Stap “Wekap” Oltaem
1 Afta we Jisas i tokbaot ol bigfala saen we bambae oli makem ol las dei blong wol ya, hem i talem long ol disaepol blong hem se oli mas “wekap” oltaem. (Mak 13:33, NW ) ?From wanem ol Kristin oli mas wekap oltaem? From we yumi stap long wan taem we laef blong man i stap long bigfala denja moa i winim olgeta taem bifo. Yumi no gat taem blong kam taed mo slip long saed blong spirit. Sipos yumi mekem olsem, bambae yumi no moa tinghevi long wok ya we Jeova i givim long yumi blong mekem long taem ya blong en. ?Wanem wok ya?
2 Jeova i yusum ol man blong hem blong talemaot gud nius blong Kingdom blong hem long olgeta ples long wol. Kingdom ya nomo hem i hop blong olgeta man. Taem yumi wok klosap long ogenaesesen blong God, samting ya i makemaot yumi olsem ol trufala Kristin we oli luksave se oli stap long wan taem we i impoten tumas. Mo oli luksave tu se i impoten blong halpem ol narafala man blong harem “ol tok blong laef ya we i no save finis.” (Jon 6:68) Taem yumi joen fulwan long impoten wok ya, yumi pruvum se yumi stap wekap long saed blong spirit.
3 Yumi Wantem Prij: From we yumi Witnes blong Jeova, yumi mas gat stret tingting long saed blong wok blong prij. Lav blong yumi long God mo long ol man we oli stap raonabaot yumi, i pusum yumi blong joen long wok blong prij. (1 Kor. 9:16, 17) Long rod ya, bambae yumi sevem yumi wan, wetem olgeta tu we oli lesin long yumi. (1 Tim. 4:16) Yumi mas gat strong tingting blong joen oltaem mo spenem plante aoa olsem we yumi naf blong mekem, long wok blong talemaot nambawan gavman ya we bambae i rulum ol man—!hemia Kingdom blong God!
4 I gat wan impoten samting we i mekem yumi luksave se wok blong prij i impoten. Taem bigfala trabol i stat, bambae yumi stap bisi yet long wok ya. From we yumi no save stret dei no taem blong samting ya, yumi mas wekap mo rere oltaem. Yumi nidim blong prea mo dipen long Jeova. (Efes. 6:18) Wok blong prij i stap gohed yet, kasem plante moa ples. Be i no longtaem, bigfala wok ya blong givim witnes, bambae i kasem ful mak blong hem.
5 Gohed strong blong folem rul ya blong Jisas blong stap “wekap” oltaem. I impoten tumas blong mekem samting ya long taem blong yumi i bitim bifo. I gud blong wok wetem wan tingting se yumi mas hareap. Tede mo evri dei, yumi mas wekap gud long saed blong spirit, mo stap bisi oltaem long wok blong Jeova. Yes, yumi mas “wekap, we hed blong yumi i klia gud.”—1 Tes. 5:6.