Ansa Long Wan Kwestin
◼ ?From wanem yumi mas putum ripot blong wok blong prij kwiktaem long en blong manis?
Yumi evriwan i glad taem yumi harem nyus blong ol gudfala samting we oli stap kamaot long saed blong wok blong talemaot mesej blong Kingdom. (Ridim Proveb 25:25.) Ol Wok 2:41 i talem se afta we Pita i givim wan tok we i wekemap tingting blong ol man long dei blong Pentekos, “samting olsem tri taosen man oli joen long kampani blong olgeta.” Smoltaem biaen, namba ya i kam antap “kasem faef taosen man.” (Wok 4:4) !Tingbaot glad blong ol Kristin long faswan handred yia taem oli harem ol ripot ya! Yumi gat semkaen filing taem yumi harem ol gudfala ripot tede. Yumi glad tumas blong kasem nyus se wok blong ol brata blong yumi blong talemaot gud nyus long olgeta ples blong wol i stap karem gudfala frut.
From we i nidim taem mo hadwok blong ademap ol ripot oltaem, i impoten we olgeta pablisa blong Kingdom evriwan oli traem givhan blong mekem plan ya i rongud. ?Yu yu givim ripot blong yu kwiktaem evri manis?
Ol ripot we oli soem se namba blong ol man we oli bilif long trutok i stap kam antap, oli karem bigfala glad i kam long yumi. Mo tu, ol ripot oli givhan long Sosaeti blong luksave olsem wanem wok i stap gohed long olgeta ples blong wol. Oli mas mekem disisen long saed blong ol ples we oli nidim moa help, mo wanem buk mo hamas buk oli mas prentem. Ol elda long kongregesen oli yusum ol ripot blong wok blong prij blong faenemaot long wanem rod kongregesen i save kamgud moa. Ol gudfala ripot oli leftemap tingting, oli pusum yumi evriwan blong luklukgud long wok blong prij blong yumi, blong faenemaot olsem wanem yumi save kamgud moa.
Olgeta pablisa wanwan oli mas luksave wok we oli gat blong givim ripot kwiktaem long en blong evri manis. I stret we ol brata we oli lukaot long ol Buk Stadi long kongregesen, oli mekem ol pablisa oli tingbaot wok ya blong olgeta, from we ol brata ya oli rere oltaem tu blong givhan long ol pablisa we oli faenem i hadwok blong joen long wok blong prij evri manis. Ol brata ya oli save pulum tingting blong grup long saed blong ol ripot, long laswan buk stadi long manis no long wan narafala taem we i stret. Sipos oli no gat jans blong givim ol ripot long Haos Kingdom, brata we i lukaot long Buk Stadi i save karem ol ripot mo givim long sekretari, bifo we sekretari i ademap ripot blong kongregesen blong sanem i go long Sosaeti long en blong manis.
Sipos yumi lukaotgud long wok ya blong putum ripot blong yumi kwiktaem long en blong manis, yumi stap givhan long ol brata we oli lukaot long yumi long saed blong speret, blong mekem se wok blong olgeta i no hevi tumas.