‘Yu Mas Strong Blong Talemaot Tok Blong God’

¹ Sipos yu kasem wan samting we oli raetem tok ya “IMPOTEN” long hem, ?bambae yu tingting wanem long samting ya? Eni samting we oli raetem tok ya “impoten” long hem i minim se man i mas “lukluk long samting ya kwiktaem.” Taswe i gat gudfala risen we aposol Pol i givim advaes long ol Kristin se oli mas ‘strong blong talemaot tok blong God.’ (2 Tim. 4:2) ?Yu yu lukluk wok ya olsem wan samting we i impoten blong yu mekem?

² Ating Pol i harem ripot se sam long ol brata blong hem oli gat fasin ya blong stap ‘les blong mekem wok blong’ ol Kristin. (Rom 12:11) From samting ya, oli no kasem plante gudfala frut long wok blong olgeta. Mo tu, oli no kasem glad we i kamaot long fasin ya blong halpem narafala.

³ Tingting Blong Jisas Long Saed Blong Wok Blong Prij: !Jisas i rili glad tumas blong mekem wok blong prij! Hem i talem se: “Kakae blong mi, i blong mi mekem ol samting we hem i wantem blong mi mi mekem, mo blong finisim ol wok we hem i givim long mi.” Eksampel blong Jisas i givim strong tingting long ol disaepol blong hem, mo hem i leftemap tingting blong olgeta taem hem i talem long olgeta se ‘naoia i taem blong go tekem kakae long garen.’ (Jon 4:​34, 35) Jisas i mekem minista wok blong hem wetem tingting ya se i taem blong hareap blong mekem ol impoten wok. Hem i soemaot tingting ya taem hem i talem long ol disaepol blong hem se: “Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Mat. 9:​38) Jisas i luksave se i wok blong hem blong prij, mo hem i gat strong tingting blong no letem wan samting i blokem hem long wok ya.

⁴ ?Olsem Wanem Long Yumi? Tede i taem blong hareap moa blong mekem impoten wok ya blong prij, i bitim bifo. Long plante ples blong wol, ol kakae oli rere finis long garen, oli wet nomo blong man i pikimap. Long ol narafala kantri we wok ya blong givim witnes i gohed blong plante yia finis, be plante taosen man yet oli stap baptaes evri yia. Naoia we en blong wol ya i stap kam klosap moa, “ol wok ya blong Masta blong yumi” oli kam plante tumas. (1 Kor. 15:58) I bitim eni narafala taem bifo, i impoten we yumi givim ful paoa blong yumi blong joen fulwan long wok ya blong serem mesej blong Kingdom wetem ol narafala.

⁵ I gud yumi joen fulwan long wok ya blong kasem ol man wetem gud nius, long ol haos wanwan mo long eni ples we yumi faenem ol man long hem. Taem yumi traehad fulwan blong joen long wok blong prij, yumi soemaot klia se yumi putum Kingdom long faswan ples long laef blong yumi. (Mat. 6:​33) Taem yumi gohed oltaem blong talemaot tok blong God wetem tingting ya se impoten blong hareap long wok ya, bambae yumi save kasem glad we i bigwan olgeta.