Prij Wetem Fasin Luksave
1 Blong gat fasin luksave, yumi mas kasem save long sam samting long saed blong ol man we yumi stap prij long olgeta. ?From wanem? From we yumi wantem kasem hat blong olgeta. Blong mekem olsem, yumi mas talemaot mesej blong Kingdom long fasin we i pulum olgeta blong intres long hem. Long manis Janewari, bambae yumi seremaot Revelesen buk. Maet sam long ol advaes ya oli givhan long yu.
2 Yu save soem pija long pej 302, mo yusum fastok ya:
◼ “Pija ya i soemaot tijing blong Baebol long stampa tingting blong God long saed blong wol ya. ?Yu ting se yu mo famle blong yu i mas mekem wanem blong laef long paradaes long wol ya? [Letem man i ansa.] Baebol i soem se, i no longtaem, bambae trufala pis i kamtru long ful wol, mo se Paradaes bambae i stap long wol ya bakegen. [Ridim Ol Sam 37:10, 11.] Buk ya i save soemaot long yu wanem yu mas mekem blong kasem ol blesing we God bambae i givim. Mi glad blong livim wan buk olsem wetem yu.”
3 No maet yu wantem talem olsem:
◼ “Mifala i wantem serem wan nambawan tingting long saed blong fyuja, wetem ol man raonabaot long mifala. ?Yu yu traem blong holem wan gudfala tingting oltaem long saed blong laef? [Letem man i ansa.] ?Yu yu faenem se sam samting long laef oli mekem se i hadwok blong tingting olsem? [Letem man i ansa.] Mi mi luk se Baebol i givhangud long saed ya. Hem i tokbaot ol trabol we oli stap kamaot tede, be tu, hem i eksplenem mining blong olgeta, mo i talem long yumi wanem samting bambae i kamaot biaen long ol trabol ya.” Ridim Revelesen 21:3, 4. Nao ridim haf 7 long pej 303 blong Revelesen buk. Askem man blong haos sipos hem i bilif se God bambae i mekem ol promes ya oli kamtru. Sipos yumi storeyan smol long sam profet tok blong Baebol we oli kamtru finis, bambae yumi givhan long man blong haos blong trastem paoa blong God blong givim blesing long olgeta man.
4 Sipos ol man long eria blong yu oli wari long saed blong helt, maet yu save talem se:
◼ “Plante man raonabaot long yumi oli traehad blong mekem helt blong olgeta i stapgud. Be, nating se yumi lukaotgud, yumi kasem sik yet. ?Yu yu wantem stap long wan wol we olgeta man oli gat gudfala helt mo strong bodi? Maet yumi sapraes blong luk se buk blong Revelesen long Baebol i tokbaot wan taem olsem, mo i talem se taem ya i kolosap nao.” Ridim Revelesen 21:3, 4. Nao yu save soem pija long pej 308 mo 309 blong Revelesen buk. Tokbaot olsem wanem ol man bambae oli kasem ol nambawan samting blong mekem laef i kamgud, taem Kraes i rul blong Wan Taosen Yia.
5 Sipos yu wantem storeyan smol nomo, yu save openem buk long pej 303 mo askem se:
◼ “?Wanem bambae i hapen long wol ya? Plante man oli wantem save samting ya. ?Yu ting se samtaem bambae wol ya i kam wan paradaes?” Lesin long ansa we man blong haos i givim, mo talem tangkyu from. Nao ridim ol fastok blong haf 6, long pej 303. Soem pija long pej 302 mo askem man blong karem buk long stret praes blong hem.
6 Gudfala fasin luksave bambae i givhan long yumi blong kasem save long ol nid blong ol man mo ol samting we oli intres long hem. Proveb 16:23 i talem samting ya, i se: “Hat blong waes man i mekem hem i tok wetem fasin luksave, mo i mekem we ol toktok blong hem oli gat paoa long narafala man.”