Folem Fasin Blong Bilif Blong Olgeta
1 Aposol Pol i eksplenem se bilif ‘i soemaot long yumi we olgeta samting ya we yumi stap putum tingting blong yumi i strong long hem, be oli tru. Mo olgeta samting we yumi no save luk, be oli stap.’ Hem i talem tu se “sipos man i no gat bilif long God, hem i no save mekem God i harem gud.” (Hib. 11:1, 6) Pol i talem se yumi mas soemaot bilif, kam strong moa oltaem long bilif, mo folem fasin blong bilif.—2 Kor. 4:13; Kol. 2:7; 2 Tim. 2:22.
2 Insaed long Baebol, i gat plante nambawan eksampel long saed blong fasin blong bilif. Long Hibrus japta 11, Pol i talem nem blong plante wetnes we oli stanap strong oltaem long bilif blong olgeta. Wan long olgeta ya, hemia Ebel, faswan man we narafala i kilim hem i ded from bilif blong hem. Hem i talem nem blong Noa tu, we bilif i pusum hem blong fraet long God, mo fasin ya i sevem laef blong hem mo famle blong hem. Japta ya i presem Ebraham tu from bilif mo fasin obei blong hem. I gat gudfala toktok long saed blong Moses, from we bilif blong hem i mekem se hem i gohed olwe nomo, olsem we hem i luk God we yumi no save luk wetem prapa ae blong yumi. I gat plante tumas eksampel, mekem se Pol i talem se hem i no gat taem blong talem store blong olgeta evriwan. !Yumi talem tangkyu tumas we yumi save mekem bilif blong yumi i kam strong moa, from eksampel blong ol man ya we ‘oli mekem ol tabu fasin mo wok blong onagud long God’!—2 Pita 3:11.
3 Long faswan handred yia, Jisas i askem kwestin ya: “?Taem we mi, mi Pikinini blong Man, mi kambak long wol, bambae mi save faenem plante man blong bilif, no bambae i no olsem?” (Luk 18:8) ?I gat ol man mo woman tede tu we oli soem eksampel long saed blong bilif? ?Yumi save faenem ol yangfala mo ol olfala, we oli stap soemaot strong bilif long Jeova olsem ol man blong God we Baebol i tokbaot?
4 Ol Eksampel Blong Bilif Tede: !Yes, ol nambawan eksampel long saed blong bilif oli stap raonabaot long yumi evri ples! I stret blong yumi folem fasin blong bilif blong ol elda we oli lidim yumi. (Hib. 13:7) Be i no olgeta ya nomo we oli givim eksampel long saed blong bilif. Long ol kongregesen, i gat ol gudfala brata mo sista we oli bin holemstrong long Jeova longtaem finis, mo oli bin winim plante bigfala traem tu.
5 Yumi laekem tumas ol gudfala sista blong yumi, we oli bin stanap strong plante yia, tru long ol hadtaem we oli bin kasem from ol hasban blong olgeta we oli agensem trutok. Ol papa no mama we oli wan nomo blong lukaot long pikinini blong olgeta, oli hadwok taem oli mas trenem ol pikinini ya olgeta nomo. I gat ol olfala wido we oli neva mestem wan jans blong joen long ol wok blong kongregesen, nating se oli no gat wan memba blong famle blong halpem olgeta. (Skelem wetem Luk 2:37.) Yumi sapraes long bigfala bilif blong olgeta we oli stanap strong tru long ol trabol long saed blong helt. Plante oli gohed blong fasgud long Jeova, nating se i gat sam samting i blokem olgeta blong oli no save kasem ol spesel wok long saed blong speret. I gat ol yangfala Wetnes we oli no fraet blong soemaot bilif taem oli kasem traem long skul. Fasin blong yumi blong fasgud long Jeova i kam strong moa taem yumi luk ol gudfala paenia we oli gohed plante yia, nating se oli fesem ol trabol we yumi no save long hem. !Olsem Pol, yumi no gat taem blong talem olgeta store blong wok blong Kingdom mo bilif blong ol brata mo sista ya blong yumi!
6 Eksampel we olgeta ya oli givim long saed blong bilif, i mekem yumi haremgud mo i leftemap tingting blong yumi. (1 Tes. 3:7, 8) Yumi mas gat sem kaen bilif from we “olgeta we oli soem bilif, oli mekem [Jeova] i haremgud tumas.”—Prov. 12:22.