Talemaot Trutok Evri Dei Folem Eksampel Blong Jisas

¹ Taem Jisas i kam long wol, hem i gat wan spesel wok blong mekem. Wok ya i isi nomo: “Talemaot ol tok blong leftemap trutok.” (Jon 18:37) Hem i talemaot trutok long saed blong ol nambawan fasin mo tingting blong Papa blong hem. Wok ya i olsem kakae blong hem. Hem i stampa samting long laef blong hem. (Jon 4:​34) Luk i talem se ‘evri dei, Jisas i stap tijim ol man long haos blong God.’ (Luk 19:47) Jisas i yusumgud taem we hem i gat. (Jon 9:⁠4) Smoltaem bifo we hem i ded, hem i talem long Papa blong hem se: “Mi mi leftemap nem blong yu long wol ya, mo mi finisim ol wok ya we yu givim long mi blong mi mekem.”​—Jon 17:⁠4.

² Taem hat blong yumi i fulap long tangkyu long Jeova from ol samting we hem i bin mekem, bambae i pusum yumi tu blong tokbaot hem evri dei. Yumi kam olsem ol disaepol blong Jisas we oli no fraet blong talem se: “Mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” (Wok 4:​20) Oli tokbaot Jeova oltaem, from we Baebol i talem se ‘evri dei, oli stap talemaot gud nyus ya.’ (Wok 5:​42) Yumi wanwan i mas askem se: ‘?Mi mi stap folem eksampel blong Tija blong mi, Jisas?’

³ Prij Long Fasin We i Soem Se Wok Ya i Impoten: Jisas i talem se taem mesej blong Kingdom i kasem olgeta ples long wol, ‘bambae en i kam.’ (Mat. 24:14) Samting ya i mas makem long yumi se wok ya i impoten tumas mo yumi mas finisim kwik. Laef blong plante milyan man i stap long denja. Taswe, wok ya i moa impoten mo i givhan moa long ol man, i bitim enikaen narafala wok we yumi save mekem. !From we i kolosap nomo long en blong rabis fasin blong wol ya, taem we i stap blong finisim wok ya i smol nomo!

⁴ Ol ripot oli soem se Jeova i stap mekem wok ya blong hivimap olgeta we oli olsem sipsip, i spid moa. (Aes. 60:22) Long plante ples long wol, fulap man oli stap joen kwiktaem long trutok. !I olsem we oli stap singaot long glad fasin se: “Bambae mifala i go wetem yufala, from we mifala i harem se God i stap wetem yufala”! (Sek. 8:​23) Tok blong Jisas i tru moa naoia bitim ol taem bifo, se: “I gat plante kakae tumas i stap long garen, be smol man nomo oli stap blong karem i go. Yufala i mas askem strong long masta blong garen ya, blong hem i sanem sam moa man oli kam blong karem ol kakae ya blong hem.” (Mat. 9:​37, 38) ?Samting ya i pusum yumi blong wok strong olsem ol disaepol blong Jisas, we ‘oltaem oli stap go long haos blong God, oli stap presem God’?​—Luk 24:⁠53.

⁵ Talemaot Trutok Evri Dei: Evri dei, yumi mas lukaot sam rod blong serem trutok wetem ol man. Yumi gat plante jans blong mekem samting ya. ?Olsem wanem sipos yu tekem sam menet blong toktok long telefon wetem wan fren no wan narafala we yu ting se maet hem i lesin? ?Olsem wanem sipos yu raetem wan leta i go long wan man we yu no save faenem hem long haos blong hem? ?Yu bin tingbaot blong givim wan traket long man we i wok long stoa taem yu go pem kakae? Ating yu save rimemba plante narafala jans we yu gat evri dei blong serem hop blong yu wetem ol narafala. Sipos yu traehad mo no fraet blong toktok, bambae Jeova i givhan long yu.​—1 Tes. 2:⁠2.

⁶ Taswe, long stat blong evri dei, yumi mas askem se: ‘?Bambae mi mekem wan samting tede blong serem hop blong mi wetem narafala sipos mi gat jans?’ Yu mas folem fasin blong Jisas, we i eksplenem from wanem hem i kam long wol ya se: ‘Mi mas talemaot gud nyus blong kingdom blong God.’ (Luk 4:​43) Sipos yumi wantem kam olsem Tija blong yumi, bambae yumi mekem i sem mak.​—Luk 6:​40.