?Yu Yu Stap Tijim Trutok Blong God Long Stret Fasin Nomo?
1 Jisas Kraes, hem i beswan tija we i bin laef long wol ya. Hem i toktok long fasin we i kasem hat blong ol man, i pulum filing blong olgeta, mo i pusum olgeta blong mekem ol gudfala wok. (Mat. 7:28, 29) Oltaem tijing blong hem i stanap long Tok blong God. (Luk 24:44, 45) Jisas i presem Jeova God from we God nao i givim ol save mo toktok we Jisas i tijim ol narafala long hem. (Jon 7:16) Jisas i givim wan nambawan eksampel long ol man blong hem, olsem wanem blong tijim trutok blong God long stret fasin nomo.—2 Tim. 2:15.
2 Aposol Pol tu i soem wan gudfala eksampel long saed blong stret fasin blong tijim Tok blong God long ol narafala. Hem i no jes ridim ol vas long olgeta. Hem i eksplenem, mo i mekem ol man oli tingtinggud long samting we hem i ridim. Hem i givim pruf we i stanap long Tok blong God, se Jisas hem i Kraes. (Ol Wok 17:2-4) Long sem fasin, disaepol ya Apolos we hem i wan gudfala man blong toktok, “hem i savegud tu ol tok blong Baebol.” Mo hem i yusum Baebol long stret fasin taem hem i stap talemaot trutok wetem paoa.—Ol Wok 18:24, 28.
3 Kam Wan Tija Blong Tok Blong God: Ol man blong talemaot Kingdom tede, oli karem nambawan frut long wok blong tijim ol man we hat blong olgeta i stret, taem oli ridim mo mekem olgeta oli tingtinggud long ol tok blong Baebol. Wan brata i bin yusum Esikel 18:4 mo sam narafala vas olsem, blong toktok wetem wan pasta mo tri man blong jyos blong hem, long saed blong fyuja blong ol rabis man mo ol stret man. From samting ya, hem i statem Baebol stadi wetem sam memba blong jyos, mo biaen, wan long olgeta i bilif long trutok. Mo bakegen, wan woman we hem i intres long trutok, man blong hem i agensem trutok. Nao man ya i askem long wan sista blong eksplenem from wanem ol Wetnes blong Jeova oli no mekem lafet blong Krismas mo betde. Taem sista i ridim ansa blong Baebol stret long Reasoning buk, man ya i agri. Woman blong hem i glad tumas long samting ya, nao hem i talem se: “Bambae mitufala i kam long ol miting blong yufala.” !Mo hasban i agri!
4 Yusum Ol Samting We i Stap Blong Halpem Yu: Kingdom Wok Blong Yumi mo Miting blong Kingdom Wok oli givim ol gudfala advaes, blong givhan long yumi blong tijim trutok blong God long stret fasin nomo. Plante pablisa oli talem tangkyu from ol defren rod blong storeyan we Kingdom Wok Blong Yumi i soem, mo from ol pleplei long ol miting. Ol samting ya oli stretgud long taem blong yumi, mo oli wokgud. Reasoning From the Scriptures i gat plante tingting blong soem stret fasin blong eksplenem ol samting. Hem i gat bitim 70 stampa poen we oli kamaot long Tok blong God. Buk ya Save Blong Lidim Yu Long Laef We i No Save Finis i yusum ol sot klia tok blong eksplenem ol stampa tijing blong Baebol. Ol man we oli intres, oli nidim blong kasem save long olgeta ya. Stadi 24 mo 25 blong Theocratic Ministry School Guidebook i soem olsem wanem olgeta we oli gat gudhan blong tijim narafala, oli lidim ol man oli go long ol vas, mo olsem wanem oli ridim mo joenem ol vas ya wetem storeyan blong olgeta. Yumi mas yusumgud ol save ya, we i stap blong givhan long yumi.
5 Taem yumi yusum Tok blong God long stret fasin nomo, bambae yumi faenem se “i wan samting we i laef, mo we i stap wok . . . i save jajem olgeta tingting blong man, mo ol samting we man i wantem long tingting blong hem.” Hem i save mekem samting ya long ol man we yumi prij long olgeta. (Hib. 4:12) !Frut we yumi kasem taem yumi yusumgud Tok blong God, bambae i mekem tingting blong yumi i strong moa blong talemaot trutok!—Wok 4:31.