Trufala Wosip i Kam Bigwan Moa Long Is Yurop
1 Ol faswan Kristin oli wok strong blong talemaot Kingdom. Oli glad taem oli luk se, long ol kongregesen, ‘evri dei, namba blong olgeta i stap kam antap moa.’ (Wok 16:5) From we oli soem strong tingting long wok blong prij, trufala wosip i kasem ol ples olsem Esia, Afrika, mo Yurop. Taswe, plante moa man oli stat blong bilif.
2 Long taem blong en, trufala wosip i stap kam bigwan moa, antap moa long ol kantri blong Is Yurop. Long ol kantri we gavman i bin putum tabu long wok blong prij kam kasem ol yia 1990, naoia wok blong prij i karem plante frut long ol ples ya. 1999 Yearbook i soem tu se long ol kantri ya, hemia Rasia mo Yukren, tufala i gat bitim 100,000 pablisa we oli joen long wok blong prij. !Stat long 1991, i gat bitim 220,000 man we oli givim laef blong olgeta long Jeova mo tekem baptaes long ol 15 teritori blong kantri we bifo oli kolem Soviet Yunion! Wok ya i kam gru bigwan long smoltaem nomo. From samting ya i nidim blong bildim plante niufala Haos Kingdom mo Haos Asembli, mo tu, i gat sam betel we oli mas mekem oli kam bigwan moa.
3 Olsem oli talemaot long Kingdom Wok blong Maj 1997 (Engglis mo Franis), naoia Sosaeti i yusum wan haf blong “Society Kingdom Hall Fund,” blong halpem ol kongregesen long ol kantri we oli gat bigfala nid blong wokem ol niufala Haos Kingdom. Hemia ol kantri we oli no rij mo we oli gat problem long ekonomi. Bitwin Maj 1996 mo Oktoba 1998, Sosaeti i agri blong bildim ol 359 Haos Kingdom we ol branj ofis long 11 kantri blong Is Yurop oli askem. Oli yusum ol presen mane blong pem graon mo ol samting we i nidim blong bildim ol niufala Haos Kingdom. Mo tu, mane ya i halpem ol kongregesen blong fiksimap ol Haos Kingdom we i stap finis. Ol pija we yu luk long atikol ya, oli soem long yumi olsem wanem mane we ol brata long Yunaeted Stet mo sam narafala kantri bakegen, oli givim long “Society Kingdom Hall Fund,” i givhan long ol brata blong yumi long Is Yurop.
4 Long 1998, namba blong ol pablisa long Bulgaria i go antap long 12 pesen. Ol brata long kantri ya oli glad tumas blong dediketem faswan Haos Kingdom blong olgeta, long Epril 1998. Kroasia i glad from we namba blong ol pablisa i go antap long 4 pesen. Naoia ol brata oli stap bildim moa Haos Kingdom blong mekem se trufala wosip i go moa. Long Hangari, 144 kongregesen oli stap yusum 80 Haos Kingdom. Samting ya i minim se, long olgeta 235 kongregesen long kantri ya, 61 pesen oli gat prapa ples blong wosip blong olgeta. Long Masedonia, program blong bildim ol Haos Kingdom, i mekem se oli stanemap tu niufala Haos Kingdom. Naoia oli stap bildim sam narafala Haos Kingdom bakegen. Long hot taem blong 1999, oli bildim wan bigfala haos we oli seraot blong mekem tu Haos Kingdom long bigfala taon blong Skopje. Sikis kongregesen oli save yusum haos ya blong mekem miting long hem.
5 !Las yia long Rasia, samwe long bitim 260 man oli tekem baptaes evri wik! Rasia i mekem sem mak olsem ol narafala kantri taem hem i stanemap 12 “Regional Building Commitees” we ol wok olbaot long bigfala teritori blong hem. Ol komiti ya oli givhan blong bildim ol niufala Haos Kingdom. Long not blong St. Petersburg, wok i stap gohed blong bildim faswan Haos Asembli long kantri ya. Haos Asembli ya bambae i gat 1,600 jea long hem. Long haos ya bambae i gat faef Haos Kingdom we wanwan long olgeta oli gat 200 jea. Long Yukren, ol brata oli bildim finis 84 Haos Kingdom mo oli stap bildim 80 moa, blong givim kakae long saed blong spirit long ol brata blong yumi mo long ol niuwan.
6 ?Hat blong yu i glad blong luk se wok blong prij i kam bigwan moa long Is Yurop? Nomata wanem ples we yumi stap long hem, taem yumi luk se trufala wosip i stap kam bigwan moa, samting ya i mekem yumi tingbaot se God i stap mekem i sem mak nomo long olgeta man. Yes, from we God i gat longfala tingting, wan “bigfala kampani” bambae i save kasem sef. (Rev. 7:9, NW; 2 Pita 3:9) !Yumi gat jans blong givhan smol long ol narafala blong oli save gru long saed blong spirit, nating se oli stap long ol kantri farawe! Ol Proveb 28:27 i promes long yumi se “sipos yu stap givhan long ol puaman, bambae yu no save sot long wan samting.” Yumi rere blong givim presen mane blong sapotem wok ya blong bildim ol Haos Kingdom mo Haos Asembli blong mekem se “i stret long olgeta man.” Long rod ya yumi kasem glad we i kamaot from fasin ya blong givim samting i go long narafala, mo yumi glad from we trufala wosip i kam bigwan moa long ful wol.—2 Kor. 8:14, 15; Wok 20:35.