Yusumgud Ol Magasin Blong Yumi
1 Taem yu go kolosap long wan stoa blong ol buk, ?yu luk wanem? Ol defren kaen magasin. Taem yu go insaed long ol narafala stoa, ?wanem samting i save pulum ae blong yu? Ol defren kaen magasin. ?Wanem samting i mekem se man we i stap karem ol leta i kam long ol haos, i gat wan hevi bag blong karem? Ol defren kaen magasin. Samting ya i soem se, ?ol man oli stap ridim wanem? Ol defren kaen magasin. Ol ripot oli soem se 9 long evri 10 yangfala we oli gat 10 kasem 18 yia, mo sem namba blong ol bigman tu, oli ridim wan no bitim wan magasin evri manis. Long evri ples long wol, ol man oli intres long ol defren kaen magasin.
2 ?Yumi save mekem we ol man we oli gat gudhat oli tinghevi long Wajtaoa mo Wekap!? Yes, sipos YUMI tinghevi long Wajtaoa mo Wekap! ?Wanem i save givhan long yumi? Tingbaot ol advaes ya:
◼ Ridim Ol Magasin: Wan elda we i stap goraon long ol kongregesen i mekem ripot ya se, long seket blong hem, 1 nomo long evri 3 pablisa i stap ridim olgeta haf blong evri Wajtaoa mo Wekap! ?Yu yu stap ridim olgeta magasin fulwan? Taem yu stap ridim ol haf wanwan, yu save askem kwestin ya long yu wan, ‘?Hu bambae i glad blong ridim save ya—wan mama, wan we i no bilif long paoa blong God, wan bisnes man, wan yangfala?’ Long prapa kopi blong yu, makem wan no tu poen we yu save yusum taem yu stap seremaot magasin ya. Nao traem tingbaot olsem wanem yu save pulum ol man blong intres long poen ya wetem sam smol toktok nomo.
◼ Odarem Wan Stret Namba Blong Ol Magasin: Putum wan oda wetem brata we i lukaot long ol magasin, blong kasem wan stret namba blong ol magasin, olsem we yu naf blong seremaot. Long rod ya, yu mo famle blong yu bambae yufala i gat naf magasin oltaem.
◼ Makemaot Wan Dei Evri Wik Blong Seremaot Ol Magasin: Plante kongregesen oli makemaot wan dei evri wik blong seremaot ol magasin. ?Yu yu save joen wetem kongregesen long dei ya? Sipos no, taem yu stap prij, traem blong yusum sam taem, blong seremaot ol magasin long rod, mo long ol narafala ples tu, olsem long ol haos wanwan mo long ol rod magasin.
◼ Tingbaot “Wajtaoa” mo “Wekap!” Oltaem: Karem sam magasin wetem yu taem yu go long wan trep no go long stoa. Soem olgeta long ol man we oli wok wetem yu, olgeta we oli stap long ol haos kolosap long yu, ol pikinini we oli skul wetem yu, mo ol tija. Wan hasban mo waef we tufala i stap mekem plante trep long plen, tufala i stap yusum wan poen long ol nyufala magasin blong statem ol storeyan wetem ol man we oli sidaon kolosap long tufala. Oli stap kasem plante nambawan frut from. Sam yangfala oli stap karem i go long skul, ol defren haf blong ol magasin we oli ting se maet tija no sam narafala studen oli intres long olgeta. Yu save karem sam magasin wetem yu taem yu go samples blong mekem wan smol bisnes blong yu, mo yu save soem magasin long ol bisnes man afta we yu finisim bisnes blong yu. Plante blong yumi i stap pem bensin oltaem. ?From wanem yu no soem ol magasin long man we i wok long stesen blong bensin? Putum sam magasin oli stap rere blong yusum taem ol famle oli visitim yu, taem yu tekem bas no plen blong go samples, no taem yu stap wet blong luk dokta, no wet long hospital, no long wan narafala ples olsem. ?Yu yu save tingbaot sam narafala taem we yu save karem ol magasin wetem yu?
◼ Mekemrere Sam Sot Toktok Nomo Blong Seremaot Ol Magasin: Mekem plan blong toktok smol nomo, be toktokgud. Soem se yu glad blong tokbaot ol magasin. Traem kasem hat blong ol man. Tokbaot wan stret poen. Jusum wan poen long wan haf blong magasin, nao tokbaot wetem ol sot toktok nomo, mo askem man blong karem ol magasin. Wan nambawan rod, hemia blong stanemap wan kwestin long wan samting we ol man oli intres long hem, nao soem wan haf long magasin we i givim ansa long kwestin ya from ol vas blong Baebol. Traem lukluk ol eksampel biaen we oli soem olsem wanem blong mekem samting ya:
3 Sipos yu stap soemaot wan haf long saed blong ol raf fasin we oli stap kam antap, yu save askem se:
◼ “?Yumi nidim wanem blong mekem se yumi save slipgud long naet we yumi no fraet se wan man bambae i kam kilim yumi no stilim sam samting blong yumi?” Maet man blong haos i no ting se ol samting oli save kamgud long fyuja. Yu save talem long hem se plante man oli gat sem tingting olsem hem, mo talem long hem se yu gat sam save we yu ting se bambae hem i intres long hem. Nao soem wan poen long magasin we i joen stret wetem storeyan blong yu.
4 Taem yu soem wan haf long saed blong famle laef, maet yu askem se:
◼ “Plante man oli luk se naoia i hadwok tumas blong winim naf mane blong stap laef mo blong lukaotgud long famle blong olgeta. Ol man oli raetem plante buk long saed ya. Be ol man ya we oli gat bigfala save, olgeta tu oli no save gat wan tingting nomo long saed blong rod blong winim ol problem blong yumi. ?I gat wan ples we yumi save go long hem blong kasem advaes we i save lidimgud yumi?” Nao soem wan poen long magasin we i pruvum se ol tok blong Baebol oli waes.
5 Taem yu soem wan haf long saed blong wan trabol we i stap mekem laef blong ol man i had, maet yu save statem wan storeyan olsemia:
◼ “Bighaf blong ol man tede oli faenem se laef i strong. God i neva wantem se yumi laef wetem ol trabol ya.” Nao yu save soem olsem wanem ol save long magasin, we i stanap long Baebol, i save halpem yumi blong stanap strong tru long ol trabol we yumi kasem long laef naoia, mo tu i save givim wan hop blong fyuja se bambae trabol ya i finis blong olwe.
6 ?Olsem wanem long praes blong ol magasin? Praes blong ol magasin blong yumi i gud nomo, oli no sas nating, taem yumi tingbaot ol narafala magasin blong wol. Taswe yumi no mas sem blong talem praes blong ol magasin. Defren nao, yumi mas soem se yumi glad tumas blong joen long wok ya we i nambawan, mo we i soem se yumi tingbaot laef blong ol narafala man fastaem. !Yes, yumi no mas fraet nating blong soemaot ol magasin mo askem man blong karem olgeta!
7 Tekem Evri Jans Blong Prij i Wan Gudfala Rod: Long sam ples, gavman i putum tabu long wok blong prij long ol haos wanwan. Sam man long ol ples ya, oli bin harem trutok from wan we i tekem jans blong prij long bas stop, long klinik, long maket, mo long rod. Samfala oli bin karem ol magasin mo oli harem trutok blong fastaem long fasin ya. ?Yu yu stap tekem jans blong prij sam samtaem? Sipos yes, ?fasin we yu stap yusum i karem frut? Yumi mas soem fasin fren mo positif tingting long ol man, be yumi no mas fosem olgeta. Tingbaot se maet sam strenja oli save stop mo lesin smoltaem sipos wan man nomo i toktok wetem olgeta, be maet oli fraet blong toktok wetem wan grup blong man. Olsem ol minista blong God, yumi mas putum ol klos we oli stret, mo komem gud hea blong yumi.—1 Tim. 2:9, 10.
8 Ol Rod Magasin: Olgeta we oli gat wan rod magasin oli seremaot plante magasin, nating se yumi stap prij oltaem long sem teritori. Ol rod magasin oli nambawan blong statem ol Baebol stadi.
9 Taem yu gobak oltaem blong karem ol nyufala magasin oli go long ol man ya, bambae yu luk se kaen fasin mo fasin fren blong yu wetem olgeta ya i kam bigwan moa. Moa yu yu save man blong haos, moa bambae yutufala i save tokbaot ol poen we oli stanap long Baebol. Samting ya i save lidim yu blong statem wan Baebol stadi. Maet yu save askem hem blong mekem wan sabskripsen tu. Mo tingbaot, evri taem yu toktok wetem man ya yu save makem wan visit long ripot blong yu.
10 Wan sista i stap tekem ol magasin i go long wan woman we oltaem hem i karem olgeta, be hem i stap talem long sista ya se: “Mi no bilivim ol samting we yu stap talem long mi.” Long wan taem, sista i faenem hasban blong woman ya long haos. Hem i storeyan gud wetem hem, mo biaen, hem i mekem wan plan blong statem wan Baebol stadi. Sista i soem fasin fren tu long trifala boe blong tufala we oli kam blong joen long stadi. Biaen, woman ya wetem ol boe blong hem oli givim laef blong olgeta i go long Jeova mo tekem baptaes. Kam kasem naoia, 35 memba blong famle ya oli akseptem trutok. !Nambawan frut ya i kamaot from we sista ya i bin gobak oltaem long rod magasin blong hem!
11 I gat plante defren fasin we yu save yusum blong statem wan rod magasin. Wan fasin se, yu save raetemdaon nem blong olgeta we yu livim magasin wetem olgeta, mo mekem plan blong gobak evri tu wik wetem ol nyufala magasin. Narafala fasin se, yu save yusum smol haf ya “Long Nekis Wajtaoa.” Taem yu gobak, talem long man blong haos se yu karem magasin ya we yu bin tokbaot lastaem. Narafala fasin se, taem yu gobak yu save talem se: “Taem mi ridim magasin ya, mi ting se maet yu tu yu intres long hem . . . ” Nao talem sam smol toktok long saed blong magasin mo askem hem blong karem. Taem yu aot long haos, raetemdaon faef isi poen ya long pepa blong prij: (1) nem blong man blong haos, (2) adres blong hem, (3) dei we yu visitim hem, (4) wanem magasin yu bin livim, mo (5) haf we yu bin soem. !Sam pablisa we oli gat gudhan blong statem ol rod magasin, oli gat 40 man long lis blong olgeta, we oli stap karem ol magasin!
12 Prij Long Ol Stoa: Ol pablisa we oli stap prij long ol stoa, oli stap seremaot plante magasin. ?Yu bin traem wok ya blong prij long ol stoa? Ol ripot oli soem se long sam kongregesen, samfala nomo oli joen long wok ya. Fastaem, maet samfala oli fraet blong toktok wetem ol bisnesman, be afta we oli mekem wok ya blong smoltaem, oli faenem se oli laekem tumas mo oli karem frut. I gud yu askem long wan pablisa we i gat ekspiryens blong halpem yu blong stat.
13 I gat plante risen from wanem wok blong prij long ol stoa i gud. !Oltaem i gat man i stap, hemia long taem we stoa i open! Kolosap oltaem, ol bisnesman oli soem kaen fasin, nating se maet oli no intres bigwan long Baebol. Stat eli long dei. Olsem nao, ating bambae oli rere blong toktok moa wetem yu. Afta we yu talemaot nem blong yu, maet yu talem long olgeta se plante taem yu no faenem ol bisnesman long haos blong olgeta, taswe yu stap visitim olgeta blong smoltaem nomo long stoa blong olgeta, blong soemaot ol nyufala Wajtaoa mo Wekap! Talem se plante bisnesman oli laekem ol magasin ya, from we oli mas save ol samting we i stap kamaot long wol, be oli no gat plante taem blong rid. Ol magasin ya oli givim save we i pulum tingting blong ol man long wan rod we maet oli no bin tingbaot bifo, be oli no pulum man i go long wan skul, politik, no bisnes. Maet yu save statem wan rod magasin wetem ol bisnesman long ol stoa, we oli soem intres.
14 Mekemrere Tugeta Long Famle: Maet yufala i save yusum sam taem long famle stadi blong yufala blong tokbaot weswan haf blong ol nyufala magasin i stret blong yusum long ples blong yufala. Olgeta memba blong famle—ol pikinini tu—oli save lanem wan rod blong seremaot ol magasin, mo blong givim gudfala ansa long ol man we oli talem sam tok blong traem blokem olgeta, ol tok olsem: “Mi mi bisi tumas,” “Mifala i gat skul blong mifala finis,” mo “Mi mi no intres long yufala.” Wetem fasin blong wokgud tugeta, ful famle i save joen oltaem long wok blong seremaot ol magasin.
15 Ol Brata We Oli Lidim Buk Stadi Oli Save Givhan: Sipos i stret long kongregesen blong yufala, i gud blong mekem ol miting blong prij blong seremaot ol magasin long ol wanwan grup blong buk stadi, bitim we ful kongregesen i mekem wan miting blong prij nomo long Haos Kingdom. Ol brata we oli lukaot long ol miting blong prij oli mas mekemrere gud, blong oli gat sam advaes blong givim long olgeta long grup. Maet oli rerem wan rod blong storeyan, mo wan no tu poen long ol nyufala magasin, we evriwan i save yusum blong wekemap intres blong ol man long ples blong yufala. Ol miting blong prij—wetem taem we oli tekem blong seraotem grup—oli mas sot nomo, oli no mas bitim 10 no 15 menet. Ol brata we oli lukaot long ol buk stadi, oli mas mekem sua se oli gat naf teritori, olsemia, grup i save yusum olgeta haoa we oli makemaot finis blong prij.
16 Soem Fasin Tangkyu From Ol Magasin: Haf ya “Yusumgud Ol Wajtaoa mo Wekap!” we i stap long Kingdom Wok Blong Yumi long Julae 1993, i talem impoten tok ya: “Ol Wajtaoa mo Wekap! oli no lusum ol sas samting insaed long olgeta, nating sipos yumi no bin givimaot long wan manis no tu manis biaen we yumi kasem olgeta. Ol toktok we oli stap insaed oli impoten yet nating se taem blong hem i pas finis . . . Sipos yumi letem ol olfala magasin ya oli hif i stap, mo yumi no stap yusum olgeta, samting ya i soemaot se yumi no gat fasin tangkyu from nambawan tul ya . . . No putum long wan saed ol olfala magasin mo fogetem olgeta, i moa gud blong traehad blong givimaot olgeta long ol man we oli intres.”
17 Tede, plante man we oli gat gudhat oli stap lukaotem trutok. !Ol save insaed long wan magasin blong yumi, maet hemia stret samting we oli nidim blong lidim olgeta long trutok! Jeova i givim wan nambawan mesej long yumi blong talemaot. Mo ol magasin blong yumi oli mekem wan impoten wok blong halpem mesej ya blong goaot long ol man. ?Long fyuja, bambae yu tinghevi moa long wok blong seremaot ol magasin? ?Bambae yu folem sam long ol advaes ya long wiken we i kam? Sipos yu mekem olsem, bambae yu kasem rij blesing from.
Ol Advaes We i Wokgud:
◼ Ridim ol magasin fastaem, mo savegud sam poen long ol haf blong olgeta.
◼ Jusum wan haf blong magasin we i tokbaot samting we ol man long ples blong yu oli intres long hem.
◼ Mekemrere wan rod blong storeyan we i stret long plante defren kaen man, ol man, woman, no yangfala. Soem long olgeta olsem wanem magasin ya i stret long olgeta, mo olsem wanem ful famle i save haremgud long magasin ya.
◼ Mekem plan blong joen long wok blong prij taem bighaf blong ol man oli stap long haos. Sam kongregesen oli gat wan plan blong prij long sapa wetem ol magasin.
◼ Mekem storeyan blong yu i sot mo klia.
◼ Yu no mas toktok kwik tumas. Sipos man blong haos i no intres, fasin blong yu blong toktok kwik bambae i no pulum hem blong lesin. Traem blong toktok slou mo long isi fasin, mo letem taem blong man blong haos i save toktok tu.
Seremaot Ol Magasin Long Evri Haos Wanwan:
◼ Smael blong soem fasin fren mo toktok long kaen fasin.
◼ Soem se yu glad blong tokbaot ol magasin.
◼ Toktok slou mo klia.
◼ Tokbaot wan poen nomo. Tekem smoltaem blong pulum intres blong man blong haos, nao soem olsem wanem magasin i save halpem hem.
◼ Soem wan haf blong magasin nomo.
◼ Tokbaot wan magasin nomo, mo soem narawan olsem wan we i joen wetem hemia we yu bin tokbaot.
◼ Givim ol magasin long man blong haos blong hem i save lukluk.
◼ Talem long man blong haos se yu wantem kambak bakegen.
◼ Sipos man blong haos i no wantem ol magasin, talem sam gudfala toktok mo soem fasin fren long ol lastok blong yu.
◼ Raetemdaon long pepa blong prij, nem blong ol man we oli intres mo we oli karem ol magasin.
Ol Jans Blong Seremaot Ol Magasin:
◼ Wok blong prij long ol haos wanwan
◼ Tekem jans blong prij
◼ Prij long ol stoa
◼ Ol rod magasin
◼ Prij long sapa
◼ Ol visit
◼ Olgeta we oli stadi Baebol bifo
◼ Long ol trep, mo taem yu pem ol samting long stoa
◼ Taem yu storeyan wetem sam famle blong yu, ol man long wok, ol man we oli stap long ol haos kolosap, ol pikinini long skul, ol tija
◼ Long bas no plen, taem yu stap wet blong luk dokta, mo wet long hospital no ol narafala ples olsem