli wantem tekem baptaes long spesel dei asembli ya, oli mas talemaot long presiden elda, longtaem lelebet bifo. Olsem nao, hem i gat naf taem blong mekem plan wetem ol narafala elda, blong oli save askem ol kwestin long olgeta we oli wantem tekem baptaes.
4 Wan narafala impoten haf blong spesel dei asembli ya, hemia stampa tok we wan brata we i kam long narafala ples bambae i mekem. Nem blong tok ya: “Yumi Mas Naf Mo Gat Ol Samting We Yumi Nidim Blong Wok Olsem Ol Minista Blong God.” Bambae hem i tokbaot fo bigfala samting we yumi nidim blong wok olsem ol minista. Mo insaed long tok ya, bambae i gat ol ekspiryens we oli mekem bilif i strong.
5 Mekem plan naoia blong stap long ful program blong asembli ya. Mekem sua se yu singaot ol man we oli intres mo ol Baebol stadi. Olsem nao, dei ya blong tiokratik tijing i save givhan long olgeta tu. Long rod ya, yumi save sua se yumi “naf” blong wok olsem ol minista blong gud nyus.